೩. ಸಾಮಞ್ಞಕಣ್ಡ

೧. ವಿಸೇಸ್ಯಾಧೀನವಗ್ಗವಣ್ಣನಾ

೬೯೧. ಇಹ ವಕ್ಖಮಾನೇ ಸಾಮಞ್ಞಕಣ್ಡೇ ಸಾಙ್ಗೋಪಾಙ್ಗೇಹಿ ಅಙ್ಗಉಪಾಙ್ಗದ್ವಯಸಹಿತೇಹಿ ವಿಸೇಸ್ಯಾಧೀನೇಹಿ ವಿಸೇಸ್ಯಾಯತ್ತೇಹಿ ವಿಸೇಸನಸದ್ದೇಹಿ ಸೋಭನಾದೀಹಿ ಸಂಕಿಣ್ಣೇಹಿ ಅಞ್ಞಮಞ್ಞವಿಜಾತಿಯತ್ಥೇಹಿ ದಬ್ಬಕ್ರಿಯಾಗುಣಾದೀಹಿ ಅನೇಕತ್ಥೇಹಿ ಸಮಯವಣ್ಣಾದೀಹಿ ಅಬ್ಯಯೇಹಿ ಚಿರಸ್ಸಮಾದೀಹಿ ಚ ಕಮಾ ಕಮತೋ ವಗ್ಗಾ ಕಥ್ಯನ್ತೇ, ತೇ ಚ ಪುಬ್ಬವಗ್ಗಸನ್ನಿಸ್ಸಯಾ, ತಥಾ ಹಿ ಸೋಭನಾದಯೋ ದೇವಮನುಸ್ಸಾದೀಸು ವಿಸೇಸನಭಾವೇನ ಸಮ್ಬನ್ಧಾ, ಕ್ರಿಯಾದಯೋ ತು ತದಾಧಾರತಾಯ, ಸಮಯಾದಯೋ ವಾಚಕತಾಯ, ಚಿರಸ್ಸಮಾದಯೋ ತಂಕ್ರಿಯಾವಿಸೇಸನಭಾವೇನ, ತತೋಯೇವ ಸಾಧಾರಣತ್ತಾ ಸಾಮಞ್ಞಕಣ್ಡಮಿದಂ.

೬೯೨. ಇಹ ಸತ್ಥೇ ಭಿಯ್ಯೋ ರೂಪನ್ತರಾ ಲಿಙ್ಗವಿನಿಚ್ಛಯೋ, ಸೋ ಅತ್ರಾಪಿ ವಗ್ಗೇ ಭಿಯ್ಯೋ ರೂಪನ್ತರಾಯೇವಾತಿ ವಿಪ್ಪಟಿಪತ್ತಿನಿರಾಸತ್ಥಂ ಬ್ಯಾಪಕನ್ಯಾಯಮಾಹ ‘‘ಗುಣಿ’’ಚ್ಚಾದಿನಾ. ತಸ್ಸತ್ಥೋ – ವಿಸೇಸನಭೂತಾ ಸಬ್ಬೇ ಗುಣಸದ್ದಾ, ದಬ್ಬಸದ್ದಾ, ಕ್ರಿಯಾಸದ್ದಾ ಚ ವಿಸೇಸ್ಯಾಧೀನಭಾವೇನ ಹೇತುನಾಯೇವ, ನ ಭಿಯ್ಯೋ ರೂಪನ್ತರಾಪಿ ವಿಸೇಸನಸದ್ದೇನ ಸಮಲಿಙ್ಗಿನೋ ಸಿಯುನ್ತಿ, ಯಥಾ – ಸೋಭನಾ ಇತ್ಥೀ, ಸೋಭನೋ ಪುರಿಸೋ, ಸೋಭನಂ ಚಿತ್ತಂ.

೬೯೩-೬೯೬. ಸುಭನ್ತಂ ಸೋಭನೇ. ಸುಭ ಸೋಭನೇ, ಯು. ರುಚ ದಿತ್ತಿಯಂ, ಇರೋ. ಸಾಧ ಸಂಸಿದ್ಧಿಯಂ, ಉ. ಮನಂ ತೋಸೇತೀತಿ ಮನುಞ್ಞಂ. ಞಾ ಪರಿಮಾಣತೋಸನನಿಸಾಮನೇಸು, ಅನ್ತಸ್ಸುಕಾರೋ, ಮನಂ ಆ ಭುಸೋ ತೋಸೇತೀತಿ ವಾ ಮನುಞ್ಞಂ, ತದಾ ‘‘ಮನೋ ಅಞ್ಞ’’ನ್ತಿ ಛೇದೋ, ಆಲೋಪೋ. ಚರ ಗತಿಭಕ್ಖನೇಸು, ಣ್ವು, ಚರತಿ ಚಿತ್ತಮೇತ್ಥಾತಿ ಚಾರು. ಸುಟ್ಠು ದರೀಯತೇ ಸುನ್ದರಂ, ದರ ದಾರಣೇ. ವಗ್ಗ ಗಮನೇ, ಉ, ವಗ್ಗು. ಮನೋ ರಮತಿ ಅಸ್ಮಿಂ. ಕಮು ಇಚ್ಛಾಯಂ, ತೋ. ಹರತಿ ಚಿತ್ತಂ ಹಾರೀ, ಣೀ. ಮನ ಞಾಣೇ, ಜು, ಮನೋ ಜವತಿ ಯಸ್ಮಿಂ ವಾ ಮಞ್ಜು, ನಲೋಪೋ. ಪಿಯಸೀಲಯುತ್ತತಾಯ ಪೇಸಲಂ, ಪಿಯಸ್ಸ ಪೇ, ಈಸ್ಸತ್ತಂ. ಭದಿ ಕಲ್ಯಾಣೇ, ದೋ. ವಾ ಗತಿಯಂ, ಮೋ. ಕಲ ಸಙ್ಖ್ಯಾನೇ, ಯಾಣೋ. ಮನಂ ಅಪ್ಪೇತಿ ವಡ್ಢೇತೀತಿ ಮನಾಪಂ, ಮನೋ ಅಪ್ಪೋತಿ ಯಸ್ಮಿನ್ತಿ ವಾ ಮನಾಪಂ, ಆಪ ಪಾಪುಣನೇ, ಅಪಾದಿಪುಬ್ಬೋ ಚ. ಲಭಿತಬ್ಬನ್ತಿ ಲದ್ಧಂ, ತೋ, ಸಕತ್ಥೇ ಕೋ. ಸುಭತೀತಿ ಸುಭಂ, ಸುನ್ದರೇನ ಸಭಾವೇನ ಭವತೀತಿ ವಾ ಸುಭಂ.

ಪುಙ್ಗವನ್ತಂ ಉತ್ತಮೇ, ಉಬ್ಭುತೋ ಅತ್ಯತ್ಥಂ ಉತ್ತಮೋ, ಉಭಸದ್ದತೋ ಉಬ್ಭುತತ್ಥತೋ ವಿಸೇಸತ್ಥೇ ತಮೋ, ಉಗ್ಗತತಮತ್ತಾ ವಾ ಉತ್ತಮೋ. ವರ ಪತ್ಥನಾಯಂ, ಪವರೋ. ಇಟ್ಠಪಚ್ಚಯೇ ವುಡ್ಢಸ್ಸ ಜಾದೇಸೋ, ಜೇಟ್ಠೋ. ಪಕಟ್ಠಂ ಮುಖಂ ಆರಮ್ಭೋ ಅಸ್ಸ ಪಮುಖೋ. ನತ್ಥಿ ಉತ್ತರೋ ಉತ್ತಮೋ ಯಸ್ಮಾ ಅನುತ್ತರೋ. ಪಮುಖೋ ಚ ಅನುತ್ತರೋ ಚಾತಿ ದ್ವನ್ದೋ. ಅಪಾದಿಪುಬ್ಬೇ ವರೋ. ಮುಖಮಿವ ಮುಖ್ಯೋ, ಇವತ್ಥೇ ಯೋ. ಪದಧಾತೀತಿ ಪಧಾನಂ, ಯು. ಪಮುಖಭಾವೇ ತಿಟ್ಠತೀತಿ ಪಾಮೋಕ್ಖೋ, ಉಭಯತ್ರಾಪಿ ವುಡ್ಢಿ. ಪಕಟ್ಠಂ ರಾತೀತಿ ಪರಂ, ಣೋ. ‘‘ಅಗ್ಗ’’ನ್ತಿ ಜಾನಿತಬ್ಬನ್ತಿ ಅಗ್ಗಞ್ಞಂ, ‘‘ಅಗ್ಗ’’ನ್ತಿ ಪಮಾನಿತಬ್ಬನ್ತಿ ವಾ ಅಗ್ಗಞ್ಞಂ. ಉತ್ತರೋ ಉತ್ತಮಸದಿಸೋ. ಪಧಾನಭಾವಂ ನೀತಂ ಪಣೀತಂ, ನೀ ನಯೇ, ಕಮ್ಮನಿ ಣೋ. ಪರಂ ಪಚ್ಚನೀಕಂ ಮಾರೇತೀತಿ ಪರಮಂ, ಪಕಟ್ಠಭಾವೇ ರಮತೀತಿವಾ ಪರಮಂ, ಣೋ. ಇಯಿಟ್ಠೇಸು ಪಸತ್ಥಸ್ಸ, ವುಡ್ಢಸ್ಸ ಚ ಸೋ, ಸೇಯ್ಯೋ, ಸೇಟ್ಠೋ ಚ, ‘‘ಕ್ವಚಾಸವಣ್ಣಂ ಲುತ್ತೇ’’ತಿ ಇಸ್ಸೇ. ಗಾಮಂ ನೇತೀತಿ ಗಾಮಣಿ, ‘‘ತಸ್ಸೀಲಾದೀಸು ಣೀ ತ್ವಾವೀ ಚಾ’’ತಿ ಣೀ, ರಸ್ಸೋ, ಗಾಮಣಿ. ಸನ್ತತಮತಾಯ ಸತ್ತಮೋ, ಸನ್ತತೋ ತಮೋ, ಸನ್ತಸ್ಸ ಚ ಸೋ. ವಿಸೇಸೀಯತೇತಿ ವಿಸಿಟ್ಠೋ, ಸಿಸ ವಿಸೇಸನೇ, ತೋ. ಅರ ಗಮನೇ, ಣ್ಯೋ, ಇಕಾರಾಗಮೋ, ಅರಿಯೋ. ನತ್ಥಿ ಅಗ್ಗೋ ಯಸ್ಮಾ ನಾಗೋ, ದೀಘಾದಿ, ಗಲೋಪೋ ಚ. ಇ ಗತಿಯಂ, ಣ್ವು, ಇಸ್ಸೇ, ಅಲೋಪೋ ಚ, ಏಕೋ, ಸದಿಸರಹಿತತಾಯ ವಾ ಏಕೀಭಾವೇ ತಿಟ್ಠತೀತಿ ಏಕೋ, ಕೋ. ಉಸ್ಸಾಪೇತಿ ಪಚ್ಚನೀಕೇತಿ ಉಸಭೋ, ಉಸ ದಾಹೇ, ಅಭೋ. ಅಜ ಗಮನೇ, ಅ, ಜಸ್ಸ ಗೋ, ದ್ವಿತ್ತಂ, ಅಗ್ಗೋ. ಮುಚ ಮೋಚನೇ, ಹೀನಮಜ್ಝಿಮಭಾವೇಹಿ ಮುಚ್ಚತೀತಿ ಮೋಕ್ಖೋ, ತೋ, ತಸ್ಸ ಖೋ. ಮೋಕ್ಖ ಮೋಚನೇ ವಾ, ಅ. ಪಧಾನಭಾವಂ ಗಚ್ಛತೀತಿ ಪುಙ್ಗವೋ, ಯದಾದಿ, ಪುಕ್ಖಲೋಪ್ಯತ್ರ, ಪುಸ ವುಡ್ಢಿಮ್ಹಿ, ಅಲೋ, ಸಸ್ಸ ಖೋ, ಅಸರೂಪದ್ವಿತ್ತಂ. ಏತೇ ಚುತ್ತಮಾದಯೋ ಸಮಾಸಗಾಪಿ ಅಸಮಾಸಗಾಪಿ ಉತ್ತಮತ್ಥವಾಚಕಾ. ಅಮರಕೋಸೇ ಪನ ನಾಗೋಸಭಪುಙ್ಗವಾನಂ ಸಮಾಸಗತ್ತೇಯೇವ ಉತ್ತಮತ್ಥವಾಚಕತಾ ವುತ್ತಾ, ವುತ್ತಞ್ಚ –

‘‘ಉತ್ತರಸ್ಮಿಂ ಪದೇ ಬ್ಯಗ್ಘ-ಪುಙ್ಗವೋ’ಸಭಕುಞ್ಜರಾ;

ಸೀಹಸದ್ದೂಲನಾಗಾದ್ಯಾ, ಪುಮೇ ಸೇಟ್ಠತ್ಥಗೋಚರಾ’’ತಿ [ಅಮರ ೨೧.೫೯].

ತಸ್ಸತ್ಥೋ – ಬ್ಯಗ್ಘಾದಯೋ ಕಮ್ಮಧಾರಯಸಮಾಸೇ ಸತಿ ಉತ್ತರಪದೀಭೂತಾ ಸೇಟ್ಠತ್ಥವಿಸಯಾ ಪುಬ್ಬಪದಸ್ಸ ಸೇಟ್ಠತ್ಥವಾಚಕಾ ಪುಲ್ಲಿಙ್ಗಾ ಚ ಭವನ್ತಿ, ಯಥಾ ‘‘ಪುರಿಸಬ್ಯಗ್ಘೋ, ಮುನಿಪುಙ್ಗವೋ’’ಇಚ್ಚಾದಿ. ಸೀಹಾದಯೋ, ಆದಿನಾ ವರಾಹಪುಣ್ಡರೀಕಧೋರಯ್ಹಸೋವೀರಾದಯೋ ಚ ಸಮಾಸಗಾ ಕಮ್ಮಧಾರಯಸಮಾಸೇ ಉತ್ತರಪದಭೂತಾ ಸೇಟ್ಠತ್ಥವಾಚಕಾ ಪುಮೇವ ಭವನ್ತಿ, ಯಥಾ ‘‘ಸಕ್ಯಸೀಹೋ, ಕವಿಕುಞ್ಜರೋ, ಪುರಿಸಸದ್ದೂಲೋ, ಪುರಿಸವರಾಹೋ’’ಇಚ್ಚಾದಿ.

