೨. ಸಂಕಿಣ್ಣವಗ್ಗವಣ್ಣನಾ

೭೫೮. ಪುಬ್ಬಸ್ಮಿಂ ಕಣ್ಡದ್ವಯೇ ಬುದ್ಧಾದೀನಿ ನಾಮಾನಿ ಸಮಾನತ್ಥಾನಿ ಪಕರಣೇನ ನಿಬದ್ಧಾನಿ, ಅಸ್ಮಿಮ್ಪಿ ಕಣ್ಡೇ ಸೋಭನಾದೀನಿ ವಿಸೇಸನನಾಮಾನಿ, ಸಮಯಾದೀನ್ಯನೇಕತ್ಥಾನಿ, ಚಿರಸ್ಸಮಾದೀನಿ ಚ ಅಬ್ಯಯಾನಿ ಪಕರಣೇನೇವ ನಿಬದ್ಧಾನಿ, ಇದಾನಿ ಪನ ಪುಬ್ಬವಗ್ಗೇಸು ವಿತ್ಥಾರಭಯಾ ಯೇ ನ ನಿಬದ್ಧಾ, ತಂಸಙ್ಗಹತ್ಥಂ, ತಂಸಮಯಾನುಪಾಲನತ್ಥಞ್ಚ ಸಂಕಿಣ್ಣಮಾರಭತೇ ‘‘ಞೇ ಯ್ಯ’’ಮಿಚ್ಚಾದಿನಾ. ತಸ್ಸತ್ಥೋ – ಇಹಾಪಿ ಸಂಕಿಣ್ಣವಗ್ಗೇಪಿ ಕ್ವಾಪಿ ಕತ್ಥಚಿ ಕ್ರಿಯಾದೀಸು ಪಚ್ಚಯತ್ಥವಸೇನ ಆಪಚ್ಚಯಾದೀನಂ ಇತ್ಥಿಲಿಙ್ಗಾದಿಭಾವಜೋತಕಸ್ಸ ಸಭಾವಸ್ಸ ವಸೇನ ಲಿಙ್ಗಂ ಇತ್ಥಿಲಿಙ್ಗಾದಿಕಂ ಞೇಯ್ಯನ್ತಿ. ಚಕಾರೇನ ಭಿಯ್ಯೋ ರೂಪನ್ತರಾದಿಪರಿಗ್ಗಹೋಪಿ. ಇಹಾತಿ ಚ ಉಪಲಕ್ಖಣಂ, ವಗ್ಗನ್ತರೇಸುಪಿ ಪಚ್ಚಯತ್ಥವಸೇನ ಲಿಙ್ಗಾದಿನಿಚ್ಛಯಸಮ್ಭವತೋ.

ಕತ್ತಬ್ಬತೋ ಕ್ರಿಯಾ, ಕರ ಕರಣೇ, ಣ್ಯೋ, ಇಕಾರಾಗಮೋ, ಅಸ್ಸಿ, ವಣ್ಣವಿಪರಿಯಯೇ ಕ್ರಿಯಾ, ಕ್ರಿಯಮ್ಪಿ, ರಿರಿಯಪಚ್ಚಯೇ ಕಿರಿಯಂ, ಕಿರಿಯಾಪಿ. ರಮ್ಮಪಚ್ಚಯೇ ಕಮ್ಮಂ.

ತಿಕಂ ಚಿತ್ತೋಪಸಮೇ. ಸಮು ಉಪಸಮೇ,ತಿ, ಸನ್ತಿ. ಥಮ್ಹಿ ಸಮಥೋ.ಅಮ್ಹಿ ಸಮೋ.

ತಿಕಂ ಕಾಯೋಪಸಮೇ. ದಮು ಉಪಸಮೇ. ಥಮ್ಹಿ ದಮಥೋ. ತಿಮ್ಹಿ ದನ್ತಿ. ಚಿತ್ತೋಪಸಮೇಪ್ಯೇತೇ.

ಸುದ್ಧಕಮ್ಮನಿ ವತ್ತಂ ಭವತಿ. ವತ್ತ ವತ್ತನೇ, ವತ್ತ ಸಮಾದಾನೇ ವಾ ವತ್ತಂ, ಅಸೀತಿಮಹಾವತ್ತಾದಿ.

