೫. ಅರಞ್ಞವಗ್ಗವಣ್ಣನಾ

೫೩೬. ಸತ್ತಕಂ ವನೇ. ಅರ ಗಮನೇ, ಅಞ್ಞೋ, ಅರಞ್ಞಂ. ಕೇನ ಜಲೇನ ಅನನಂ ಪಾಣಮನಸ್ಸ ಕಾನನಂ, ದಾ ಅವಖಣ್ಡನೇ, ದಾ ಛೇದನೇ ವಾ. ಅಧಿಕರಣೇ ಣೋ, ‘‘ಆಕಾರನ್ತಾನಮಾಯೋ’’ತಿ ಆಯೋ. ದಯ ದಾನಗತಿಹಿಂ ಸಾದಾನೇಸು ವಾ, ಣೋ, ಗಹ ಉಪಾದಾನೇ [ಗಾಹೂ ವಿಲೋಳನೇ (?)], ಅಧಿಕರಣೇ ಯು. ವಪ ಬೀಜನಿಕ್ಖೇಪೇ, ಇನೋ, ಅಸ್ಸಿತ್ತಂ. ವನ ಸಮ್ಭತ್ತಿಸದ್ದೇಸು, ಕತ್ತರಿ ಅ, ವನಂ. ಅಟಾ ಅವಯವೋ ಸೇಲಾ ಅತ್ರೇತಿ ಅಟವಿ, ಇ, ಈಮ್ಹಿ ಅಟವೀ.

ಮಹಾಪದುಮಲತಾವನಂ ಮಹಾರಞ್ಞಂ, ನದಾದಿ, ಅನನ್ತೋ ಚ, ಅರಞ್ಞಾನೀ.

೫೩೭. ನಗರತೋ ನಾತಿದೂರಸ್ಮಿಂ ಠಾನೇ ಸನ್ತೇಹಿ ಅಭಿರೋಪಿತೋ ತರುಸಣ್ಡೋ ಪೂಗಪನಸಾದಿತರುಸಮೂಹೋ ಅತ್ಥಿ, ಸೋ ‘‘ಉಪವನ’’ನ್ತಿ ಚೋಚ್ಚತೇ, ಕಿತ್ತಿಮವನಮೇತಂ. ಆರಮನ್ತ್ಯಸ್ಮಿನ್ತಿ ಆರಾಮೋ, ಣೋ. ಉಪಗತಂ, ಉಪರೋಪಿತಂ ವಾ ವನಂ ಉಪವನಂ.

೫೩೮. ಸಬ್ಬಸಾಧಾರಣಂ ಸಬ್ಬಲೋಕೇಹಿ ಸಾಧಾರಣೋಪಭೋಗಂ ರಞ್ಞಂ ರಾಜೂನಂ ಅರಞ್ಞಂ ‘‘ಉಪವನಂ, ಉಯ್ಯಾನ’’ಮಿತ್ಯುಚ್ಚತೇ, ಉಲ್ಲೋಕೇನ್ತಾ ಯನ್ತಿ ಜನಾ ಏತಸ್ಮಿನ್ತಿ ಉಯ್ಯಾನಂ, ಯು. ಆಕೀಳೋಪ್ಯತ್ರ.

ತದೇವ ರಾಜೋಪವನಮೇವ ಉಪಕಾರಿಕಾಸನ್ನಿಹಿತಂ, ಪುರಸನ್ನಿಹಿತಂ ವಾ ಅನ್ತೇಪುರಾಚಿತಂ ಪಮದವನಾಖ್ಯಂ. ಯತ್ರ ಅನ್ತೇಪುರಸಹಿತೋ ಏವ ರಾಜಾ ವಿಹರತಿ, ನಾಞ್ಞಜನಪ್ಪವೇಸೋ. ಪಮದಾನಂ ಇತ್ಥೀನಂ ವನಂ ಪಮದವನಂ, ರಸ್ಸೋ.

೫೩೯-೫೪೦. ಸಾನ್ತರಾಳಾ ಪನ್ತಿ, ಯಥಾ – ತರುಪನ್ತಿ, ಪಾಸಾದಪನ್ತಿ, ನಿರನ್ತರಾಳಾ ತು ರಾಜೀತಿ. ತತ್ರ ಪಞ್ಚಕಂ ಪನ್ತಿಯಂ. ಪನ ಬ್ಯವಹಾರೇ, ಥುತಿಮ್ಹಿ ಚ, ಪನ್ತಿ. ವೀ ಗಮನೇ, ಥಿ, ವೀಥಿ. ವಲ ಸಂವರಣೇ, ಇ, ಆವಲಿ. ಆಲಿಪಿ, ಅಲಧಾತುಮ್ಹಾ ಇ. ಸಿ ಸೇವಾಯಂ, ಣಿ, ಸೇಣಿ. ಪಾ ರಕ್ಖಣೇ, ಳಿ, ಪಾಳಿ, ಸೋಗತೇಪಿ. ದ್ವೇ ಸಮಾ. ಲಿಖ ಲೇಖನೇ, ಅ. ರಾಜ ದಿತ್ತಿಯಂ, ಇ.

ತಿಪಾದಂ ರುಕ್ಖಮತ್ತೇ. ಪಾದೇನ ಮೂಲೇನ ಪಿವತೀತಿ ಪಾದಪೋ, ಣೋ. ವಿಟಪಯೋಗಾ ವಿಟಪೀ. ರುಕ್ಖ ವರಣೇ, ಅ, ರುಹ ಜನನೇ ವಾ, ಖೋ, ಹಸ್ಸ ಕೋ. ನ ಗಚ್ಛತೀತಿ ಅಗೋ. ಸಲ ಗಮನೇ, ಣೋ, ಸಾರವನ್ತತಾಯ ವಾ ಸಾರೋ, ಸೋ ಏವ ಸಾಲೋ, ಅಞ್ಞತ್ರೋಪಚಾರಾ. ಮಹಿಯಂ ರುಹತೀತಿ, ಅ. ದು ಗತಿಯಂ, ಮೋ. ತರ ತರಣೇ, ಉ. ಕುತೋ ಭೂಮಿತೋ ಜಾಯತೀತಿ ಕುಜೋ, ಅಙ್ಗಾರೇಪಿ. ಸಾಖಾಯೋಗತೋ ಸಾಖೀ.

ಗಮು ಗಮನೇ, ಣೋ, ‘‘ಗಮಿಸ್ಸನ್ತೋ ಚ್ಛೋ ವಾ ಸಬ್ಬಾಸೂ’’ತಿ ಚ್ಛೋ. ಖುದ್ದೋ ಅವುಡ್ಢಿಪ್ಪತ್ತೋ ಪಾದಪೋ ಖುದ್ದಪಾದಪೋ. ಯೇ ರುಕ್ಖಾ ಪುಪ್ಫಂ ವಿನಾ ಅಪುಪ್ಫಕಾ ಫಲನ್ತಿ, ತೇ ಅಸ್ಸತ್ಥೋದುಮ್ಬರಪನಸಾದಯೋ ‘‘ವನಪ್ಪತೀ’’ತಿ ವುಚ್ಚನ್ತಿ, ವನಾನಂ ಪತಿ ವನಪ್ಪತಿ. ಪುಪ್ಫತೋ ಜಾತಫಲಾ ಪನ ಅಮ್ಬಖಜ್ಜೂರಾದಯೋ ವಾನಪ್ಪತಯೋ. ವನಪ್ಪತಿಮ್ಹಿ ಭವಾ ವಾನಪ್ಪತಯೋ.

೫೪೧. ಯೋ ಫಲಪಾಕಾವಸಾನೇ ಮರತಿ, ಸೋ ಕದಲೀಧಞ್ಞಾದಿಕೋ ಓಸಧಿ ನಾಮ ಭವೇ, ಓಸೋ ಧೀಯತೇ ಯಸ್ಸಂ [ಓಸೋ ಗ್ಲೋಸೋ ದಿತ್ತಿಬ್ಬಾ ಧೀಯತೇ’ತ್ರ ಬ್ಯಾಖ್ಯಾಸುಧಾ ೨.೪.೬], ಸಾ ಓಸಧಿ, ಇ. ಸಾಸದ್ದೋ ಓಸಧಿಸದ್ದಸ್ಸ ಇತ್ಥಿಲಿಙ್ಗತ್ತದೀಪಕೋ.

ದ್ವಯಂ ಉತುಪ್ಪತ್ತೇಪಿ ಫಲಹೀನೇ. ವನ ಯಾಚನೇ, ಝೋ, ವಞ್ಝಾ, ವಧತಿ ಫಲನ್ತಿ ವಾ ವಞ್ಝಾ, ವಜಾದಿನಾ ಯೋ, ಝಸ್ಸ ಝೋ, ನಿಗ್ಗಹೀತಾಗಮೋ ಚ. ನ ವಿಜ್ಜತಿ ಫಲಮೇತಿಸ್ಸಾತಿ ಅಫಲಾ, ದ್ವೇ ತೀಸು. ತಿಕಂ ವತ್ತಮಾನಫಲೇ ರುಕ್ಖಾದೋ. ಫಲಯೋಗಾ, ಇನೋ, ವನ್ತು, ಈ ಚ.

೫೪೨. ಚತುಕ್ಕಂ ವಿಕಸಿತೇ. ಫುಲ್ಲ ವಿಕಸನೇ, ಕತ್ತರಿ ತೋ, ಸಞ್ಜಾತತ್ಥೇ ವಾ ಇತೋ, ಫಲ ವಿಸರಣೇ ವಾ, ವಿಸರಣಂ ವಿಕಾಸೋ, ಅಸ್ಸು. ಕಚ ಬನ್ಧನೇ, ವಿಪುಬ್ಬೋ ವಿಕಸನೇ, ಕತ್ತರಿ ಅ. ವಿಕಚತೇ ವಿದಲತಿ ವಿಸಿಲಿಟ್ಠದಲೋ ಭವತೀತಿ ವಾ ವಿಕಚೋ, ಅ, ವಿಸದ್ದೋ ವಿಸಿಲೇಸಜೋತಕೋ. ಕಸ ಗಮನೇ, ತೋ. ದಲಾನಂ ಅಞ್ಞಮಞ್ಞಂ ವಿಸಿಲೇಸತೋ ಸಮುದಾಯೋ ‘‘ವಿಕಸಿತೋ’’ತ್ಯುಚ್ಚತೇ. ಫುಟೋಪ್ಯತ್ರ. ಫುಟ ವಿಕಸನೇ.

ಪಾದೋ ರುಕ್ಖಗ್ಗೇ. ‘‘ನ ನಾ’ಗ್ಗಂ ಸಿಖರಂ ಸಿರೋ’’ತಿ ವೋಪಾಲಿತವಚನತೋ ‘‘ಸಿರಸೋ ಅಗ್ಗ’’ನ್ತಿ ನ ಛಟ್ಠೀಸಮಾಸೋ. ಸಿರೋ ವುತ್ತೋ. ಅಜ ಗಮನೇ, ಗೋ, ಅಗ್ಗಂ, ಸೇಟ್ಠೇ ತೀಸು. ಸೀ ಸಯೇ, ಖರೋ, ಸಿಖಾ ವಾ ಚೂಳಾ, ಸಾ ವಿಯ ಜಾಯತೀತಿ ಸಿಖರೋ. ದ್ವಯಂ ಸಾಖಾಯಂ. ಸಾಖ ಬ್ಯಾಪನೇ, ಅ. ‘‘ಲತಾ ವಲ್ಲೀ ಸಮಾಖ್ಯಾತಾ, ಲತಾ ಸಾಖಾ ಚ ಸಾಖಿನ’’ನ್ತಿ ಲತಾ ನಾನತ್ಥಾ. ಲಾ ಆದಾನೇ, ತೋ, ರಸ್ಸೋ.

