(೧೦) ೫. ಲೋಣಕಪಲ್ಲವಗ್ಗೋ

೧. ಅಚ್ಚಾಯಿಕಸುತ್ತವಣ್ಣನಾ

೯೩. ಪಞ್ಚಮಸ್ಸ ಪಠಮೇ ಅಚ್ಚಾಯಿಕಾನೀತಿ ಅತಿಪಾತಿಕಾನಿ. ಕರಣೀಯಾನೀತಿ ಅವಸ್ಸಕಿಚ್ಚಾನಿ. ಯಞ್ಹಿ ನ ಅವಸ್ಸಂ ಕಾತಬ್ಬಂ, ತಂ ಕಿಚ್ಚನ್ತಿ ವುಚ್ಚತಿ. ಅವಸ್ಸಂ ಕಾತಬ್ಬಂ ಕರಣೀಯಂ ನಾಮ. ಸೀಘಂ ಸೀಘನ್ತಿ ವೇಗೇನ ವೇಗೇನ. ತಸ್ಸ ಖೋ ತನ್ತಿ ಏತ್ಥ ತನ್ತಿ ನಿಪಾತಮತ್ತಂ. ನತ್ಥಿ ಸಾ ಇದ್ಧಿ ವಾ ಆನುಭಾವೋ ವಾತಿ ಸಾ ವಾ ಇದ್ಧಿ ಸೋ ವಾ ಆನುಭಾವೋ ನತ್ಥಿ. ಉತ್ತರಸ್ವೇತಿ ತತಿಯದಿವಸೇ. ಉತುಪರಿಣಾಮಿನೀತಿ ಲದ್ಧಉತುಪರಿಣಾಮಾನಿ ಹುತ್ವಾ. ಜಾಯನ್ತಿಪೀತಿ ತತಿಯದಿವಸೇ ನಿಕ್ಖನ್ತಸೇತಙ್ಕುರಾನಿ ಹೋನ್ತಿ, ಸತ್ತಾಹೇ ಪತ್ತೇ ನೀಲಙ್ಕುರಾನಿ ಹೋನ್ತಿ. ಗಬ್ಭೀನಿಪಿ ಹೋನ್ತೀತಿ ದಿಯಡ್ಢಮಾಸಂ ಪತ್ವಾ ಗಹಿತಗಬ್ಭಾನಿ ಹೋನ್ತಿ. ಪಚ್ಚನ್ತಿಪೀತಿ ತಯೋ ಮಾಸೇ ಪತ್ವಾ ಪಚ್ಚನ್ತಿ. ಇದಾನಿ ಯಸ್ಮಾ ಬುದ್ಧಾನಂ ಗಹಪತಿಕೇನ ವಾ ಸಸ್ಸೇಹಿ ವಾ ಅತ್ಥೋ ನತ್ಥಿ, ಸಾಸನೇ ಪನ ತಪ್ಪಟಿರೂಪಕಂ ಪುಗ್ಗಲಂ ವಾ ಅತ್ಥಂ ವಾ ದಸ್ಸೇತುಂ ತಂ ತಂ ಓಪಮ್ಮಂ ಆಹರನ್ತಿ. ತಸ್ಮಾ ಯಮತ್ಥಂ ದಸ್ಸೇತುಕಾಮೇನ ಏತಂ ಆಭತಂ, ತಂ ದಸ್ಸೇನ್ತೋ ಏವಮೇವ ಖೋತಿಆದಿಮಾಹ. ತಂ ಅತ್ಥತೋ ಉತ್ತಾನಮೇವ. ಸಿಕ್ಖಾ ಪನ ಇಧಾಪಿ ಮಿಸ್ಸಿಕಾ ಏವ ಕಥಿತಾ.

೨. ಪವಿವೇಕಸುತ್ತವಣ್ಣನಾ

೯೪. ದುತಿಯೇ ಚೀವರಪವಿವೇಕನ್ತಿ ಚೀವರಂ ನಿಸ್ಸಾಯ ಉಪ್ಪಜ್ಜನಕಕಿಲೇಸೇಹಿ ವಿವಿತ್ತಭಾವಂ. ಸೇಸದ್ವಯೇಪಿ ಏಸೇವ ನಯೋ. ಸಾಣಾನೀತಿ ಸಾಣವಾಕಚೇಲಾನಿ. ಮಸಾಣಾನೀತಿ ಮಿಸ್ಸಕಚೇಲಾನಿ. ಛವದುಸ್ಸಾನೀತಿ ಮತಸರೀರತೋ ಛಡ್ಡಿತವತ್ಥಾನಿ, ಏರಕತಿಣಾದೀನಿ ವಾ ಗನ್ಥೇತ್ವಾ ಕತನಿವಾಸನಾನಿ. ಪಂಸುಕೂಲಾನೀತಿ ಪಥವಿಯಂ ಛಡ್ಡಿತನನ್ತಕಾನಿ. ತಿರೀಟಾನೀತಿ ರುಕ್ಖತಚವತ್ಥಾನಿ. ಅಜಿನಾನೀತಿ ಅಜಿನಮಿಗಚಮ್ಮಾನಿ. ಅಜಿನಕ್ಖಿಪನ್ತಿ ತದೇವ ಮಜ್ಝೇ ಫಾಲಿತಂ, ಸಹಖುರಕನ್ತಿಪಿ ವದನ್ತಿ. ಕುಸಚೀರನ್ತಿ ಕುಸತಿಣಾನಿ ಗನ್ಥೇತ್ವಾ ಕತಚೀರಂ. ವಾಕಚೀರಫಲಕಚೀರೇಸುಪಿ ಏಸೇವ ನಯೋ. ಕೇಸಕಮ್ಬಲನ್ತಿ ಮನುಸ್ಸಕೇಸೇಹಿ ಕತಕಮ್ಬಲಂ. ವಾಲಕಮ್ಬಲನ್ತಿ ಅಸ್ಸವಾಲಾದೀಹಿ ಕತಕಮ್ಬಲಂ. ಉಲೂಕಪಕ್ಖಿಕನ್ತಿ ಉಲೂಕಪತ್ತಾನಿ ಗನ್ಥೇತ್ವಾ ಕತನಿವಾಸನಂ.

ಸಾಕಭಕ್ಖಾತಿ ಅಲ್ಲಸಾಕಭಕ್ಖಾ. ಸಾಮಾಕಭಕ್ಖಾತಿ ಸಾಮಾಕತಣ್ಡುಲಭಕ್ಖಾ. ನೀವಾರಾದೀಸು ನೀವಾರಾ ನಾಮ ಅರಞ್ಞೇ ಸಯಂ ಜಾತವೀಹಿಜಾತಿ. ದದ್ದುಲನ್ತಿ ಚಮ್ಮಕಾರೇಹಿ ಚಮ್ಮಂ ಲಿಖಿತ್ವಾ ಛಡ್ಡಿತಕಸಟಂ. ಹಟಂ ವುಚ್ಚತಿ ಸಿಲೇಸೋಪಿ ಸೇವಾಲೋಪಿ ಕಣಿಕಾರಾದಿರುಕ್ಖನಿಯ್ಯಾಸೋಪಿ. ಕಣನ್ತಿ ಕುಣ್ಡಕಂ. ಆಚಾಮೋತಿ ಭತ್ತಉಕ್ಖಲಿಕಾಯ ಲಗ್ಗೋ ಝಾಮಓದನೋ. ತಂ ಛಡ್ಡಿತಟ್ಠಾನೇ ಗಹೇತ್ವಾ ಖಾದನ್ತಿ, ಓದನಕಞ್ಜಿಯನ್ತಿಪಿ ವದನ್ತಿ. ಪಿಞ್ಞಾಕಾದಯೋ ಪಾಕಟಾವ. ಪವತ್ತಫಲಭೋಜೀತಿ ಪತಿತಫಲಭೋಜೀ. ಭುಸಾಗಾರನ್ತಿ ಖಲಸಾಲಂ.