೬೯೭. ಚಿತ್ತಸ್ಸ, ಅಕ್ಖಿನೋ ಚ ಪೀತಿಜನಕಂ ವತ್ಥು ಅಬ್ಯಾಸೇಕಂ, ಅಸೇಚನಞ್ಚ ನಾಮ, ನ ಬ್ಯಾಸಿಞ್ಚನ್ತಿ ನಕ್ಖರನ್ತಿ ನಯನಮನಾನಿ ಯಸ್ಮಾತಿ ಅಬ್ಯಾಸೇಕಂ, ಅಸೇಚನಞ್ಚ, ನ ಬ್ಯಾಸಿಞ್ಚನ್ತಿ ಚ ಯಸ್ಮಿಂ ಆಗನ್ತುಕಭೂತಾನಿ ಅಞ್ಞರಸಾನೀತಿ ವಾ ಅಬ್ಯಾಸೇಕಂ, ಅಸೇಚನಞ್ಚ. ಣೋ, ಯು ಚ.

ಛಕ್ಕಂ ಇಟ್ಠೇ ವತ್ಥುಮ್ಹಿ. ಇಚ್ಛಿತಬ್ಬಂ, ಏಸಿತಬ್ಬನ್ತಿ ವಾ ಇಟ್ಠಂ, ಇಸು ಇಚ್ಛಾಯಂ, ಇಸ ಗವೇಸನೇ ಚ, ತೋ. ಸುಭತ್ತಂ ಗಚ್ಛತೀತಿ ಸುಭಗಂ, ಕ್ವಿ. ಹದಯೇ ಸಾಧು, ಹದಯಸ್ಸ ವಾ ಪಿಯನ್ತಿ ಹಜ್ಜಂ, ಣೋ, ದನ್ತಸ್ಸ ಲೋಪೋ, ದ್ಯಸ್ಸ ಜ್ಜೋ. ದಯಿತಬ್ಬಂ ಆದಾತಬ್ಬನ್ತಿ ದಯಿತಂ, ತೋ. ವಲ್ಲ ಸಂವರಣೇ, ಕಮ್ಮನಿ ಅಭೋ. ಪಿಯಾಯಿತಬ್ಬನ್ತಿ ಪಿಯಂ,ಪೀ ತಪ್ಪನಕನ್ತೀಸು, ಣ್ಯೋ, ರಸ್ಸಾದಿ.

೬೯೮. ತಿಕಂ ತುಚ್ಛೇ. ತುಚ ವಿನಾಸೇ, ಛೋ. ರಿಚ ವಿಯೋಜನಸಮ್ಬಜ್ಝನೇಸು, ಸಮ್ಬಜ್ಝನಂ ಮಿಸ್ಸನಂ, ತೋ, ಸಕತ್ಥೇ ಕೋ. ಸುನಸ್ಸ ಹಿತಂ ಸುಞ್ಞಂ, ಯೋ, ನ್ಯಸ್ಸ ಞ್ಞೋ, ಸುನ ಗತಿಯಂ ವಾ, ಯೋ. ದ್ವಯಂ ಅಸಾರೇ. ಫಲ ನಿಪ್ಫತ್ತಿಯಂ, ಉ, ಗು ವಾ. ಪುಬ್ಬತ್ರ ಗೋನ್ತೋ, ಅಸ್ಸೇ, ಫೇಗ್ಗು.

ತಿಕಂ ಪವಿತ್ತೇ. ಮೇಧ ಹಿಂಸಾಸಙ್ಗಮೇಸು, ಮೇಧೀಯತೇ ಸಙ್ಗಮೀಯತೇ ಮೇಜ್ಝಂ, ಣ್ಯೋ, ಝಸ್ಸ ಝೋ, ಅಸರೂಪದ್ವಿತ್ತಂ. ಪು ಪವನೇ, ತೋ, ದೀಘಾದಿ. ವುಡ್ಢಾವಾದೇಸೋ, ಇಕಾರಾಗಮೋ ಚ. ದ್ವಯಂ ಅವಿರದ್ಧೇ. ನ ವಿರಜ್ಝತೀತಿ ಅವಿರದ್ಧೋ, ರಧ ಹಿಂಸಾಪರಾಧಾಪಗಮನೇಸು, ತೋ. ‘‘ಧಢಭಹೇಹಿ ಧಢಾ ಚೇ’’ತಿ ತಸ್ಸ ಧೋ. ಪಣ ಬ್ಯವಹಾರಥುತೀಸು, ಣ್ವು, ವಿರದ್ಧವೋಹಾರೇನ ನ ಪಣಾಮೇತೀತಿ ಅಪಣ್ಣಕೋ.

೬೯೯-೭೦೧. ದ್ವಯಂ ಜಾತ್ಯಾಚಾರಾದಿನಾ ಅನಿನ್ದಿತೇ. ಉಪುಬ್ಬೋ, ಪಪುಬ್ಬೋ ಚ ಕಸ ವಿಲೇಖನೇ, ಹಿಂಸಾಯಞ್ಚ, ತೋ, ‘‘ಸಾದಿಸನ್ತಪುಚ್ಛಭನ್ಜಹಂಸಾದೀಹಿ ಟ್ಠೋ’’ತಿ ಸಹಾದಿಬ್ಯಞ್ಜನೇನ ತಸ್ಸ ಟ್ಠೋ.

ಗಾರಯ್ಹನ್ತಂ ಜಾತ್ಯಾಚಾರಾದಿನಾ ನಿನ್ದಿತೇ. ನಿಹೀಯತೇತಿ ನಿಹೀನೋ, ಹಾ ಚಾಗೇ, ಇನೋ, ದೀಘೋ. ಅಪಾದಿಪುಬ್ಬೇ ಹೀನೋ. ಲಮ ನಿನ್ದಾಯಂ, ಣ್ವು, ಲಾಮಕೋ. ಕಿಟ ಗತಿಯಂ, ಪತಿ ನಿಪುಬ್ಬೋ ತು ನಿನ್ದಾಯಂ, ಠೋ, ಪತಿಕಿಟ್ಠಂ, ನಿಕಿಟ್ಠಞ್ಚ. ಇತ್ತರಸದ್ದೋ ಲಾಮಕತ್ಥವಾಚಕೋ ಪಾಟಿಪದಿಕೋ, ‘‘ಜಾತ್ಯಾಚಾರಾದೀಹಿ ನಿಹೀನೋಯ’’ನ್ತಿ ಅವದಿತಬ್ಬೋತಿ ಅವಜ್ಜೋ, ತಬ್ಭಾವತ್ಥೋ ಚೇತ್ಥ ಅಕಾರೋ. ವದ ವಿಯತ್ತಿಯಂ ವಾಚಾಯಂ, ಣ್ಯೋ, ದ್ಯಸ್ಸ ಜ್ಜೋ. ಕುಚ್ಛಾ ಸಞ್ಜಾತಾ ಅಸ್ಸ ಕುಚ್ಛಿತೋ. ಅಧೋಭಾಗೇ ಜಾತೋ ಅಧಮೋ, ಓಸ್ಸತ್ತಂ. ಉಮ ನಿನ್ದಾಯಂ, ಕಮ್ಮೇ ಅ, ಸಕತ್ಥೇ ಕೋ, ಉಸ್ಸೋ, ಓಮಕೋ. ಗರಹಿತಬ್ಬೋತಿ ಗಾರಯ್ಹೋ, ಗರಹ ನಿನ್ದಾಯಂ, ಣ್ಯೋ, ವಣ್ಣವಿಪರಿಯಯೋ.

ದ್ವಯಂ ಮಲಯುತ್ತೇ. ಮಲಯುತ್ತತಾಯ ಮಲೀನೋ, ಇನೋ, ದೀಘೋ. ಅಸ್ಸತ್ಥ್ಯತ್ಥೇ ಈ, ಮಸಪಚ್ಚಯೇ ಮಲೀಮಸೋ, ಕಚ್ಚರಂ, ಮಲದೂಸಿತಮ್ಪಿ, ಕುಚ್ಛಿತಂ ಚರತೀತಿ ಕಚ್ಚರಂ.

ತಿಪಾದಂ ವಿಪುಲೇ. ಬ್ರಹ ವುದ್ಧಿಯಂ, ರಾಜಾದಿ, ಬ್ರಹಾ. ಮಹ ಪೂಜಾಯಂ, ಅನ್ತೋ. ಪುಲ ಮಹತ್ತೇ, ವಿಪುಲಂ. ಸಲ ಗಮನೇ, ವಿಸಾಲಂ, ಣೋ. ಪಥ ಸಙ್ಖ್ಯಾನೇ, ಉಲೋ, ಅಸ್ಸು, ಪುಥುಲಂ, ಉಮ್ಹಿ ಪುಥು. ಗರ ಸೇಚನೇ, ಉ, ಗರು. ಅರ ಗಮನೇ, ಉ, ಅಸ್ಸು, ಉರು. ತನು ವಿತ್ಥಾರೇ, ತೋ, ಇಣ್ಣಾದೇಸೋ, ತಸ್ಸ ಥೋ, ಅಸ್ಸಿ, ಅಸರೂಪದ್ವಿತ್ತಂ, ವಿತ್ಥಿಣ್ಣಂ.

ವಠರನ್ತಂ ಥೂಲೇ. ಪೀ ತಪ್ಪನಕನ್ತೀಸು, ಇನೋ. ಥೂಲ ಪರಿಬ್ರೂಹನೇ, ಅ. ಪೀಧಾತುತೋ ಈವರೋ, ಪೀವರಂ. ಲಪಚ್ಚಯೇ ಥುಲ್ಲಂ, ರಸ್ಸಾದಿ. ವದ ವಿಯತ್ತಿಯಂ ವಾಚಾಯಂ, ವದತೀತಿ ವಠರಂ, ಅರೋ, ದಸ್ಸ ಠೋ. ಥೂಲಮುಪಚಿತಮಂಸವಿಪುಲಾಯತಮಂಸಾದಿ.

ದ್ವಯಂ ಸನ್ನಿಚಿತೇ. ಆನಿಪುಬ್ಬೋ ಚಿ ಚಯೇ, ಕಮ್ಮೇ ತೋ, ಆಚಿತಂ, ನಿಚಿತಞ್ಚ.

೭೦೨. ಸಿಲೋಕೋ ಸಬ್ಬಸ್ಮಿಂ. ಸರತೀತಿ ಸಬ್ಬಂ, ವೋ, ರಸ್ಸ ಚ ವೋ. ಸಂಪುಬ್ಬೋ ಅಸು ಖೇಪನೇ, ತೋ, ಸಮತ್ತಂ, ಅಥ ವಾ ಸಮ ತಿಮ ವೇಕಲ್ಲಬ್ಯೇ, ತೋ, ಸಮತ್ತಂ. ನ ಖಿಯತೀತಿ ಅಖಿಲಂ, ಲೋ, ಅಖಿಲಂ, ನಿಖಿಲಞ್ಚ ತಥಾ. ಸಕ ಸತ್ತಿಯಂ, ಅಲೋ, ಕಲಾಭಿ ಅವಯವೇಹಿ ಸಹ ವತ್ತತೇತಿ ವಾ ಸಕಲಂ. ಸೇಸತೋ ಅವಸಿಟ್ಠತೋ ನಿಗ್ಗತಂ ನಿಸ್ಸೇಸಂ. ಕಸ ಗಮನೇ, ಇನೋ, ಣತ್ತಂ, ಕಸಿಣಂ. ನ ಸೇಸಂ ಅವಸಿಟ್ಠಂ ಅಸೇಸಂ. ಅಗ್ಗೇನ ಸಿಖರೇನ ಸಙ್ಗತಂ ಸಮಗ್ಗಂ. ಕತೇ ಸಮಾಸೇ ಪುಬ್ಬನಿಪಾತೋ ಅಭಿಧಾನಾ. ಊನ ಪರಿಹಾನೇ, ನ ಊನಂ ಅಸ್ಮಿಂ ಅನೂನಕಂ, ಕೋ.

೭೦೩. ಬಹುಲನ್ತಂ ಬಹುತ್ತೇ, ಭಾವೇತಿ ವಡ್ಢೇತೀತಿ ಭೂರಿ, ಭೂ ಸತ್ತಾಯಂ, ರಿ, ಭೂರಿ, ದೀಘಾದಿ, ರಸ್ಸನ್ತೋ, ಈಮ್ಹಿ ಭೂರೀ, ಮೇಧಾ. ಪಹು ಸತ್ತಿಯಂ, ತೋ, ಉಕಾರಾಗಮೋ, ಪಪುಬ್ಬೋ ಹೂ ಸತ್ತಾಯಂ ವಾ, ರಸ್ಸೋ. ಪಚಿ ವಿತ್ಥಾರೇ, ಉರೋ, ಪಚುರಂ. ಭೀ ಭಯೇ, ಭಾಯತಿ ಯಸ್ಮಾತಿ ಭಿಯ್ಯೋ, ದ್ವಿತ್ತಂ. ಸಮ್ಪಹೋತೀತಿ ಸಮ್ಪಹುಲಂ, ಲೋ. ಬಹ ವುಡ್ಢಿಯಂ, ಉ, ಬಹು. ಯೇಭುಯ್ಯಸದ್ದೋ ಬಹುಲತ್ಥವಾಚಕೋ ಪಾಟಿಪದಿಕೋ. ಬಹೂ ಅತ್ಥೇ ಲಾಭೀತಿ ಬಹುಲಂ.

ದ್ವಯಂ ಬಹಿಗತೇ. ಬಹಿ ಜಾತಂ ಬಾಹಿರಂ, ಇರಣ.

೭೦೪-೭೦೬. ಯೇಸಂ ಪದತ್ಥಾನಂ ಮತ್ತಂ ಪಮಾಣಂ ಸತಾದಿತೋ ಪರಂ ಅಧಿಕಂ ಭವತಿ, ತೇ ಪರೋಸತಾದೀ. ಆದಿನಾ ಪರೋಸಹಸ್ಸಾದಿ. ಸತತೋ ಪರೋ ಪರೋಸತಂ. ಸಹಸ್ಸತೋ ಪರೋ ಪರೋಸಹಸ್ಸಂ, ಪರಸ್ಸ ಪುಬ್ಬನಿಪಾತೋ ಅಭಿಧಾನಾ ಪರಸದ್ದಾ ಓಕಾರಾಗಮೋ. ಪಜ್ಜಂ ಅಪ್ಪೇ. ಪರಿತೋ ಅತ್ತಂ ಖಣ್ಡಿತಂ ಪರಿತ್ತಂ. ಸುಖ ತಕ್ರಿಯಾಯಂ, ತಕ್ರಿಯಾ ಸುಖನಂ, ಉಮೋ. ಸುಚ ಸೋಚನೇ ವಾ. ಖುದ ಪಿಪಾಸಾಯಂ, ದೋ, ಖುದ್ದಂ. ಥುಚ ಪಸಾದೇ, ಣೋ. ಅಲ ಭೂಸನಪರಿಯತ್ತಿನಿವಾರಣೇಸು, ಪೋ, ಲಸ್ಸ ಪೋ, ಅಪ್ಪಂ. ಕಿಸ ತನುಕರಣೇ, ಣೋ. ತನು ವಿತ್ಥಾರೇ. ಚಿ ಚಯೇ, ಉಲೋ, ದ್ವಿತ್ತಂ, ಚುಲ್ಲಂ, ನೀಚೇ ಪನ ಚುಲ್ಲೋ. ಮಾ ಮಾನೇ, ಛದಾದೀಹಿ ತೋ. ರಸ್ಸಾದಿ, ಮತ್ತಾ, ಇತ್ಥಿಯಂ. ಲಿಸ ಅಪ್ಪೀಭಾವೇ, ಅ. ಲೂ ಛೇದನೇ, ಲುಯತೇತಿ ಲವೋ, ಅ. ಅಣ ಗತ್ಯತ್ಥೋ, ಉ. ಕಣ ಸದ್ದೇ, ಅ, ಕಣೋ. ಲವಾದೀಹಿ ಸಹ ಕಣೋ ಪುಮೇ, ವುತ್ತಞ್ಚ ಅಮರಕೋಸೇ ‘‘ಪುಮೇ ಲವಲೇಸಕಣಾಣವೋ’’ತಿ [ಅಮರ ೨೧.೬೨].