೫೪೩. ಛಕ್ಕಂ ಪತ್ತೇ. ದಲತಿ ವಿಕಸತೀತಿ ದಲಂ, ಅ. ಲಸ ಕನ್ತಿಯಂ, ಪಕಾರೇನ ಲಸತೀತಿ ಪಲಾಸೋ, ಣೋ. ಛದ ಸಂವರಣೇ, ಛಾದೀಯತೇ ಯೇನ ಛದನಂ, ಯು. ಪೂರಯತೀತಿ ಪಣ್ಣಂ, ನಿಪಾತನಾ, ಪತ ಅಧೋಗಮನೇ ವಾ, ಪತತ್ಯಚಿರೇನ ಪಣ್ಣಂ, ಪತ್ತಞ್ಚ, ತೋ, ಪುಮೇ. ಸಞ್ಞಾಯಂ ಣಮ್ಹಿ ಛದೋ.

ದ್ವಯಂ ಪತ್ತಾದಿಸಙ್ಘಾತವತಿ ಸಾಖಾಯ ಪಬ್ಬೇ. ಪಲ್ಲ ಗಮನೇ, ಅವೋ. ಕಿಸ ಗಮನೇ, ಯೋ, ಲಾಗಮೋ ಮಜ್ಝೇ. ದ್ವಯಂ ಅಙ್ಕುರೇ. ನವೋ ಏವ ಉಬ್ಭಿತೋ ಉಗ್ಗತೋ ನವುಬ್ಭಿನ್ನೋ. ಅಙ್ಕ ಲಕ್ಖಣೇ, ಉರೋ.

೫೪೪. ಪಕ್ಕಂ ಯಾವ ಪಾದೇನ ನಾಮಂ. ವಿಕಾಸೋ ಮುಖಪಬುದ್ಧಕಲಿಕಾಯಂ ಮಕುಳಾದಿದ್ವಯಂ. ಮುಚ ಮೋಚನೇ, ಉಲೋ, ಉಸ್ಸತ್ತಂ, ಚಸ್ಸ ಕೋ, ಮಕುಳಂ, ಮಕುಳೋ ವಾ. ಕುಟ ಛೇದನೇ, ಮಲೋ, ಅಸ್ಸು, ಕುಟುಮಲೋ, ಕುತುಮಲೋಪಿ. ಪುಪ್ಫಸ್ಸ ಚ ಫಲಸ್ಸ ಚ ಪಕತಿಭೂತೇ ಜಾಲಪತ್ತೇ ಖಾರಕಾದಿದ್ವಯಂ. ಖುರ ವಿನಾಸೇ. ಣ್ವು. ಜಲ ಧಞ್ಞೇ, ಸಕತ್ಥೇ ಕೋ. ಜಾಲಕಂ ನಪುಂಸಕೇ. ದ್ವಯಂ ಜಾಲಕತೋ ಪವುದ್ಧೇ ಪುಪ್ಫೇ, ಫಲೇ ಚ. ಕಲ ಸಙ್ಖ್ಯಾನೇ, ಣ್ವು, ಕುರ ಸದ್ದೇ, ಣ್ವು.

ಪುಪ್ಫಾದಿಬನ್ಧನಂ ಪುಪ್ಫಫಲಾನಂ ಬನ್ಧನಂ ವಣ್ಟಂ ನಾಮ. ಬನ್ಧೀಯತೇ ಯೇನ ವಣ್ಟಂ, ವಜಾದಿ.

೫೪೫. ತಿಕಂ ಪುಪ್ಫೇ. ಪಸು ಪಾಣಿಗಬ್ಭವಿಮೋಚನೇ, ಣೋ. ಖಪಣಕಭಾಸಾಯ ರುಕ್ಖೋಪಿ ಪಾಣಿ, ವುದ್ಧಾದಿ, ಪಸವೋ. ಕುಸ ಅಕ್ಕೋಸೇ, ಉಮೋ, ಕಸ ಗಮನೇ ವಾ, ಕಾಸ ದಿತ್ತಿಯಂ ವಾ, ಉಮೋ, ರಸ್ಸೋ. ಪುಪ್ಫ ವಿಕಸನೇ, ಪುಪ್ಫತೀತಿ, ಅ. ಪುಪ್ಫಜೋ ರಜೋ ಪುಪ್ಫಧೂಲೀ ಪರಾಗೋ ನಾಮ, ರನ್ಜ ರಙ್ಗೇ, ಣೋ.

ಮಧುರಪುಪ್ಫರಸೋ ಮಕರನ್ದೋ ನಾಮಾತಿ ಮತಂ. ಮಕ್ಖಿಕಾ ರಮನ್ತಿ ಯಸ್ಮಿಂ ಮಕರನ್ದೋ, ವಜಾದಿ. ದ್ವಯಂ ಕಲಿಕಾಭಿ ಆಕಿಣ್ಣೇ ಪರಿಣಾಯವತಿ. ಥು ಅಭಿತ್ಥವೇ, ಣ್ವು, ಥವಕೋ. ಗುಧ ಪರಿವೇಧನೇ, ಣ್ವು, ಧಸ್ಸ ಛೋ, ಗೋಚ್ಛಕೋ.

೫೪೬-೫೪೭. ಆಮೇ ಅಪಕ್ಕೇ ಫಲೇ ಸಲಾಟು ಉತ್ತೋ, ಸಲಾಟ ಬಾಲ್ಯಪರಿಭಾಸನೇಸು, ಉ, ವಿಜ್ಜಮಾನಬಾಲ್ಯತಾಯ ಸಲಾಟು. ಪಕ್ಕನ್ತು ಫಲಂ ನಿಪ್ಪರಿಯಾಯೇನ ‘‘ಫಲ’’ಮಿತ್ಯುಚ್ಚತೇ, ತೇನ ‘‘ಆಮಸ್ಮಿಂ ಫಲವೋಹಾರೋ ರೂಳ್ಹಿಯಾ ಪವತ್ತತೀ’’ತಿ ಞಾತಬ್ಬೋ, ಫಲ ನಿಪ್ಫತ್ತಿಯಂ, ನಿಪ್ಫತ್ತಿ ಚಾತ್ರ ಸುಪಕ್ಕತ್ತಂ, ಸುಕ್ಖೇ ತು ಫಲೇ ವಾನೋ. ತತ್ರ ಸಲಾಟು ವಾನಾ ತೀಸು, ಯಥಾ ಸಲಾಟು ಜಮ್ಬೂ, ಸಲಾಟವೋ ಮಾಸಾ, ಸಲಾಟೂನಿ ಕುಮ್ಭಣ್ಡಾನಿ, ವಾನಾ ಹರೀಟಕೀ, ವಾನೋ ಮುಗ್ಗೋ, ವಾನಮಮ್ಬಂ.

ಚಮ್ಪಕಾದಿ ಚಮ್ಪಕಂ ಕರವೀರಂ ಕದಮ್ಬಕಂ ಅಸೋಕಂ ಕಣ್ಣಿಕಾರಂ ಚಮ್ಪಕಾದೀನಂ ಪುಪ್ಫಂ ವಿಕಾರೋ, ಅವಯವೋ ಚೇತಿ ಅಞ್ಞತ್ಥೇ ಣೋ ನ ಭವತಿ, ತದನ್ತತೋ ಪುಪ್ಫಸ್ಸುಪ್ಪತಿತತೋ, ಏವಂ ಚಮ್ಪಕಾದೀನಿ ಕುಸುಮನಾಮಾನಿ ನಪುಂಸಕೇ ವತ್ತನ್ತಿ, ಅಮ್ಬಾದಿ ದಾಳಿಮಂ ನಾರಙ್ಗಂ ಆಮಲಕಂ ಕುವಲಂ ಬದರನ್ತಿ ಪಕತ್ಯನ್ತರಮೇವ ಫಲೇ ವತ್ತತೇ, ಆಮಲಕಿಯಾ ಕುವಲಿಯಾ ಬದರಿಯಾ ಫಲಂ ವಿಕಾರೋ, ಅವಯವೋ ಚೇತಿ ಅಞ್ಞತ್ಥೇ ತದ್ಧಿತೋಪಿ ನೋಪ್ಪಜ್ಜತೇ, ತದನ್ತತೋ ಫಲಸ್ಸುಪ್ಪತಿತತೋ, ಏವಂ ಅಮ್ಬಾದೀನಿ ಫಲನಾಮಾನಿ ನಪುಂಸಕೇ ವತ್ತನ್ತಿ. ಮಲ್ಲಿಕಾದಯೋ ಕುಸುಮೇಪಿ ವತ್ತಮಾನಾ ಸಲಿಙ್ಗಾ ಪಕತಿಲಿಙ್ಗಾಅಭೇದೋಪಚಾರೇನ ಪವತ್ತಿಯಾ, ಯಥಾ – ಮಲ್ಲಿಕಾ ಜಾತಿ, ವನಮಲ್ಲಿಕಾ ಇಚ್ಚಾದಿ. ವೀಹಯೋಪ್ಯಭೇದೋಪಚಾರೇನ ಫಲೇಪಿ ಸಲಿಙ್ಗಾ, ಯಥಾ ಮಾಸಸ್ಸ ಫಲಂ ಮಾಸೋ, ಮುಗ್ಗಸ್ಸ ಫಲಂ ಮುಗ್ಗೋ, ಏವಂ ಯವೋ, ತಿಲೋ, ಅತಸೀ, ಕಙ್ಗು, ಧಞ್ಞಂ.

ತಿಕಂ ಜಮ್ಬುಯಾ ಫಲೇ. ತತ್ರ ಯದಾ ಲೋಕತೋ ಫಲೇ ವುತ್ತಿ, ತದಾ ಜಮ್ಬುಸದ್ದೋ ಪಕತ್ಯನ್ತರಮೇವ ಫಲೇ ವತ್ತತೇ, ಯದಾ ನ ಫಲವುತ್ತಿ, ತದಾ ವಿಕಾರೇ ಅವಯವೇ ವಾನೋ, ಜಮ ಅದನೇ, ಬೂ, ಜಮ್ಬೂ, ಪಕತ್ಯನ್ತರಾಫಲೇ ವುತ್ತಿ. ಜಮ್ಬುಯಾ ಫಲಂ ಜಮ್ಬುವಂ. ಜಮ್ಬು ಚ. ಲೋಕತೋ ಏವ ಫಲೇಪಿ ವತ್ತಮಾನಾ ಹರೀಟಕ್ಯಾದಯೋ ಸಭಾವತೋ ಇತ್ಥಿಯಂ ಭವನ್ತಿ [ಅಮರ ೧೪.೧೮-೨೦]. ಹರೀಟಕಿಯಾ ಫಲಂ ಹರೀಟಕೀ, ಏವಂ ಕೋಸಾತಕೀ, ಸಲ್ಲಕೀ, ದಕ್ಖಾ, ಕಣ್ಡಕಾರಿಕಾ, ಸೇಫಾಲಿಕಾ ಇಚ್ಚಾದಿ, ಪುಬ್ಬೇ ವಿಯ ವಿಕಾರಾವಯವತ್ಥೇಸು ಪಚ್ಚಯಾಭಾವೋ, ಅಸ್ಸತ್ಥಾದಿಕಂ ಛಕ್ಕಮೇವ ತದ್ಧಿತನ್ತಂ ಅಸ್ಸತ್ಥಾದೀನಂ ಫಲೇ ವತ್ತಮಾನಾನಂ ನಪುಂಸಕಂ ಸಿಯಾ ರೂಪಭೇದೋ, ಯಥಾ – ಅಸ್ಸತ್ಥಸ್ಸ ಫಲಂ ಅಸ್ಸತ್ಥಂ, ವೇಣುನೋ ಫಲಂ ವೇಣವಂ, ಪಿಲಕ್ಖಸ್ಸ ಫಲಂ ಪಿಲಕ್ಖಂ, ನಿಗ್ರೋಧಸ್ಸ ಫಲಂ ನಿಗ್ರೋಧಂ, ಇಙ್ಗುದಿಯಾ ಫಲಂ ಇಙ್ಗುದಂ, ಬ್ರಹತಿಯಾ ಫಲಂ ಬ್ರಾಹತಂ, ವಿದಾರೀ ಅಂಸುಮತೀ ಗಮ್ಭರಿಯಾದಯೋ ಮೂಲೇ, ಪುಪ್ಫೇಪಿ ಸಲಿಙ್ಗಾ [ಅಮರ ೧೪.೧೮-೨೦]. ಪಾಟಲಾಸದ್ದೋ ಪನ ಅಭೇದವತ್ತಿಚ್ಛಾಯಂ ಮೂಲೇ ಪುಪ್ಫೇಪಿ ವತ್ತಮಾನೋ ಸಭಾವತೋ ಇತ್ಥಿಲಿಙ್ಗೋ, ಭೇದವತ್ತಿಚ್ಛಾಯಂ ವಿಕಾರೇ ಅವಯವೇ ವಾ ಣಮ್ಹಿ ಪಾಟಲಂ [ಅಮರ ೧೪.೧೮-೨೦]. ದ್ವಯಂ ಸಾಖಾಪಲ್ಲವಾದಿಸಮುದಾಯಲಕ್ಖಣೇ ಆಭೋಗೇ, ವಿಟ ವೇಧನೇ, ವಿಟ ಅಕ್ಕೋಸೇ ವಾ, ಅಪೋ, ಪಸ್ಸ ಭತ್ತೇ ವಿಟಭೀ, ನದಾದಿ.