ಸೀಲವಾತಿ ಚತುಪಾರಿಸುದ್ಧಿಸೀಲೇನ ಸಮನ್ನಾಗತೋ. ದುಸ್ಸೀಲ್ಯಞ್ಚಸ್ಸ ಪಹೀನಂ ಹೋತೀತಿ ಪಞ್ಚ ದುಸ್ಸೀಲ್ಯಾನಿ ಪಹೀನಾನಿ ಹೋನ್ತಿ. ಸಮ್ಮಾದಿಟ್ಠಿಕೋತಿ ಯಾಥಾವದಿಟ್ಠಿಕೋ. ಮಿಚ್ಛಾದಿಟ್ಠೀತಿ ಅಯಾಥಾವದಿಟ್ಠಿ. ಆಸವಾತಿ ಚತ್ತಾರೋ ಆಸವಾ. ಅಗ್ಗಪ್ಪತ್ತೋತಿ ಸೀಲಗ್ಗಪ್ಪತ್ತೋ. ಸಾರಪ್ಪತ್ತೋತಿ ಸೀಲಸಾರಂ ಪತ್ತೋ. ಸುದ್ಧೋತಿ ಪರಿಸುದ್ಧೋ. ಸಾರೇ ಪತಿಟ್ಠಿತೋತಿ ಸೀಲಸಮಾಧಿಪಞ್ಞಾಸಾರೇ ಪತಿಟ್ಠಿತೋ.

ಸೇಯ್ಯಥಾಪೀತಿ ಯಥಾ ನಾಮ. ಸಮ್ಪನ್ನನ್ತಿ ಪರಿಪುಣ್ಣಂ ಪರಿಪಕ್ಕಸಾಲಿಭರಿತಂ. ಸಙ್ಘರಾಪೇಯ್ಯಾತಿ ಸಙ್ಕಡ್ಢಾಪೇಯ್ಯ. ಉಬ್ಬಹಾಪೇಯ್ಯಾತಿ ಖಲಟ್ಠಾನಂ ಆಹರಾಪೇಯ್ಯ. ಭುಸಿಕನ್ತಿ ಭುಸಂ. ಕೋಟ್ಟಾಪೇಯ್ಯಾತಿ ಉದುಕ್ಖಲೇ ಪಕ್ಖಿಪಾಪೇತ್ವಾ ಮುಸಲೇಹಿ ಪಹರಾಪೇಯ್ಯ. ಅಗ್ಗಪ್ಪತ್ತಾನೀತಿ ತಣ್ಡುಲಗ್ಗಂ ಪತ್ತಾನಿ. ಸಾರಪ್ಪತ್ತಾದೀಸುಪಿ ಏಸೇವ ನಯೋ. ಸೇಸಂ ಉತ್ತಾನಮೇವ. ಯಂ ಪನೇತ್ಥ ‘‘ದುಸ್ಸೀಲ್ಯಞ್ಚಸ್ಸ ಪಹೀನಂ ಮಿಚ್ಛಾದಿಟ್ಠಿ ಚಸ್ಸ ಪಹೀನಾ’’ತಿ ವುತ್ತಂ, ತಂ ಸೋತಾಪತ್ತಿಮಗ್ಗೇನ ಪಹೀನಭಾವಂ ಸನ್ಧಾಯ ವುತ್ತನ್ತಿ ವೇದಿತಬ್ಬಂ.

೩. ಸರದಸುತ್ತವಣ್ಣನಾ

೯೫. ತತಿಯೇ ವಿದ್ಧೇತಿ ವಲಾಹಕವಿಗಮೇನ ದೂರೀಭೂತೇ. ದೇವೇತಿ ಆಕಾಸೇ. ಅಭಿವಿಹಚ್ಚಾತಿ ಅಭಿವಿಹನಿತ್ವಾ. ಯತೋತಿ ಯಸ್ಮಿಂ ಕಾಲೇ. ವಿರಜನ್ತಿ ರಾಗರಜಾದಿರಹಿತಂ. ತೇಸಂಯೇವ ಮಲಾನಂ ವಿಗತತ್ತಾ ವೀತಮಲಂ. ಧಮ್ಮಚಕ್ಖುನ್ತಿ ಚತುಸಚ್ಚಧಮ್ಮಪರಿಗ್ಗಾಹಕಂ ಸೋತಾಪತ್ತಿಮಗ್ಗಚಕ್ಖುಂ. ನತ್ಥಿ ತಂ ಸಂಯೋಜನನ್ತಿ ದುವಿಧಮೇವಸ್ಸ ಸಂಯೋಜನಂ ನತ್ಥಿ, ಇತರಮ್ಪಿ ಪನ ಪುನ ಇಮಂ ಲೋಕಂ ಆನೇತುಂ ಅಸಮತ್ಥತಾಯ ನತ್ಥೀತಿ ವುತ್ತಂ. ಇಮಸ್ಮಿಂ ಸುತ್ತೇ ಝಾನಾನಾಗಾಮೀ ನಾಮ ಕಥಿತೋತಿ.