ಆಸಙ್ಗವಚನಂ ಆಸತ್ತವಚನಂ ಸದ್ದಸರೂಪಂ ಪರಾಯಣಂ ನಾಮ ವುತ್ತಂ, ತಞ್ಚ ತೀಸು. ಪರಂ ಆಯನಂ ಆಯತ್ತೋ ತಾಣಂ ಪರಾಯಣಂ, ಕಮ್ಮಾಸತ್ತೋ ಇಚ್ಚತ್ಥೋ, ಸಾಕಲ್ಯವಚನೇ ತು ಪಾರಾಯಣಂ, ಪಾರಂ ಪರಿಯನ್ತಂ ಅಯನ್ತಿ ಗಚ್ಛನ್ತಿ ಕಸ್ಸಚಿ ಅನೇನಾತಿ ಪಾರಾಯಣಂ, ಯು, ಣತ್ತಂ, ಯಥಾ – ನಾಮಪಾರಾಯಣಂ, ಧಾತುಪಾರಾಯಣಂ.

೭೫೯. ತಿಕಂ ದ್ವಿಧಾಭಾವೇ. ಭಿದಿ ದ್ವಿಧಾಕರಣೇ, ಣೋ. ದರ ವಿದಾರಣೇ. ಫುಟ ವಿಕಸನೇ, ಫುಟ ಭೇದನೇ ವಾ, ಯು.

ದ್ವಯಂ ತಪ್ಪನೇ. ತಪ ಪೀಣನೇ, ಯು. ಪೀ ತಪ್ಪನೇ, ಯು, ಕಿಯಾದಿ, ನಸ್ಸ ಣತ್ತಂ. ಅವನಮ್ಪಿ, ಅವ ಪಾಲನೇ, ದಿತ್ತಿಯಞ್ಚ ಅನೇಕತ್ಥತ್ತಾ.

ದ್ವಯಂ ಸಾಪೇ. ಕುಸ ಅವ್ಹಾನೇ, ಭೇದನೇ ಚ, ಯು. ಸನ್ಜ ಸಙ್ಗೇ, ಅಭಿಸಙ್ಗೋ.

ತಿಕಂ ಯಾಚನಾಯಂ. ಭಿಕ್ಖ ಯಾಚನೇ, ಯು. ಯಾಚ ಯಾಚನೇ. ಅತ್ಥ ಯಾಚನೇ. ಅದ್ದನೋಪ್ಯತ್ರ, ಅದ್ದ ಗತಿಮ್ಹಿ, ಯಾಚನೇ ಚ.

೭೬೦. ನಿಮಿತ್ತರಹಿತಂ ಯದಿಚ್ಛಾ ನಾಮ, ಯಾ ಯಾ ಇಚ್ಛಾ ಅಧಿಪ್ಪಾಯೋ ಯದಿಚ್ಛಾ ನಾಮ. ಸೇರಿತಾಪಿ.

ತಿಕಂ ಆಪುಚ್ಛನೇ, ಆಪುಚ್ಛನಞ್ಚ ಗಮನಾಗಮನಾದಿಸಮಯೇ ಸುಹಜ್ಜ ಬನ್ಧವಾದೀನಮಾಲಿಙ್ಗನ ಚುಮ್ಬನಸ್ವಾಗತಪಿಯವಚನಾರೋಗ್ಯಪುಚ್ಛನಗಮನಾನುಞ್ಞಾದಿನಾ ಆನನ್ದನಂ. ಪುಚ್ಛ ಪುಚ್ಛನೇ, ಆಪುಚ್ಛನಂ. ನನ್ದ ಸಮಿದ್ಧಿಯಂ, ಆನನ್ದನಂ. ಸಭಾಜ ಪೀತಿದಸ್ಸನೇಸು, ಸಭಾಜ ಪೀತಿವಚನೇಸು ವಾ, ಚುರಾದಿ, ಯು, ಸಭಾಜನಂ.

ದ್ವಯಂ ನಯೇ. ಞಾಯನ್ತಿ ಯೇನಾತಿ ಞಾಯೋ, ಆಕಾರನ್ತಾನಮಾಯೋ. ನ್ಯಾಯೋಪಿ, ನಿಸ್ಸೇಸತೋ ಅಯತಿ ಯೇನ ನ್ಯಾಯೋ. ನೀ ನಯೇ, ಅಯಾದೇಸೋ, ನಯೋ.