೫೪೮. ಮೂಲಮಾರಬ್ಭ ಮೂಲತೋ ಪಟ್ಠಾಯ ಸಾಖನ್ತೋ ಸಾಖಾವಧಿ ತರುಸ್ಸ ಭಾಗೋ ಖನ್ಧೋ ನಾಮ, ಯೋ ‘‘ಪಕಣ್ಡೋ’’ತಿಪಿ ವುಚ್ಚತಿ, ಖನು ಅವದಾರಣೇ, ಧೋ, ಖನ್ಧೋ, ಖಾದ ಭಕ್ಖನೇ ವಾ, ಕೋ, ‘‘ಖಾದಾಮಗಮಾನಂ ಖನ್ಧನ್ಧಗನ್ಧಾ’’ತಿ ಖನ್ಧಾದೇಸೋ, ಕಲೋಪೋ.

ರುಕ್ಖಚ್ಛಿದ್ದೇ ರುಕ್ಖಾದೀನಂ ವಿವರೇ ಕೋಟರೋ. ಕುಟ ಛೇದನೇ, ಅರೋ, ಕೋಟರೋ, ನಿಕ್ಕುಹೋಪಿ. ದ್ವೇ ಸಮಾ. ಕಾಸ ದಿತ್ತಿಯಂ, ಕಾಸತೇ ಅಗ್ಗಿನಾ ದಿಪ್ಪತೇತಿ ಕಟ್ಠಂ, ತೋ, ತಸ್ಸ ಟ್ಠೋ, ರಸ್ಸೋ ಚ, ಕಸ ಗಮನೇ ವಾ, ತೋ, ಕಟ್ಠಂ. ದರ ವಿದಾರಣೇ, ಣು.

೫೪೯. ತಿಕಂ ಮೂಲೇ. ವು ಸಂವರಣೇ, ದೋ, ನಿಗ್ಗಹೀತಾಗಮೋ, ಬುಧ ಗಮನೇ ವಾ, ಅ, ಧಸ್ಸ ದೋ. ಮೂಲ ಪತಿಟ್ಠಾಯಂ, ಣೋ, ಪಾದಸದ್ದೇನ ತಪ್ಪರಿಯಾಯಾ ಚರಣತ್ಥಾ ಸಬ್ಬೇ ಸಙ್ಗಹಿತಾ, ಪಾದಸದಿಸತ್ತಾ ಪಾದೋ, ದ್ವಯಂ ಛಿನ್ನಸ್ಸ ತರುಕ್ಖನ್ಧಸ್ಸ ಭೂಮಿಟ್ಠಭಾಗೇ. ಸಙ್ಕ ಸಙ್ಕಾಯಂ, ಉ, ಸಕ ಸತ್ತಿಯಂ ವಾ, ನಿಗ್ಗಹೀತಾಗಮೋ. ಖನು ಅವದಾರಣೇ, ಣು, ಖಾಣು. ಧುವೋಪಿ, ಧುವತಿ ಥಿರಾಯತೇತಿ ಧುವೋ, ಧು ಗತಿಥೇರಿಯೇಸು, ಅ, ಉವಾದೇಸೋ.

ದ್ವಯಂ ವಿದಾರಿಯಾದೀನಂ ಕನ್ದೇ. ಕುಯಂ ಪಥವಿಯಂ ರುಹತೀತಿ ಕುರುಹಾಟಂ, ಅಟೋ, ಕನ್ದ ಅವ್ಹಾನೇ, ರೋದನೇ ಚ, ‘‘ಕರಹಾಟೋ’ಮ್ಬುಜಕನ್ದೇ, ಪುಪ್ಫರುಕ್ಖಭೀತೇಸು ಚೇ’’ತಿ ನಾನತ್ಥಸಙ್ಗಹೇ. ದ್ವಯಂ ಹಲಾದೀನಂ ಕಲೀರೇ. ಕಲ ಸಙ್ಖ್ಯಾನೇ, ಈರೋ. ಮಸ ಆಮಸನೇ, ಥಕೋ, ಮತ್ಥಕೇ ಸೀಸೇ ವಾ ಜಾತೋ ಮತ್ಥಕೋ.

೫೫೦. ದ್ವೇ ಸಮಾ. ಅಭಿನವನಿಗ್ಗತಾ ಆಯತಾ ಸಕುಸುಮಾ, ಕುಸುಮಸುಞ್ಞಾ ಚ ಮಞ್ಜರೀ, ವಲ್ಲರೀ ತು ತದಞ್ಞಾಪಿ, ಯಥಾ ತಾಲವಲ್ಲರೀ, ವಲ, ವಲ್ಲ ಸಂವರಣೇ, ಅರೋ, ನದಾದಿ. ಮುಞ್ಜಯೋಗತೋ ಮಞ್ಜರೀ, ರೋ, ನದಾದಿ, ಉಸ್ಸತ್ತಞ್ಚ, ದ್ವೇಪಿ ನಾರೀ. ದ್ವಯಂ ಲತಾಯಂ. ವಲ್ಲ ಸಂವರಣೇ, ನದಾದಿ. ಲತಾ ವುತ್ತಾ, ‘‘ಲತಾ ಪತಾನಿನೀ ವಲ್ಲೀ ಮತಕೀಥಾ’’ತಿ ಹಲಾಯುಧೋ.

ಅಕ್ಖನ್ಧೋ ಅಪ್ಪಕ್ಖಣ್ಡೋ, ಬಹುಪತ್ತತಚದಣ್ಡಿಕಾದಿ. ಯೋ ವಾ ತನುಪಕಣ್ಡೋ ವಂಸನಳಾದಿ, ಸೋ ‘‘ಥಮ್ಬೋ, ಗುಮ್ಬೋ’’ತಿ ಚೋಚ್ಚತೇ, ಥಕ ಸಂವರಣೇ, ಬೋ, ಕಸ್ಸ ಮೋ. ಗುಪ ರಕ್ಖಣೇ, ಬೋ, ಪಸ್ಸ ಮೋ. ಪತಾನೋ ಸಾಖಾಪತ್ತಚಯೋ, ತೇನ ಯುತ್ತಾ ಗೋರಕ್ಖಾ ತಮ್ಬೂಲಿ ಧಿವುಸಜೀಮೂತ ಗಳೋಝಾದಿಕಾ ಲತಾ, ಸಾ ವೀರು ನಾಮ, ವಿವಿಧೇಹಿ ರುಹತೀತಿ ಕತ್ವಾ, ಕ್ವಿ, ವೀರು, ದೀಘಾದಿ, ಗುಮ್ಬಿನೀಪಿ.

೫೫೧. ಪಜ್ಜೇ ಪಾದೇನ ನಾಮಂ. ಯತ್ರ ದ್ವಯಂ ‘‘ಬೋಧಿರುಕ್ಖೋ’’ತಿ ಸಞ್ಞಿತೇ ಬುದ್ಧಸ್ಸ ಭಗವತೋ ಸಬ್ಬಞ್ಞುತಞ್ಞಾಣಪ್ಪಟಿಲಾಭಟ್ಠಾನಭೂತೇ ದುಮರಾಜೇ, ಅಞ್ಞತ್ರ ತೂಪಚಾರಾ. ಅಸ್ಸಂ ಸಬ್ಬಞ್ಞುತಞ್ಞಾಣಂ ತಿಟ್ಠತಿ ಏತ್ಥಾತಿ ಅಸ್ಸತ್ಥೋ, ಠಸ್ಸ ಥೋ, ದ್ವಿತ್ತಂ, ಮಾರವಿಜಯಸಬ್ಬಞ್ಞುತಞ್ಞಾಣಪ್ಪಟಿಲಾಭಾದಿಕೇಹಿ ಭಗವನ್ತಂ ಅಸ್ಸಾಸೇತೀತಿ ವಾ ಅಸ್ಸತ್ಥೋ, ಆಪುಬ್ಬೋ ಸಾಸ ಅನುಸಿಟ್ಠಿಯಂ, ತೋಸನೇ ಚ ವತ್ತತಿ, ತೋ, ರಸ್ಸೋ. ಸಬ್ಬಞ್ಞುತಞ್ಞಾಣಂ ಬುಜ್ಝತಿ ಏತ್ಥಾತಿ ಬೋಧಿ, ಬುಧ ಅವಗಮನೇ, ಇ, ಬೋಧಿ, ದ್ವೀಸು. ಚಲದಲೋ, ಪಿಪ್ಪಲೋ, ಕುಞ್ಜರಾಸನೋಪಿ. ದ್ವಯಂ ಬಹುಪಾದೇ. ಅಧೋಭಾಗಂ ರುನ್ಧತೀತಿ ನಿಗ್ರೋಧೋ, ಉಸ್ಸೋ, ಗಾಗಮೋ ಚ. ವಟ ವೇಧನೇ, ವಟತೀತಿ, ಅ.

ದ್ವಯಂ ಕಬಿಟ್ಠೇ. ಕವಿಮ್ಹಿ ವಾನರೇ ತಿಟ್ಠತೀತಿ ಕಬಿಟ್ಠೋ [ಪಾಯೇನ ಕಪಯೋ ತಿಟ್ಠನ್ತಿ ಅತ್ರ ಕಪಿತ್ಥೋ (ಚಿನ್ತಾಮಣಿಟೀಕಾ ೧೪.೨೧)] ‘‘ವಾನರೇ ಪಣ್ಡಿತೇ ಕವೀ’’ತಿ ವೋಪಾಲಿತೋ, ತಥಾ ಕಪಿತ್ಥೋ, ತೋ, ಠಸ್ಸ ಥೋ ಚ. ದಧಿತ್ಥೋ, ಅಮ್ಬಿಲಫಲೋಪಿ. ದ್ವಯಂ ಉದುಮ್ಬರೇ. ಯಞ್ಞಕಮ್ಮಾನಮಙ್ಗೋ ಏಕಙ್ಗತ್ತಾ ಯಞ್ಞಙ್ಗೋ, ದುಬ್ಬೀ ಹಿಂಸಾಯಂ, ಅರೋ, ನಿಗ್ಗಹೀತಾಗಮೋ, ಏಕಸ್ಸ ಬಸ್ಸ ಲೋಪೋ ಚ. ಜನ್ತುಫಲೋ ಹೇಮದುದ್ಧೋಪಿ.

೫೫೨. ದ್ವಯಂ ಕೋವಿಳಾರೇ.

‘‘ಸುಕಪದಾಚ್ಛರೋ ಚಮ್ಪೋ,

ಕೋವಿಳಾರೋ ತು ಕಞ್ಚನೋ;

ಪುಬ್ಬೋ ಸಿತೋ ಪರೋ ರತ್ತೋ,

ಯುಗಪತ್ತಾ ಉಭೋಪಿತೇ’’ತಿ [ಚಿನ್ತಾಮಣಿಟೀಕಾ ೧೪.೨೨].

ಹಿ ರತನಕೋಸೋ, ಕಞ್ಜನಾಲಕೋಪ್ಯತ್ರ. ಯುಗಂ ಯಮಕಂ ಪತ್ತಮಸ್ಸ.