೪. ಪರಿಸಾಸುತ್ತವಣ್ಣನಾ

೯೬. ಚತುತ್ಥೇ ನ ಬಾಹುಲಿಕಾ ಹೋನ್ತೀತಿ ಪಚ್ಚಯಬಾಹುಲ್ಲಿಕಾ ನ ಹೋನ್ತಿ. ನ ಸಾಥಲಿಕಾತಿ ತಿಸ್ಸೋ ಸಿಕ್ಖಾ ಸಿಥಿಲಂ ಕತ್ವಾ ನ ಗಣ್ಹನ್ತಿ. ಓಕ್ಕಮನೇ ನಿಕ್ಖಿತ್ತಧುರಾತಿ ಓಕ್ಕಮನಂ ವುಚ್ಚತಿ ಅವಗಮನಟ್ಠೇನ ಪಞ್ಚ ನೀವರಣಾನಿ, ತೇಸು ನಿಕ್ಖಿತ್ತಧುರಾ. ಪವಿವೇಕೇ ಪುಬ್ಬಙ್ಗಮಾತಿ ಕಾಯಚಿತ್ತಉಪಧಿವಿವೇಕಸಙ್ಖಾತೇ ತಿವಿಧೇಪಿ ವಿವೇಕೇ ಪುಬ್ಬಙ್ಗಮಾ. ವೀರಿಯಂ ಆರಭನ್ತೀತಿ ದುವಿಧಮ್ಪಿ ವೀರಿಯಂ ಪಗ್ಗಣ್ಹನ್ತಿ. ಅಪ್ಪತ್ತಸ್ಸಾತಿ ಝಾನವಿಪಸ್ಸನಾಮಗ್ಗಫಲಸಙ್ಖಾತಸ್ಸ ಅಪ್ಪತ್ತವಿಸೇಸಸ್ಸ. ಸೇಸಪದದ್ವಯೇಪಿ ಏಸೇವ ನಯೋ. ಪಚ್ಛಿಮಾ ಜನತಾತಿ ಸದ್ಧಿವಿಹಾರಿಕಅನ್ತೇವಾಸಿಕಾದಯೋ. ದಿಟ್ಠಾನುಗತಿಂ ಆಪಜ್ಜತೀತಿ ಆಚರಿಯುಪಜ್ಝಾಯೇಹಿ ಕತಂ ಅನುಕರೋತಿ. ಯಂ ತಾಯ ಜನತಾಯ ಆಚರಿಯುಪಜ್ಝಾಯೇಸು ದಿಟ್ಠಂ, ತಸ್ಸ ಅನುಗತಿಂ ಆಪಜ್ಜತಿ ನಾಮ. ಅಯಂ ವುಚ್ಚತಿ, ಭಿಕ್ಖವೇ, ಅಗ್ಗವತೀ ಪರಿಸಾತಿ, ಭಿಕ್ಖವೇ, ಅಯಂ ಪರಿಸಾ ಅಗ್ಗಪುಗ್ಗಲವತೀ ನಾಮ ವುಚ್ಚತಿ.

ಭಣ್ಡನಜಾತಾತಿ ಜಾತಭಣ್ಡನಾ. ಕಲಹಜಾತಾತಿ ಜಾತಕಲಹಾ. ಭಣ್ಡನನ್ತಿ ಚೇತ್ಥ ಕಲಹಸ್ಸ ಪುಬ್ಬಭಾಗೋ, ಹತ್ಥಪರಾಮಾಸಾದಿವಸೇನ ವೀತಿಕ್ಕಮೋ ಕಲಹೋ ನಾಮ. ವಿವಾದಾಪನ್ನಾತಿ ವಿರುದ್ಧವಾದಂ ಆಪನ್ನಾ. ಮುಖಸತ್ತೀಹೀತಿ ಗುಣವಿಜ್ಝನಟ್ಠೇನ ಫರುಸಾ ವಾಚಾ ‘‘ಮುಖಸತ್ತಿಯೋ’’ತಿ ವುಚ್ಚನ್ತಿ, ತಾಹಿ ಮುಖಸತ್ತೀಹಿ. ವಿತುದನ್ತಾ ವಿಹರನ್ತೀತಿ ವಿಜ್ಝನ್ತಾ ವಿಚರನ್ತಿ.

ಸಮಗ್ಗಾತಿ ಸಹಿತಾ. ಸಮ್ಮೋದಮಾನಾತಿ ಸಮಪ್ಪವತ್ತಮೋದಾ. ಖೀರೋದಕೀಭೂತಾತಿ ಖೀರೋದಕಂ ವಿಯ ಭೂತಾ. ಪಿಯಚಕ್ಖೂಹೀತಿ ಉಪಸನ್ತೇಹಿ ಮೇತ್ತಚಕ್ಖೂಹಿ. ಪೀತಿ ಜಾಯತೀತಿ ಪಞ್ಚವಣ್ಣಾ ಪೀತಿ ಉಪ್ಪಜ್ಜತಿ. ಕಾಯೋ ಪಸ್ಸಮ್ಭತೀತಿ ನಾಮಕಾಯೋಪಿ ರೂಪಕಾಯೋಪಿ ವಿಗತದರಥೋ ಹೋತಿ. ಪಸ್ಸದ್ಧಕಾಯೋತಿ ಅಸಾರದ್ಧಕಾಯೋ. ಸುಖಂ ವೇದಿಯತೀತಿ ಕಾಯಿಕಚೇತಸಿಕಸುಖಂ ವೇದಿಯತಿ. ಸಮಾಧಿಯತೀತಿ ಆರಮ್ಮಣೇ ಸಮ್ಮಾ ಠಪೀಯತಿ.

ಥುಲ್ಲಫುಸಿತಕೇತಿ ಮಹಾಫುಸಿತಕೇ. ಪಬ್ಬತಕನ್ದರಪದರಸಾಖಾತಿ ಏತ್ಥ ಕನ್ದರೋ ನಾಮ ‘‘ಕ’’ನ್ತಿ ಲದ್ಧನಾಮೇನ ಉದಕೇನ ದಾರಿತೋ ಉದಕಭಿನ್ನೋ ಪಬ್ಬತಪ್ಪದೇಸೋ, ಯೋ ‘‘ನಿತಮ್ಭೋ’’ತಿಪಿ ‘‘ನದಿಕುಞ್ಜೋ’’ತಿಪಿ ವುಚ್ಚತಿ. ಪದರಂ ನಾಮ ಅಟ್ಠ ಮಾಸೇ ದೇವೇ ಅವಸ್ಸನ್ತೇ ಫಲಿತೋ ಭೂಮಿಪ್ಪದೇಸೋ. ಸಾಖಾತಿ ಕುಸೋಬ್ಭಗಾಮಿನಿಯೋ ಖುದ್ದಕಮಾತಿಕಾಯೋ. ಕುಸೋಬ್ಭಾತಿ ಖುದ್ದಕಆವಾಟಾ. ಮಹಾಸೋಬ್ಭಾತಿ ಮಹಾಆವಾಟಾ. ಕುನ್ನದಿಯೋತಿ ಖುದ್ದಕನದಿಯೋ. ಮಹಾನದಿಯೋತಿ ಗಙ್ಗಾಯಮುನಾದಿಕಾ ಮಹಾಸರಿತಾ.