ದ್ವಯಂ ವುದ್ಧಿಮ್ಹಿ. ಫಾ ವುದ್ಧಿಮ್ಹಿ, ಫಾಯ ವುದ್ಧಿಯಂ ವಾ, ಯಲೋಪೋ,ತಿ, ಫಾತಿ, ನಾರಿಯಂ. ವದ್ಧ ವದ್ಧನೇ,ತಿ, ದಲೋಪೋ, ಧಢಭಹೇಹಿ ಧಢಾ ಚ, ಅಸ್ಸು, ವುದ್ಧಿ, ವುಡ್ಢಿಪಿ.

೭೬೧. ಕಿಲಮ ಹಾಸಕ್ಖಯೇ, ಥೋ, ಕಿಲಮಥೋ. ಯುಮ್ಹಿ ಕಿಲಮನಂ. ಸೂ ಪಾಣಿಪಸವೇ, ಪಸವನಂ ಪಸವೋ, ತಿಮ್ಹಿ ಪಸೂತಿ.

ಕಸ ಗತಿಯಂ ಹಿಂಸಾಯಞ್ಚ, ನಿಗ್ಗಹೀತಾಗಮೋ, ಉಕ್ಕಂಸೋ, ಕಸ ವಿಲೇಖನೇ ವಾ. ಅತಿಸಯೋ ವುತ್ತೋ. ಭುಸಾದಯೋ ಪಮಾಣಾತಿಸಯವಸೇನ ವುತ್ತಾ, ಉಕ್ಕಂಸೋ ಗುಣಾತಿಸಯವಸೇನ ವುತ್ತೋ, ಅತಿಸಯೋ ಪನ ಉಭಯವಸೇನಾತಿ ಉಭಯತ್ರ ನಿದ್ದಿಟ್ಠಾನಂ ಭೇದೋ. ತಿಕಂ ಜಯನೇ. ಜಯನಂ ಜಯೋ, ಯು, ಜಯನಂ. ತಿಮ್ಹಿ ಜಿತಿ, ನಾರೀ.

೭೬೨. ಬನ್ಧನನ್ತಾನಿ ದ್ವೇ ದ್ವೇ ನಾಮಾನಿ. ವಸ ಕನ್ತಿಯಂ. ಕಮು ಕನ್ತಿಯಂ,ತಿ. ವಿಧ ವೇಧನೇ, ಬ್ಯಥನೇ ಚ ಅನೇಕತ್ಥತ್ತಾ, ಅ, ಇಕಾರಸ್ಸ ಯಾದೇಸೋ, ಬ್ಯಧೋ, ವೇಧೋ. ಗಹ ಉಪಾದಾನೇ ನಿಬನ್ಧನೇ ಚ, ಗಹೋ, ಗಾಹೋ ಚ. ವರ ಆವರಣೇ, ವರೋ. ವು ಸಂವರಣೇ,ತಿ, ವುತಿ. ಪಚ ಪಾಕೇ, ಇತ್ಥಿಯಮತಿಯವೋ ವಾ, ಅ. ಪಚನಂ ಪಾಕೋ, ಣೋ.

ದ್ವಯಂ ಆಹ್ವಾನೇ. ಹು ದಾನಾದನಹಬ್ಯಪ್ಪದಾನೇಸು, ಣೋ, ಹವೋ. ತಿಮ್ಹಿ ಹುತಿ. ದ್ವಯಂ ಅನುಭವನೇ. ವಿದ ಞಾಣೇ, ಣೋ, ವೇದೋ. ವಿದ ವೇದನಾಖ್ಯಾನನಿವಾಸೇಸು, ಚುರಾದಿ, ಯು, ವೇದನಂ, ವಾಕಾರೋ ವೇದನಾಸದ್ದಸ್ಸ ನಪುಂಸಕತ್ತಾಪೇಕ್ಖೋ.

೭೬೩. ದ್ವಯಂ ಧನಾದಿಜಾನಿಯಂ. ಜರ ವಯೋಹಾನಿಮ್ಹಿ, ಯು, ಜೀರಣಂ, ಅಸ್ಸೀ. ಹಾ ಚಾಗೇ, ಯು, ನದಾದಿ, ರಸ್ಸೋ, ಹಸ್ಸ ಜೋ, ಜಾನಿ. ತಾ ಪಾಲನೇ, ಯು, ಣತ್ತಂ. ದ್ವಯಂ ಪಮಾಣೇ. ಮಾ ಮಾನೇ,ತಿ, ಪಮಿತಿ. ಅಮ್ಹಿ ಪಮಾ.

ದ್ವಯಂ ಸಂಯೋಗೇ. ಸಿಲಿಸ ಆಲಿಙ್ಗನೇ. ಸಂಪುಬ್ಬೋ ಧಾ ಧಾರಣೇ, ಇ, ಸನ್ಧನಂ ಸನ್ಧಿ. ದ್ವಯಂ ಖಯೇ. ಖಿ ಖಯೇ, ಣೋ, ಇಸ್ಸೇ, ಏ ಅಯ, ಖಯೋ. ಚಿ ಚಯೇ, ಅಪಪುಬ್ಬೋ ಖಯೇ. ದ್ವಯಂ ಸದ್ದೇ. ರು ಸದ್ದೇ, ಣೋ, ವುದ್ಧ್ಯಾದೇಸೋ. ರಣ ಸದ್ದೇ. ಅ, ರಣೋ.

೭೬೪. ಗದ ಬ್ಯತ್ತಿಯಂ ವಾಚಾಯಂ, ಣೋ, ಅ ಚ, ನಿಗಾದೋ, ನಿಗದೋ ಚ. ದ್ವಯಂ ಮದೇ. ಮದ ಉಮ್ಮಾದೇ, ಮಾದೋ, ಮದೋ ಚ. ಸಿ ಬನ್ಧನೇ,ತಿ, ಸಿತಿ.

ತಿಕಂ ಆಕಾರೇ. ಆಕರಣಂ ಆಕಾರೋ, ಅನೇಕತ್ಥತ್ತಾ ಮುಖವಙ್ಕಾದ್ಯಙ್ಗವಿಕಾರೋ ವಾ, ಇಙ್ಗತಿ ಜಾನಾತೀತಿ ವಾ ಯೇನ ಆಕಾರೋ. ಇಙ್ಗ ಗಮನತ್ಥೋ, ತೋ, ಅ ಚ, ಇಙ್ಗಿತಂ, ಇಙ್ಗೋ ಚ. ಅತ್ಥಸ್ಸ ಧನಸ್ಸ ಅಪಗಮೋ ವಿನಾಸೋ ಬ್ಯಯೋ ನಾಮ. ಬ್ಯಯ ಚಿತ್ತಸಮುಸ್ಸಗ್ಗೇ.

೭೬೫. ದ್ವಯಂ ಅನ್ತರಾಯೇ. ಚುತಿಪಟಿಸನ್ಧೀನಮನ್ತರೇ ಅಯತೀತಿ ಅನ್ತರಾಯೋ. ಪಟಿಪಕ್ಖವಸೇನ ಊಹತಿ ಪವತ್ತತೀತಿ ಪಚ್ಚೂಹೋ, ಅಥ ವಾ ಕಾರಿಯಸಿದ್ಧಿ ಅನ್ತರಂ ಬ್ಯವಧಾನಂ ಅಯತಿ ಗಮಯತೀತಿ ಅನ್ತರಾಯೋ. ಪಚ್ಚೂಹನ್ತಿ ವಿನಿಹನ್ತೀತಿ ಪಚ್ಚೂಹೋ.

ವಿಕರಣಂ ಅಞ್ಞಥಾ ಭವನನ್ತಿ ವಿಕಾರೋ, ವಿಕತಿ ಚ, ಕರ ಕರಣೇ, ಣೋ,ತಿ ಚ.

ದ್ವಯಂ ಸಭಾವವಿಗಮೇ. ಸಿಲಿಸ ಆಲಿಙ್ಗನೇ, ಪವಿಪುಬ್ಬೋ ತಂಸಭಾವವಿಗಮೇ, ವಿಗತೋ ಧುರೋ ಸದಿಸಭಾವೋ ಯಸ್ಮಾತಿ ವಿಧುರೋ, ‘‘ವಿಧುರಂ ಪವಿಸಿಲೇಸೇ, ಕ್ಲಿವಞ್ಚ ವಿಕಲೇ ತಿಸೂ’’ತಿ [ಚಿನ್ತಾಮಣಿಟೀಕಾ ೨೨.೨೦] ರಭಸೋ. ವಿಧ ವಿಧಾನೇ ವಾ, ಉರೋ. ದ್ವಯಂ ಆಸನೇ. ವಿಸ ಪವೇಸನೇ, ಉಪವೇಸನಂ. ಆಸ ಉಪವೇಸನೇ, ಆಸನಂ.

