೯. ಲೋಣಕಪಲ್ಲಸುತ್ತವಣ್ಣನಾ

೧೦೧. ನವಮೇ ಯಥಾ ಯಥಾಯನ್ತಿ ಯಥಾ ಯಥಾ ಅಯಂ. ತಥಾ ತಥಾ ತನ್ತಿ ತಥಾ ತಥಾ ತಂ ಕಮ್ಮಂ. ಇದಂ ವುತ್ತಂ ಹೋತಿ – ಯೋ ಏವಂ ವದೇಯ್ಯ – ‘‘ಯಥಾ ಯಥಾ ಕಮ್ಮಂ ಕರೋತಿ, ತಥಾ ತಥಾಸ್ಸ ವಿಪಾಕಂ ಪಟಿಸಂವೇದಿಯತೇವ. ನ ಹಿ ಸಕ್ಕಾ ಕತಸ್ಸ ಕಮ್ಮಸ್ಸ ವಿಪಾಕಂ ಪಟಿಸೇಧೇತುಂ. ತಸ್ಮಾ ಯತ್ತಕಂ ಕಮ್ಮಂ ಕರೋತಿ, ತತ್ತಕಸ್ಸ ವಿಪಾಕಂ ಪಟಿಸಂವೇದಿಯತೇವಾ’’ತಿ. ಏವಂ ಸನ್ತನ್ತಿ ಏವಂ ಸನ್ತೇ. ಬ್ರಹ್ಮಚರಿಯವಾಸೋ ನ ಹೋತೀತಿ ಯಂ ಮಗ್ಗಭಾವನತೋ ಪುಬ್ಬೇ ಉಪಪಜ್ಜವೇದನೀಯಂ ಕಮ್ಮಂ ಕತಂ, ತಸ್ಸ ಅವಸ್ಸಂ ಪಟಿಸಂವೇದನೀಯತ್ತಾ ಬ್ರಹ್ಮಚರಿಯಂ ವುತ್ಥಮ್ಪಿ ಅವುತ್ಥಮೇವ ಹೋತಿ. ಓಕಾಸೋ ನ ಪಞ್ಞಾಯತಿ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾತಿ ಯಸ್ಮಾ ಚ ಏವಂ ಸನ್ತೇ ತೇನ ಕಮ್ಮಾಯೂಹನಞ್ಚೇವ ವಿಪಾಕಾನುಭವನಾ ಚ ಹೋತಿ, ತಸ್ಮಾ ಹೇತುನಾ ನಯೇನ ವಟ್ಟದುಕ್ಖಸ್ಸ ಅನ್ತಕಿರಿಯಾಯ ಓಕಾಸೋ ನ ಪಞ್ಞಾಯತಿ ನಾಮ.

ಯಥಾ ಯಥಾ ವೇದನೀಯನ್ತಿ ಯೇನ ಯೇನಾಕಾರೇನ ವೇದಿತಬ್ಬಂ. ತಥಾ ತಥಾಸ್ಸ ವಿಪಾಕಂ ಪಟಿಸಂವೇದಿಯತೀತಿ ತೇನ ತೇನಾಕಾರೇನ ಅಸ್ಸ ವಿಪಾಕಂ ಪಚ್ಚನುಭೋತಿ. ಇದಂ ವುತ್ತಂ ಹೋತಿ – ಯದೇತಂ ಸತ್ತಸು ಜವನೇಸು ಪಠಮಜವನಕಮ್ಮಂ ಸತಿ ಪಚ್ಚಯೇ ವಿಪಾಕವಾರಂ ಲಭನ್ತಮೇವ ದಿಟ್ಠಧಮ್ಮವೇದನೀಯಂ ಹೋತಿ, ಅಸತಿ ಅಹೋಸಿಕಮ್ಮಂ ನಾಮ. ಯಞ್ಚ ಸತ್ತಮಜವನಕಮ್ಮಂ ಸತಿ ಪಚ್ಚಯೇ ಉಪಪಜ್ಜವೇದನೀಯಂ ಹೋತಿ, ಅಸತಿ ಅಹೋಸಿಕಮ್ಮಂ ನಾಮ. ಯಞ್ಚ ಮಜ್ಝೇ ಪಞ್ಚಜವನಕಮ್ಮಂ ಯಾವ ಸಂಸಾರಪ್ಪವತ್ತಿ, ತಾವ ಅಪರಪರಿಯಾಯವೇದನೀಯಂ ನಾಮ ಹೋತಿ. ಏತೇಸು ಆಕಾರೇಸು ಯೇನ ಯೇನಾಕಾರೇನ ವೇದಿತಬ್ಬಂ ಕಮ್ಮಂ ಅಯಂ ಪುರಿಸೋ ಕರೋತಿ, ತೇನ ತೇನೇವಸ್ಸ ವಿಪಾಕಂ ಪಟಿಸಂವೇದಿಯತಿ ನಾಮ. ಅಟ್ಠಕಥಾಯಞ್ಹಿ ಲದ್ಧವಿಪಾಕವಾರಮೇವ ಕಮ್ಮಂ ಯಥಾವೇದನೀಯಂ ಕಮ್ಮಂ ನಾಮಾತಿ ವುತ್ತಂ. ಏವಂ ಸನ್ತಂ, ಭಿಕ್ಖವೇ, ಬ್ರಹ್ಮಚರಿಯವಾಸೋ ಹೋತೀತಿ ಕಮ್ಮಕ್ಖಯಕರಸ್ಸ ಬ್ರಹ್ಮಚರಿಯಸ್ಸ ಖೇಪೇತಬ್ಬಕಮ್ಮಸಮ್ಭವತೋ ವಾಸೋ ನಾಮ ಹೋತಿ, ವುತ್ಥಂ ಸುವುತ್ಥಮೇವ ಹೋತೀತಿ ಅತ್ಥೋ. ಓಕಾಸೋ ಪಞ್ಞಾಯತಿ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾತಿ ಯಸ್ಮಾ ಏವಂ ಸನ್ತೇ ತೇನ ತೇನ ಮಗ್ಗೇನ ಅಭಿಸಙ್ಖಾರವಿಞ್ಞಾಣಸ್ಸ ನಿರೋಧೇನ ತೇಸು ತೇಸು ಭವೇಸು ಆಯತಿಂ ವಟ್ಟದುಕ್ಖಂ ನ ಉಪ್ಪಜ್ಜತಿ, ತಸ್ಮಾ ಓಕಾಸೋ ಪಞ್ಞಾಯತಿ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯ.

ಇದಾನಿ ತಂ ಯಥಾವೇದನೀಯಕಮ್ಮಸಭಾವಂ ದಸ್ಸೇನ್ತೋ ಇಧ, ಭಿಕ್ಖವೇ, ಏಕಚ್ಚಸ್ಸಾತಿಆದಿಮಾಹ. ತತ್ಥ ಅಪ್ಪಮತ್ತಕನ್ತಿ ಪರಿತ್ತಂ ಥೋಕಂ ಮನ್ದಂ ಲಾಮಕಂ. ತಾದಿಸಂಯೇವಾತಿ ತಂಸರಿಕ್ಖಕಮೇವ. ದಿಟ್ಠಧಮ್ಮವೇದನೀಯನ್ತಿ ತಸ್ಮಿಂ ಕಮ್ಮೇಯೇವ ದಿಟ್ಠಧಮ್ಮೇ ವಿಪಚ್ಚಿತಬ್ಬಂ ವಿಪಾಕವಾರಂ ಲಭನ್ತಂ ದಿಟ್ಠಧಮ್ಮವೇದನೀಯಂ ಹೋತಿ. ನಾಣುಪಿ ಖಾಯತೀತಿ ದುತಿಯೇ ಅತ್ತಭಾವೇ ಅಣುಪಿ ನ ಖಾಯತಿ, ಅಣುಮತ್ತಮ್ಪಿ ದುತಿಯೇ ಅತ್ತಭಾವೇ ವಿಪಾಕಂ ನ ದೇತೀತಿ ಅತ್ಥೋ. ಬಹುದೇವಾತಿ ಬಹುಕಂ ಪನ ವಿಪಾಕಂ ಕಿಮೇವ ದಸ್ಸತೀತಿ ಅಧಿಪ್ಪಾಯೋ. ಅಭಾವಿತಕಾಯೋತಿಆದೀಹಿ ಕಾಯಭಾವನಾರಹಿತೋ ವಟ್ಟಗಾಮೀ ಪುಥುಜ್ಜನೋ ದಸ್ಸಿತೋ. ಪರಿತ್ತೋತಿ ಪರಿತ್ತಗುಣೋ. ಅಪ್ಪಾತುಮೋತಿ ಆತುಮಾ ವುಚ್ಚತಿ ಅತ್ತಭಾವೋ, ತಸ್ಮಿಂ ಮಹನ್ತೇಪಿ ಗುಣಪರಿತ್ತತಾಯ ಅಪ್ಪಾತುಮೋಯೇವ. ಅಪ್ಪದುಕ್ಖವಿಹಾರೀತಿ ಅಪ್ಪಕೇನಪಿ ಪಾಪೇನ ದುಕ್ಖವಿಹಾರೀ. ಭಾವಿತಕಾಯೋತಿಆದೀಹಿ ಖೀಣಾಸವೋ ದಸ್ಸಿತೋ. ಸೋ ಹಿ ಕಾಯಾನುಪಸ್ಸನಾಸಙ್ಖಾತಾಯ ಕಾಯಭಾವನಾಯ ಭಾವಿತಕಾಯೋ ನಾಮ. ಕಾಯಸ್ಸ ವಾ ವಡ್ಢಿತತ್ತಾ ಭಾವಿತಕಾಯೋ. ಭಾವಿತಸೀಲೋತಿ ವಡ್ಢಿತಸೀಲೋ. ಸೇಸಪದದ್ವಯೇಪಿ ಏಸೇವ ನಯೋ. ಪಞ್ಚದ್ವಾರಭಾವನಾಯ ವಾ ಭಾವಿತಕಾಯೋ. ಏತೇನ ಇನ್ದ್ರಿಯಸಂವರಸೀಲಂ ವುತ್ತಂ, ಭಾವಿತಸೀಲೋತಿ ಇಮಿನಾ ಸೇಸಾನಿ ತೀಣಿ ಸೀಲಾನಿ. ಅಪರಿತ್ತೋತಿ ನ ಪರಿತ್ತಗುಣೋ. ಮಹತ್ತೋತಿ ಅತ್ತಭಾವೇ ಪರಿತ್ತೇಪಿ ಗುಣಮಹನ್ತತಾಯ ಮಹತ್ತೋ. ಅಪ್ಪಮಾಣವಿಹಾರೀತಿ ಖೀಣಾಸವಸ್ಸೇತಂ ನಾಮಮೇವ. ಸೋ ಹಿ ಪಮಾಣಕರಾನಂ ರಾಗಾದೀನಂ ಅಭಾವೇನ ಅಪ್ಪಮಾಣವಿಹಾರೀ ನಾಮ.

ಪರಿತ್ತೇತಿ ಖುದ್ದಕೇ. ಉದಕಮಲ್ಲಕೇತಿ ಉದಕಸರಾವೇ. ಓರಬ್ಭಿಕೋತಿ ಉರಬ್ಭಸಾಮಿಕೋ. ಉರಬ್ಭಘಾತಕೋತಿ ಸೂನಕಾರೋ. ಜಾಪೇತುಂ ವಾತಿ ಧನಜಾನಿಯಾ ಜಾಪೇತುಂ. ಝಾಪೇತುನ್ತಿಪಿ ಪಾಠೋ, ಅಯಮೇವತ್ಥೋ. ಯಥಾಪಚ್ಚಯಂ ವಾ ಕಾತುನ್ತಿ ಯಥಾ ಇಚ್ಛತಿ, ತಥಾ ಕಾತುಂ. ಉರಬ್ಭಧನನ್ತಿ ಏಳಕಅಗ್ಘನಕಮೂಲಂ. ಸೋ ಪನಸ್ಸ ಸಚೇ ಇಚ್ಛತಿ, ದೇತಿ. ನೋ ಚೇ ಇಚ್ಛತಿ, ಗೀವಾಯಂ ಗಹೇತ್ವಾ ನಿಕ್ಕಡ್ಢಾಪೇತಿ. ಸೇಸಂ ವುತ್ತನಯೇನೇವ ವೇದಿತಬ್ಬಂ. ಇಮಸ್ಮಿಂ ಪನ ಸುತ್ತೇ ವಟ್ಟವಿವಟ್ಟಂ ಕಥಿತನ್ತಿ.