ತಿಪಾದಂ ಉದ್ದಾಲೇ. ವಾತಂ ಉದ್ದಾಲತೀತಿ ಉದ್ದಾಲೋ. ಸಿಙ್ಗಾರಾದೀನಂ ಸಞ್ಞಾವಸೇನ ರುಕ್ಖಾನಂ ರಾಜಾ ರಾಜರುಕ್ಖೋ, ವಾತರೋಗಹನನೇ ರಾಜಭೂತೋ ರುಕ್ಖೋ ವಾ ರಾಜರುಕ್ಖೋ. ಕತಾ ಮಾಲಾ ಅಸ್ಸ ಪುಪ್ಫೇಹೀತಿ ಕತಮಾಲೋ, ಸಿಙ್ಗಾರಪ್ಪಕಾಸೋ. ಇನ್ದತಿ ಪರಮಿಸ್ಸರಿಯಂ ಕರೋತಿ ವಾತಹನನೇತಿ ಇನ್ದೀವರೋ, ಈವರೋ, ಇನ್ದಿಯಾ ಸಕ್ಕಸ್ಸ ಭರಿಯಾಯ ಇಚ್ಛಿತಬ್ಬತ್ತಾ ವಾ ಇನ್ದೀವರೋ. ಚತುರಙ್ಗುಲೋ, ಆರೇವತೋ, ಸುವಣ್ಣಕೋಪಿ.

೫೫೩. ದ್ವಯಂ ಜಮ್ಭೀರೇ, ಯಸ್ಸ ಫಲಮಮ್ಬಿಲಂ ಹೋತಿ. ಅಮ್ಬಿಲತ್ತಾ ದನ್ತಸ್ಸ ಸಠೋ ದನ್ತಸಠೋ. ಸಠ ಕೇತವಹಿಂಸಾಸಂಕಿಲೇಸೇಸು, ಅ. ಜಮು ಅದನೇ, ಈರೋ, ಭನ್ತೋ ಚ, ಜಮ್ಭ ಗತ್ತವಿನಾಮೇ ವಾ, ಜಮ್ಭೋ, ಜಮ್ಭಲೋ, ಜಮ್ಬೀರೋಪಿ. ದ್ವಯಂ ವರಣೇ. ವರ ಇಚ್ಛಾಯಂ, ಯು. ಕಲ ಸಙ್ಖ್ಯಾನೇ, ಇರೋ, ನದಾದಿ, ರಸ್ಸನ್ತೋ. ವರುಣೋ, ತಿತ್ತಸಾಕೋಪಿ.

ದ್ವಯಂ ಫಲಹರೇ. ‘‘ಕೋ ಅಯಂ, ಸುಕೋ’’ತಿ ವಿಮತುಪ್ಪತ್ತಿಕರಪತ್ತಕುಸುಮತಾಯ ಕಿಂಸುಕೋ. ಪಾರಿ ಸಮುದ್ದೋ, ತತ್ರ ಭದ್ದೋ ಪಾರಿಭದ್ದೋ, ಸೋ ಏವ ಪಾಳಿಭದ್ದೋ, ಕೋವಿಳಾರೋ, ತಂಸಣ್ಠಾನಪತ್ತಕುಸುಮತಾಯ ಪಾಳಿಭದ್ದೋ. ದ್ವಯಂ ವಿದುಲೇ, ಯೋ ಅಬ್ಭಸಮಯೇ ಪುಪ್ಫತಿ. ವಜ ಗಮನೇ, ಉಲೋ. ವೀ ಪಜನೇ, ಅಸೋ, ತೋನ್ತೋ ಚ, ವಿಪುಬ್ಬೋ ಅತ ಸಾತಚ್ಚಗಮನೇ ವಾ, ಅಸೋ. ವಾನೀರೋಪಿ.

೫೫೪. ದ್ವಯಂ ಪೀತನೇ, ಯಸ್ಸ ಪತ್ತಫಲಾನಿ ಅಮ್ಬಿಲಾನಿ, ಪೂಗಫಲಪ್ಪಮಾಣಞ್ಚ ಫಲಂ, ಸಲ್ಲಕೀರುಕ್ಖಸಣ್ಠಾನೋ ಚ, ಸೋ ರುಕ್ಖೋ. ಅಮ್ಬ ಸದ್ದೇ, ಅಟೋ, ಸಕತ್ಥೇ ಕೋ. ಪೀ ತಪ್ಪನಕನ್ತೀಸು, ತನೋ, ಪೀತಿಂ ವಾ ತನೋತೀತಿ ಪೀತನೋ, ಸಕತ್ಥೇ ಕೋ. ದ್ವಯಂ ಗುಳಪುಪ್ಫೇ. ಮನ ಞಾಣೇ, ಕೋ, ಮಧ್ವಾದೇಸೋ ಚ. ಮಧುನಾಮೋ ದುಮೋ ಮಧುದ್ದುಮೋ. ದ್ವಯಂ ‘‘ಲಮ್ಬೂ’’ತಿ ಖ್ಯಾತೇ. ಗುಳೋ ವಿಯ ಸಾತೇನ ಫಲಮಸ್ಸ ಗುಳಫಲೋ. ಪೀಲ ಪತಿತ್ಥಮ್ಭೇ, ಉ. ದ್ವಯಂ ತಿಕ್ಖಗನ್ಧೇ. ಸೋಭಂ ಜನೇತೀತಿ ಸೋಭಞ್ಜನೋ, ಸೋಭಂ ವಿಸಞ್ಜನಮೇತೇನ ಹೇತುಭೂತೇನಾತಿ ವಾ ಸೋಭಞ್ಜನೋ. ವುತ್ತಞ್ಚ –

‘‘ಸಿರೀಸಪುಪ್ಫಸ್ಸ ರಸೇನ ಭಾವಿತಂ,

ಸಹಸ್ಸವಾರಂ ಮರೀಚಂ ಸಿತವ್ಹಯಂ;

ಏತೇನ ಸಮನ್ತಿ ವಿಸಾಹಿ ಸಮ್ಭವಾ,

ಕತಞ್ಜನಸ್ನೇಹನಪಾದನತ್ಥುತೋ’’ತಿ.

ಸಿ ಸೇವಾಯಂ, ವಿದ್ಧವಿನಾಸನತ್ಥಂ ಸೇವೀತೇತಿ ಸಿಗ್ಗು, ಗು, ಥೀ. ಚಿತ್ತಹಾರೀ, ಪಭಞ್ಜನೋ, ವಿದ್ಧವಿನಾಸನೋಪಿ.

೫೫೫. ದ್ವಯಂ ವಿಸಾಲತಚೇ, ಯೋ ಸರದೇ ಪುಪ್ಫತಿ ಪುಪ್ಫಂ. ಸತ್ತಪಣ್ಣಾನ್ಯಸ್ಸ ಸತ್ತಪಣ್ಣೀ ಪುಮೇ. ಛತ್ತಮಿವ ಪಣ್ಣಮಸ್ಸ ಛತ್ತಪಣ್ಣೋ. ವಿಸಮಚ್ಛದೋಪಿ, ಸತ್ತಪಣ್ಣತ್ತಾ ವಿಸಮಚ್ಛದೋ. ದ್ವಯಂ ರಥದ್ದುಮೇ. ರಥಂ ತನೋತಿ ಯೇನ ತಿನಿಸೋ, ಇಸೋ. ಅತಿಪಮುಚ್ಚತಿ ದಾಹಪಿತ್ತಮನೇನೇತಿ ಅತಿಮುತ್ತಕೋ. ಚಿತ್ತಕಿಪಿ.

ದ್ವಯಂ ವಾತಪೋಥೇ, ಪಂ ವಾತಂ ಲುನಾತೀತಿ ಪಲಾಸೋ, ಅಸೋ. ‘‘ಪತ್ತೇ ಪಲಾಸಂ ಸೋ ರುಕ್ಖೇ, ಪೀತಹರಿತಕಿಂ ಸುಕೇ’’ತಿ ಹಿ ರುದ್ದೋ. ವಾತಪೋಥೋಪಿ, ವಾತಸ್ಸ ಪೋಥೋ ವಾತಪೋಥೋ, ಪುಥ ಹಿಂಸಾಯಂ.

ದ್ವಯಂ ‘‘ಪುತೀತಿ’’ ಖ್ಯಾತೇ. ಹತಜನ್ತುಪಮೋಹಸಙ್ಖಾತಾರಿಫಲತಾಯ ಅರಿಟ್ಠೋ, ನಿಪಾತನಾ ಹನ್ತಿಸ್ಸ ಟ್ಠೋ, ತಂರೋಗಾರಿವನ್ತಜನೇಹಿ ಇಚ್ಛಿತಬ್ಬಫಲತ್ತಾ ವಾ ಅರಿಟ್ಠೋ, ಇಸು ಇಚ್ಛಾಯಂ. ಫಣ ಗತಿಯಂ, ಇಲೋ, ಅಸ್ಸೇ.

೫೫೬. ತಿಕಂ ಸಿರಿಫಲೇ. ಮಲ ಧಾರಣೇ, ಊರೋ. ಬಿಲ ಭೇದನೇ, ಣುವೋ, ಬೇಲುವೋ. ಲಪಚ್ಚಯೇ ಬಿಲ್ಲೋ. ಸಣ್ಡಿಲ್ಯೋ, ಸೇಲುಸೋಪಿ. ‘‘ಮುನಿಪ್ಪಭೇದೇ ಮಾಲೂರೇ, ಸಣ್ಡಿಲ್ಯೋ ಪಾದಪನ್ತರೇ, ನಟೇ ಬಿಲ್ಲೇ ಚ ಸೇಲುಸೋ’’ತಿ [ಚಿನ್ತಾಮಣಿಟೀಕಾ ೧೪.೩೨] ರಭಸೋ.

ದ್ವಯಂ ತುಙ್ಗೇ. ಪುಮನಾಮೋ ನಾಗೋ ರುಕ್ಖೋ ಪುನ್ನಾಗೋ. ‘‘ಪುನ್ನಾಗೇ ಪುರಿಸೋ ತುಙ್ಗೋ, ಕೇಸರೋ ದೇವವಲ್ಲಭೋ’’ತಿ [ಅಮರ ೧೪.೨೫] ಹ್ಯಮರಸೀಹೋ, ದೀಘೋ, ‘‘ಪುಮಸ್ಸ ಲಿಙ್ಗಾದೀಸು ಸಮಾಸೇಸೂ’’ತಿ ಅಕಾರಲೋಪೋ ಚ. ಅತಿಸಯಪುಪ್ಫಕೇಸರವನ್ತತಾಯ ಕೇಸರೋ, ಕಿಸ ತನುಕರಣೇ ವಾ, ಅರೋ, ಪುಪ್ಫಕೇಸಯುತ್ತತಾಯ ವಾ ಕೇಸರೋ, ರೋ.

ದ್ವಯಂ ಲೋದ್ದಮತ್ತೇ. ಸಲ ಗಮನತ್ಥೋ, ಅವೋ. ರತ್ತಕಫಪಿತ್ತಸೋತೇ ಲುನಾತೀತಿ ಲೋದ್ದೋ, ದ್ದೋ. ತಿರಿಟೋ, ಸಾವರೋಪಿ. ‘‘ಸಾವರೋ ಅಪರಾಧೇ ಚ, ಲೋದ್ದೇ ಪಾಪೇ ಚ ಕಥ್ಯತೇ’’ [ಚಿನ್ತಾಮಣಿಟೀಕಾ ೧೪.೩೩] ತ್ಯಜಯೋ. ದ್ವಯಂ ಧನುಪಟ್ಟೇ ಫಲಿನಿ. ಪೀ ಪಾನೇ, ಅಲೋ, ಈಸ್ಸ ಇಯಾದೇಸೋ. ಸನ್ನಕಾ ತಾಪಸಾ, ತೇಸಂ ದು ದುಮೋ ಸನ್ನಕದ್ದು, ‘‘ಸನ್ನಕದ್ದು ಚಾಪಪಟಾ, ವರಣೋ ತಾಪಸಪ್ಪಿಯೋ’’ತಿ [ಚಿನ್ತಾಮಣಿಟೀಕಾ ೧೪.೩೫] ಹಿ ಕೋಸನ್ತರೇ.

೫೫೭. ದ್ವಯಂ ‘‘ಮ್ಹನಕೂ’’ಇತಿ ಖ್ಯಾತೇ. ಲಿಕುಚೋ ನಾಮ ಡಹುರುಕ್ಖೋ, ತಗ್ಗುಣತ್ತಾ ಲಿಕೋಚಕೋ, ಸಞ್ಞಾಯಂ ಕೋ. ಅಙ್ಕ ಲಕ್ಖಣೇ, ಓಲೋ, ಅಙ್ಕೋಲೋ. ದ್ವಯಂ ಕುಮ್ಭೇ. ರೋಗಹರಣೇ ಗರುನೋಪಿ ವೇಜ್ಜಸ್ಸ ಗರು ಗುಗ್ಗುಲು, ನಿಪಾತನಾ. ಕುಸ ಛೇದನೇ, ಣ್ವು. ಕುಮ್ಭೋ, ಪುರೋಪಿ.

‘‘ರಾಸಿಭೇದೇ ಗಜಮುದ್ಧಂಸೇ,

ಕುಮ್ಭಕಣ್ಣಸುಕೇ ಘಟೇ;

ಕಾಮುಕೇ ವಾರನಾರಿಯಞ್ಚ,

ಕುಮ್ಭೋ ಕ್ಲೀವನ್ತು ವಗ್ಗುಲುಮ್ಹೀ’’ತಿ [ಚಿನ್ತಾಮಣಿಟೀಕಾ ೧೪.೩೪].

ರಭಸೋ. ಪುರ ಅಗ್ಗಗಮನೇ, ಣೋ, ಪುರೋ.

ದ್ವಯಂ ಅಮ್ಬೇ. ಅಮ ಗತಿಯಂ, ಬೋ, ಅಮ್ಬ ಸದ್ದೇ ವಾ, ಅ. ಚುತಿ ಆಸೇಚನೇ, ರಕ್ಖಣೇ ಚ, ಅ, ಚು ಚವನೇ ವಾ, ತೋ, ದೀಘಾದಿ. ರಸಾಲೋಪಿ, ರಸಂ ಲಾತೀತಿ ರಸಾಲೋ, ದೀಘೋ. ಏಸೋ ಅಮ್ಬೋ ಸುಗನ್ಧವಾ ಅತಿಸಯಗನ್ಧಯುತ್ತೋ ಸಮಾನೋ ‘‘ಸಹೋ, ಸಹಕಾರೋ’’ತಿ ಚೋಚ್ಚತೇ. ಸಹ ಸತ್ತಿಯಂ, ಸುಗನ್ಧಂ ಕತ್ತುಂ ಸಹತೀತಿ ಸಹೋ, ಅ. ಸಹನಂ ಸಹೋ, ತಂ ಕರೋತೀತಿ ಸಹಕಾರೋ, ಹಾ ವಾ ಪಮುದಾ, ತಾಯ ಸಹ ವತ್ತತೀತಿ ಸಹೋ, ಸಹಂ ಸಮುದಂ ಕರೋತೀತಿ ಸಹಕಾರೋ.

೫೫೮. ದ್ವಯಂ ಸೇತಮ್ಬೇ. ಪುಣ್ಡ ಪುಣ್ಡನೇ. ಪುಣ್ಡ ಖಣ್ಡನೇತ್ಯೇಕೇ, ಣ್ವು, ಅಸ್ಸೀ, ಅರಾಗಮೋ ಚ. ಸೇತವಣ್ಣೋ ಅಮ್ಬೋ ಸೇತಮ್ಬೋ. ದ್ವಯಂ ಬಹುವಾರಕೇ, ಯಸ್ಸ ಫಲಾನಿ ಅತಿಪಿಚ್ಛಿಲಾನಿ. ಸಿ ಬನ್ಧನೇ, ಲು, ಸಲ ಗಮನತ್ಥೋ ವಾ, ಉ, ಅಸ್ಸೇ. ಪಿಚ್ಛಿಲತ್ತಾ ಬಹೂನಿ ವಾರೀನಿ ಯಸ್ಮಿಂ ಬಹುವಾರಕೋ, ಸಞ್ಞಾಯಂ ಕೋ. ಸೀತೋ, ಉದ್ದಾಲೋ, ಕಫಲೋಪಿ.

ದ್ವಯಂ ಕಾಸ್ಮರಿಯಂ. ಸಿರಿಮನ್ತಾನಿ ಪಣ್ಣಾನಿ ಯಸ್ಸಾ ಸೇಪಣ್ಣೀ, ನದಾದಿ, ಸಿರೀಸದ್ದಸ್ಸ ಸೇ. ಕಸ್ಮೀರದೇಸಜತ್ತಾ ಕಾಸ್ಮರೀ, ಕಾಸ ದಿತ್ತಿಯಂ ವಾ, ಮರೋ, ನದಾದಿ. ಮಧುಪಣ್ಣೀ, ಭದ್ದಪಣ್ಣೀಪಿ. ದ್ವಯಂ ಸಕಣ್ಟಕಮ್ಬಿಲಫಲರುಕ್ಖೇ. ಸಕಣ್ಟಕತ್ತಾ ಕುಚ್ಛಿತಂ ಲಾತೀತಿ ಕೋಲೀ, ನದಾದಿ. ವದ ಥೇರಿಯೇ, ಅರೋ, ನದಾದಿ. ಕುವಲೀ, ಕಕ್ಕನ್ಧೂಪಿ.

೫೫೯. ದ್ವಯಂ ತಸ್ಸಾ ಕೋಲಿಯಾ ಫಲೇ. ಕೋಲಿಯಾ ಫಲಂ ಕೋಲಂ. ಬದರಿಯಾ ಅಯಂ ಅವಯವೋ ಬದರೋ. ಕುವಲಂ, ಫೇನಿಲಂ, ಸೋವೀರಮ್ಪಿ. ‘‘ಸೋತಞ್ಜನೇ ತು ಸೋವೀರಂ, ಕಞ್ಜಿಕೇ ಬದರೇಪಿ ಚೇ’’ತಿ [ಚಿನ್ತಾಮಣಿಟೀಕಾ ೧೪.೩೬] ರಭಸೋ. ದ್ವಯಂ ಅಸ್ಸತ್ಥಕುಲಸಮ್ಭೂತೇ ರುಕ್ಖಪಾಸಾಣಾದೀಸು ಸಞ್ಜಾತರುಕ್ಖೇ. ಪಿಲಂ ಪರಂ ನಿಸ್ಸಯಭೂತಂ ಕಸತೀತಿ ಪಿಲಕ್ಖೋ, ಕಸ ವಿಲೇಖನೇ, ಸಸ್ಸ ಖತ್ತಾದಿ ನಿಪಾತನಾ. ಅಖಾದನೀಯಫಲತಾಯ ವಿರೂಪಂ ಫಲಮಸ್ಸತ್ಥೀತಿ ಪಿಪ್ಫಲೀ, ಈ, ನದಾದಿ, ವಿಸ್ಸಪಿ ಚ.

ದ್ವಯಂ ತೋಯಾದಿವಾಪಿನಿಯಂ, ಯಸ್ಸಾ ಮೂಲಂ ಮಹಾಪಞ್ಚಮೂಲೇ ಪವಿಟ್ಠಂ. ಪಟ ಗಮನೇ, ಅಲೋ, ನದಾದಿ, ಪಾಟಲೀ, ಪಾಟಲಾಪಿ. ಕಣ್ಹಂ ಪುಪ್ಫವಣ್ಟಂ ಯಸ್ಸಾ ಸಾ ಕಣ್ಹವಣ್ಟಾ, ಕಾಸ್ಮರಿಯಮ್ಪಿ. ಅಲಿಪ್ಪಿಯಂ, ತಮ್ಬಪುಪ್ಫಿಪ್ಯತ್ರ. ದ್ವಯಂ ಗನ್ಧಿಲೇ. ಸಾದುಫಲತಾಯ ಸಾದು ಚ ಸೋ ಕಣ್ಟಸಹಿತತಾಯ ಕಣ್ಟೋ ಚೇತಿ ಸಾದುಕಣ್ಟೋ. ಸಕಣ್ಟಕತಾಯ ಅತ್ತಾನಂ ವಿರೂಪಂ ಕರೋತೀತಿ ವಿಕಙ್ಕತೋ, ದ್ವಿತ್ತಂ, ನಿಗ್ಗಹೀತಾಗಮೋ ಚ.

೫೬೦. ಚತುಕ್ಕಂ ತಿನ್ದುಕೇ. ತನು ವಿತ್ಥಾರೇ, ಉಕೋ, ದನ್ತೋ ಚ. ತಿದಿ ಹಿಂಸಾಯಂ ವಾ, ಉ, ಸಞ್ಞಾಯಂ ಕೋ. ಕಾಳೋ ಖನ್ಧೋ ಪಕಣ್ಡೋ ಯಸ್ಸಾತಿ. ತಿಮ ಅದ್ದಭಾವೇ, ಊಸೋ, ಸಕತ್ಥೇ ಕೋ, ವರನ್ತೋ ಚ. ಉಪಚ್ಚಯೇ ತಿಮ್ಬರು.

ದ್ವಯಂ ತಮ್ಬಫಲೇ. ಇರಾವತೀ ನದೀ, ಪಠಮಕಾಲೇ ತಸ್ಸಾ ತೀರೇ ಜಾತೋ ಏರಾವತೋ. ನಾರಂ ವುಚ್ಚತಿ ನೀರಂ, ತಂ ಗಚ್ಛತೀತಿ ನಾರಙ್ಗೋ. ದ್ವಯಂ ಮಕ್ಕಟತಿನ್ದುಕೇ. ಕುಲ ಸಙ್ಖ್ಯಾನೇ, ಣ್ವು. ಕಾಕೇನ್ದು, ಕಾಕಲುಕೋಪಿ.

೫೬೧. ತಿಕಂ ಕದಮ್ಬೇ. ಕಂ ವಾತಂ ದಮೇತೀತಿ ಕದಮ್ಬೋ, ಬೋ. ಪಿನೇತೀತಿ ಪಿಯಕೋ, ಣ್ವು, ಇಯಾದೇಸೋ. ನಯತಿ ಮುದಂ ನೀಪೋ, ಪೋ. ದ್ವಯಂ, ವಿದರುಕ್ಖೇ, ಯಸ್ಸ ನಿಯ್ಯಾಸೇನ ಪೇಳಾದಯೋ ಲಿಮ್ಪನ್ತಿ. ಭಲ, ಭಲ್ಲ ಪರಿಭಾಸನಹಿಂಸಾದಾನೇಸು, ನದಾದಿ, ಅಞ್ಞತ್ರ ತೋ, ಕನ್ತೋ ಚ, ಭಲ್ಲಾತಕೋ, ತೀಸ್ವಯಂ. ಅರುಕರೋ, ಅಗ್ಗಿಮುಖೋಪಿ.

ದ್ವಯಂ ‘‘ಪಾವುಸಾ’’ಇತಿ ಖ್ಯಾತೇ. ಝಪ ದಾಹೇ, ಣ್ವು. ಪಸ್ಸ ವೋ. ಪಚ ಪಾಕೇ, ಉಲೋ. ದ್ವಯಂ ಸಿರಿಮತಿ, ಯಸ್ಸ ಫಲಾನಿ ಮರೀಚಪ್ಪಮಾಣಾನಿ, ಅಮ್ಬಿಲಾನಿ ಚ. ತಿಲ ಗಮನೇ, ಣ್ವು. ಖುರ ಛೇದನೇ, ಣ್ವು.

೫೬೨. ದ್ವಯಂ ಅಮ್ಬಿಲಿಕಾಯಂ. ಚಿ ಚಯನೇ, ಚೋ, ಚಿಚ ಆದಾನಸಂವರಣೇಸು ವಾ. ತನು ವಿತ್ಥಾರೇ, ಅಮ್ಬಿಲರಸಂ ತನೋತೀತಿ ತಿನ್ತಿಣೀ, ದ್ವಿತ್ತಮಿತ್ತಂ, ಣತ್ತಞ್ಚ, ನದಾದಿ. ದ್ವಯಂ ಅಮ್ಬಿಲಙ್ಕುರಫಲೇ ಸೇತರುಕ್ಖೇ. ಗದ್ರಭಣ್ಡಪ್ಪಮಾಣಫಲತ್ತಾ ಗದ್ದಭಣ್ಡೋ, ರಲೋಪೋ. ಕಪಿ ಚಲನೇ, ತನೋ, ದೀಘೋ ಆಗಮಸ್ಸ. ಕನ್ದರಾಲೋ, ಪಿಲಕ್ಖೋಪಿ.