೭೬೬. ತಿಪಾದಂ ಅಧಿಪ್ಪಾಯೇ. ಚಿತ್ತಮಧ್ಯಾಗನ್ತ್ವಾ ಸಯತೀತಿ ಅಜ್ಝಾಸಯೋ. ಅನಮಿಪುಬ್ಬೇ ಆಸಯೋ. ಅಧಿಪಯತಿ ಚಿತ್ತೇತಿ ಅಧಿಪ್ಪಾಯೋ, ಣೋ, ಪಯ ಗಮನೇ. ಚಿತ್ತೇ ಅಭಿಸನ್ಧಾಯತೀತಿ ಅಭಿಸನ್ಧಿ, ದ್ವೀಸು. ಭವತಿ ಚಿತ್ತೇತಿ ಭಾವೋ, ಣೋ. ಅಧಿಮುಚ್ಚನಂ ಚಿತ್ತೇ ಅಧಿಟ್ಠಾನಂ ಅಧಿಮುತ್ತಿ, ನಾರೀ. ಛನ್ದೋ ತಣ್ಹಾಯಮ್ಪಿ ವುತ್ತೋ.

ದ್ವಯಂ ಆದೀನವೇ. ದೋಸೋ ಪಟಿಘೇ ವುತ್ತೋ. ಆ ಭುಸೋ ದೀನಂ ವಾಯತಿ ಗಮಯತೀತಿ ಆದೀನವೋ, ದೀನ ದುಗ್ಗತಭಾವೇ, ವೋ, ವೀ ಗಮನೇ ಚ.

೭೬೭. ದ್ವಯಂ ಆನಿಸಂಸೇ. ಸಂಸ ಹಿಂಸಾಥುತೀಸು, ಆನಿಸಂಸೋ ಅಮುಖ್ಯಫಲೇ, ಮುಖ್ಯಫಲೇ ಚ, ತಥಾ ಗುಣೋ. ಗುಣ ಪಕಾಸನೇ, ಪಕಾಸೇತಿ ಕಾರಣನ್ತಿ ಗುಣೋ, ಗಣ ಸಙ್ಖ್ಯಾನೇ ವಾ, ಅಸ್ಸು, ಗುಣೋ. ದ್ವಯಂ ಮಜ್ಝೇ. ಮಜ ಸುದ್ಧಿಯಂ, ಝೋ. ವಿಪುಬ್ಬೇ ವೇಮಜ್ಝಂ.

ದ್ವಯಂ ತರುಣಸೂರಿಯಟ್ಠಾನೇ. ಅಹಸ್ಸ ಮಜ್ಝೋ ಮಜ್ಝಹೋ, ಸೋ ಏವ ಮಜ್ಝನ್ಹಿಕೋ, ಹಸ್ಸ ನ್ಹೋ [ಮೋಗ್ಗಲ್ಲಾನ ೩.೧೧೦ ಸುತ್ತಂ ಪಸ್ಸಿತಬ್ಬಂ]. ಅಹಸ್ಸ ಮಜ್ಝೋ ಮಜ್ಝನ್ಹೋ, ಮಜ್ಝನ್ತೋಪಿ. ದ್ವಯಂ ನಾನತ್ತಾಯಂ. ವಿಗತಾ ಮತ್ತಾ ಸದಿಸಪ್ಪಮಾಣಂ ಏತೇನ ಹೇತುಭೂತೇನ ವೇಮತ್ತಂ. ನಾನಮೇವ ನಾನತಾ, ನಾನಸದ್ದೋ ಪುನ್ನಪುಂಸಕೇ, ಅಬ್ಯಯೇ ತು ನಾನಾ.

೭೬೮. ದ್ವಯಂ ನಿದ್ದಾಪಟಿಕ್ಖೇಪೇ. ಜಾಗರ ನಿದ್ದಕ್ಖಯೇ, ಜಾಗರಮೇವ ಜಾಗರಿಯೋ. ದ್ವಯಂ ಜಲಾದೀನಮವಿಚ್ಛನ್ನಾಯಂ ಸನ್ತತಿಯಂ. ವಹತಿಸ್ಮಾ ಣೋ, ಪವಾಹೋ. ವತು ಆವತ್ತನೇ,ತಿ, ಪವತ್ತಿ.

ತಿಕಂ ವಿತ್ಥಾರೇ. ಅಸು ಖೇಪನೇ, ಣೋ, ಬ್ಯಾಸೋ. ಪಪುಬ್ಬೋ ಪಞ್ಚ ವಿತ್ಥಾರೇ. ಥರ ಸನ್ಥರಣೇ, ಪಾದಿಪುಬ್ಬೋ ಚ ವಿತ್ಥಾರೇ. ತಿಕಂ ಸಂಯಮೇ. ಯಮು ಉಪರಮೇ, ಣೋ, ಯಾಮೋ. ಇತರೇಸು ಅ.