ಞತ್ತನ್ತಂ ಸಮೀಪೇ. ಸಙ್ಗತಾ ಆಪೋ ಯಸ್ಮಿಂ ಸಮೀಪಂ, ಆಸ್ಸೀ. ಪಾದಿತೋ ಯದಾದಿನಾ ಕಟೋ, ನಿಕಟೋ, ನತ್ಥಿ ಕಟೋ ಆವರಣಂ ಏತಸ್ಸಾತಿ ವಾ ನಿಕಟೋ. ಸದಸ್ಮಾ ತೋ, ಆಸನ್ನೋ. ಕಣ್ಠಂ ಸಮೀಪಂ ಉಪಗತಂ ಉಪಕಟ್ಠೋ. ‘‘ಕಣ್ಠೋ ಗಲೇ ಸನ್ನಿಟ್ಠಾನೇ, ಸದ್ದೇ ಮದನಪಾದಪೇ’’ತಿ ಹಿ ನಾನತ್ಥಸಙ್ಗಹೋ, ಇಧ ಪನ ಕಣ್ಠಸ್ಸ ಕಟ್ಠಾದೇಸೋ, ಣಲೋಪೋ ವಾ. ಅಭ್ಯಾಸೀದತೀತಿ ಅಭ್ಯಾಸೋ. ‘‘ಅಭ್ಯಾಸೋ ತು ಸಮೀಪಮ್ಹಿ, ಪುಮಾ ಅಭ್ಯಸನೇಪಿ ಚೇ’’ತಿ [ಚಿನ್ತಾಮಣಿಟೀಕಾ ೨೧.೬೭] ರಭಸೋ. ಸಹ ಅನ್ತೇನ ಸನ್ತಿಕಂ, ಸಕತ್ಥೇ ಇಕೋ. ವಿದೂರಪಟಿಪಕ್ಖತ್ತಾ ಅವಿದೂರಂ. ಸಙ್ಗತಂ ಅನ್ತಂ ಸಾಮನ್ತಂ, ಸಸದ್ದಸ್ಸ ದೀಘೋ, ನಿಗ್ಗಹೀತಸ್ಸ ಮೋ, ಸಂ ನಿಪುಬ್ಬೋಪಿ ಕಟ್ಠಸದ್ದೋ ಸಮೀಪತ್ಥೋಯೇವಾತಿ ದಸ್ಸನತ್ಥಂ ಉದಾಹಟಂ, ಕಸ ವಿಲೇಖನೇ ವಾ, ತೋ, ಸನ್ನಿಕಟ್ಠಂ. ಅನ್ತಿಕಭಾವಂ ಉಪಗತಂ ಉಪನ್ತಿಕಂ. ಸಹ ಕಾಸೇನ ವತ್ತತೇ ಸಕಾಸಂ, ಕಾಸ ದಿತ್ತಿಯಂ. ಅನ್ತಯೋಗಾ ಅನ್ತಿಕಂ, ಇಕೋ. ಞಾಯತೇತಿ ಞತ್ತಂ, ತೋ, ಸಕಾಸಸದ್ದೇನ ಸನಿಡಸದೇಸಸವಿಧಸಮರಿಯಾದಸವೇಸಾಪಿ ಗಯ್ಹನ್ತಿ. ಸಹ ನಿಡೇನ, ಸಹ ದೇಸೇನ, ಸಹ ವಿಧಾಯ, ಸಹ ಮರಿಯಾದಾಯ, ಸಹ ವೇಸೇನ ವತ್ತತೇತಿ ವಿಗ್ಗಹೋ, ಬ್ಯುಪ್ಪತ್ತಿನಿಮಿತ್ತಂ, ರೂಳ್ಹೀಸದ್ದಾ ಪನ ಏತೇ.

ದ್ವಯಂ ದೂರಮತ್ತೇ. ದುಕ್ಖೇನ ಅರತಿ ಯಂ ದೂರಂ. ವಿಪಪುಬ್ಬೋ ಕಟ್ಠಸದ್ದೋ ದೂರೇ, ಸಕತ್ಥೇ ಕೋ, ವಿಪ್ಪಕಟ್ಠಕಂ.

೭೦೭. ತಿಕಂ ಘನೇ, ನತ್ಥಿ ಅನ್ತರಂ ಛಿದ್ದಂ ಯಸ್ಸ. ಹನತಿಸ್ಮಾ ಅ, ಹಸ್ಸ ಘೋ ಚ, ಘನಂ. ಸಮು ಉಪಸಮೇ, ದೋ, ಸನ್ದಂ. ಪಾದೋ ವಿರಳೇ. ವಿರಮತೀತಿ ವಿರಳಂ, ಅ, ವಣ್ಣವಿಕಾರೋ. ಪಿಯೋ ಲವೋ ಅಪ್ಪೋ ಯಸ್ಮಿಂ ಪೇಲವಂ, ಪಿಯಸ್ಸ ಪೇ, ಪಿಲಿ ಗಮನೇ ವಾ, ಅವೋ. ತನು ಅಪ್ಪಾದೀಸುಪಿ.

ದ್ವಯಂ ದೀಘೇ. ಯತ ಆಯತನೇ, ಆಯತಂ. ಇ ಗಮನೇ ವಾ, ತೋ, ಭೂವಾದಿ, ಇಸ್ಸೇ, ಏ ಅಯ, ದೀಘಾದಿ. ದಿ ಖಯೇ, ಘೋ, ದೀಘಾದಿ. ತಿಕಂ ವಟ್ಟಲೇ. ನಿಗ್ಗತಂ ತಲಂ ಅಸ್ಮಾತಿ ನಿತ್ತಲಂ. ವಟ್ಟ ವಟ್ಟನೇ, ವಟ್ಟಂ, ಲತಾದಿ. ಉಲಪಚ್ಚಯೇ ವಟ್ಟುಲಂ.

೭೦೮. ಉಚ್ಛಿತನ್ತಂ ಉನ್ನತೇ. ಚಿ ಚಯೇ, ಉಚ್ಚಿನೋತೀತಿ ಉಚ್ಚೋ, ಅ. ಉನ್ನಮತೀತಿ ಉನ್ನತೋ. ತುಜ ಹಿಂಸಾಯಂ, ಫಲನೇ ಚ, ಅ, ತುಙ್ಗೋ. ಉಗ್ಗತಂ ಅಗ್ಗಂ ಅಸ್ಸ ಉದಗ್ಗೋ. ಉದ್ಧಂ ಸಿತೋ ಉಚ್ಛಿತೋ, ಸಿ ಸೇವಾಯಂ, ತೋ, ಸಸ್ಸ ಛೋ, ಅಸರೂಪದ್ವಿತ್ತಂ, ಉಚ್ಛಿತೋ. ಪಂಸುಪಿ, ಪಕಟ್ಠೋ ಅಂಸು ದಿತ್ತಿ ಯಸ್ಸ ಪಂಸು.

ತಿಕಂ ವಾಮನೇ. ಉದ್ಧಂ ನ ಅಞ್ಚತೀತಿ ನೀಚೋ, ಅಞ್ಚ ಗಮನೇ, ಣೋ, ಅಕಾರಞಕಾರಾನಂ ಲೋಪೋ, ನಿಸದ್ದೋ ಅತ್ರ ನಿಸೇಧೇ. ರಸ ಸದ್ದೇ, ಸೋ, ರಸ್ಸೋ. ವಾ ಗಮನೇ, ಮನೋ, ವಾಮನೋ.

ತಿಕಂ ಉಜುಮ್ಹಿ. ನ ಜಿಮ್ಹಂ ಕುಟಿಲಂ ಅಜಿಮ್ಹಂ. ತಸ್ಮಿಂ ಅವಙ್ಕತಾಯ ಪಕಟ್ಠೋ ಗುಣೋ ಯಸ್ಸ ಪಗುಣೋ. ಅಜ ಗಮನೇ, ಉ, ಅಸ್ಸು, ಉಜು.

೭೦೯. ಛಕ್ಕಂ ವಙ್ಕೇ. ಅಲಧಾತುಮ್ಹಾ ಅರೋ, ಳತ್ತಂ. ವೇಲ ಗಮನೇ, ತೋ, ದ್ವಿತ್ತಾದಿ, ವಿರೂಪೇನ ಇಲಯತೀತಿ ವಾ ವೇಲ್ಲಿತಂ, ತೋ, ಇಲ ಗಮನೇ. ವಙ್ಕ ಕೋಟಿಲ್ಯೇ, ಅ. ಕುಟ ಛೇದನೇ, ಇಲೋ, ಕುಟ ಕೋಟಿಲ್ಯೇ ವಾ. ಹಾ ಚಾಗೇ, ಕತ್ತರಿ ಮೋ, ದ್ವಿತ್ತಂ, ವಣ್ಣವಿಪರಿಯಯಾದಿ, ಜಿಮ್ಹಂ. ಕುಞ್ಚ ಕೋಟಿಲ್ಯೇ, ತೋ. ವಕ್ಕಮ್ಪಿ, ವಕ್ಕ ಗಮನೇ.

ಪಞ್ಚಕಂ ಧುವೇ. ಧು ಗತಿಥೇರಿಯೇಸು, ಅ, ಉವಾದೇಸೋ. ಸಸ್ಸತೇ ನಿಚ್ಚೇ ಭವೋ ಸಸ್ಸತೋ. ನಿಚ್ಚೋ ವುತ್ತೋ [ಅಭಿಧಾನಪ್ಪದೀಪಿಕಾಟೀಕಾ]. ಸದಾ ಕಾಲೇ ಭವೋ ಸದಾತನೋ. ಸನಸದ್ದೋ ನಿಚ್ಚತ್ಥೋ ಸತ್ತಮ್ಯನ್ತೋ ನಿಪಾತೋ, ಸನಂಸದ್ದೋ ವಾ [ಅಭಿಧಾನಪ್ಪದೀಪಿಕಾಟೀಕಾ], ತತ್ರ ಭವೋ ಸನನ್ತನೋ, ಉಭಯತ್ರಾಪಿ ಭವತ್ಥೇ ತನೋ, ಪುಬ್ಬೇ ನಿಗ್ಗಹೀತಾಗಮೋ.

೭೧೦. ಏಕೇನೇವ ಭಾವಾದಿರೂಪೇನ ಕಾಲಸ್ಸ ಬ್ಯಾಪಕೋ ನಿಬ್ಬಾನಾಕಾಸಾದಿಕೂಟಟ್ಠೋತಿ ಪಕಾಸಿತೋ. ಮಾಯಾನಿಚ್ಚಲಯನ್ತಾದೀಸು ಕೂಟಂ ವಕ್ಖತಿ [ಅಭಿಧಾನಪ್ಪದೀಪಿಕಾಟೀಕಾ]. ನಿಚ್ಚಲೋ ತಿಟ್ಠತೀತಿ ಕೂಟಟ್ಠೋ, ಪಬ್ಬತೋ, ಕೂಟಟ್ಠೋ ವಿಯ ಸದಾ ತಿಟ್ಠತೀತಿ ಕೂಟಟ್ಠೋ.

ದ್ವಯಂ ಲಹುಕೇ. ಲಙ್ಘ ಗತಿ ಸೋಸನೇಸು, ಉ, ಘಸ್ಸ ಹತ್ತಂ, ನಿಗ್ಗಹೀತಲೋಪೋ, ಲಹು, ಲಘುಪಿ. ಸಂಪುಬ್ಬೇ, ಸತ್ಥಿಕಕಪಚ್ಚಯೇ ಚ ಸಲ್ಲಹುಕಂ. ತಿಕಂ ಸಙ್ಖ್ಯಾತೇ. ಖ್ಯಾ ಕಥನೇ. ಗಣ ಸಙ್ಖ್ಯಾನೇ. ಮಾ ಪರಿಮಾಣೇ, ಸಬ್ಬತ್ರ ತೋ.

೭೧೧. ತಿಕಂ ತಿಖಿಣೇ. ತಿಜ ನಿಸಾನೇ, ಹೋ, ವಣ್ಣವಿಕಾರೋ, ತಿಣ್ಹಂ. ತಿಜ ನಿಸಾನೇ, ಇನೋ, ಜಸ್ಸ ಖೋ, ಣತ್ತಂ, ತಿಖಿಣಂ. ತಿಜತೋಯೇವ ವೋ, ಜಸ್ಸ ವೋ, ಬತ್ತಂ, ತಿಬ್ಬಂ. ತಿಕಂ ಚಣ್ಡೇ. ಚಣ್ಡ ಕೋಪೇ, ಚಣ್ಡಂ. ಉಜ್ಜ ಬಲಪಾಲನೇಸು, ಅ, ಜ್ಜಸ್ಸ ಗ್ಗೋ, ಉಗ್ಗಂ. ಖರ ವಿನಾಸೇ, ಅ, ಖರಂ.

ಚತುಕ್ಕಂ ಜಙ್ಗಮೇ. ಗಮು ಗಮನೇ, ದ್ವಿತ್ತಾದಿ, ಜಙ್ಗಮಂ. ಚರ ಗಮನೇ, ಅ, ಚರಂ. ತಸತಿ ಚಲತೀತಿ ತಸಂ, ತಸ ಉಬ್ಬೇಗೇ, ಉಬ್ಬೇಗೋ ಭಯಂ, ಚಲನಞ್ಚ. ಚರಭಿಸ್ಮಾ ಚರೋ, ಮಜ್ಝೇ ದೀಘೋ, ಚರಾಚರಂ, ಅಬ್ಭಾಸನ್ತೇ ವಾ ರಾಗಮೋ, ಚರಾಚರಂ, ಸಬ್ಬತ್ರ ಅಪಚ್ಚಯೋ. ಇಙ್ಗಮ್ಪಿ, ಇಙ್ಗತೀತಿ ಇಙ್ಗೋ, ಇಙ್ಗ ಗಮನೇ.