೫-೭. ಪಠಮಆಜಾನೀಯಸುತ್ತಾದಿವಣ್ಣನಾ

೯೭-೯೯. ಪಞ್ಚಮೇ ಅಙ್ಗೇಹೀತಿ ಗುಣಙ್ಗೇಹಿ. ರಾಜಾರಹೋತಿ ರಞ್ಞೋ ಅರಹೋ ಅನುಚ್ಛವಿಕೋ. ರಾಜಭೋಗ್ಗೋತಿ ರಞ್ಞೋ ಉಪಭೋಗಭೂತೋ. ರಞ್ಞೋ ಅಙ್ಗನ್ತಿ ರಞ್ಞೋ ಹತ್ಥಪಾದಾದಿಅಙ್ಗಸಮತಾಯ ಅಙ್ಗನ್ತೇವ ಸಙ್ಖಂ ಗಚ್ಛತಿ. ವಣ್ಣಸಮ್ಪನ್ನೋತಿ ಸರೀರವಣ್ಣೇನ ಸಮ್ಪನ್ನೋ. ಬಲಸಮ್ಪನ್ನೋತಿ ಕಾಯಬಲೇನ ಸಮ್ಪನ್ನೋ. ಆಹುನೇಯ್ಯೋತಿ ಆಹುತಿಸಙ್ಖಾತಂ ಪಿಣ್ಡಪಾತಂ ಪಟಿಗ್ಗಹೇತುಂ ಯುತ್ತೋ. ಪಾಹುನೇಯ್ಯೋತಿ ಪಾಹುನಕಭತ್ತಸ್ಸ ಅನುಚ್ಛವಿಕೋ. ದಕ್ಖಿಣೇಯ್ಯೋತಿ ದಸವಿಧದಾನವತ್ಥುಪರಿಚ್ಚಾಗವಸೇನ ಸದ್ಧಾದಾನಸಙ್ಖಾತಾಯ ದಕ್ಖಿಣಾಯ ಅನುಚ್ಛವಿಕೋ. ಅಞ್ಜಲಿಕರಣೀಯೋತಿ ಅಞ್ಜಲಿಪಗ್ಗಹಣಸ್ಸ ಅನುಚ್ಛವಿಕೋ. ಅನುತ್ತರಂ ಪುಞ್ಞಕ್ಖೇತ್ತಂ ಲೋಕಸ್ಸಾತಿ ಸಬ್ಬಲೋಕಸ್ಸ ಅಸದಿಸಂ ಪುಞ್ಞವಿರುಹನಟ್ಠಾನಂ.

ವಣ್ಣಸಮ್ಪನ್ನೋತಿ ಗುಣವಣ್ಣೇನ ಸಮ್ಪನ್ನೋ. ಬಲಸಮ್ಪನ್ನೋತಿ ವೀರಿಯಬಲೇನ ಸಮ್ಪನ್ನೋ. ಜವಸಮ್ಪನ್ನೋತಿ ಞಾಣಜವೇನ ಸಮ್ಪನ್ನೋ. ಥಾಮವಾತಿ ಞಾಣಥಾಮೇನ ಸಮನ್ನಾಗತೋ. ದಳ್ಹಪರಕ್ಕಮೋತಿ ಥಿರಪರಕ್ಕಮೋ. ಅನಿಕ್ಖಿತ್ತಧುರೋತಿ ಅಟ್ಠಪಿತಧುರೋ ಪಗ್ಗಹಿತಧುರೋ, ಅಗ್ಗಫಲಂ ಅರಹತ್ತಂ ಅಪ್ಪತ್ವಾ ವೀರಿಯಧುರಂ ನ ನಿಕ್ಖಿಪಿಸ್ಸಾಮೀತಿ ಏವಂ ಪಟಿಪನ್ನೋ. ಇಮಸ್ಮಿಂ ಸುತ್ತೇ ಚತುಸಚ್ಚವಸೇನ ಸೋತಾಪತ್ತಿಮಗ್ಗೋ, ಸೋತಾಪತ್ತಿಮಗ್ಗೇನ ಚ ಞಾಣಜವಸಮ್ಪನ್ನತಾ ಕಥಿತಾತಿ. ಛಟ್ಠೇ ತೀಣಿ ಚ ಮಗ್ಗಾನಿ ತೀಣಿ ಚ ಫಲಾನಿ, ತೀಹಿ ಮಗ್ಗಫಲೇಹಿ ಚ ಞಾಣಜವಸಮ್ಪನ್ನತಾ ಕಥಿತಾ. ಸತ್ತಮೇ ಅರಹತ್ತಫಲಂ, ಅರಹತ್ತಫಲೇನೇವ ಚ ಮಗ್ಗಕಿಚ್ಚಂ ಕಥಿತಂ. ಫಲಂ ಪನ ಜವಿತಜವೇನ ಉಪ್ಪಜ್ಜನತೋ ಜವೋತಿ ಚ ವತ್ತುಂ ವಟ್ಟತಿ.

೮. ಪೋತ್ಥಕಸುತ್ತವಣ್ಣನಾ

೧೦೦. ಅಟ್ಠಮೇ ನವೋತಿ ಕರಣಂ ಉಪಾದಾಯ ವುಚ್ಚತಿ. ಪೋತ್ಥಕೋತಿ ವಾಕಮಯವತ್ಥಂ. ಮಜ್ಝಿಮೋತಿ ಪರಿಭೋಗಮಜ್ಝಿಮೋ. ಜಿಣ್ಣೋತಿ ಪರಿಭೋಗಜಿಣ್ಣೋ. ಉಕ್ಖಲಿಪರಿಮಜ್ಜನನ್ತಿ ಉಕ್ಖಲಿಪರಿಪುಞ್ಛನಂ ದುಸ್ಸೀಲೋತಿ ನಿಸ್ಸೀಲೋ. ದುಬ್ಬಣ್ಣತಾಯಾತಿ ಗುಣವಣ್ಣಾಭಾವೇನ ದುಬ್ಬಣ್ಣತಾಯ. ದಿಟ್ಠಾನುಗತಿಂ ಆಪಜ್ಜನ್ತೀತಿ ತೇನ ಕತಂ ಅನುಕರೋನ್ತಿ. ನ ಮಹಪ್ಫಲಂ ಹೋತೀತಿ ವಿಪಾಕಫಲೇನ ಮಹಪ್ಫಲಂ ನ ಹೋತಿ. ನ ಮಹಾನಿಸಂಸನ್ತಿ ವಿಪಾಕಾನಿಸಂಸೇನೇವ ನ ಮಹಾನಿಸಂಸಂ. ಅಪ್ಪಗ್ಘತಾಯಾತಿ ವಿಪಾಕಗ್ಘೇನ ಅಪ್ಪಗ್ಘತಾಯ. ಕಾಸಿಕಂ ವತ್ಥನ್ತಿ ತೀಹಿ ಕಪ್ಪಾಸಅಂಸೂಹಿ ಸುತ್ತಂ ಕನ್ತಿತ್ವಾ ಕತವತ್ಥಂ, ತಞ್ಚ ಖೋ ಕಾಸಿರಟ್ಠೇಯೇವ ಉಟ್ಠಿತಂ. ಸೇಸಂ ಉತ್ತಾನಮೇವ. ಸೀಲಂ ಪನೇತ್ಥ ಮಿಸ್ಸಕಂ ಕಥಿತನ್ತಿ.