೭೬೯. ದ್ವಯಂ ಗತ್ತಾನಂ ಮದ್ದನೇ. ‘‘ಸಮ್ಬಾಹನೋ’ಙ್ಗಮದ್ದಕೋ’’ತಿ ವೋಪಾಲಿತೋ, ಸಂಪುಬ್ಬೋ ವಾಹ ಪಯತನೇ, ಮದ್ದನೇ ವಾ, ಯು. ಮದ್ದ ಮದ್ದನೇ. ದ್ವಯಂ ನಾನಾರಮ್ಮಣಾದೀಸು ವಿಸಪ್ಪನೇ. ಸರ ಗಮನೇ, ಣ. ಸಪ್ಪ ಗಮನೇ, ಯು, ವಿಸಪ್ಪನಂ.

ದ್ವಯಂ ಪರಿಚಯೇ. ಥು ಅಭಿತ್ಥವೇ. ಚಿ ಚಯೇ. ತಿಕಂ ಸಙ್ಗಮೇ. ಮಿಲ ಸಿಲೇಸನೇ, ಣೋ, ಸಕತ್ಥೇ ಕೋ, ಮೇಲಕೋ. ಸನ್ಜ ಸಙ್ಗೇ, ಣೋ. ಸಂಪುಬ್ಬಾ ಗಮಿತೋ ಅ.

೭೭೦. ಸನ್ನಿಕಟ್ಠಮ್ಹಿ ಸಮೀಪೇ ಸನ್ನಿಧಿಸದ್ದೋ, ಸನ್ನಿಧಾನಂ ಸನ್ನಿಧಿ, ಪುಮೇ, ಠಪನೇಪ್ಯಯಂ. ನಸ ಅದಸ್ಸನೇ, ಣೋ. ದಿಸ ಪೇಕ್ಖನೇ, ಯು, ದಿಸ್ಸಾದೇಸೋ, ಇಸ್ಸತ್ತಂ.

ತಿಕಂ ಧಞ್ಞಾದೀನಂ ಲವನೇ. ಲೂ ಛೇದನೇ, ಅ. ಣಮ್ಹಿ ಅಭಿಲಾವೋ. ಯುಮ್ಹಿ ಲವನಂ. ದ್ವಯಂ ಖಣಪ್ಪತ್ತಿಯಂ. ಪಪುಬ್ಬೋ ಥು ಅಭಿತ್ಥವೇ. ಸರ ಗಮನೇ, ಅವಸರೋ. ಸಮಾತಿ ದ್ವೇ ತುಲ್ಯತ್ಥಾ.

೭೭೧. ಚತುಕ್ಕಂ ಪರಿಯೋಸಾನೇ. ಸಾ ತನುಕರಣೇ, ಯು, ಓಸಾನಂ. ಪರಿಪುಬ್ಬೋ ಪರಿಯೋಸಾನಂ. ಉಕ್ಕಂಸಾತಿಸಯಾ ಪಕಟ್ಠೇಪ್ಯುತ್ತಾ.

ದ್ವಯಂ ಸಣ್ಠಾನೇ. ವಿಸ ಪವೇಸನೇ, ಸನ್ನಿವೇಸೋ. ಠಾ ಗತಿನಿವತ್ತಿಯಂ, ಯು, ಸಣ್ಠಾನಂ. ದ್ವಯಂ ಅಬ್ಭನ್ತರವಾಚಕಂ ಪಾಟಿಪದಿಕಂ. ಅಥ ವಾ ಅಭಿ ಬನ್ಧನೇ, ಅರೋ, ಧಾತ್ವತ್ಥಾನುವತ್ತಕೋ ಅಭಿ, ಅಬ್ಭನ್ತರಂ. ಅಬ್ಭಾಭಾವೇ ಅನ್ತರಂ.