೭೧೨-೭೧೩. ದ್ವಯಂ ಚಲನಮತ್ತೇ. ಕಮ್ಪ ಚಲನೇ. ಚಲ ಕಮ್ಪನೇ, ಸಬ್ಬತ್ರ ಕತ್ತರಿ ಯು.

ದ್ವಯಂ ಅಧಿಕೇ. ಅತಿರಿಚ್ಚತೀತಿ ಅತಿರಿತ್ತೋ, ರಿಚ ವಿಯೋಜನಸಮ್ಪಟಿಚ್ಛನಗತೀಸು, ತೋ, ಭುಜಾದಿ. ಅಧಿ ಏತಿ ಗಚ್ಛತೀತಿ ಅಧಿಕೋ, ಇ ಗಮನೇ, ಕೋ.

ಜಙ್ಗಮಾ ಪಾಣಿತೋ ಅಞ್ಞೋ ಥಾವರೋ ನಾಮ, ತಿಟ್ಠತೀತಿ ಥಾವರೋ, ಠಾ ಗತಿನಿವತ್ತಿಯಂ, ವರೋ, ವಣ್ಣವಿಕಾರೋ, ಥಾವರೋ, ಠಾವರೋಪೀತ್ಯೇಕೇ.

ಚತುಕ್ಕಂ ಲೋಲೇ. ಲೋಲ ಉಮ್ಮಾದನೇ. ಚಲ ಕಮ್ಪನೇ, ದ್ವಿತ್ತಾದಿ, ಚಞ್ಚಲಂ. ತರ ಪ್ಲವನತರಣೇಸು, ತರಂ ಲಾತೀತಿ ತರಲಂ, ಏತೇ ಚಲನಮತ್ತೇಪಿ.

ಚತುಕ್ಕಂ ಪುರಾಣೇ. ಪುರೇ ಭವೋ ಪುರಾಣೋ, ಯದಾದಿನಾ ನಪಚ್ಚಯೋ, ಣತ್ತಂ. ಪುರಾ ಭವೋ ಪುರಾತನೋ, ತನಪಚ್ಚಯೋ. ಸನಂಸದ್ದೋ ಇಹ ಸತ್ತಮ್ಯನ್ತೋ ಪುರಾಣತ್ಥೇ ನಿಪಾತೋ. ತತ್ರ ಭವೋ ಸನನ್ತನೋ, ಪುಬ್ಬೇ ವಿಯ ಸನಂಸದ್ದೋ ವಾ, ತತ್ರಾಪಿ ಪುಬ್ಬೇ ವಿಯ ನಿಗ್ಗಹೀತಾಗಮೋ. ಚಿರಂಸದ್ದೋ ನಿಪಾತೋ ಸತ್ತಮ್ಯನ್ತೋ ಪುರಾಣತ್ಥೋ ಇಹ ಗಯ್ಹತೇ, ತತ್ರ ಭವೋ ಚಿರನ್ತನೋ. ನಿಗ್ಗಹೀತಲೋಪೋ ಚಿರಕಾಲಾದೀಸು.

ಚತುಕ್ಕಂ ಅಭಿನವೇ. ಪತಿತೋ ಅಗ್ಗೋ ಯಸ್ಸ ಪಚ್ಚಗ್ಘೋ, ಗಸ್ಸ ಘೋ, ಬಹುಕೋ ವಾ ಅಗ್ಘೋ ಯಸ್ಸ ಪಚ್ಚಗ್ಘೋ, ಅನೇಕತ್ಥತ್ತಾ ಹಿ ಉಪಸಗ್ಗನಿಪಾತಾನಂ ಬಹುಕತ್ಥೋ ಏತ್ಥ ಪತಿಸದ್ದೋ. ನವಸದ್ದಾಸಕತ್ಥೇ ತನೋ, ನವಸ್ಸ ನುಭಾವೋ ಚ. ನವೋ ಏವ ಅಭಿನವೋ, ನು ಥುತಿಯಂ, ಅ, ನವೋ.

೭೧೪-೭೧೫. ಪಞ್ಚಕಂ ಕಕ್ಖಳೇ. ಕನ್ತತೀತಿ ಕುರೂರಂ, ಊರೋ, ಕನ್ತಸ್ಸ ಚ ಕುರಾದೇಸೋ, ಕರ ಹಿಂಸಾಯಂ ವಾ, ಊರೋ, ಅಸ್ಸು. ಕಠ ಕಿಚ್ಛಜೀವನೇ, ಮುದ್ಧಜದುತಿಯನ್ತೋ ಧಾತು, ಇನೋ, ವಣ್ಣವಿಪರಿಯಯೇ ಕಥಿನನ್ತಿಪಿ. ದಲ ವಿದಾರಣೇ, ಹೋ, ಳತ್ತಂ, ಬಹ ವುದ್ಧಿಮ್ಹಿ ವಾ, ಬಸ್ಸ ದೋ, ಳನ್ತೋ ಚ, ದಳ್ಹಂ ದಹ ಭಸ್ಮೀಕರಣೇ ವಾ, ಅ, ಳನ್ತೋ ಚ. ನಿಟ್ಠಾತೀತಿ ನಿಟ್ಠುರಂ, ಠಾ ಗತಿನಿವತ್ತಿಯಂ, ಉರೋ. ಕಕ್ಖ ಹಸನೇ, ಅಲೋ, ಳತ್ತಂ. ಕಠೋರಂ, ಜರಠಂ, ಮುತ್ತಿಮಂ, ಮುತ್ತಮ್ಪಿ, ಕಠ ಕಿಚ್ಛಜೀವನೇ, ಓರೋ. ಜರ ಜೀರಣೇ, ಭೂವಾದಿ, ಠೋ. ಮುತ್ತಿ ಕಥಿನ್ಯಂ, ತಂಯೋಗಾ ಮುತ್ತಿಮಂ. ಅಪಚ್ಚಯೇ ಮುತ್ತಂ.

ಸತ್ತಕಂ ಅನ್ತೇ. ಅಮ ಗಮನೇ, ತೋ, ಅನ್ತೋ, ಅನಿತ್ಥೀ. ಪರಿಪುಬ್ಬೋ ಪರಿಯನ್ತೋ. ಪಪುಬ್ಬೋ ಪನ್ತೋ. ಪಚ್ಛಾ ಭವೋ ಪಚ್ಛಿಮೋ. ಅನ್ತೇ ಭವೋ ಅನ್ತಿಮೋ, ಇಮೋ. ಜಘನೇ ಸಾಧು ಜಿಘಞ್ಞಂ, ಯೋ, ಅಸ್ಸಿ. ಚರತಿಸ್ಮಾ ಇಮೋ. ಚರಿಮಂ, ಚರಸದ್ದಾ ವಾ ಇಮೋ.

ಚತುಕ್ಕಂ ಪಠಮೇ. ಪುಬ್ಬ ಪೂರಣೇ, ಅ. ಅಗ್ಗಂ ಸೇಟ್ಠೇಪಿ ವುತ್ತಂ. ಪಠ ವಿಯತ್ತಿಯಂ ವಾಚಾಯಂ, ಅಮೋ, ಪಥ ಸಙ್ಖ್ಯಾನೇ ವಾ, ಅಮೋ, ವಣ್ಣವಿಕಾರೋ, ಪಠಮಂ, ಪಥಮನ್ತಿಪಿ. ಆದೀಯತೇ ಪಠಮಂ ಗಣ್ಹೀಯತೇತಿ ಆದಿ, ಇ, ಪುಮೇ, ಸೋಸದ್ದೋ ಆದಿಸ್ಸ ಪುಲ್ಲಿಙ್ಗತ್ತಜೋತಕೋ, ಪುರಿಮಂ, ಪುರತ್ಥಾಪಿ, ಭವತ್ಥೇ ಇಮತ್ಥಾ.

ದ್ವಯಂ ಅನುಚ್ಛವಿಕೇ. ಪಟಿಗ್ಗಹಿತೋ ರೂಪೋ ಪತಿರೂಪೋ. ಛವಿಯಾ ಅನುರೂಪಂ ಅನುಚ್ಛವಿಕಂ, ಸಕತ್ಥೇ ಕೋ.

ದ್ವಯಂ ನಿರತ್ಥಕೇ. ಮೂಹ ವೇಚಿತ್ತೇ, ಅ, ಹಸ್ಸ ಘೋ. ನತ್ಥಿ ಅತ್ಥೋ ಯಸ್ಸ, ಸಕತ್ಥೇ ಕೋ.

೭೧೬. ದ್ವಯಂ ಪಾಕಟೇ. ವಿಸಿಟ್ಠೋ ಅತ್ತಾ ಯಸ್ಸ ಬ್ಯತ್ತಂ. ಪುಟ ಪಕಾಸನೇ, ಪುಟ ವಿಕಾಸನೇ ವಾ.

ತಿಕಂ ಮುದುಮ್ಹಿ. ಮುದ ಮೋದನೇ, ಉ, ಮುದ ಸಂಸಗ್ಗೇ ವಾ. ಸೋಭನಂ ಕುಮಾರಂ ಕನ್ತಿ ಯಸ್ಸ. ಕು ಸದ್ದೇ, ಅಲೋ, ಮನ್ತೋ ಚ.

ದ್ವಯಂ ಇನ್ದ್ರಿಯಗ್ಗಯ್ಹೇ. ಅಕ್ಖಂ ಇನ್ದ್ರಿಯಂ ಪತಿಗತಂ ನಿಸ್ಸಿತಂ, ಅಕ್ಖೇನ ವಾ ಪತಿಗತಂ ಪಚ್ಚಕ್ಖಂ, ಕತೇ ಸಮಾಸೇ ಪತಿಸದ್ದಸ್ಸ ಪುಬ್ಬನಿಪಾತೋ ಅಭಿಧಾನತೋ. ಇನ್ದ್ರಿಯಂ ಚಕ್ಖಾದಿಕಂ, ತೇನ ಗಯ್ಹಂ ಇನ್ದ್ರಿಯಗ್ಗಯ್ಹಂ.

ದ್ವಯಂ ಅಪಚ್ಚಕ್ಖೇ. ಪಚ್ಚಕ್ಖವಿಪರೀತಂ ಅಪಚ್ಚಕ್ಖಂ, ಪರಮಾಣ್ವಾದಿ. ಇನ್ದ್ರಿಯಂ ಅತಿಕ್ಕನ್ತಂ ಅತಿನ್ದ್ರಿಯಂ.

೭೧೭. ಚತುಕ್ಕಂ ಅಞ್ಞತ್ಥೇ. ಇತರಸದ್ದೋ ಪಾಟಿಪದಿಕೋ ಅಞ್ಞತ್ಥವಾಚಕೋ, ಇದಂಸದ್ದಾ ವಾ ತರೋ ಅಞ್ಞತ್ಥೇ, ದಂಲೋಪೋ ಚ. ಅಞ್ಞಸದ್ದಾ ಸಕತ್ಥೇ ತರೋ. ಏಕೋ ಸೇಟ್ಠೇಪಿ ವುತ್ತೋ. ಅಞ್ಞಸದ್ದೋ ಪಾಟಿಪದಿಕೋ ಭಿನ್ನತ್ಥೋ, ನ ಞಾಯತೇತಿ ವಾ ಅಞ್ಞೋ.

ತಿಕಂ ನಾನಪ್ಪಕಾರೇ. ಬಹವೋ ವಿಧಾ ಪಕಾರಾ ಅಸ್ಸ ಬಹುವಿಧೋ. ವಿಚಿತ್ತಾ ವಿಧಾ ಯಸ್ಸ ವಿವಿಧೋ.

ದ್ವಯಂ ಅನಿವಾರಿತೇ. ನತ್ಥಿ ಬಾಧೋ ನಿಸೇಧೋ ಯಸ್ಸ ಅಬಾಧಂ. ನತ್ಥಿ ಅಗ್ಗಳಂ ಅಸ್ಸ.

೭೧೮. ಚತುಕ್ಕಂ ಅಸಹಾಯೇ. ಅಸಹಾಯತ್ಥೇ ಏಕತೋ ಆಕೀ, ಚ್ಚೋ, ಕೋ ಚ, ಏಕಾಕೀ, ಏಕಚ್ಚೋ. ಅಞ್ಞತ್ಥೇಪಿ ಏಕಕೋ ವುತ್ತೋ. ಸಮಾ ತುಲ್ಯತ್ಥಾ.

ಅನೇಕಸಮ್ಬನ್ಧಿನಿ ಸಾಧಾರಣಾದಿದ್ವಯಂ. ಸಹ ಆಧಾರಣೇನ ವತ್ತತೀತಿ ಸಾಧಾರಣಂ, ಯದಾದಿ, ಥಿಯಂ ಸಾಧಾರಣೀ, ಸಾಧಾರಣಾ ಚ. ಸಮಾನಮೇವ ಸಾಮಞ್ಞಂ, ಯೋ, ಸಾಮಞ್ಞಾ ಇತ್ಥಿಯಂ.

ದ್ವಯಂ ಅಪ್ಪಾವಕಾಸೇ. ಸಮ್ಬಾಧತೇ ಅಸ್ಮಿಂ, ರೋ. ಸಂಸದ್ದಾ ಕಟೋ, ಯದಾದಿ, ಸಙ್ಕಟಂ, ಸಹ ಆವರಣೇನ ವತ್ತತೀತಿ ವಾ ಸಙ್ಕಟಂ, ಸಹತ್ಥೋ ಸಂಸದ್ದೋ.

೭೧೯. ವಾಮಂ ಕಳೇವರಂ ವಾಮಕಾಯೋ ಸಬ್ಯಂ ನಾಮ. ‘‘ಸಬ್ಯಂ ವಾಮೇ ಚ ದಕ್ಖಿಣೇ’’ತಿ [ಚಿನ್ತಾಮಣಿಟೀಕಾ ೨೧.೮೪] ಹಿ ಅಜಯೋ, ಸವ ಗತಿಯಂ, ಯೋ. ದಕ್ಖಿಣಂ ಕಳೇವರಂ ಅಪಸಬ್ಯಂ, ಸಬ್ಯತೋ ಅಪಗತಂ ಅಪಸಬ್ಯಂ.

ದ್ವಯಂ ವಿಪರೀತೇ. ಪಟಿಕೂಲತಿ ಆವರತೀತಿ ಪಟಿಕೂಲಂ, ಕೂಲ ಆವರಣೇ. ಅಪಸಬ್ಯಂ ದಕ್ಖಿಣೇಪಿ ವುತ್ತಂ.