ತಿಕಂ ಸಾಲರುಕ್ಖೇ. ಸಲ ಗಮನೇ, ಣೋ, ಸಾರವನ್ತತಾಯ ವಾ ಸಾಲೋ. ಅಸ್ಸಕಣ್ಣಸದಿಸಪಣ್ಣತಾಯ ಅಸ್ಸಕಣ್ಣೋ. ಸನ್ಜ ಸಙ್ಗೇ, ಅ, ಸಜ್ಜ ಅದನೇ ವಾ, ಅ. ದ್ವಯಂ ನದೀಸಜ್ಜೇ. ಅಜ್ಜ ಅಜ್ಜನೇ, ಉನೋ. ಕಕ ಲೋಲ್ಯೇ, ಉಧೋ. ವೀರತರು, ಇನ್ದದುಮೋಪಿ.

೫೬೩. ತಿಕಂ ಮುಚಲಿನ್ದೇ. ಚುಲ ನಿಮುಜ್ಜನೇ. ಮುಚಲ ಸಙ್ಗಾತೇ, ಇನ್ದೋ. ನೀಪೋ ಕದಮ್ಬೇಪಿ. ತಿಕಂ ಪೀತಸಾಲೇ. ಪಿಯಕೋ ಕದಮ್ಬೇಪಿ. ಅಸ ಭಕ್ಖನೇ, ಯು, ಪೀತಪುಪ್ಫೋ ಸಾಲೋ ರುಕ್ಖೋ ಪೀತಸಾಲೋ. ಬನ್ಧೂಕಪುಪ್ಫೋ, ಜೀವಕೋಪಿ.

ದ್ವಯಂ ಝಾಟಲಿಯಂ. ಗಾವೋ ಲಿಹನ್ತೀತಿ ಗೋಲೀಸೋ, ಹಸ್ಸ ಸೋ. ಝಟ ಸಙ್ಘಾತೇ, ಅಲೋ. ಝಾಟಲೋ, ಪಾಟಲಿಪುಪ್ಫಾಕಾರೋ ದೀಘಫಲೋ ರುಕ್ಖೋ. ಪಮೋಕ್ಖೋಪಿ.

೫೬೪. ದ್ವಯಂ ರಾಜಾಯತನೇ, ಖೀರವನ್ತತಾಯ ಖೀರಿಕಾ. ದೇವರಾಜಸ್ಸ ನಿವಾಸನಟ್ಠಾನಭೂತತ್ತಾ ರಾಜಾಯತನಂ, ಪಿಯಾಲೇಪಿ. ದ್ವಯಂ ಕಪ್ಫಲೇ. ಕುಚ್ಛಿತೇನ ಫಲೇನ ಉಮ್ಭತಿ ಪೂರತೀತಿ ಕುಮ್ಭೋ. ಕುಚ್ಛಿತೇನ ಮೋದತೀತಿ ಕುಮುದಿಕಾ, ಣ್ವು.

ದ್ವಯಂ ಗುವಾಕರುಕ್ಖೇ, ಯಸ್ಸ ಫಲೇನ ತಮ್ಬೂಲನಾಮಂ ಜಾಯತಿ. ಪೂಜ ಪೂಜಾಯಂ, ಣೋ, ಜಸ್ಸ ಗೋ. ಕಮು ಇಚ್ಛಾಯಂ, ಹೇತುಕತ್ತರಿ ಣ್ವು. ಖಪುರೋಪಿ. ದ್ವಯಂ ಲೋಹಿತಲೋದ್ದೇ. ಪಟ್ಟಿಇತ್ಯಾಖ್ಯಾ ಯಸ್ಸ ಪಟ್ಟಿ. ‘‘ಪದ್ಧೀ’’ತಿಪಿ ಪಾಠೋ. ಅಸ್ಮಿಂ ಪಕ್ಖಿತ್ತೇ ಲಾಖಾ ರತ್ತಾ ಭವತೀತಿ ಲಾಖಾಪಸಾದನೋ. ಕಮುಕೋಪಿ.

೫೬೫. ದ್ವಯಂ ಇಙ್ಗುದಿಯಂ, ಅಯಞ್ಚ ಕಣ್ಟಕೀ ಬಾಹುಲ್ಯೇನ ಮಜ್ಝಿಮದೇಸೇ ಜಾಯತೇ. ಇಙ್ಗ ಗಮನತ್ಥೋ, ಇದೋ, ಇಸ್ಸು, ನದಾದಿ. ತಾಪಸೋ ಪಯುಜ್ಜಮಾನಫಲಕತಾಯ ತಾಪಸತರು. ದ್ವಯಂ ‘‘ಭುಜಪತ್ತೋ’’ಇತಿಖ್ಯಾತೇ ಸುನ್ದರತಚೇ ರುಕ್ಖೇ, ಯಸ್ಸ ತಚೇ ಮನ್ತಕ್ಖರಾನಿ ಲಿಖನ್ತಿ. ಭುಜೋ ಪಾಣಿ, ತಂಸದಿಸಪತ್ತತಾಯ ಭುಜಪತ್ತೋ. ಮನ್ತಲೇಖಕೇಹಿ ಆಭುಜಿತತಚವನ್ತತಾಯ ಆಭುಜೀ. ಭೂಜೋ, ಚಮ್ಮೀ, ಮುದುತ್ತಚೋಪಿ.

ದ್ವಯಂ ಸಿಮ್ಬಲಿಯಂ. ಪಿಚ್ಛಾಯೋಗಾ ಪಿಚ್ಛಿಲಾ, ಇಲೋ. ಸಮ್ಬ ಮಣ್ಡಲೇ, ಅಲಿ, ಅಸ್ಸಿ. ‘‘ಪಿಚ್ಛಿಲಾ ಪೂರಣೀ ಮೋಚಾ, ಥಿರಾಯು ಸಿಮ್ಬಲೀ ದ್ವಿಸೂ’’ತಿ [ಅಮರ ೧೪.೪೬] ಅಮರಕೋಸೋ. ದ್ವಯಂ ಪಿಚ್ಛಿಲಾಕಾರೇ ಕಣ್ಟಕಸಹಿತೇ ರುಕ್ಖೇ. ರುಚ ದಿತ್ತಿಯಂ, ಹೇತುಕತ್ತರಿ ಯು, ಕುಟ ಕೋಟಿಲ್ಯೇ, ಕತ್ತರಿ ಣೋ, ಕೋಟೋ ಅಸಿಮ್ಬಲಿ ಸಮಾನೋಪಿ ಸಿಮ್ಬಲಿಸದಿಸಾಕಾರದಸ್ಸನತೋ ಕೋಟಸಿಮ್ಬಲಿ, ಪುಮೇ. ಕಸಮ್ಬಲೋಪಿ.

೫೬೬. ದ್ವಯಂ ‘‘ಕಣ್ಟಕರಞ್ಜ’’ಇತಿ ಖ್ಯಾತೇ ಕಣ್ಟಕಿನಿ ಕರಞ್ಜಗುಮ್ಬೇ, ಯಂ ಲೋಕೇ ‘‘ಕಲಿನೋ’’ತಿ ವುಚ್ಚತಿ. ಕರ ಹಿಂಸಾಯಂ, ಕರತೋ ರಿರಿಯಾ. ಪೂ ಪವನೇ, ಇಕೋ, ತೋನ್ತೋ ಚ. ಪೂತಿಕರಜೋ, ಕಲಿಮಾರಕೋಪಿ, ಕಲಿನೋ. ದ್ವಯಂ ದಾಲಿಮಪುಪ್ಫಾಕಾರೇ ಪೀತನಾಸಕರುಕ್ಖೇ. ರುಹ ಜನನೇ, ಣೀ. ಲೋಹಿತಪುಪ್ಫತಾಯ ರೋಹಿತಕೋ.

ದ್ವಯಂ ಏರಣ್ಡೇ. ಏರಡಿ ಹಿಂಸಾಯಂ. ವಾತಂ ಏರಣ್ಡತೀತಿ ಏರಣ್ಡೋ, ಣೋ. ಮಣ್ಡ ಭೂಸನೇ, ಈಸಂಪಸನ್ನತೇಲತಾಯ ವಾ ಆಮಣ್ಡೋ, ಆಮಂ ವಾ ವಾತಂ, ತಂ ದಾಯತೀತಿ ಆಮಣ್ಡೋ. ದಾ ಅವಖಣ್ಡನೇ, ದಾಸ್ಸ ಡೋ. ಚಿತ್ತಕೋ, ಚಞ್ಚುಪಿ.

‘‘ಅಗ್ಗಿಸಞ್ಞೇಪಿ ಚಿತ್ತಕೋ, ಪುಮೇ ಏರಣ್ಡಕೇ ಚಞ್ಚು.

ಪಕ್ಖಿತುಣ್ಡೇ ಥಿಯಂ ಮತೋ’’.

ದ್ವಯಂ ಸಿವಾರುಕ್ಖೇ. ಸತ್ತುಯುತ್ತಫಲತಾಯ ಸತ್ತುಫಲಾ. ಗಣ್ಡಂ ಸಮೇತೀತಿ ಸಮೀ, ಅ, ನದಾದಿ, ಪಾರಿಭದ್ದಕೇಪಿ. ಗರುದಾರು, ಪೂತಿಕಟ್ಠಮ್ಪಿ.

೫೬೭. ದ್ವಯಂ ಕರಞ್ಜೇ. ನತ್ತಂ ರತ್ತಾ ಮಾಲಾ ಯಸ್ಸ. ಕಂ ರಞ್ಜಯತೀತಿ ಕರಞ್ಜೋ, ಣೋ. ಚಿಲ್ಲವಿಲ್ಲೋ, ಕರಜೋಪಿ. ದ್ವಯಂ ಖದಿರೇ. ಖದ ಹಿಂಸಾಯಂ, ಥೇರಿಯೇ ಚ. ಖದನ್ತಿ ದನ್ತಾ ಯೇನಾತಿ ಖದಿರೋ, ಇರೋ. ದನ್ತಾ ಧಾವನ್ತಿ ಯೇನ ನಿರೋಗತ್ತಾತಿ ದನ್ತಧಾವನೋ, ಯು, ಧಾವ ಗತಿಸುದ್ಧಿಯಂ. ಗಾಯತ್ತೀ, ಬಾಲತನಯೋಪಿ. ‘‘ಗಾಯತ್ತೀ ಖದಿರೇ ಇತ್ಥೀ, ಛನ್ದಸಿಪಿ ಛಳಕ್ಖರೇ’’ತಿ [ಚಿನ್ತಾಮಣಿಟೀಕಾ ೧೪.೪೯ ಬ್ಯಾಖ್ಯಾಸುಧಾ ೨.೪.೫೦] ರಭಸೋ. ಬಾಲೋ ಸುಖುಮೋ ಪತ್ತಸಞ್ಞಿತೋ ತನಯೋ ಯಸ್ಸ ಬಾಲತನಯೋ. ದ್ವಯಂ ಪೀತಸಾರೇ ಖದಿರೇ. ಖದಿರಾದಿಕನ್ತು ಪೀತಸಾರೇ. ಸೇತವಣ್ಣತಾಯ ಸೋಮೋ ಕಪ್ಪೂರಸದಿಸೋ ವಕ್ಕೋ ವಕ್ಕಲಮೇತಸ್ಸ ಸೋಮವಕ್ಕೋ. ‘‘ಸೋಮೋ ಕುವೇರೇ ಪಿತುದೇವತಾಯಂ, ವಸುಪ್ಪಭೇದೇ ವಸುಧಾಕರೇ ಚ. ದಿಬ್ಬೋಸಧೀ ಸೋಮಲತಾ ಸಮೀರಣೇ, ಕಪ್ಪೂರನೀರೇಸು ಚ ವಾನರೇ ಚಾ’’ತಿ ನಾನತ್ಥಸಙ್ಗಹೋ. ಈಸಂ ಖುದ್ದಕಂ ದಲಮೇತಸ್ಸ ಕದರೋ, ಲಸ್ಸ ರೋ. ದ್ವಯಂ ಪಿಣ್ಡೀತಕೇ. ಸಲ ಗಮನೇ, ಲೋ. ಮದ ಉಮ್ಮಾದೇ, ಯು. ‘‘ಪಿಣ್ಡೀತಕೋ ಮರವಕೋ, ಸಸನೋ ಕರಹಾಟಕೋ’’ತ್ಯಮರಕೋಸೇ [ಅಮರ ೧೪.೫೨].

