೨. ಆಜೀವಕಸುತ್ತವಣ್ಣನಾ

೭೩. ದುತಿಯೇ ತೇನ ಹಿ ಗಹಪತೀತಿ ಥೇರೋ ಕಿರ ಚಿನ್ತೇಸಿ – ‘‘ಅಯಂ ಇಧ ಆಗಚ್ಛನ್ತೋ ನ ಅಞ್ಞಾತುಕಾಮೋ ಹುತ್ವಾ ಆಗಮಿ, ಪರಿಗ್ಗಣ್ಹನತ್ಥಂ ಪನ ಆಗತೋ. ಇಮಿನಾ ಪುಚ್ಛಿತಪಞ್ಹಂ ಇಮಿನಾವ ಕಥಾಪೇಸ್ಸಾಮೀ’’ತಿ. ಇತಿ ತಂಯೇವ ಕಥಂ ಕಥಾಪೇತುಕಾಮೋ ತೇನ ಹೀತಿಆದಿಮಾಹ. ತತ್ಥ ತೇನ ಹೀತಿ ಕಾರಣಾಪದೇಸೋ. ಯಸ್ಮಾ ತ್ವಂ ಏವಂ ಪುಚ್ಛಸಿ, ತಸ್ಮಾ ತಞ್ಞೇವೇತ್ಥ ಪಟಿಪುಚ್ಛಾಮೀತಿ. ಕೇಸಂ ನೋತಿ ಕತಮೇಸಂ ನು. ಸಧಮ್ಮುಕ್ಕಂಸನಾತಿ ಅತ್ತನೋ ಲದ್ಧಿಯಾ ಉಕ್ಖಿಪಿತ್ವಾ ಠಪನಾ. ಪರಧಮ್ಮಾಪಸಾದನಾತಿ ಪರೇಸಂ ಲದ್ಧಿಯಾ ಘಟ್ಟನಾ ವಮ್ಭನಾ ಅವಕ್ಖಿಪನಾ. ಆಯತನೇವ ಧಮ್ಮದೇಸನಾತಿ ಕಾರಣಸ್ಮಿಂಯೇವ ಧಮ್ಮದೇಸನಾ. ಅತ್ಥೋ ಚ ವುತ್ತೋತಿ ಮಯಾ ಪುಚ್ಛಿತಪಞ್ಹಾಯ ಅತ್ಥೋ ಚ ಪಕಾಸಿತೋ. ಅತ್ತಾ ಚ ಅನುಪನೀತೋತಿ ಅಮ್ಹೇ ಏವರೂಪಾತಿ ಏವಂ ಅತ್ತಾ ಚ ನ ಉಪನೀತೋ. ನುಪನೀತೋತಿಪಿ ಪಾಠೋ.