೭೭೨. ತಿಕಂ ಪಾಟಿಹಾರಿಯೇ. ಹಿ ಗತಿಮ್ಹಿ, ಪಟಿತೋ ಹಿಸ್ಸ ಹೇರಣ ಹೀರಣ, ಪಾಟಿಹೇರಂ, ಪಾಟಿಹೀರಂ. ಯದಾದಿನಾ ಹಾರಿಯಞ್ಚ, ಪಾಟಿಹಾರಿಯಂ, ಅಥ ವಾ ಪಟಿಪಕ್ಖೇ ಹರತೀತಿ ಪಾಟಿಹೀರಂ, ಣೋ, ಅಸ್ಸೀ. ಏಕಾರಾದೇಸೇ ಪಾಟಿಹೇರಂ. ಣ್ಯಮ್ಹಿ ಪಾಟಿಹಾರಿಯಂ, ವಿಹತುಪಕ್ಕಿಲೇಸೇನ ಪಚ್ಚಾಹರಿತಬ್ಬಂ ಪವತ್ತೇತಬ್ಬನ್ತಿ ಪಾಟಿಹೀರನ್ತಿಆದಿಪಿ ಕಾತಬ್ಬಂ.

ದ್ವಯಂ ಕತ್ತಬ್ಬಮತ್ತೇ. ಕರಮ್ಹಾ ರಿಚ್ಚ, ಕಿಚ್ಚಂ, ಅವಸ್ಸಂ ಕಾತಬ್ಬೇಪಿ. ಅನೀಯಪಚ್ಚಯೇ ಕರಣೀಯಂ.

ದ್ವಯಂ ಪುಪ್ಫಾದಿನಾ ಉದಕಾದೀನಂ ಪರಿಭಾವನೇ. ಸುನ್ದರಂ ಕರೀಯತೇ ಯೇನಾತಿ ಸಙ್ಖಾರೋ, ಣೋ, ಖರಾದೇಸೋ. ವಸ ನಿವಾಸೇ, ಯು, ವಾಸನಾ, ಕಿಲೇಸಾದೀನಂ ಸತ್ತಿವಿಸೇಸೇಪಿ. ಸಾ ಹಿ ಕುಸಲಾಪಿ ಅತ್ಥಿ ಅಕುಸಲಾಪಿ ಅಬ್ಯಾಕತಾಪಿ, ತಥಾ ಪಹಾತಬ್ಬಾಪಿ ಅತ್ಥಿ ಅಪ್ಪಹಾತಬ್ಬಾಪಿ. ತತ್ಥ ಯಾ ಕುಸಲಾಬ್ಯಾಕತಾ, ನ ಸಾ ಪಹಾತಬ್ಬಾ. ಯಾ ಪನ ಅಕುಸಲಾ, ಸಾ ಸುಖುಮತರತಾಯ ಭಗವತೋಯೇವ ಅರಿಯಮಗ್ಗೇನ ಪಹಾತಬ್ಬಾ, ನಾಞ್ಞೇಸಂ. ಏವಂ ಸನ್ತೇ ಅರಿಯಾನಮ್ಪಿ ಅಪಾಯೂಪಪತ್ತಿ ಸಿಯಾತಿ? ನ ಸಿಯಾ, ಸಬ್ಬೇಸಮೇವ ಅರಿಯಾನಂ ಅಪಾಯೂಪಪತ್ತಿಹೇತುಕಾಯ ವಾಸನಾಯ ಪಹೀನತ್ತಾ. ದುವಿಧಾ ಹಿ ಅಕುಸಲಾ ವಾಸನಾ ಕಾಯವಚೀಪಯೋಗಹೇತುಭೂತಾ ಚ ಅಪಾಯೂಪಪತ್ತಿಹೇತುಭೂತಾ ಚ. ತತ್ಥ ಪುರಿಮಾ ಭಗವತೋಯೇವ ಅರಿಯಮಗ್ಗೇನ ಪಹಾತಬ್ಬಾ, ಇತರಾ ಸಬ್ಬೇಸಮ್ಪಿ ಅರಿಯಮಗ್ಗೇನಾತಿ, ತಸ್ಮಾ ಯಂ ವುತ್ತಂ ‘‘ಬುದ್ಧಾವ ಸವಾಸನೇ ಕಿಲೇಸೇ ಪಜಹಿತುಂ ಸಕ್ಕೋನ್ತಿ, ನಾಞ್ಞೇ’’ತಿ, ತಂ ಕಾಯವಚೀಪಯೋಗಹೇತುಭೂತಂ ವಾಸನಂ ಸನ್ಧಾಯ ವುತ್ತಂ, ನೇತರನ್ತಿ ನಿಟ್ಠಮೇತ್ಥಾವಗನ್ತಬ್ಬಂ.