೫೬೮. ತಿಕಂ ಇನ್ದಸಾಲೇ. ಸಾಲಾನಂ ರುಕ್ಖಾನಂ ಇನ್ದೋ ರಾಜಾ ಇನ್ದಸಾಲೋ, ದಾಸಾದೀಸು ಸಿರಿವಡ್ಢಕಾದಿಸದ್ದೋ ವಿಯ ಅಧಿವಚನಮತ್ತಮಿದಂ. ಇನ್ದಸ್ಸ ಸಕ್ಕಸ್ಸ ಸಾಲೋತಿಪಿ ಇನ್ದಸಾಲೋ. ಸಲ್ಲತೋ ಣ್ವು, ನದಾದಿ, ಸಲ್ಲಕೀ. ಖರ ಛೇದನವಿನಾಸನೇಸು, ಣ್ವು.

ದ್ವಯಂ ದೇವದಾರುಮ್ಹಿ. ದೇವಾನಂ ದಾರು. ಭದ್ದತ್ತಾ ಭದ್ದದಾರು. ಸಕ್ಕಪಾದಪೋ, ಪಾರಿಭದ್ದಕೋ, ಪೀತದಾರು, ದಾರು, ಪೂತಿಕಟ್ಠಮ್ಪಿ. ದ್ವಯಂ ಹೇಮಪುಪ್ಫಕೇ. ಪಠಮಕಾಲೇ ಚಮ್ಪಾನಗರೇ ಜಾತೋ ಚಮ್ಪೇಯ್ಯೋ, ಣೇಯ್ಯೋ. ಕಪಚ್ಚಯೇ ಚಮ್ಪಕೋ.

೫೬೯. ದ್ವಯಂ ಪನಸೇ. ಪನ ಬ್ಯವಹಾರೇ, ಥುತಿಮ್ಹಿ ಚ, ಅಸೋ. ಕಣ್ಟಕಯುತ್ತಂ ಫಲಮಸ್ಸ ಕಣ್ಟಕಿಫಲೋ. ದ್ವಯಂ ಸಿವಾಯಂ. ನ ವಿಜ್ಜತೇ ರೋಗಭಯಂ, ರೋಗಬ್ಯಥೋ ಚೋಪಯುಜ್ಜಮಾನಾಯಮಸ್ಸನ್ತಿ ಅಭಯಾ. ರೋಗಭಯಂ ಹರತಿ ಅಪನೇತೀತಿ ಹರೀತಕೀ, ತೋ, ಸಕತ್ಥೇ ಕೋ, ನದಾದಿ. ಹರಿತ್ತಕೀಪಿ. ಅಬ್ಯಥಾ, ಪುತನಾ, ಅಮತಾ, ಹೇಮವತೀ, ಚೇತಕೀ, ಸಿವಾಪಿ.

ದ್ವಯಂ ಕರಿಸಫಲೇ. ರೋಗಂ ಅಸತಿ ಭಕ್ಖತೀತಿ ಅಕ್ಖೋ, ಖೋ, ಸಸ್ಸ ಕೋ. ರೋಗಂ ವಿಭೂತಂ ಕರೋತೀತಿ ವಿಭೀತಕೋ, ವಿಭೀಟಕೋಪಿ. ಭೂತಾವಾಸೋ, ಕಲಿದ್ದುಮೋಪಿ, ಕಲಿಸ್ಸ ಆಸಯಭೂತೋ ದುಮೋ ಕಲಿದ್ದುಮೋ. ದ್ವಯಂ ಪುಸ್ಸಫಲೇ. ನತ್ಥಿ ಮತಮೇತಿಸ್ಸಂ ಹೇತುಭೂತಾಯಂ ಅಮತಾ. ಮಲ ಧಾರಣೇ, ಣ್ವು, ನದಾದಿ, ಆಮಲಕೀ. ವಯಟ್ಠಾಪಿ. ವಯೋ ತಿಟ್ಠತಿ ಥಿರೀಭವತ್ಯೇತಾಯಾತಿ ವಯಟ್ಠಾ.

೫೭೦. ದ್ವಯಂ ಡಹುರುಕ್ಖೇ. ಲಬುನಾಮಕೇ ಪಬ್ಬತೇ ಜಾಯತೀತಿ ಲಬುಜೋ. ಖುದ್ದಕತ್ತಾ ಲೀನಂ ಅಪಾಕಟಂ ಕುಚಸಙ್ಖಾತಂ ಫಲಮೇತಸ್ಸ ಲಿಕುಚೋ, ನಿಪಾತನಾ. ದ್ವಯಂ ಪೀತಪುಪ್ಫೇ. ಅಗನ್ಧಪುಪ್ಫತಾಯ ಅತ್ತಾನಂ ಕಣಿಟ್ಠಂ ಕರೋತೀತಿ ಕಣಿಕಾರೋ, ಟ್ಠಲೋಪೋ, ಪದುಮಪ್ಪಮಾಣಪುಪ್ಫದುಮತಾಯ ದುಮುಪ್ಪಲೋ.

ತಿಕಂ ಹಿಙ್ಗುನಿಯ್ಯಾಸೇ. ನೀ ನಯೇ, ಬೋ, ಮೋನ್ತೋ ಚ. ತಿತ್ತರಸತ್ತಾ ಅರಿಭಾವೇ ತಿಟ್ಠತೀತಿ ಅರಿಟ್ಠೋ. ಪುಚಿಂ ಕುಟ್ಠಂ ಮದ್ದತೀತಿ ಪುಚಿಮನ್ದೋ, ಇತ್ತಂ, ಬಿನ್ದಾಗಮೋ. ಧಮ್ಮಸೇನೋ, ಮಾಲಕೋಪಿ. ಮಲತೇ ರೋಗಂ ಮಾಲಕೋ, ಣ್ವು. ದ್ವಯಂ ರತ್ತಪುಪ್ಫೇ. ಕರೋತಿಸ್ಮಾ ಣ್ವು. ದಲ ವಿದಾರಣೇ, ಮೋ, ಇಕಾರಾಗಮೋ. ದಾಳಿಮೋಪಿ.

೫೭೧. ದ್ವಯಂ ಪೀತದ್ದುಮೇ. ಸರತಿ ಕಾಲನ್ತರಂ ಸರಲೋ, ಅಲೋ. ಪೂತಿಯೇವ ಕಟ್ಠಂ ಪೂತಿಕಟ್ಠಂ, ಪೂತಿಮುತ್ತನ್ತಿ ಯಥಾ. ದ್ವಯಂ ಪಿಚ್ಛಿಲಾಯಂ. ಕಪಿ ಚಲನೇ, ಇಲೋ. ಸಾಸ ಅನುಸಿಟ್ಠಿಯಂ, ಸಿಸ ಇಚ್ಛಾಯಂ ವಾ, ಅಪೋ, ನಿಗ್ಗಹೀತಾಗಮೋ, ಸಿಂಸಪಾ. ಅಗುರುಪಿ.

ತಿಕಂ ಫಲಿನಿಯಂ. ಸಾ ತನುಕರಣೇ, ಮೋ. ಪಿಯಭಾವಂ ಗಚ್ಛತೀತಿ ಪಿಯಙ್ಗು, ಉ. ಕಮನೀಯಭಾವಂ ಗಚ್ಛತೀತಿ ಕಙ್ಗು, ಉ, ನಿಪಾತನಾ. ಮಹಿಲಾವ್ಹಯಾ, ಲತಾ, ಗುನ್ದಾ, ಗನ್ಧಫಲೀ, ಕಾರಮ್ಭಾಪಿ. ದ್ವಯಂ ಸಿರೀಸೇ. ಸರತಿ ರೋಗಂ ಹಿಂಸತೀತಿ ಸಿರೀಸೋ. ಈಸೋ, ಅಸ್ಸಿ. ಭಣ್ಡ ಪರಿಭಾಸನೇ, ಇಲೋ. ಕಪೀತನೋಪಿ. ಅಮ್ಬಾಟಕೇ, ಗದ್ದಭಣ್ಡೇ ಚ ಕಪೀತನೋ.

೫೭೨. ದ್ವಯಂ ಮಣ್ಡೂಕಪಣ್ಣೇ. ಸುಣ ಗತಿಯಂ, ಣ್ವು, ದೀಘಂ ಫಲವಣ್ಟಂ ಯಸ್ಸ. ನಟೋ ಕುಟನ್ನಟಾಪಿ. ದ್ವಯಂ ಬಕುಲೇ. ವಕ ಆದಾನೇ, ಉಲೋ. ಕೇಸರಯುತ್ತಪುಪ್ಫತಾಯ ಕೇಸರೋ.

ದ್ವಯಂ ಮಲಪುಪ್ಫಸ್ಮಿಂ. ಕಾಕಾನಂ ಉದುಮ್ಬರೋ ಕಾಕೋದುಮ್ಬರೋ, ಸೋ ಏವ ಕಾಕೋದುಮ್ಬರಿಕಾ, ಸಕತ್ಥೇ ಇಕೋ. ಫಲ ನಿಪ್ಫತ್ತಿಯಂ, ಗು, ಲಸ್ಸ ಗೋ. ದ್ವಯಂ ನಾಗರುಕ್ಖೇ. ನ ಗಚ್ಛತೀತಿ ನಾಗೋ, ದೀಘಾದಿ. ನಾಗಾನಂ ಮಾಲಾ, ಸಾ ಸಞ್ಜಾತಾ ಯತ್ರ ನಾಗಮಾಲಿಕಾ.

೫೭೩. ದ್ವಯಂ ಅಸೋಕೇ. ನತ್ಥಿ ಸೋಕೋ ಯೇನ. ವಜ ಗಮನೇ, ಉಲೋ. ದ್ವಯಂ ಜಯಾಯಂ. ತಂತಂರೋಗಜಯಾದಿಕಂ ಕರೋತೀತಿ ತಕ್ಕಾರೀ, ಣೀ. ವಿಸೇಸೇನ ಜಯತೀತಿ ವೇಜಯನ್ತಿಕಾ, ಅನ್ತೋ, ನದಾದಿ, ಸಕತ್ಥೇ ಕೋ. ‘‘ಜಯಾ ಜಯನ್ತೀ ತಕ್ಕಾರೀ, ನಾದೇಯೀ ವೇಜಯನ್ತಿಕಾ’’ತ್ಯಮರಕೋಸೋ [ಅಮರ ೧೪.೬೫].

ದ್ವಯಂ ಸಮುದ್ದಸಮೀಪದೇಸಜೇ ಸಾಮದಲೇ ತಮಾಲನಾಮೇ ತರುಮ್ಹಿ. ತಾಪಿಯಂ ಜಾಯತೀತಿ ತಾಪಿಞ್ಛೋ, ಅಞ್ಞತ್ಥೇ ಛೋ, ಬಿನ್ದಾಗಮೋ, ‘‘ತಾಪೀ ತು ಸರಿತಾನ್ತರೇ’’ತಿ ಹಿ ನಾನತ್ಥಸಙ್ಗಹೋ. ತಮು ಕಙ್ಖಾಯಂ, ಅಲೋ. ದ್ವಯಂ ಕುಟಜೇ. ರೋಗಂ ಛಿನ್ದತೀತಿ ಕುಟಜೋ, ಜೋ. ಗಿರಿಮ್ಹಿ ಜಾತಾ ಮಲ್ಲಿಕಾ ಗಿರಿಮಲ್ಲಿಕಾ, ಸಕ್ಕಪರಿಯಾಯೋಪ್ಯತ್ರ.