ದುರಧಿಗಮನ್ತೋ ಪಥಂ ಗಹನಂ, ಯಥಾ – ಗಹನಮೇತಂ ಸತ್ಥಂ, ದುಬ್ಬಿವೇಕಮಿಚ್ಚತ್ಥೋ. ಗಚ್ಛನ್ತಂ ಹನ್ತೀತಿ ಗಹನಂ, ಗಹಣಮ್ಪಿ, ಯದಾದಿ. ಕಲ ಗಮನೇ, ಇಲೋ, ಕಲಿಂ ಲಾತೀತಿ ವಾ ಕಲಿಲಂ.

೭೨೦-೭೨೧. ದ್ವಯಂ ಬಹುಪ್ಪಕಾರೇ. ಉಚ್ಚಞ್ಚ ತಂ ಅವಚಞ್ಚೇತಿ ಉಚ್ಚಾವಚಂ, ಕಮ್ಮಧಾರಯೋ. ಬಹವೋ ಭೇದಾ ಅಸ್ಸ.

ತಿಕಂ ಜನಾದಿನಿರನ್ತರಗತೇ. ಸಙ್ಕ ಸಙ್ಕಾಯಂ, ತೋ. ಕಿರ ಪಕ್ಖೇಪವಿಕ್ಖಿಪನೇಸು, ತೋ, ಇಣ್ಣಾದೇಸೋ. ಸಙ್ಕ ಸಙ್ಕಾಯಂ, ಉಲೋ, ಸಙ್ಕುಲಂ, ಸಂಪುಬ್ಬೋ ಕುಲ ಸನ್ತಾನೇ ವಾ, ರೋ.

ಸಿಲೋಕೋ ಛೇಕೇ. ಕತೋ ಅಭ್ಯಾಸಿತೋ ಹತ್ಥೋ ಪದತ್ಥೋ ಯೇನ ಕತಹತ್ಥೋ. ಕುಸ ಸಿಲೇಸನೇ, ಅಲೋ. ಪಕಟ್ಠಾ ವೀಣಾ ಅಸ್ಸ. ಅಭಿಜಾನಾತಿ ಅಭಿಞ್ಞೋ. ಸಿಕ್ಖ ವಿಜ್ಜೋಪಾದಾನೇ, ತೋ. ಪುಣ ಕಮ್ಮನಿ ಸುಭೇ, ರೋ. ಪಟ ಗಮನೇ, ಉ. ಛಿದಿ ದ್ವಿಧಾಕರಣೇ, ಕತ್ತರಿ ಅ, ದಸ್ಸ ಕೋ. ಚತ ಯಾಚನೇ, ಉರೋ. ದಲ ದಿತ್ತಿಯಂ, ಖೋ, ಲಸ್ಸ ಕೋ, ದಕ್ಖ ವುಡ್ಢಿಯಂ ವಾ, ಅ, ದಕ್ಖ ವುಡ್ಢಿಹಿಂಸಾಗತಿಸೀಘೇಸು ವಾ. ಪಿಸ ಹಿಂಸಾಬಲದಾನನಿಕೇತನೇಸು, ಅಲೋ, ಪೇಸಲೋ. ಕತಮುಖೋ, ಕತೀಪಿ, ಕತಸದ್ದೋ ಅಭ್ಯಾಸಿತತ್ಥೋ, ಕತಂ ಅಬ್ಯಾಸಿತಂ ಮುಖಂ ಉಪಾಯೋ ಅನೇನಾತಿ ಕತಮುಖೋ. ಕತಂ ಅಸ್ಸತ್ಥೀತಿ ಕತೀ.

ಸತ್ತಕಂ ಬಾಲೇ. ಬಲ ಪಾಣನೇ, ಬಲತೀತಿ ಬಾಲೋ, ಅಸ್ಸಾಸಿತಪಸ್ಸಾಸಿತಮತ್ತೇನ ಜೀವತಿ, ನ ಪಞ್ಞಾಜೀವಿತೇನಾತ್ಯತ್ಥೋ. ದಾ ಕುಚ್ಛಾಯಂ ಗತಿಯಂ ವಾ, ತು, ದ್ವಿತ್ತಂ, ರಸ್ಸಾದಿ. ಜಲ ಧಞ್ಞೇ, ಅ, ಳತ್ತಂ. ಮೂಹ ವೇಚಿತ್ತೇ, ಲೋ, ವಣ್ಣವಿಪರಿಯಯೋ, ಮೂಳ್ಹೋ. ಮನ್ದ ಜಳತ್ತೇ. ಬಾಲ್ಯಯೋಗಾ ಬಾಲಿಸೋ, ಇಸೋ. ಅಞ್ಞೋ, ಯಥಾಜಾತೋಪಿ, ನ ಜಾನಾತೀತಿ ಅಞ್ಞೋ. ಯಾದಿಸೋ ಜಾತೋ ವಿವೇಕೋ ಯಥಾಜಾತೋ.

೭೨೨. ತಿಕಂ ಭಾಗ್ಯಸಮ್ಪನ್ನೇ. ಪುಞ್ಞಂ, ಸುಕತಞ್ಚ ಯಸ್ಮಿಂ ಅತ್ಥಿ ಪುಞ್ಞವಾ, ಸುಕತೀ, ವನ್ತು, ಈ ಚ. ಧನಂ ಗಹಣಂ ಲದ್ಧೋತಿ ಧಞ್ಞೋ, ಯೋ. ದ್ವಯಂ ಮಹಾವೀರಿಯೇ. ಮಹಾಧಿತಿ ಮಹಾವೀರಿಯೋ. ದ್ವಯಂ ಮಹಿಚ್ಛೇ. ಮಹಾಸಯೋಪಿ.

ದ್ವಯಂ ಬಹುಲಹದಯೇ, ಪಸತ್ಥಹದಯೇ ಚ. ಹದಯಂ ಬಹುಲಂ, ಪಸತ್ಥಞ್ಚ ಯಸ್ಸ ಹದಯೀ, ಹದಯಾಲು ಚ, ತಬ್ಬಹುಲೇ ಈ, ಆಲು ಚ, ಸುಹದಯೋಪಿ.

೭೨೩. ದ್ವಯಂ ಹಟ್ಠಚಿತ್ತೇ. ‘‘ಹಾಸಮನೋ ವಿಕುಬ್ಬಾನೋ, ಪಮಾನೋ ಹಟ್ಠಮಾನಸೋ’’ತಿ [ಅಮರ ೨೧.೭] ಅಮರಸೀಹೋ. ದ್ವಯಂ ದುಮ್ಮನೇ. ದುಟ್ಠಂ, ದುಕ್ಖಿತಂ ವಾ ಮನೋ ಯಸ್ಸ. ವಿರೂಪಂ ಮನೋ ಯಸ್ಸ. ಅನ್ತಮನೋಪಿ.

ಚತುಕ್ಕಂ ಬಹುಪ್ಪದೇ. ಯಾಚಕಾನಂ ವದಂ ವಚನಂ ಜಾನಾತೀತಿ ವದಾನಿಯೋ, ವದಞ್ಞೂ ಚ, ಇಯೋ, ರೂ ಚ, ಪುಬ್ಬತ್ರಞ್ಞಸ್ಸ ನಾದೇಸೋ, ಮಜ್ಝದೀಘೋ ಚ. ದಾನೇ ಸೋಣ್ಡೋ ಪಸುತೋ. ಸೋಣ್ಡಸದ್ದೋತ್ರ ಮಜ್ಜಮದೇತ್ಯೇಕೇ, ಥೂಲಲಕ್ಖೋಪ್ಯತ್ರ, ದಾನತ್ಥಂ ಥೂಲಂ ಲಕ್ಖಂ ಅಸ್ಸ.

೭೨೪. ಸಿಲೋಕೋ ಪಾಕಟಮತ್ತೇ. ಖ್ಯಾ ಪಕಾಸನೇ, ತೋ. ಪತಿಪುಬ್ಬೋ ಇ ಗಮನೇ, ತೋ. ಅಭಿಮುಖಂ ಏತೀತಿ ಪತೀತೋ. ಞಾ ಅವಬೋಧನೇ, ತೋ, ಪಞ್ಞಾತೋ, ಅಭಿಞ್ಞಾತೋ ಚ. ಪಥ ಖ್ಯಾನೇ. ಸು ಗತಿಬುದ್ಧೀಸು, ತೋ, ಸುತೋ, ವಿಸ್ಸುತೋ ಚ, ಸು ಸವನೇ ವಾ, ಕಮ್ಮೇ ತೋ. ವಿದ ಞಾಣೇ, ವಿದಿತೋ. ಸಿಧು ಸಂರಾಧೇ, ತೋ, ಸಿಧ ಸಂಸಿದ್ಧಿಯಂ ವಾ. ಕಟ ಗತಿಯಂ, ದಸ್ಸನಂ ಕಟತೀತಿ ಪಾಕಟೋ, ಉಪಸಗ್ಗಸ್ಸ ದೀಘೋ.

೭೨೫. ತಿಪಾದಂ ಇಸ್ಸರೇ. ಈಸ ಇಸ್ಸರಿಯೇ, ಈಸತೀತಿ ಇಸ್ಸರೋ, ಅರೋ, ರಸ್ಸಾದಿ, ದ್ವಿತ್ತಂ. ನೀ ನಯೇ, ಣ್ವು, ನಾಯಕೋ. ಸಂ ಧನಂ ಅಸ್ಸತ್ಥೀತಿ ಸಾಮೀ, ದೀಘಾದಿ, ರಸ್ಸನ್ತೇ ಸಾಮಿಪಿ. ಪಾ ರಕ್ಖಣೇ,ತಿ, ರಸ್ಸಾದಿ, ಪತಿ. ಅಧಿಪುಬ್ಬೇ ಅಧಿಪತಿ. ಈಸ ಇಸ್ಸರಿಯೇ, ಅ, ಈಸೋ. ಪಭವತೀತಿ ಪಭು, ಉ, ಪಭೂಪಿ. ಅಯ ಗಮನೇ, ಯೋ, ಅಯ್ಯೋ. ಅಧಿಪಾತೀತಿ ಅಧಿಪೋ, ರೋ. ಅಧಿಭವತೀತಿ ಅಧಿಭೂ, ಕ್ವಿ. ನೀ ನಯೇ, ರಿತು, ನೇತಾ.

ತಿಕಂ ಬಹುಧನೇ. ಇಭಂ ಅರಹತೀತಿ ಇಬ್ಭೋ, ವೋ, ವಣ್ಣವಿಪರಿಯಯೋ. ಝೇ ಚಿನ್ತಾಯಂ, ಅ, ಅಜ್ಝಾಯತಿ ಧನಂ ಅಡ್ಢೋ, ಝಸ್ಸ ಢೋ, ಅಸರೂಪದ್ವಿತ್ತಂ, ರಸ್ಸಾದಿ ಚ. ಧನಾ ಅತಿಸಯೇ ಈ, ಧನೀ.

೭೨೬. ದ್ವಯಂ ದಕ್ಖಿಣೇಯ್ಯೇ. ದಾನಂ ಪಟಿಗ್ಗಣ್ಹಿತುಂ ಅರಹತೀತಿ ದಾನಾರಹೋ, ದಕ್ಖ ವುದ್ಧಿಯಂ, ಸೀಘತ್ಥೇ ಚ, ದಕ್ಖನ್ತಿ ಭೋಗಸಮ್ಪದಾದೀಹಿ ಯಾಯ, ಸಾ ದಕ್ಖಿಣಾ, ಇಣೋ, ತಂ ಅರಹತೀತಿ ದಕ್ಖಿಣೇಯ್ಯೋ.

ದ್ವಯಂ ಸ್ನೇಹವತಿ. ಸಿನಿಹ ಪೀತಿಯಂ, ಧೋ, ಹಸ್ಸ ದೋ, ಸಿನಿದ್ಧೋ, ವಚ್ಛೋ ಸಿನೇಹೋ ಯಸ್ಸತ್ಥಿ ವಚ್ಛಲೋ, ಲೋ.

ಪಮಾಣಿಕೋ ಪರಿಕ್ಖಕೋ, ಪರಿಕ್ಖತೇ ಅವಧಾರಯತೇ ಪಮಾಣೇಹಿ ಅತ್ಥನ್ತಿ ಪರಿಕ್ಖಕೋ, ಇಕ್ಖ ದಸ್ಸನಙ್ಕೇಸು, ಣ್ವು. ಕಾರಣಂ ಜಾನಾತೀತಿ ಕಾರಣಿಕೋ, ಇಕೋ.

ದ್ವಯಂ ಆಸತ್ತೇ. ಸನ್ಜ ಸಙ್ಗೇ, ತೋ. ತಂ ತಂ ವತ್ಥು ಪರಂ ಪಧಾನಂ ಅಸ್ಸ ತಪ್ಪರೋ.

೭೨೭. ತಿಕಂ ಕಾರುಣಿಕೇ. ಕರುಣಾ ಸೀಲಂ ಅಸ್ಸ ಕಾರುಣಿಕೋ. ದಯಾ ಕರುಣಾ ಯಸ್ಸತ್ಥಿ ದಯಾಲು, ಆಲು. ದುಕ್ಖಿತೇಸು ಸುಟ್ಠು ರಮತೀತಿ ಸೂರತೋ, ಉಪಸಗ್ಗಸ್ಸ ದೀಘತಾ.

ಇಟ್ಠತ್ಥೇ ಅಭಿಮತಪ್ಪಯೋಜನೇ ಉಯ್ಯುತೋ ಪುಗ್ಗಲೋ ಉಸ್ಸುಕೋ ನಾಮ, ಉಟ್ಠಾನಂ ಸುಟ್ಠು ಕಾಯತೀತಿ ಉಸ್ಸುಕೋ, ಹಸಾದ್ಯನುಟ್ಠೇಯಂ.

ಯೋ ಆಲಸ್ಯಾವಸಾದೀಹಿ ಅನುತಿಟ್ಠತಿ, ಸೋ ದೀಘಸುತ್ತೋ, ದೀಘಞ್ಚ ತಂ ಸುತ್ತಞ್ಚ, ತಮಿವ ಚರತೀತಿ ದೀಘಸುತ್ತಂ, ದೀಘಸುತ್ತಪರಿಯನ್ತಿಕಂ ಕಾರಿಯಂ ಕರೋತೀತಿ ದೀಘಸುತ್ತೋ. ಚಿರೇನ ಕ್ರಿಯಾನುಟ್ಠಾನಂ ಅಸ್ಸ.

೭೨೮. ದ್ವಯಂ ಪರಾಯತ್ತೇ, ಪರಸ್ಮಿಂ, ಪರೇನ ವಾ ಅಧೀನೋ ಪರಾಧೀನೋ, ಅಝನ್ತಾ ಸಕತ್ಥೇ ಇನೋ ಯದಾದಿನಾ. ಪರತನ್ತೋ, ಪರವಾ, ಅತ್ತವಾಪಿ [ನಾಥವಾ (ಅಮರ ೨೧.೨೬], ತನ್ತಯತೀತಿ ತನ್ತೋ, ತನ್ತ ಕುಟುಮ್ಬಧಾರಣೇ, ಅ, ಪರೋ ತನ್ತೋ ನಿಯಾಮಕೋ ಯಸ್ಸ. ಪರೋ ಸೇಟ್ಠೋ ನಾಯಕೋ, ಅತ್ತಾ ಚ ಅತ್ಥೀತಿ ಪರವಾ, ಅತ್ತವಾ ಚ, ವನ್ತು.