೯. ಲೋಣಕಪಲ್ಲಸುತ್ತವಣ್ಣನಾ

೧೦೧. ನವಮೇ ಯಥಾ ಯಥಾಯನ್ತಿ ಯಥಾ ಯಥಾ ಅಯಂ. ತಥಾ ತಥಾ ತನ್ತಿ ತಥಾ ತಥಾ ತಂ ಕಮ್ಮಂ. ಇದಂ ವುತ್ತಂ ಹೋತಿ – ಯೋ ಏವಂ ವದೇಯ್ಯ – ‘‘ಯಥಾ ಯಥಾ ಕಮ್ಮಂ ಕರೋತಿ, ತಥಾ ತಥಾಸ್ಸ ವಿಪಾಕಂ ಪಟಿಸಂವೇದಿಯತೇವ. ನ ಹಿ ಸಕ್ಕಾ ಕತಸ್ಸ ಕಮ್ಮಸ್ಸ ವಿಪಾಕಂ ಪಟಿಸೇಧೇತುಂ. ತಸ್ಮಾ ಯತ್ತಕಂ ಕಮ್ಮಂ ಕರೋತಿ, ತತ್ತಕಸ್ಸ ವಿಪಾಕಂ ಪಟಿಸಂವೇದಿಯತೇವಾ’’ತಿ. ಏವಂ ಸನ್ತನ್ತಿ ಏವಂ ಸನ್ತೇ. ಬ್ರಹ್ಮಚರಿಯವಾಸೋ ನ ಹೋತೀತಿ ಯಂ ಮಗ್ಗಭಾವನತೋ ಪುಬ್ಬೇ ಉಪಪಜ್ಜವೇದನೀಯಂ ಕಮ್ಮಂ ಕತಂ, ತಸ್ಸ ಅವಸ್ಸಂ ಪಟಿಸಂವೇದನೀಯತ್ತಾ ಬ್ರಹ್ಮಚರಿಯಂ ವುತ್ಥಮ್ಪಿ ಅವುತ್ಥಮೇವ ಹೋತಿ. ಓಕಾಸೋ ನ ಪಞ್ಞಾಯತಿ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾತಿ ಯಸ್ಮಾ ಚ ಏವಂ ಸನ್ತೇ ತೇನ ಕಮ್ಮಾಯೂಹನಞ್ಚೇವ ವಿಪಾಕಾನುಭವನಾ ಚ ಹೋತಿ, ತಸ್ಮಾ ಹೇತುನಾ ನಯೇನ ವಟ್ಟದುಕ್ಖಸ್ಸ ಅನ್ತಕಿರಿಯಾಯ ಓಕಾಸೋ ನ ಪಞ್ಞಾಯತಿ ನಾಮ.

ಯಥಾ ಯಥಾ ವೇದನೀಯನ್ತಿ ಯೇನ ಯೇನಾಕಾರೇನ ವೇದಿತಬ್ಬಂ. ತಥಾ ತಥಾಸ್ಸ ವಿಪಾಕಂ ಪಟಿಸಂವೇದಿಯತೀತಿ ತೇನ ತೇನಾಕಾರೇನ ಅಸ್ಸ ವಿಪಾಕಂ ಪಚ್ಚನುಭೋತಿ. ಇದಂ ವುತ್ತಂ ಹೋತಿ – ಯದೇತಂ ಸತ್ತಸು ಜವನೇಸು ಪಠಮಜವನಕಮ್ಮಂ ಸತಿ ಪಚ್ಚಯೇ ವಿಪಾಕವಾರಂ ಲಭನ್ತಮೇವ ದಿಟ್ಠಧಮ್ಮವೇದನೀಯಂ ಹೋತಿ, ಅಸತಿ ಅಹೋಸಿಕಮ್ಮಂ ನಾಮ. ಯಞ್ಚ ಸತ್ತಮಜವನಕಮ್ಮಂ ಸತಿ ಪಚ್ಚಯೇ ಉಪಪಜ್ಜವೇದನೀಯಂ ಹೋತಿ, ಅಸತಿ ಅಹೋಸಿಕಮ್ಮಂ ನಾಮ. ಯಞ್ಚ ಮಜ್ಝೇ ಪಞ್ಚಜವನಕಮ್ಮಂ ಯಾವ ಸಂಸಾರಪ್ಪವತ್ತಿ, ತಾವ ಅಪರಪರಿಯಾಯವೇದನೀಯಂ ನಾಮ ಹೋತಿ. ಏತೇಸು ಆಕಾರೇಸು ಯೇನ ಯೇನಾಕಾರೇನ ವೇದಿತಬ್ಬಂ ಕಮ್ಮಂ ಅಯಂ ಪುರಿಸೋ ಕರೋತಿ, ತೇನ ತೇನೇವಸ್ಸ ವಿಪಾಕಂ ಪಟಿಸಂವೇದಿಯತಿ ನಾಮ. ಅಟ್ಠಕಥಾಯಞ್ಹಿ ಲದ್ಧವಿಪಾಕವಾರಮೇವ ಕಮ್ಮಂ ಯಥಾವೇದನೀಯಂ ಕಮ್ಮಂ ನಾಮಾತಿ ವುತ್ತಂ. ಏವಂ ಸನ್ತಂ, ಭಿಕ್ಖವೇ, ಬ್ರಹ್ಮಚರಿಯವಾಸೋ ಹೋತೀತಿ ಕಮ್ಮಕ್ಖಯಕರಸ್ಸ ಬ್ರಹ್ಮಚರಿಯಸ್ಸ ಖೇಪೇತಬ್ಬಕಮ್ಮಸಮ್ಭವತೋ ವಾಸೋ ನಾಮ ಹೋತಿ, ವುತ್ಥಂ ಸುವುತ್ಥಮೇವ ಹೋತೀತಿ ಅತ್ಥೋ. ಓಕಾಸೋ ಪಞ್ಞಾಯತಿ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾತಿ ಯಸ್ಮಾ ಏವಂ ಸನ್ತೇ ತೇನ ತೇನ ಮಗ್ಗೇನ ಅಭಿಸಙ್ಖಾರವಿಞ್ಞಾಣಸ್ಸ ನಿರೋಧೇನ ತೇಸು ತೇಸು ಭವೇಸು ಆಯತಿಂ ವಟ್ಟದುಕ್ಖಂ ನ ಉಪ್ಪಜ್ಜತಿ, ತಸ್ಮಾ ಓಕಾಸೋ ಪಞ್ಞಾಯತಿ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯ.