೭೭೩. ತಿಕಂ ಧಞ್ಞಾದೀನಂ ಪೂತಕರಣೇ. ಪೂ ಪವನೇ, ಯು. ಅಪಚ್ಚಯೇ ಪವೋ. ಣಮ್ಹಿ ನಿಪ್ಪಾವೋ. ದ್ವಯಂ ತಸರೇ. ತಸ ಉಬ್ಬೇಗೇ, ಅರೋ. ಸುತ್ತೇನ ವೇಠನಂ ಸುತ್ತವೇಠನಂ.

ದ್ವಯಂ ದುಗ್ಗಸಞ್ಚಾರೇ. ಸಙ್ಕಮ್ಯತೇ ಯೇನಾತಿ ಸಙ್ಕಮೋ. ಸಞ್ಚರನ್ತಿ ಅನೇನಾತಿ ಸಞ್ಚಾರೋ, ದುಗ್ಗಸ್ಸ ಸಞ್ಚಾರೋ ದುಗ್ಗಸಞ್ಚಾರೋ. ದ್ವಯಂ ಪಠಮಾರಮ್ಭೇ. ಪಠಮಂ ಕಮೋ ಪಕ್ಕಮೋ, ಉಪಕ್ಕಮೋ ಚ.

೭೭೪. ತಿಕಂ ಪಾಠೇ. ಪಠ ವಿಯತ್ತಿಯಂ ವಾಚಾಯಂ, ಣೋ, ಪಾಠೋ. ನಿಪುಬ್ಬೇ ನಿಪಾಠೋ, ಅಮ್ಹಿ ನಿಪಠೋ. ದ್ವಯಂ ಅಪಹರಿತಾದಿನೋ ವತ್ಥುನೋ ಅನ್ವೇಸನೇ. ಚಿ ಚಯೇ, ಚಯನಮತ್ರ ಅನ್ವೇಸನಂ. ಮಗ್ಗ ಅನ್ವೇಸನೇ, ಚುರಾದಿ, ಯು, ಏತೇ ದ್ವೇ ಅಪುಮೇ, ಸಂವಿಕ್ಖನಂಪ್ಯತ್ರ.

ಚತುಕ್ಕಂ ಆಲಿಙ್ಗನೇ. ಲಿಙ್ಗ ಗತ್ಯತ್ಥೋ. ಸನ್ಜ ಸಙ್ಗೇ. ಸಿಲಿಸ ಆಲಿಙ್ಗನೇ. ಗುಹ ಸಂವರಣೇ, ಯು, ಪರಿರಮ್ಭೋಪ್ಯತ್ರ. ರಮ್ಭ ಸದ್ದೇ.

೭೭೫. ಚತುಕ್ಕಂ ಆಲೋಕನೇ. ಲೋಕ ದಸ್ಸನೇ. ಝೇ ಚಿನ್ತಾಯಂ. ಇಕ್ಖ ದಸ್ಸನಙ್ಕೇಸು. ದಿಸ ಪೇಕ್ಖನೇ, ಸಬ್ಬತ್ರ ಭಾವೇ ಯು.

ಚತುಕ್ಕಂ ನಿರಾಕರಣೇ. ದಿಸ ಪೇಕ್ಖನೇ. ಅಸು ಖೇಪನೇ, ನಿರಸನಂ. ಪತಿ ಆಪುಬ್ಬೋ ಖಾಕಥನೇ. ಕರ ಕರಣೇ, ಇತ್ಥಿಯಮತಿಯವೋ ವಾ,ತಿ.

೭೭೬. ಪಞ್ಚಕಂ ವಿಪರಿಯಯೇ. ವಿಪರಿಪುಬ್ಬೋ ಅಸು ಖೇಪನೇ, ಣೋ, ವಿಪಲ್ಲಾಸೋ. ಅಞ್ಞೇನ ಪಕಾರೇನ ಭವನಂ ಅಞ್ಞಥಾಭಾವೋ. ವಿಪರಿಪುಬ್ಬೋ ಅಯ ಗಮನೇ, ವಿಪರಿಯಯೋ. ಅಸು ಖೇಪನೇ, ವಿಪರಿಯಾಸೋ.

ತಿಕಂ ಅತಿಕ್ಕಮೇ. ಅತಿಕ್ಕಮನಂ ಅತಿಕ್ಕಮೋ. ಅತಿಕ್ಕಮ್ಮ ಪತನಂ ಅತಿಪಾತೋ. ಅಯ ಗಮನೇ, ಉಪಚ್ಚಯೋ.

ಸಂಕಿಣ್ಣವಗ್ಗವಣ್ಣನಾ ನಿಟ್ಠಿತಾ.