೧೫. ಚುರಾ

ಅಸತಿ ಸುತ್ತೇ ಸಕತ್ಥೇತಿ ಕಥಂ ಲಬ್ಭತೀತಿ ಆಹ- ‘ಅತ್ಥಾನತಿ ದೇಸಾ’ತಿ. ಅತ್ಥಾ-ನತಿದೇಸಾತಿ ಅತ್ಥವಿಸೇಸಸ್ಸ ಕಸ್ಸಚಿ ಸುತ್ತೇ ಅನಿದ್ದೇಸಾತಿ ಅತ್ಥೋ. ಅತ್ಥವಿಸೇಸಸ್ಸಾ-ನತಿದೇಸಮತ್ತೇನ ಸಕತ್ಥೋಯೇವ ಣಿನಾ ವಾಚ್ಚೋತಿ ಕಥಂ ವಿಞ್ಞಾಯತೇಚ್ಚಾಹ- ‘ಸಕತ್ಥಸ್ಸ ಚ ಸುತತ್ತಾ’ತಿ. ಚುರ=ಥೇಯ್ಯೇ ಇಚ್ಚಾದೀಸು ಥೇಯ್ಯಾದಿಕಸ್ಸ ಸಕತ್ಥಸ್ಸ ಸುತತ್ತಾತಿ ಅತ್ಥೋ. ಯೋಗವಿಭಾಗತೋತಿ ‘ಣೀ’ತಿಯೋಗವಿಭಾಗತೋ, ರಜ್ಜಂ ಕಾರೇತೀತಿ ಏತ್ಥ ಸಾಮ್ಯಮಚ್ಚಾದಿಕಂ ಸತ್ತಙ್ಗಂ ರಜ್ಜಂ ಪವತ್ತೇತೀತಿ ವಾ ಅತ್ಥೋ, ಪಯೋಜಕಬ್ಯಾಪಾರೇ ಣಿ.