ಇದಾನಿ ತಂ ಯಥಾವೇದನೀಯಕಮ್ಮಸಭಾವಂ ದಸ್ಸೇನ್ತೋ ಇಧ, ಭಿಕ್ಖವೇ, ಏಕಚ್ಚಸ್ಸಾತಿಆದಿಮಾಹ. ತತ್ಥ ಅಪ್ಪಮತ್ತಕನ್ತಿ ಪರಿತ್ತಂ ಥೋಕಂ ಮನ್ದಂ ಲಾಮಕಂ. ತಾದಿಸಂಯೇವಾತಿ ತಂಸರಿಕ್ಖಕಮೇವ. ದಿಟ್ಠಧಮ್ಮವೇದನೀಯನ್ತಿ ತಸ್ಮಿಂ ಕಮ್ಮೇಯೇವ ದಿಟ್ಠಧಮ್ಮೇ ವಿಪಚ್ಚಿತಬ್ಬಂ ವಿಪಾಕವಾರಂ ಲಭನ್ತಂ ದಿಟ್ಠಧಮ್ಮವೇದನೀಯಂ ಹೋತಿ. ನಾಣುಪಿ ಖಾಯತೀತಿ ದುತಿಯೇ ಅತ್ತಭಾವೇ ಅಣುಪಿ ನ ಖಾಯತಿ, ಅಣುಮತ್ತಮ್ಪಿ ದುತಿಯೇ ಅತ್ತಭಾವೇ ವಿಪಾಕಂ ನ ದೇತೀತಿ ಅತ್ಥೋ. ಬಹುದೇವಾತಿ ಬಹುಕಂ ಪನ ವಿಪಾಕಂ ಕಿಮೇವ ದಸ್ಸತೀತಿ ಅಧಿಪ್ಪಾಯೋ. ಅಭಾವಿತಕಾಯೋತಿಆದೀಹಿ ಕಾಯಭಾವನಾರಹಿತೋ ವಟ್ಟಗಾಮೀ ಪುಥುಜ್ಜನೋ ದಸ್ಸಿತೋ. ಪರಿತ್ತೋತಿ ಪರಿತ್ತಗುಣೋ. ಅಪ್ಪಾತುಮೋತಿ ಆತುಮಾ ವುಚ್ಚತಿ ಅತ್ತಭಾವೋ, ತಸ್ಮಿಂ ಮಹನ್ತೇಪಿ ಗುಣಪರಿತ್ತತಾಯ ಅಪ್ಪಾತುಮೋಯೇವ. ಅಪ್ಪದುಕ್ಖವಿಹಾರೀತಿ ಅಪ್ಪಕೇನಪಿ ಪಾಪೇನ ದುಕ್ಖವಿಹಾರೀ. ಭಾವಿತಕಾಯೋತಿಆದೀಹಿ ಖೀಣಾಸವೋ ದಸ್ಸಿತೋ. ಸೋ ಹಿ ಕಾಯಾನುಪಸ್ಸನಾಸಙ್ಖಾತಾಯ ಕಾಯಭಾವನಾಯ ಭಾವಿತಕಾಯೋ ನಾಮ. ಕಾಯಸ್ಸ ವಾ ವಡ್ಢಿತತ್ತಾ ಭಾವಿತಕಾಯೋ. ಭಾವಿತಸೀಲೋತಿ ವಡ್ಢಿತಸೀಲೋ. ಸೇಸಪದದ್ವಯೇಪಿ ಏಸೇವ ನಯೋ. ಪಞ್ಚದ್ವಾರಭಾವನಾಯ ವಾ ಭಾವಿತಕಾಯೋ. ಏತೇನ ಇನ್ದ್ರಿಯಸಂವರಸೀಲಂ ವುತ್ತಂ, ಭಾವಿತಸೀಲೋತಿ ಇಮಿನಾ ಸೇಸಾನಿ ತೀಣಿ ಸೀಲಾನಿ. ಅಪರಿತ್ತೋತಿ ನ ಪರಿತ್ತಗುಣೋ. ಮಹತ್ತೋತಿ ಅತ್ತಭಾವೇ ಪರಿತ್ತೇಪಿ ಗುಣಮಹನ್ತತಾಯ ಮಹತ್ತೋ. ಅಪ್ಪಮಾಣವಿಹಾರೀತಿ ಖೀಣಾಸವಸ್ಸೇತಂ ನಾಮಮೇವ. ಸೋ ಹಿ ಪಮಾಣಕರಾನಂ ರಾಗಾದೀನಂ ಅಭಾವೇನ ಅಪ್ಪಮಾಣವಿಹಾರೀ ನಾಮ.

ಪರಿತ್ತೇತಿ ಖುದ್ದಕೇ. ಉದಕಮಲ್ಲಕೇತಿ ಉದಕಸರಾವೇ. ಓರಬ್ಭಿಕೋತಿ ಉರಬ್ಭಸಾಮಿಕೋ. ಉರಬ್ಭಘಾತಕೋತಿ ಸೂನಕಾರೋ. ಜಾಪೇತುಂ ವಾತಿ ಧನಜಾನಿಯಾ ಜಾಪೇತುಂ. ಝಾಪೇತುನ್ತಿಪಿ ಪಾಠೋ, ಅಯಮೇವತ್ಥೋ. ಯಥಾಪಚ್ಚಯಂ ವಾ ಕಾತುನ್ತಿ ಯಥಾ ಇಚ್ಛತಿ, ತಥಾ ಕಾತುಂ. ಉರಬ್ಭಧನನ್ತಿ ಏಳಕಅಗ್ಘನಕಮೂಲಂ. ಸೋ ಪನಸ್ಸ ಸಚೇ ಇಚ್ಛತಿ, ದೇತಿ. ನೋ ಚೇ ಇಚ್ಛತಿ, ಗೀವಾಯಂ ಗಹೇತ್ವಾ ನಿಕ್ಕಡ್ಢಾಪೇತಿ. ಸೇಸಂ ವುತ್ತನಯೇನೇವ ವೇದಿತಬ್ಬಂ. ಇಮಸ್ಮಿಂ ಪನ ಸುತ್ತೇ ವಟ್ಟವಿವಟ್ಟಂ ಕಥಿತನ್ತಿ.

೧೦. ಪಂಸುಧೋವಕಸುತ್ತವಣ್ಣನಾ

೧೦೨. ದಸಮೇ ಧೋವತೀತಿ ವಿಕ್ಖಾಲೇತಿ. ಸನ್ಧೋವತೀತಿ ಸುಟ್ಠು ಧೋವತಿ, ಪುನಪ್ಪುನಂ ಧೋವತಿ. ನಿದ್ಧೋವತೀತಿ ನಿಗ್ಗಣ್ಹಿತ್ವಾ ಧೋವತಿ. ಅನಿದ್ಧನ್ತಕಸಾವನ್ತಿ ಅನೀಹತದೋಸಂ ಅನಪನೀತಕಸಾವಂ. ಪಭಙ್ಗೂತಿ ಪಭಿಜ್ಜನಸಭಾವಂ, ಅಧಿಕರಣೀಯಂ ಠಪೇತ್ವಾ ಮುಟ್ಠಿಕಾಯ ಪಹಟಮತ್ತಂ ಭಿಜ್ಜತಿ. ಪಟ್ಟಿಕಾಯಾತಿ ಸುವಣ್ಣಪಟ್ಟಕಾಯ. ಗೀವೇಯ್ಯಕೇತಿ ಗೀವಾಲಙ್ಕಾರೇ.