ಆಯತ್ತತಾಮತ್ತೇ ಚತುಕ್ಕಂ. ಯತ ಪಯತನೇ, ಆಪುಬ್ಬೋ ಅವಸೀಭಾವೇ, ತೋ. ಅನ್ತೇನ ಸಮೀಪೇನ ಸಹಾತಿ ಸನ್ತಕೋ, ಸಕತ್ಥೇ ಕೋ. ಪರಿಗ್ಗಯ್ಹತೇ ‘‘ಸಕ’’ನ್ತಿ ಕರೀಯತೇತಿ ಪರಿಗ್ಗಹೋ. ಅಧಿಗತೋ ಇನೋ ಪಭೂ ಯೇನಾತಿ ಅಧೀನೋ.

ಸೇನ ಅತ್ತನಾ ಈರಿತಂ ಸೀಲಂ ಅಸ್ಸಾತಿ ಸೇರೀ, ತಸ್ಮಿಂ ಸೇರಿನಿ ಚ ಸಚ್ಛನ್ದೋ ವತ್ತತಿ, ಸಸ್ಸ ಅತ್ತನೋ ಛನ್ದೋ ಯಸ್ಸತ್ಥೀತಿ ಸಚ್ಛನ್ದೋ, ಅ. ಸವಸೋ, ಸಯಂವಸೀ, ನಿರವಗ್ಗಹೋಪಿ.

೭೨೯. ಗುಣದೋಸೇ ಅನಿಸಮ್ಮ ಅನುಪಪರಿಕ್ಖಿತ್ವಾ ಯೋ ಕರೋತಿ, ಸೋ ಜಮ್ಮೋ, ಜಮ ಅದನೇ, ಮೋ.

ದ್ವಯಂ ಅತಿತಣ್ಹೇ. ಲುಭ ಲೋಭೇ, ಅ, ದ್ವಿತ್ತಂ, ಭಸ್ಸ ಪೋ, ಲೋಲುಪೋ, ಲೋಲುಭೋಪಿ.

ತಿಕಂ ಲುದ್ಧೇ. ಗಿಧ ಅಭಿಕಙ್ಖಾಯಂ, ತೋ. ಲುಭ ಗಿದ್ಧಿಯಂ, ತೋ. ಲೋಲ ಉಮ್ಮಾದನೇ, ಅ, ಲೋಲೋ. ಅಥ ಮಹಾತಣ್ಹಾತಿತಣ್ಹಗಿದ್ಧಾನಂ ಕೋ ಭೇದೋ? ಮಹಾತಣ್ಹೋ ನಾನಾರಮ್ಮಣಂ ಇಚ್ಛತಿ, ಅತಿತಣ್ಹೋ ಏಕಸ್ಮಿಮ್ಪಿ ಆರಮ್ಮಣೇ ಅನೇಕವಾರಂ, ಅಧಿಕಞ್ಚ ತಸತಿ, ಗಿದ್ಧೋ ಪನ ಉಭಯಥಾಪೀತಿ ಅಯಮೇತೇಸಂ ವಿಸೇಸೋ.

ಯೋ ಕ್ರಿಯಾಸು ಮನ್ದೋ, ಸೋ ಕುಣ್ಠೋ, ಕುಣ್ಠ ಪಟಿಘಾತೇ, ಆಲಸ್ಯೇ ಚ, ಅ.

೭೩೦. ಪಞ್ಚಕಂ ಕಾಮಕೇ. ಕಮು ಇಚ್ಛಾಯಂ, ಚುರಾದಿ, ರಿತು, ಕಾಮಯಿತಾ, ಕಾರಿತಲೋಪೇ ಕಮಿತಾ. ಯುಮ್ಹಿ ಕಾಮನೋ, ಕಮನೋಪಿ. ಣೀಪಚ್ಚಯೇ ಕಾಮೀ, ಣುಕಪಚ್ಚಯೇ ಕಾಮುಕೋ, ಅನುಕೋ, ಅಭಿಕೋಪ್ಯತ್ರ, ಅನುಕಾಮಯತೇ ಅನುಕೋ, ಕ್ವಿ. ಅಭಿಕಾಮಯತೇ ಅಭಿಕೋ, ಕ್ವಿ. ಅತಿಕೋಪಿ.

ದ್ವಯಂ ಮತ್ತೇ. ಸುಣ್ಡಾ ಸುರಾ, ತತ್ರ ಕುಸಲೋ ಸೋಣ್ಡೋ, ಪಾನಾಗಾರಂ ವಾ ಸುಣ್ಡಾ, ತತ್ರ ಭವೋ, ಠಿತಂ ವಾ ಸೋಣ್ಡೋ. ಮದ ಉಮ್ಮಾದೇ, ತೋ. ಉಕ್ಕಟೋ, ಖಿವೋಪಿ, ಮದೇನ ಉದ್ಧತೋ ಉಕ್ಕಟೋ, ಯದಾದಿನಾ ಉತೋ ಕಟೋ ಮತ್ತತ್ಥೇ [ಪಾಣಿನಿ ೫.೨.೨೯]. ಖಿವ ಮದೇ, ಅ.

ತಿಕಂ ವಚನಕಾರಿನಿ. ಪವತ್ತಿನಿವತ್ತೀಸು ವಿಧಾತುಂ ಸಕ್ಯೋ ವಿಧೇಯ್ಯೋ, ಇಯ್ಯೋ. ಆದೇಸಿತಂ, ಆದರೇನ ವಾ ಸುಣೋತೀತಿ ಅಸ್ಸವೋ, ರಸ್ಸಾದಿ, ಅ. ಸುನ್ದರಂ ವಚೋ ಆಚರಿಯಾದೀನಂ ಏತಸ್ಮಿಂ ಹೇತುಭೂತೇತಿ ಸುಬ್ಬಚೋ. ವಿನಯಗ್ಗಾಹೀಪಿ, ವಿನಯಂ ವಿಧಿಪಟಿಸೇಧವಚನಂ ಗಹೇತುಂ ಸೀಲೋ ವಿನಯಗ್ಗಾಹೀ.

೭೩೧. ತಙ್ಖಣುಪ್ಪತ್ತಿಞಾಣಂ ಪಟಿಭಾ, ತಾಯ ಯುತ್ತೋ ಪಗಬ್ಭೋ, ಸೀಘಮೇವ ಗಬ್ಭತೀತಿ ಪಗಬ್ಭೋ, ಗಬ್ಭ ಧಾರಣೇ.

ತಿಕಂ ಭೀರುಕೇ. ಭೀ ಭಯಂ ಸೀಲೋ ಯಸ್ಸ ಭೀಸೀಲೋ. ಭಾಯತೀತಿ ಭೀರು, ಭೀ ಭಯೇ, ರು. ರುಕಪಚ್ಚಯೇ ಭೀರುಕೋ, ಸಕತ್ಥೇ ವಾ ಕೋ.

ದ್ವಯಂ ಅಸೂರೇ. ನ ವೀರೋ ಸೂರೋ ಅವೀರೋ. ಕುಚ್ಛಿತತರತ್ತಾ ಕಾತರೋ, ಕುಸ್ಸ ಕಾದೇಸೋ.

ದ್ವಯಂ ಹಿಂಸಾಸೀಲೇ, ಹನನಸೀಲೋ ಹಿಂಸಾಸೀಲೋ, ಘಾತುಕೋ, ಉಕೋ, ಹನಸ್ಸ ಘಾತೋ. ಸರಾರು, ಹಿಂಸೋಪಿ.

೭೩೨. ತಿಕಂ ಕೋಧಯುತ್ತೇ. ಕುಧ ಕೋಪೇ, ಕುಜ್ಝನಸೀಲೋ ಕೋಧನೋ, ಯು. ದುಸ ದೋಸೇ, ದೋಸನೋ, ಪಟಿಘೋ, ಯು. ಕುಪ ಕೋಪೇ, ಕುಪತೀತಿ ಕೋಪೀ, ಣೀ. ಅಮರಿಸನೋಪಿ, ನತ್ಥಿ ಮರಿಸನಂ ಖಮಾ ಅಸ್ಸ ಅಮರಿಸನೋ, ಮರಿಸ ಅಸಹನೇ.

ದ್ವಯಂ ಅಧಿಕಕೋಧಯುತ್ತೇ. ಚಣ್ಡತೇತಿ ಚಣ್ಡೋ, ಅ, ಚಣ್ಡ ಕೋಪೇ. ಅತಿರೇಕಂ ಕುಜ್ಝತೀತಿ ಅಚ್ಚನ್ತಕೋಧನೋ. ಅಚ್ಚನ್ತಕೋಪನೋಪಿ, ತದಾ ಕುಪತೋ ಯು.

ಪಞ್ಚಕಂ ಖನ್ತಿಯುತ್ತೇ. ಸಹ ಖಮನೇ, ಯು. ಖಮು ಸಹನೇ, ಯು. ತುಮ್ಹಿ ಖನ್ತಾ, ಸತ್ಥಾದಿ. ತಿತಿಕ್ಖಾ ಯಸ್ಸತ್ಥೀತಿ ತಿತಿಕ್ಖವಾ. ಮನ್ತುಮ್ಹಿ ಖನ್ತಿಮಾ, ಸವಿಭತ್ತಿಸ್ಸ ನ್ತುಸ್ಸ ಆ.

೭೩೩. ದ್ವಯಂ ಸದ್ಧಾಯುತ್ತೇ. ಹಿ ಪದಪೂರಣೇ. ಸದ್ಧಾ ಯಸ್ಸತ್ಥೀತಿ ಸದ್ಧಾಲು. ಸದ್ಧಾ ರತನತ್ತಯಾದೀಸು ಪಸಾದೋ, ತಣ್ಹಾ, ಆದರೋ ಚ. ದ್ವಯಂ ಧಜಯುತ್ತೇ. ಚಿಹನೇ ಚ ಪಟಾಕಾಯಂ, ಧಜೋ ಸೋಫೇ ಚ ಸೋಣ್ಡಿಕೇ, ಸೋಫೋ ಪುಲ್ಲಿಙ್ಗಂ.

ದ್ವಯಂ ನಿದ್ದಾಸೀಲೇ. ನಿದ್ದಾ ಏವ ಸೀಲಂ ಯಸ್ಸ ಸೋ ನಿದ್ದಾಸೀಲೋ. ದ್ವಯಂ ಪಭಾಯುತ್ತೇ. ಭಾ ದಿತ್ತಿಮ್ಹಿ, ಸರಪಚ್ಚಯೋ, ರಸ್ಸಾದಿ, ದ್ವಿತ್ತಞ್ಚ, ಭಸ್ಸರೋ, ಭಾಸಾ ರತಿ ಯಸ್ಸಾತಿ ವಾ ಭಸ್ಸರೋ, ರಸ್ಸಾದಿ ಏವ. ಸಸ್ಸ ದ್ವಿತ್ತಾಭಾವೇ ಭಾಸುರೋ, ಅಸ್ಸು, ಭಾಸ ದಿತ್ತಿಯಂ ವಾ, ಉರೋ, ಅಥ ವಾ ದ್ವಯಂ ಬಹುಕಥಾಯುತ್ತೇ, ಭಾಸಾಸು ಸಬ್ಬಾಸು ಬಹೂಸು ಕಥಾಸು ರಮತೀತಿ ಭಸ್ಸರೋ, ಕ್ವಿ, ಭಾಸತೀತಿ ವಾ ಭಸ್ಸರೋ, ಅರೋ, ರಸ್ಸಾದಿ, ದ್ವಿತ್ತಞ್ಚ, ಭಾಸಾಸು ರಮತೀತಿ ವಾ ಭಾಸರೋ, ಕ್ವಿ, ಮಜ್ಝರಸ್ಸೋ, ಭಾಸತೀತಿ ವಾ ಭಾಸರೋ, ಅರೋ, ಇಮಸ್ಮಿಂ ಪಕ್ಖೇ ಅಸ್ಸುತ್ತಾಭಾವೋ.

೭೩೪. ತಿಕಂ ನಗ್ಗೇ. ನ ಗಚ್ಛತೀತಿ ನಗ್ಗೋ, ದ್ವಿತ್ತಂ, ಲಗ್ಗ ಸಙ್ಗೇ ವಾ, ನತ್ತಂ, ನಜಿ ಲಜಿ ಬಿಲೇ ವಾ, ಣೋ, ಜಸ್ಸ ಗೋ, ದ್ವಿತ್ತಂ. ದಿಸಾ ಏವ ಅಮ್ಬರಂ ವತ್ಥಂ ಏತಸ್ಸ, ನ ಪಕತಿವತ್ಥನ್ತಿ ದಿಗಮ್ಬರೋ. ಸಸ್ಸ ಗೋ. ನತ್ಥಿ ವತ್ಥಂ ಏತಸ್ಸ, ಅಥ ವಾ ದಿಗಮ್ಬರಾ ವತ್ಥಾ, ಅಞ್ಞತಿತ್ಥಿಕೋ ಅವತ್ಥೋ ಚಾತಿ ಏತೇ ದ್ವೇ ನಗ್ಗೋ ನಾಮ, ನಗ್ಗಾ ನಾಮಾತಿ ವಾ, ‘‘ತೇ ಇತ್ಥಿಖ್ಯಾ ಪೋ, ಸತ್ತ ಪಕರಣಾನಿ ಅಭಿಧಮ್ಮೋ ನಾಮಾ’’ತ್ಯಾದೀಸು ವಿಯ ಸಞ್ಞಾಸಞ್ಞೀಸದ್ದಾನಂ ವಚನಭೇದಸ್ಸಾಪಿ ಸಮ್ಭವತೋ. ನಗ್ಗೋ ಚ ನಗ್ಗೋ ಚ ನಗ್ಗಾ, ಪುರಿಮಸ್ಮಿಂ ಪಕ್ಖೇ ಪನ ಸಾಮಞ್ಞತಾಯ ಏಕವಚನನಿದ್ದೇಸೋ.

ದ್ವಯಂ ಭಕ್ಖಕೇ. ಘಸ ಅದನೇ, ಮರೋ, ಘಸ್ಮರೋ. ಭಕ್ಖ ಅದನೇ, ಣ್ವು.