ಅಧಿಚಿತ್ತನ್ತಿ ಸಮಥವಿಪಸ್ಸನಾಚಿತ್ತಂ. ಅನುಯುತ್ತಸ್ಸಾತಿ ಭಾವೇನ್ತಸ್ಸ. ಸಚೇತಸೋತಿ ಚಿತ್ತಸಮ್ಪನ್ನೋ. ದಬ್ಬಜಾತಿಕೋತಿ ಪಣ್ಡಿತಜಾತಿಕೋ. ಕಾಮವಿತಕ್ಕಾದೀಸು ಕಾಮೇ ಆರಬ್ಭ ಉಪ್ಪನ್ನೋ ವಿತಕ್ಕೋ ಕಾಮವಿತಕ್ಕೋ. ಬ್ಯಾಪಾದವಿಹಿಂಸಸಮ್ಪಯುತ್ತಾ ವಿತಕ್ಕಾ ಬ್ಯಾಪಾದವಿಹಿಂಸವಿತಕ್ಕಾ ನಾಮ. ಞಾತಿವಿತಕ್ಕಾದೀಸು ‘‘ಅಮ್ಹಾಕಂ ಞಾತಕಾ ಬಹೂ ಪುಞ್ಞವನ್ತಾ’’ತಿಆದಿನಾ ನಯೇನ ಞಾತಕೇ ಆರಬ್ಭ ಉಪ್ಪನ್ನೋ ವಿತಕ್ಕೋ ಞಾತಿವಿತಕ್ಕೋ. ‘‘ಅಸುಕೋ ಜನಪದೋ ಖೇಮೋ ಸುಭಿಕ್ಖೋ’’ತಿಆದಿನಾ ನಯೇನ ಜನಪದಮಾರಬ್ಭ ಉಪ್ಪನ್ನೋ ವಿತಕ್ಕೋ ಜನಪದವಿತಕ್ಕೋ. ‘‘ಅಹೋ ವತ ಮಂ ಪರೇ ನ ಅವಜಾನೇಯ್ಯು’’ನ್ತಿ ಏವಂ ಉಪ್ಪನ್ನೋ ವಿತಕ್ಕೋ ಅನವಞ್ಞತ್ತಿಪಟಿಸಂಯುತ್ತೋ ವಿತಕ್ಕೋ ನಾಮ. ಧಮ್ಮವಿತಕ್ಕಾವಸಿಸ್ಸನ್ತೀತಿ ಧಮ್ಮವಿತಕ್ಕಾ ನಾಮ ದಸವಿಪಸ್ಸನುಪಕ್ಕಿಲೇಸವಿತಕ್ಕಾ. ಸೋ ಹೋತಿ ಸಮಾಧಿ ನ ಚೇವ ಸನ್ತೋತಿ ಸೋ ಅವಸಿಟ್ಠಧಮ್ಮವಿತಕ್ಕೋ ವಿಪಸ್ಸನಾಸಮಾಧಿ ಅವೂಪಸನ್ತಕಿಲೇಸತ್ತಾ ಸನ್ತೋ ನ ಹೋತಿ. ನ ಪಣೀತೋತಿ ನ ಅತಪ್ಪಕೋ. ನಪ್ಪಟಿಪ್ಪಸ್ಸದ್ಧಿಲದ್ಧೋತಿ ನ ಕಿಲೇಸಪಟಿಪ್ಪಸ್ಸದ್ಧಿಯಾ ಲದ್ಧೋ. ನ ಏಕೋದಿಭಾವಾಧಿಗತೋತಿ ನ ಏಕಗ್ಗಭಾವಪ್ಪತ್ತೋ. ಸಸಙ್ಖಾರನಿಗ್ಗಯ್ಹವಾರಿತಗತೋತಿ ಸಸಙ್ಖಾರೇನ ಸಪ್ಪಯೋಗೇನ ಕಿಲೇಸೇ ನಿಗ್ಗಣ್ಹಿತ್ವಾ ವಾರೇತ್ವಾ ವಾರಿತೋ, ನ ಕಿಲೇಸಾನಂ ಛಿನ್ನನ್ತೇ ಉಪ್ಪನ್ನೋ, ಕಿಲೇಸೇ ಪನ ವಾರೇತ್ವಾ ಉಪ್ಪನ್ನೋ.

ಹೋತಿ ಸೋ, ಭಿಕ್ಖವೇ, ಸಮಯೋತಿ ಏತ್ಥ ಸಮಯೋ ನಾಮ ಉತುಸಪ್ಪಾಯಂ ಆಹಾರಸಪ್ಪಾಯಂ ಸೇನಾಸನಸಪ್ಪಾಯಂ ಪುಗ್ಗಲಸಪ್ಪಾಯಂ ಧಮ್ಮಸ್ಸವನಸಪ್ಪಾಯನ್ತಿ ಇಮೇಸಂ ಪಞ್ಚನ್ನಂ ಸಪ್ಪಾಯಾನಂ ಪಟಿಲಾಭಕಾಲೋ. ಯಂ ತಂ ಚಿತ್ತನ್ತಿ ಯಸ್ಮಿಂ ಸಮಯೇ ತಂ ವಿಪಸ್ಸನಾಚಿತ್ತಂ. ಅಜ್ಝತ್ತಂಯೇವ ಸನ್ತಿಟ್ಠತೀತಿ ಅತ್ತನಿಯೇವ ತಿಟ್ಠತಿ. ನಿಯಕಜ್ಝತ್ತಞ್ಹಿ ಇಧ ಅಜ್ಝತ್ತಂ ನಾಮ. ಗೋಚರಜ್ಝತ್ತಮ್ಪಿ ವಟ್ಟತಿ. ಪುಥುತ್ತಾರಮ್ಮಣಂ ಪಹಾಯ ಏಕಸ್ಮಿಂ ನಿಬ್ಬಾನಗೋಚರೇಯೇವ ತಿಟ್ಠತೀತಿ ವುತ್ತಂ ಹೋತಿ. ಸನ್ನಿಸೀದತೀತಿ ಸುಟ್ಠು ನಿಸೀದತಿ. ಏಕೋದಿ ಹೋತೀತಿ ಏಕಗ್ಗಂ ಹೋತಿ. ಸಮಾಧಿಯತೀತಿ ಸಮ್ಮಾ ಆಧಿಯತಿ. ಸನ್ತೋತಿಆದೀಸು ಪಚ್ಚನೀಕಕಿಲೇಸವೂಪಸಮೇನ ಸನ್ತೋ. ಅತಪ್ಪಕಟ್ಠೇನ ಪಣೀತೋ. ಕಿಲೇಸಪಟಿಪ್ಪಸ್ಸದ್ಧಿಯಾ ಲದ್ಧತ್ತಾ ಪಟಿಪ್ಪಸ್ಸದ್ಧಲದ್ಧೋ. ಏಕಗ್ಗಭಾವಂ ಗತತ್ತಾ ಏಕೋದಿಭಾವಾಧಿಗತೋ. ಕಿಲೇಸಾನಂ ಛಿನ್ನನ್ತೇ ಉಪ್ಪನ್ನತ್ತಾ ನ ಸಪ್ಪಯೋಗೇನ ಕಿಲೇಸೇ ನಿಗ್ಗಣ್ಹಿತ್ವಾ ವಾರೇತ್ವಾ ವಾರಿತೋತಿ ನ ಸಸಙ್ಖಾರನಿಗ್ಗಯ್ಹವಾರಿತಗತೋ. ಏತ್ತಾವತಾ ಅಯಂ ಭಿಕ್ಖು ವಿವಟ್ಟೇತ್ವಾ ಅರಹತ್ತಂ ಪತ್ತೋ ನಾಮ ಹೋತಿ.