ವತ್ತುಂ ಸೋತುಞ್ಚ ಅಕುಸಲೋ, ವಚನೇ ಸವನೇ ಚ ಅಕುಸಲೋ ಏಳಮೂಗೋ ನಾಮ, ಏಳೋ ಬಧಿರೋ, ಮೂಗೋ ಅವಚನೋ, ಕಮ್ಮಧಾರಯೋ, ಸಠೇಪಿ ಏಳಮೂಗೋ.

೭೩೫. ಮುಖರಾದಯೋ ತಯೋ ಅಪ್ಪಿಯವಾದಿನಿ. ವಾಝಾವಾಝೇಸು ಮುಖಂ ಅಸ್ಸತ್ಥಿ, ನಿನ್ದಾಯಂ ರೋ. ನಿನ್ದಿತಂ ಮುಖಂ ಯಸ್ಸ ದುಮ್ಮುಖೋ. ಅಬದ್ಧಂ ಅನಗ್ಗಳಂ ಮುಖಂ ಯಸ್ಸ ಅಬದ್ಧಮುಖೋ.

ಬಹು ಚ ಗಾರಯ್ಹಞ್ಚ ವಚೋ ಯಸ್ಸ ಸೋ ವಾಚಾಲೋ ನಾಮ. ಕುಚ್ಛಿತಾ ವಾಚಾ ಅಸ್ಸ ಸನ್ತೀತಿ ವಾಚಾಲೋ, ನಿನ್ದಾಯಂ ಲೋ.

ದ್ವಯಂ ಸುವಚನೇ. ವದತೀತಿ ವತ್ತಾ, ಪಸಂಸಾಯಂ ತು. ವದತೀತಿ ವದೋ. ಸೋ ಪದಪೂರಣೇ.

೭೩೬. ತಿಕಂ ಅತ್ತನಿಯೇ. ನೇತಬ್ಬೋತಿ ನಿಯೋ, ನಿಯೋ ಏವ ನಿಜೋ, ನೀ ನಯೇ, ಣ್ಯೋ, ಯಸ್ಸ ಜೋ, ಸಮೀಪೇ ಜಾಯತೀತಿ ವಾ ನಿಜೋ. ಸಸ್ಸ ಅತ್ತನೋ ಅಯಂ ಸಕೋ, ಇದಮತ್ಥೇ ಕೋ, ಸೋ ಏವ ವಾ ಸಕೋ, ಸಸ್ಸಾಯಂ ಸಕೋ, ಣೋ. ಅತ್ತನಿ ಜಾತೋ ಅತ್ತನಿಯೋ, ಅನಿಯೋ.

ತಿಕಂ ಅಚ್ಛರಿಯೇ. ವಿಪುಬ್ಬೋ ಮಹ ಪೂಜಾಯಂ, ಭೂವಾದಿ, ಣ್ಯೋ, ಮನ್ತಲೋಪೋ, ವಿಮ್ಹಯೋ. ಆಪುಬ್ಬೋ ಚರ ಗತಿಭಕ್ಖನೇಸು, ಅ, ಚರಸ್ಸ ಚ್ಛರಿಯೋ, ರಸ್ಸಾದಿ ಚ, ಅಚ್ಛರಿಯೋ. ನ ಭವಿತ್ಥಾತಿ ಅಬ್ಭುತೋ, ಅಸರೂಪದ್ವಿತ್ತಂ, ರಸ್ಸೋ ಚ, ಅಭೂತೋಪಿ [ಸದ್ದನೀತಿಪದಮಾಲಾಯಂ ೩೪೦.೧ ಪಿಟ್ಠೇಸು ಪಸ್ಸಿತಬ್ಬಂ].

ಸೋಕಾದೀಹಿ ಇತಿಕತ್ತಬ್ಬತಾಪಟಿಪತ್ತಿಸುಞ್ಞೋ ವಿಹತ್ಥೋ, ಬ್ಯಾಕುಲೋ ಚ. ವಿಕ್ಖಿತ್ತೋ ಹತ್ಥೋ ಯಸ್ಸ ವಿಹತ್ಥೋ. ಕುಲ ಸಙ್ಖ್ಯಾನೇ ವಿಆಪುಬ್ಬೋ.

ಕತಸನ್ನಾಹೋ ವಧುದ್ಯತೋ ಹನ್ತುಮುದ್ಯತೋ ಉಯ್ಯುತೋ ಆತತಾಯೀ ನಾಮ. ‘‘ವಧುಯ್ಯುತ್ತೋ’’ತಿಪಿ ಪಾಠೋ. ಆಪುಬ್ಬೋ ತಾ ಪಾಲನೇ, ಣೀ, ದ್ವಿತ್ತಂ, ಆಕಾರನ್ತಾನಮಾಯೋ, ಆತತಾಯೀ.

೭೩೭. ಸೀಸಚ್ಛೇಜ್ಜಮ್ಹಿ ಸೀಸಚ್ಛೇದಾರಹೇ ವಜ್ಝೋ. ಹನ್ತಬ್ಬೋತಿ ವಜ್ಝೋ, ಹನ ಹಿಂಸಾಯಂ, ಣ್ಯೋ, ಹನಸ್ಸ ವಧೋ, ಝಸ್ಸ ಝೋ. ಅಸರೂಪದ್ವಿತ್ತಂ, ವಜ್ಝೋ.

ತಿಕಂ ವಕ್ಕಾಸಯೇ. ನಿಕನ್ತತೀತಿ ನಿಕತೋ, ಕನ್ತ ಛೇದನೇ, ಅ, ನಲೋಪೋ. ಸಠ ಕೇತವೇ, ಅ. ನತ್ಥಿ ಉಜುತಾ ಯಸ್ಸ ಅನುಜು.

ತಿಕಂ ಭೇದಕಾರಕೇ. ಸೂಚ ಪೇಸುಞ್ಞೇ, ಣ್ವು. ಪಿಸಿ ಸಞ್ಚುಣ್ಣನೇ, ಪಿಸಿ ಅವಯವೇ ವಾ, ಪಿಸತೀತಿ ಪಿಸುಣೋ, ಯದಾದಿನಾ ಉನೋ, ಣತ್ತಂ. ಕಣ್ಣೇ ಜಪತೀತಿ, ಅಲುತ್ತಸಮಾಸೋ, ಅರುಚಿತಬ್ಬರೋಚಕೇಪಿ ಕಣ್ಣೇಜಪೋ.

ದ್ವಯಂ ಪಹರಣಸೀಲೇ. ಧುಬ್ಬೀ ಹಿಂಸಾಯಂ, ತೋ, ಭುಜಾದಿ. ವಞ್ಚಯತೇ ವಿಪ್ಪಲಪತೇತಿ ವಞ್ಚಕೋ, ವಞ್ಚ ಗಮನೇ.

೭೩೮. ಅರಿಯಾಸಾಮಞ್ಞೇನ ಚ ಬಾಲಪುರಿಸಸ್ಸ ಲಕ್ಖಣಮಾಹ. ಹಿ ಪದಪೂರಣೇ. ಯೋ ಪುರಿಸೋ ಯೋ ಜನೋ, ಜನಪರಿಯಾಯೋ ಚೇತ್ಥ ಪುರಿಸಸದ್ದೋ ‘‘ದ್ವೇ ಮಹಾಪುರಿಸಾ ಅಭಿನಿಕ್ಖನ್ತಾ’’ತ್ಯಾದೀಸು ವಿಯ, ಅನಿಸಮ್ಮ ಅನುಪಪರಿಕ್ಖಿತ್ವಾ ವಧಬನ್ಧನಾದಿಕಿಚ್ಚಂ ಕರೋತಿ, ಸೋ ಖಲು ಏಕನ್ತತೋ ‘‘ಚಪಲೋ’’ತಿ ವಿಞ್ಞೇಯ್ಯೋ, ಕಸ್ಮಾ? ಅವಿನಿಚ್ಛಿತಕಾರಿತ್ತಾ ಸಮ್ಮಾ ಅವಿನಿಚ್ಛಿತಸ್ಸ ಕಾರಿಯಸ್ಸ ಕರಣಸೀಲತ್ತಾ. ಚಪ ಕಕ್ಕರಣೇ, ಚಪ ಸನ್ತಾನೇ ವಾ, ಅಲೋ, ಚಪಲೋ.

೭೩೯. ಚತುಕ್ಕಂ ಕದರಿಯೇ. ಕುಚ್ಛಿತಂ ದದಾತೀತಿ ಖುದ್ದೋ, ದೋ, ಕಸ್ಸ ಖೋ, ಅದಾನಸೀಲತಾಯ ಸಮ್ಪರಾಯೇಸು ಖುದ್ದಂ ಬುಭುಕ್ಖಿಸ್ಸಾಮೀತಿ ವಾ ಖುದ್ದೋ, ಖುದ ಬುಭುಕ್ಖಾಯಂ, ದೋ ಅನಾಗತತ್ಥೇ. ಪರಾನುಪಭೋಗೇನ ಅತ್ಥಸಞ್ಚಯಸೀಲತ್ತಾ ಕುಚ್ಛಿತೋ ಅರಿಯೋ ಅತ್ಥಪತಿ ಕದರಿಯೋ, ಅದಾಯಕತ್ತಾ ಕುಚ್ಛಿತಂ ಠಾನಂ ಅರತೀತಿ ವಾ ಕದರಿಯೋ, ಇಯೋ. ದಾನಾದೀಸು ನಮನಾಭಾವೇನ ಥದ್ಧೇನ ಮಚ್ಛೇರಯುತ್ತಚಿತ್ತೇನ ಸಹಿತತಾಯ ಥದ್ಧಮಚ್ಛರೀ, ಈ. ಕುಚ್ಛಿತೋ ಪಣೋ ಯಸ್ಸ ಕಪಣೋ, ಕಿಪಚಾನೋ, ಮಿತಪ್ಪಚೋಪಿ. ಕುಚ್ಛಿತಂ ಪಚಾನೋತಿ ದುತಿಯಾಸಮಾಸೋ. ಮಿತಂ ಪಚತೀತಿ ಮಿತಪ್ಪಚೋ, ಣೋ.

ಅದ್ಧಂ ದಲಿದ್ದೇ. ನತ್ಥಿ ಕಿಞ್ಚನಂ ಅಪ್ಪಮತ್ತಕಮ್ಪಿ ಧನಂ ಯಸ್ಸ ಅಕಿಞ್ಚನೋ. ದಲಿದ್ದ ದುಗ್ಗತಿಯಂ, ಅ, ದಲ ವಿದಾರಣೇ ವಾ, ಇದೋ, ದ್ವಿತ್ತಂ. ದೀನ ದುಗ್ಗತಭಾವೇ, ದೀನೋ, ದಿ ಖಯೇ ವಾ, ಈನೋ. ನತ್ಥಿ ಧನಂ ಅಸ್ಸ. ನಿನ್ದಿತಂ ಗಮನಂ ಅಸ್ಸ ದುಗ್ಗತೋ.

೭೪೦. ಯಂ ಕಮ್ಮಂ ‘‘ಇದಮಹಂ ಉಪ್ಪಾದೇಸ್ಸಾಮೀ’’ತಿ ಅಸಮ್ಭಾವಿತಂ ಅಚಿನ್ತಿತಮೇವ ಹುತ್ವಾ ಸಮ್ಪತ್ತಂ, ತಂ ‘‘ಕಾಕತಾಲೀಯ’’ನ್ತ್ಯುಚ್ಚತೇ. ತಾಲಸ್ಸ ಇದಂ ಫಲಂ ತಾಲಂ, ಕಾಕೋ ಚ ತಾಲಞ್ಚ ಕಾಕತಾಲಾನಿ, ತೇಹಿ ಸದಿಸಂ ಕಮ್ಮಂ ಕಾಕತಾಲಿಯಂ, ಕಾಕಸ್ಸ, ತಾಲಫಲಸ್ಸ ಉಡ್ಡನಪತನಸದಿಸಂ ಕಮ್ಮನ್ತ್ಯತ್ಥೋ.

ಚತುಕ್ಕಂ ಯಾಚಕೇ. ಯಾಚನಂ ಕರೋತೀತಿ ಯಾಚನಕೋ, ಯಾಚತೀತಿ ವಾ, ಯಾಚ ಯಾಚನೇ, ಯು. ಸಕತ್ಥೇ ಕೋ. ಅತ್ಥ ಯಾಚನಾಯಂ, ಅತ್ಥನಂ ಅತ್ಥೋ, ಸೋ ಅಸ್ಸತ್ಥೀತಿ ಅತ್ಥೀ. ಣ್ವು, ಯಾಚಕೋ. ‘‘ಮಾದಿಸಸ್ಸ ಧನಂ ದತ್ವಾ ರಾಜಾ ಸಗ್ಗಂ ಗಮಿಸ್ಸತೀ’’ತ್ಯಾದಿನಾ ದಾನಫಲಂ ವಣ್ಣೇತ್ವಾ ವಕತಿ ಯಾಚತೀತಿ ವನಿಬ್ಬಕೋ, ವಣ್ಣಸ್ಸ ವನಿ, ವಕ ಆದಾನೇ, ಆದಾನಮೇತ್ಥ ಯಾಚನಮೇವ.

೭೪೧. ಕಿಞ್ಚಿದೂನಕನ್ತಂ ಪತಿಪಾದೇನ ನಾಮಂ. ಪಕ್ಖಿಸಪ್ಪಮಚ್ಛಾದಯೋ ಅಣ್ಡತೋ ಜಾತತ್ತಾ ಅಣ್ಡಜಾ. ನರಾದಯೋ ಪನ ಗಬ್ಭಾಸಯಸಙ್ಖಾತಜಲಾಬುತೋ, ತತ್ರ ವಾ ಜಾತತ್ತಾ ಜಲಾಬುಜಾ. ಕಿಮಿ ಚ ಡಂಸಾ ಚ ಆದಿನಾ ಮಕಸಮಙ್ಗುರಾದಯೋ ಚ ಸೇದಜಾ, ಸೇದಕಾರಣತ್ತಾ ಉಸ್ಮಾ ಸೇದೋ, ತತೋ ಜಾತಾ ಸೇದಜಾ. ದೇವೋ ಚ ಆದಿನಾ ಬ್ರಹ್ಮನೇರಯಿಕಾದಯೋ ಚ ಓಪಪಾತಿಕಾ, ಉಪಗನ್ತ್ವಾ ಪತತೀತಿ ಉಪಪಾತೀ, ಣೀ, ಸೋಳಸವಸ್ಸುದ್ದೇಸಿಕಾದಿಕೋ ಅತ್ತಭಾವೋ, ಸೋ ಯೇಸಮತ್ಥಿ, ತೇ ಓಪಪಾತಿಕಾ.

೭೪೨. ಜಣ್ಣುಮತ್ತೇ ಜಣ್ಣುಪ್ಪಮಾಣಯುತ್ತೇ ಉದಕಾದಿಮ್ಹಿ ಜಣ್ಣುತಗ್ಘೋ, ಜಣ್ಣುಪ್ಪಮಾಣೋ ಜಣ್ಣುತಗ್ಘೋ, ಪಮಾಣತ್ಥೇ ತಗ್ಘೋ, ಜಣ್ಣುಪ್ಪಮಾಣೋ ಜಣ್ಣುಮತ್ತೋ, ಪಮಾಣತ್ಥೇ ಮತ್ತೋ [ಮೋಗ್ಗಲ್ಲಾನೇ ೪.೪೭ ಸುತ್ತೇ ಪಸ್ಸಿತಬ್ಬಂ], ತಸ್ಮಿಂ.

ಕಿಞ್ಚಿದೂನಕೇ ಅಪ್ಪಮತ್ತಕಯುತ್ತೇ ಕಪ್ಪೋ [ಪಾಣಿನಿ ೫.೪.೬೭], ಊನಸ್ಸ ಅಪ್ಪಕತಾಯ ಕಪ್ಪೀಯತಿ ಏಕಾದಿವಸೇನ ಪರಿಚ್ಛಿಜ್ಜತೀತಿ ಕಪ್ಪೋ, ಕಪ್ಪ ಪರಿಚ್ಛೇದನೇ.

ಚತುಕ್ಕಂ ಪರಿಯಾಪನ್ನೇ. ಅನ್ತೋ ಗಚ್ಛತೀತಿ ಅನ್ತಗ್ಗತಂ, ‘‘ಲೋಪಞ್ಚ ತತ್ರಾಕಾರೋ’’ತಿ ಓಲೋಪೇ ಅಆಗಮೋ, ದ್ವಿತ್ತಂ. ಅನ್ತೋಗತಮ್ಪಿ. ಪರಿಚ್ಛಿನ್ದಿತ್ವಾ ಆಪನ್ನಂ ಗಹಿತಂ ಪರಿಯಾಪನ್ನಂ. ಗಾಧ ಪತಿಟ್ಠಾಯಂ, ಅನ್ತೋ ಓಗಾಧತೀತಿ ಅನ್ತೋಗಧಂ, ರಸ್ಸೋ, ಓಗಾಧತೀತಿ ಓಗಧಂ.

೭೪೩. ದ್ವಯಂ ಸಾಧಿತೇ. ರಾಧ ಸಾಧ ಸಿದ್ಧಿಯಂ, ಕಮ್ಮನಿ ತೋ.

ದ್ವಯಂ ಕುಥಿತೇ. ಪಚ ಪಾಕೇ, ಅತೀತೇ ಕತ್ತರಿ ತೋ, ತಸ್ಸ ಕ್ಕೋ, ಚಲೋಪೋ. ಕುಥ ನಿಪ್ಪಕ್ಕೇ, ತೋ.

ಆಪದಂ ಬ್ಯಸನಂ ಪತ್ತೋ ಆಪನ್ನೋ ನಾಮ, ಅತಿಪೀಳನಂ ಆಪಜ್ಜತೀತಿ ಆಪನ್ನೋ, ‘‘ಆ ತುಕೋಧಮುದಾಟ್ಟೀಸೂ’’ತಿ ಹಿ ಏಕಕ್ಖರಕೋಸೋ [ಏಕಕ್ಖರಕೋಸ ೧೪ ಗಾಥಾ] . ಪದ ಗಮನೇ, ‘‘ಆಪನ್ನೋ ಚ ವಿಪತ್ತಿಮ್ಹಿ, ಪತ್ತೇ ಚ ವಾಚ್ಚಲಿಙ್ಗಿಕೋ’’ತಿ ನಾನತ್ಥಸಙ್ಗಹೋ.

ದ್ವಯಂ ಪರೇಸಮವಸಗತೇ. ನತ್ಥಿ ವಸೋ ಆಯತ್ತೋ ಪರೇಸಂ ಏತಸ್ಮಿಂ ಸೇರೀಭೂತೇತಿ ವಿವಸೋ, ಅವಸೋ ಚ.

೭೪೪. ಛಕ್ಕಂ ಖಿತ್ತೇ. ನುದ ಪೇರಣೇ, ನುದ ಖೇಪೇ ವಾ, ತೋ, ತಸ್ಸ ಇನ್ನೋ. ಅನಿನ್ನಾದೇಸೇ ಭುಜಾದಿ, ನುತ್ತೋ. ನುತೋಪಿ. ಅಸು ಖೇಪನೇ, ತೋ, ಭುಜಾದಿ, ಅತ್ತೋ. ಖಿಪ ಪೇರಣೇ, ತೋ.

ಈರ ಗತಿಯಂ, ಕಮ್ಪನೇ ಚ, ಇತೋ, ಈರಿತೋ. ಆಪುಬ್ಬೋ ವಿಧ ಪೇರಣೇ, ತೋ, ಆವಿದ್ಧೋ.

ಚತುಕ್ಕಂ ಕಮ್ಪಿತೇ. ಕಮ್ಪ ಚಲನೇ, ಧೂ ವಿಧುನನೇ, ಕಮ್ಪನೇ ಚ. ಧೂತೋ, ಆಧೂತೋ, ಚಲ ಕಮ್ಪನೇ, ಚಲಿತೋ. ವೇಲ್ಲಿತೋ, ಪೇಖಿತೋಪಿ. ವೇಲ್ಲ ಚಲನತ್ಥೋ. ಪೇಖ ಗತ್ಯತ್ಥೋ, ಪೇಖಿತೋ.

ದ್ವಯಂ ನಿಸಿತೇ. ನಿಸಿ ನಿಸಾನೇ. ತಿಜ ನಿಸಾನೇ, ನಿಸಾನಂ ತಿಕ್ಖಕರಣಂ, ಉಭಯತ್ರಾಪಿ ಕಮ್ಮನಿ ತೋ.

೭೪೫-೭೪೬. ತಿಕಂ ಪತ್ತಬ್ಬೇ. ಪತ ಗಮನೇ, ತಬ್ಬೋ. ಗಮು ಗತಿಯಂ, ಣ್ಯೋ, ಮ್ಯಸ್ಸ ಮ್ಮೋ ವಾ, ಗಮ್ಮಂ, ಗಮ್ಯಂ, ದ್ಯಸ್ಸ ಜ್ಜೋ, ಆಪಜ್ಜಂ.

ದ್ವಯಂ ಪರಿಣತೇ. ಪಚಿನೋ ಅನೇಕತ್ಥತ್ತಾ ಇಹ ಪರಿಣತತ್ಥೋ. ನಮು ನಮನೇ, ಭೂವಾದಿ, ಕತ್ತರಿ ತೋ, ಸಮಾ ದ್ವೇ ತುಲ್ಯತ್ಥಾ.

ಪಞ್ಚಕಂ ವೇಠಿತೇ. ವೇಠ ವೇಠನೇ. ವಲಮಿವ ವಲಯಂ, ಕುಣ್ಡಲಾಕಾರಂ ವಲಯಂ ಕತಂ ವಲಯಿತಂ, ನಾಮಧಾತು, ಕಾರಿತನ್ತಾ ತೋ. ರುಧ ಆವರಣೇ, ರುದ್ಧಂ. ಸಂಪುಬ್ಬೋ ವು ಸಂವರಣೇ, ಸಂವುತಂ. ಸಮನ್ತತೋ ವುತಂ ಆವುತಂ, ವು ಸಂವರಣೇ, ಸಬ್ಬತ್ರ ಕಮ್ಮನಿ ತೋ.

ದ್ವಯಂ ಪರಿಖಾದಿನಾ ಪರಿಕ್ಖಿತ್ತೇ. ಪರಿ ಸಮನ್ತತೋ ಕರೀಯತೇತಿ ಪರಿಕ್ಖಿತ್ತಂ, ಪರಿಕ್ಖತಮ್ಪಿ. ವು ಸಂವರಣೇ, ನಿವುತಂ.

ತಿಕಂ ವಿತ್ಥತೇ. ಸರ ಗತಿಯಂ, ತೋ, ತಸ್ಸ ಟೋ, ರಲೋಪೋ, ವಿಸಟಂ. ತನು ವಿತ್ಥಾರೇ, ತೋ, ತಸ್ಸ ತೋ, ನಲೋಪೋ, ವಿತ್ಥತಂ, ತತಂ.

ದ್ವಯಂ ಲೇಪನೀಯೇ. ಲಿಪ ಲೇಪನೇ, ದಿಹ ಉಪಲೇಪನೇ, ಉಭಯತ್ರಾಪಿ ಕಮ್ಮನಿ ತೋ.

ದ್ವಯಂ ಗುಳ್ಹೇ. ಗುಹ ಸಂವರಣೇ, ಳೋ, ಗುಳ್ಹೋ. ಗುಪ ಗೋಪನೇ, ಗುತ್ತೋ.

ದ್ವಯಂ ಪೋಸನೀಯೇ. ಪುಸ ಪೋಸನೇ, ತೋ, ಸತಾನಂ ಟ್ಠೋ, ಟ್ಠಾಭಾವೇ ಪೋಸಿತೋ.

೭೪೭. ದ್ವಯಂ ಸಲಜ್ಜೇ. ಲಜ್ಜ ಪೀಳೇ, ಪೀಳೋ ಲಜ್ಜಾವ. ಹೀಳ ನಿನ್ದಾಲಜ್ಜಾಸು, ಹೀಳಿತೋ.

ದ್ವಯಂ ಸದ್ದೇ. ಸನ ಧನ ಸದ್ದೇ, ಸನಿತಂ, ಧನಿತಂ.

ಪಞ್ಚಕಂ ಬನ್ಧನೀಯೇ. ಸನ್ದನಂ ಬನ್ಧನಂ, ತಂಯೋಗಾ ವನ್ತು. ಸನ್ದಾನವನ್ತಂ ಕತಂ ಸನ್ದಾನಿತಂ, ನಾಮಧಾತುಮ್ಹಾ ತೋ, ವನ್ತುಲೋಪೋ. ಸನ್ದಾನಂ ಸಜ್ಜಾ, ತಮಸ್ಸಾತಿ ವಾ, ಇತೋ. ಸಿ ಬನ್ಧನೇ, ತೋ. ಬನ್ಧ ಬನ್ಧನೇ, ಬದ್ಧೋ. ಕೀಲ ಬನ್ಧನೇ. ಯಮು ಉಪರಮೇ, ಸಂಪುಬ್ಬೋ ಬನ್ಧನೇ, ಸಬ್ಬತ್ರ ಕಮ್ಮನಿ ತೋ. ಮೂತಂ, ಉದ್ದಿತಂ, ಸದ್ದಿತಮ್ಪಿ. ಮೂ ಬನ್ಧನೇ. ದಾ ಅವಖಣ್ಡನೇ. ಉ ಸಂಪುಬ್ಬೋ ಬನ್ಧನೇ. ವುತ್ತಞ್ಚ ‘‘ಉದ್ದಾನನ್ತು ಚ ಬನ್ಧನ’’ನ್ತಿ.

೭೪೮. ತಿಕಂ ಸಿದ್ಧೇ. ಸಿಧ ಸಂಸಿದ್ಧಿಮ್ಹಿ. ಪದ ಗಮನೇ, ನಿಪುಬ್ಬೋ ಸಿದ್ಧಿಯಂ. ವತ್ತ ವತ್ತನೇ, ವತ್ತನಂಪ್ಯತ್ರ ಸಿಜ್ಝನಂ ನಿಪುಬ್ಬತ್ತಾ.

ತಿಕಂ ವಿದಾರಿತೇ. ದರ ಭಿದ ವಿದಾರಣೇ, ಇನ್ನಾದೇಸೋ. ಭಿನ್ನಂ. ಅನಿನ್ನಾದೇಸೇ ತು ಭೇದಿತಂ.

ದ್ವಯಂ ತಿಣಾದೀಹಿ ಛಾದನೀಯೇ. ಛದ ಸಂವರಣೇ, ತೋ, ತಸ್ಸ ಸಧಾತ್ವನ್ತಸ್ಸ ಅನ್ನಾದೇಸೋ.

ತಿಕಂ ಛಿನ್ದಿತೇ. ವಿಧ ವೇಧನೇ. ಛಿದ್ದ ಕಣ್ಣಭೇದೇ, ಚುರಾದಿ. ವಿಧ ವೇಧನೇ, ಸಬ್ಬತ್ರ ಕಮ್ಮೇ ತೋ, ಅಪರದ್ವಯೇ ಚ ಸಞ್ಜಾತತ್ಥೇ ಇತೋ.

೭೪೯. ತಿಕಂ ಆನೀತೇ. ಹರ ಹರಣೇ, ಭರ ಧಾರಣಪೋಸನೇಸು, ಆಪುಬ್ಬೋ ನೀ ನಯೇ.

ದ್ವಯಂ ದಮಯುತ್ತೇ. ದಮು ದಮನೇ, ಕತ್ತರಿ ತೋ. ಪಕ್ಕಮಾದೀಹಿ ನ್ತೋ. ಅನ್ತಾದೇಸೇ ದಮಿತೋ. ಕಮ್ಮಸಾಧನೋಪ್ಯಯಂ.

ದ್ವಯಂ ಸನ್ತೇ. ಸಮು ಉಪಸಮೇ, ಕತ್ತರಿತೋ. ಅನ್ತಾದೇಸೇ ಸಮಿತೋ, ಕಮ್ಮಸಾಧನೋಪ್ಯಯಂ.

ದ್ವಯಂ ಪುಣ್ಣೇ. ಪೂರ ಪೂರಣೇ, ತರಾದೀಹಿ ಇಣ್ಣೋ, ದ್ವೀಸುಪಿ ಕತ್ತುಕಮ್ಮಸಾಧನಾನಿ ಲಬ್ಭನ್ತಿ.

೭೫೦. ತಿಪಾದಂ ಪೂಜಿತೇ. ಚಾಯ ಪೂಜಾನಿಸಾಮನೇಸು. ಮಹ ಪೂಜಾಯಂ, ಪೂಜ ಪೂಜನೇ, ಅರಹ ಪೂಜಾಯಂ, ಅರಹಿತೋ. ಅಚ್ಚ ಪೂಜಾಯಂ. ಮಾನ ಪೂಜಾಯಂ. ಚಿ ಚಯೇ, ಅಪಪುಬ್ಬೋ ಪೂಜನೇ. ನಮಸ್ಸಿತೋಪಿ, ನಮಸ್ಸಧಾತು ಪೂಜಾಯಂ.

ದ್ವಯಂ ತಚ್ಛಿತೇ ದಾರುಆದಿಮ್ಹಿ. ತಚ್ಛ ತನುಕರಣೇ, ತನುಕರೀಯತೇತಿ ತನೂಕತೋ, ದೀಘೋ.

೭೫೧. ದ್ವಯಂ ಅಗ್ಗಿಆದೀಹಿ ತತ್ತೇ. ತಪ ಧೂಪ ಸನ್ತಾಪೇ.