ಇದಾನಿ ಖೀಣಾಸವಸ್ಸ ಸತೋ ಅಭಿಞ್ಞಾಪಟಿಪದಂ ದಸ್ಸೇನ್ತೋ ಯಸ್ಸ ಯಸ್ಸ ಚಾತಿಆದಿಮಾಹ. ತತ್ಥ ಅಭಿಞ್ಞಾ ಸಚ್ಛಿಕರಣೀಯಸ್ಸಾತಿ ಅಭಿಜಾನಿತ್ವಾ ಪಚ್ಚಕ್ಖಂ ಕಾತಬ್ಬಸ್ಸ. ಸತಿ ಸತಿಆಯತನೇತಿ ಪುಬ್ಬಹೇತುಸಙ್ಖಾತೇ ಚೇವ ಇದಾನಿ ಚ ಪಟಿಲದ್ಧಬ್ಬೇ ಅಭಿಞ್ಞಾಪಾದಕಜ್ಝಾನಾದಿಭೇದೇ ಚ ಸತಿ ಸತಿಕಾರಣೇ. ವಿತ್ಥಾರತೋ ಪನ ಅಯಂ ಅಭಿಞ್ಞಾಕಥಾ ವಿಸುದ್ಧಿಮಗ್ಗೇ (ವಿಸುದ್ಧಿ. ೨.೩೬೫ ಆದಯೋ) ವುತ್ತನಯೇನೇವ ವೇದಿತಬ್ಬಾ. ಆಸವಾನಂ ಖಯಾತಿಆದಿ ಚೇತ್ಥ ಫಲಸಮಾಪತ್ತಿವಸೇನ ವುತ್ತನ್ತಿ ವೇದಿತಬ್ಬಂ.

೧೧. ನಿಮಿತ್ತಸುತ್ತವಣ್ಣನಾ

೧೦೩. ಏಕಾದಸಮೇಪಿ ಅಧಿಚಿತ್ತಂ ಸಮಥವಿಪಸ್ಸನಾಚಿತ್ತಮೇವ. ತೀಣಿ ನಿಮಿತ್ತಾನೀತಿ ತೀಣಿ ಕಾರಣಾನಿ. ಕಾಲೇನ ಕಾಲನ್ತಿ ಕಾಲೇ ಕಾಲೇ, ಯುತ್ತಕಾಲೇತಿ ಅತ್ಥೋ. ಕಾಲೇನ ಕಾಲಂ ಸಮಾಧಿನಿಮಿತ್ತಂ ಮನಸಿಕಾತಬ್ಬನ್ತಿಆದೀಸು ತಂ ತಂ ಕಾಲಂ ಸಲ್ಲಕ್ಖೇತ್ವಾ ಏಕಗ್ಗತಾಯ ಯುತ್ತಕಾಲೇ ಏಕಗ್ಗತಾ ಮನಸಿಕಾತಬ್ಬಾ. ಏಕಗ್ಗತಾ ಹಿ ಇಧ ಸಮಾಧಿನಿಮಿತ್ತನ್ತಿ ವುತ್ತಾ. ತತ್ರ ವಚನತ್ಥೋ – ಸಮಾಧಿಯೇವ ನಿಮಿತ್ತಂ ಸಮಾಧಿನಿಮಿತ್ತಂ. ಸೇಸಪದದ್ವಯೇಪಿ ಏಸೇವ ನಯೋ. ಪಗ್ಗಹೋತಿ ಪನ ವೀರಿಯಸ್ಸ ನಾಮಂ, ಉಪೇಕ್ಖಾತಿ ಮಜ್ಝತ್ತಭಾವಸ್ಸ. ತಸ್ಮಾ ವೀರಿಯಸ್ಸ ಯುತ್ತಕಾಲೇ ವೀರಿಯಂ ಮನಸಿಕಾತಬ್ಬಂ, ಮಜ್ಝತ್ತಭಾವಸ್ಸ ಯುತ್ತಕಾಲೇ ಮಜ್ಝತ್ತಭಾವೇ ಠಾತಬ್ಬನ್ತಿ. ಠಾನಂ ತಂ ಚಿತ್ತಂ ಕೋಸಜ್ಜಾಯ ಸಂವತ್ತೇಯ್ಯಾತಿ ಕಾರಣಂ ವಿಜ್ಜತಿ ಯೇನ ತಂ ಚಿತ್ತಂ ಕೋಸಜ್ಜಭಾವೇ ತಿಟ್ಠೇಯ್ಯ. ಇತರೇಸುಪಿ ಏಸೇವ ನಯೋ. ಉಪೇಕ್ಖಾನಿಮಿತ್ತಂಯೇವ ಮನಸಿ ಕರೇಯ್ಯಾತಿ ಏತ್ಥ ಚ ಞಾಣಜವಂ ಉಪೇಕ್ಖೇಯ್ಯಾತಿ ಅಯಮತ್ಥೋ. ಆಸವಾನಂ ಖಯಾಯಾತಿ ಅರಹತ್ತಫಲತ್ಥಾಯ.

ಉಕ್ಕಂ ಬನ್ಧೇಯ್ಯಾತಿ ಅಙ್ಗಾರಕಪಲ್ಲಂ ಸಜ್ಜೇಯ್ಯ. ಆಲಿಮ್ಪೇಯ್ಯಾತಿ ತತ್ಥ ಅಙ್ಗಾರೇ ಪಕ್ಖಿಪಿತ್ವಾ ಅಗ್ಗಿಂ ದತ್ವಾ ನಾಳಿಕಾಯ ಧಮನ್ತೋ ಅಗ್ಗಿಂ ಗಾಹಾಪೇಯ್ಯ. ಉಕ್ಕಾಮುಖೇ ಪಕ್ಖಿಪೇಯ್ಯಾತಿ ಅಙ್ಗಾರೇ ವಿಯೂಹಿತ್ವಾ ಅಙ್ಗಾರಮತ್ಥಕೇ ವಾ ಠಪೇಯ್ಯ, ಮೂಸಾಯ ವಾ ಪಕ್ಖಿಪೇಯ್ಯ. ಅಜ್ಝುಪೇಕ್ಖತೀತಿ ಪಕ್ಕಾಪಕ್ಕಭಾವಂ ಉಪಧಾರೇತಿ.

ಸಮ್ಮಾ ಸಮಾಧಿಯತಿ ಆಸವಾನಂ ಖಯಾಯಾತಿ ಅರಹತ್ತಫಲತ್ಥಾಯ ಸಮ್ಮಾ ಠಪೀಯತಿ. ಏತ್ತಾವತಾ ಹಿ ವಿಪಸ್ಸನಂ ವಡ್ಢೇತ್ವಾ ಅರಹತ್ತಪ್ಪತ್ತೋ ಭಿಕ್ಖು ದಸ್ಸಿತೋ. ಇದಾನಿ ತಸ್ಸ ಖೀಣಾಸವಸ್ಸ ಅಭಿಞ್ಞಾಯ ಪಟಿಪದಂ ದಸ್ಸೇನ್ತೋ ಯಸ್ಸ ಯಸ್ಸ ಚಾತಿಆದಿಮಾಹ. ತಂ ಹೇಟ್ಠಾ ವುತ್ತನಯೇನೇವ ವೇದಿತಬ್ಬಂ.

ಲೋಣಕಪಲ್ಲವಗ್ಗೋ ಪಞ್ಚಮೋ.