೫೭೪. ತಸ್ಸ ಕುಟಜಸ್ಸ ಫಲೇ ಇನ್ದಯವೋ. ಇನ್ದಸ್ಸ ಸಕ್ಕಸ್ಸ ಯವೋ ಧಞ್ಞವಿಸೇಸೋ ಇನ್ದಯವೋ. ಕಲಿಙ್ಗಂ, ಕದ್ದಯವಮ್ಪಿ.

‘‘ಪೂತಿಕರಞ್ಜ ಧೂಮ್ಯಾಟೇ, ದೇಸಭೇದೇ ಪುಮಾ ಭವೇ;

ಕುಟಜಸ್ಸ ಫಲೇ ಕ್ಲೀವಂ, ಕಲಿಙ್ಗಂ ಥೀ ತು ನಾರಿಯ’’ನ್ತಿ [ಚಿನ್ತಾಮಣಿಟೀಕಾ ೧೪.೬೭]. –

ರಭಸೋ. ಅಮರಮಾಲಾಯನ್ತು ‘‘ಕಲಿಙ್ಗೇ’ನ್ದಯವೋ ಪುಮಾ’’ತಿ ಇತ್ಥಿಕಣ್ಡೇ ಪಾಠೋ. ತಸ್ಸತ್ಥೋ ಕಲಿಙ್ಗಾ ಇತ್ಥೀ, ಇನ್ದಯವೋ ಪುಮಾ. ದ್ವಯಂ ಕಣಿಕಾರಿಕಾಯಂ. ಅಗ್ಗಿ ಅನೇನ ಮನ್ಥ್ಯತೇ ಅಗ್ಗಿಮನ್ಥೋ, ಣೋ. ತಂ ಕಟ್ಠೇಹಿ ಘಂಸಿಯಮಾನೇ ಅಗ್ಗಿ ಉಟ್ಠಹತಿ. ಕಣ ಗತಿಯಂ, ಣ್ವು. ಜಯಾಪ್ಯತ್ರ. ‘‘ವಿಜಯೇ ಸೋ ಜಯಾ ದುಗ್ಗಾ, ಜಯನ್ತೀ ಗಣಿಕಾರಿಕೇ’’ತಿ ಜಯಾ ನಾನಾತ್ಥಾ.

ದ್ವಯಂ ನಿಗ್ಗುಣ್ಡಿಯಂ. ನತ್ಥಿ ಗುಣ್ಡಂ ಗಬ್ಭಬನ್ಧನಮೇತಾಯಾತಿ ನಿಗ್ಗುಣ್ಡೀ. ಸಿ ಬನ್ಧನೇ, ದು, ಸಿನ್ದುಂ ಗಬ್ಭಬನ್ಧನಂ ವಾರೇತೀತಿ ಸಿನ್ದುವಾರೋ. ಇನ್ದಾನೀಪ್ಯತ್ರ. ಇನ್ದಾನೀಕರಣೇ ಥೀನಂ, ಸಿನ್ದುವಾರೇನ್ದನಾರಿಸು. ದ್ವಯಂ ಮಲ್ಲಿಕಾಯಂ. ತಿಣಾನಿ ಸೂಲನ್ತಿ ಯಸ್ಮಿನ್ತಿ ತಿಣಸೂಲಂ, ಸೂಲ ರುಜಾಯಂ. ಯತ್ರ ತಂ ಜಾಯತಿ, ತತ್ರ ತಿಣಾನಿ ರೋಗೀನಿ ಭವನ್ತೀತ್ಯತ್ಥೋ. ‘‘ತಿಣಸೂಲಂ ಮಲ್ಲಿಕಾಯಂ, ಪಣ್ಡಕಂ ಕೇತಕೀಫಲೇ’’. ಮಲ್ಲತೇ ಧಾರೀಯತೇ ಸಬ್ಬೇಹೀತಿ ಮಲ್ಲಿಕಾ, ಮಲ್ಲ ಧಾರಣೇ, ಇ, ಸಕತ್ಥೇ ಕೋ. ಭೂಪದೀ, ಸೀತಭೀರು ಚ.

೫೭೫. ದ್ವಯಂ ಕಣ್ಹಪುಪ್ಫಸೇಫಾಲಿಕಾಯಂ. ಸಿಫಾ ಜಟಾ ಯಸ್ಸತ್ಥಿ ಸೇಫಾಲಿಕಾ, ಇಕೋ, ಲಮಜ್ಝೋ. ನೀಲಪುಪ್ಫತಾಯ ನೀಲಿಕಾ. ಸುವಹಾ, ನಿಗ್ಗುಣ್ಡೀಪಿ. ‘‘ಸಿನ್ದುವಾರೇಪಿ ನಿಗ್ಗುಣ್ಡೀ, ನೀಲಸೇಫಾಲಿಕಾಯ ಚೇ’’ತಿ ರುದ್ದೋ. ದ್ವಯಂ ವನಮಲ್ಲಿಕಾಯಂ. ಫುಟ ವಿಕಸನೇ, ಆ ಭುಸೋ ಫುಟತೀತಿ ಅಪ್ಫೋಟಾ, ರಸ್ಸಾದಿ.

ಚತುಕ್ಕಂ ರತ್ತಪುಪ್ಫೇ. ಬನ್ಧ ಬನ್ಧನೇ, ಉ, ಸಕತ್ಥೇ ಕೋ. ಜಯತ್ಥಂ ಸುಮನಂ ಜಯಸುಮನಂ. ಭಣ್ಡತಿಸ್ಮಾ ಇಕೋ, ಭಣ್ಡಿಕೋ. ಜೀವತೀತಿ ಜೀವಕೋ, ಜೀವ ಪಾಣಧಾರಣೇ, ಣ್ವು. ಜೀವಕಸದ್ದಸ್ಸ ಪೀತಸಾಲಾದೀಸ್ವಪಿ ಪವತ್ತನತೋ ಬನ್ಧು ಏವ ಜೀವಕೋ ಬನ್ಧುಜೀವಕೋತಿ ಬನ್ಧುಸದ್ದೇನ ವಿಸೇಸೇತ್ವಾ ವುತ್ತಂ, ಸಮುದಿತೇನ ವಾ ನಾಮಮಿದಮೇಕಸ್ಸ. ‘‘ಬನ್ಧು ಬನ್ಧುಕಪುಪ್ಫೇ ಚ, ಬನ್ಧುಭಾತರಿ ಬನ್ಧವೇ’’ತಿ ವಚನತೋ,

‘‘ಜೀವಕೋ ಪೀತಸಾಲೇ ಚ, ಖೇಪನೇ ವುದ್ಧಿಜೀವಿನಿ;

ಸೇವಿನಿ ಪಾಣಕೇ ಫಾತಿ-ಕುಣ್ಡಿಕೇ ಪಾದಪನ್ತರೇ’’ತಿ. –

ವಚನತೋ ಚ ‘‘ಬನ್ಧುಜೀವಕೋ’’ತಿ ಏತ್ಥ ದ್ವೇ ನಾಮಾನಿಪಿ ದಟ್ಠಬ್ಬಾನಿ.

೫೭೬. ಪಞ್ಚಕಂ ಸುಮನಾಯಂ. ಸುನ್ದರಂ ಮನೋ ಯಸ್ಸಂ. ಸುಗನ್ಧತ್ತಾ ಜಾತಿಸುಮನಾತಿ ಸಮುದಿತನಾಮಂ. ಮಲ ಧಾರಣೇ, ತೋ, ನದಾದಿ. ಜನ ಜನನೇ,ತಿ. ವಸ್ಸಕಾಲಸಞ್ಜಾತಪುಪ್ಫತಾಯ ವಸ್ಸಿಕೀ. ಇಕೋ, ನದಾದಿ.

ದ್ವಯಂ ‘‘ಚಮ್ಪೇಯ್ಯ’’ಇತಿ ಖ್ಯಾತೇ. ಯುಥ ಹಿಂಸಾಯಂ, ಇ, ಸಕತ್ಥೇ ಕೋ, ದೀಘಾದಿ. ಮಗಧೇ ಭವಾ ಮಾಗಧೀ. ಗಣಿಕಾ, ಅಮ್ಬಟ್ಠಾಪಿ. ದ್ವಯಂ ‘‘ದೇವಾಲಿ’’ಇತಿ ಖ್ಯಾತಾಯಂ. ಸುನ್ದರಂ ದಲಮೇತಿಸ್ಸಾ ಸತ್ತಲಾ, ದಸ್ಸ ತೋ, ಸತ್ತ ದಲಾನಿ ಯಸ್ಸಾ ವಾ ಸತ್ತಲಾ. ನವಾ ನೂತನಾ ಮಲ್ಲಿಕಾ ನವಮಲ್ಲಿಕಾ. ನವಮಾಲಿಕಾಪಿ.

೫೭೭. ದ್ವಯಂ ಪುಣ್ಡಕೇ ‘‘ಲಂಸ್ವಣ’’ಇತಿ ಖ್ಯಾತೇ. ವಸನ್ತೇ ಪುಪ್ಫತಿ ವಾಸನ್ತೀ. ಅತಿಮುದಂ ತನೋತೀತಿ ಅತಿಮುತ್ತೋ, ನಿಪಾತನಾ. ಮಾಧವೀ, ಲತಾಪಿ. ಮಧುಮ್ಹಿ ಚಿತ್ತೇ, ವೇಸಾಖೇ ವಾ ಪುಪ್ಫತೀತಿ ಮಾಧವೀ.

‘‘ಲತಾ ಜೋತಿಮತೀಪಕ್ಕ-ಸಾಖಾವಲ್ಲೀಪಿಯಙ್ಗುಸು;

ಲತಾ ಕತ್ಥೂರಿಕಾಯಞ್ಚ, ಸಾ ದುಬ್ಬಾಮಾಧವೀಸು ಚಾ’’ತಿ.

ಲತಾ ಅನೇಕತ್ಥಾ. ದ್ವಯಂ ಕರವೀರೇ. ಕುಚ್ಛಿತಂ ರವನ್ತಿ ಅಸ್ಸಾ ಯೇನ ಕರವೀರೋ, ಈರೋ. ಅಸ್ಸೇ ಮಾರೇತೀತಿ ಅಸ್ಸಮಾರಕೋ. ಪಟಿಹಾಸೋಪಿ.

ದ್ವಯಂ ಮಾತುಲುಙ್ಗೇ. ಮತ್ತೋ ಲುಜ್ಜತಿ ಯೇನ ಮಾತುಲುಙ್ಗೋ, ಲುಜ ವಿನಾಸೇ. ಪರಿಪುಣ್ಣಬೀಜತಾಯ ಬೀಜಪೂರೋ. ರುಚಕೋಪಿ, ರುಚ ದಿತ್ತಿಯಂ, ಣ್ವು. ದ್ವಯಂ ಧುತ್ತುರೇ. ಉಗ್ಗಂ ಮಜ್ಜತಿ ಯೇನ ಉಮ್ಮತ್ತೋ, ಮದ ಉಮ್ಮಾದೇ. ಮಾರೇತೀತಿ ಮಾತುಲೋ, ಉಲೋ, ರಸ್ಸ ತೋ. ‘‘ಉಮ್ಮತ್ತೋ ಕಿತವೋ ಧುತ್ತೋ, ಧತ್ತೂರೋ ಕನಕಾವ್ಹಯೋ, ಮಾತುಲೋ ಮದನೋ’’ತ್ಯಮರಕೋಸೋ [ಅಮರ ೧೪.೭೭].

೫೭೮. ದ್ವಯಂ ಕಣ್ಹಪಾಕಫಲೇ. ಕರಂ ಹತ್ಥಂ ಮದ್ದತಿ ಕಣ್ಟಕೇನ ಕರಮನ್ದೋ. ಕರಮದ್ದೋಪಿ. ಸುಟ್ಠು ಸಿನೋತೀತಿ ಸುಸೇನೋ, ಸಿ ಬನ್ಧನೇ, ಯು. ದ್ವಯಂ ಕುನ್ದೇ. ಕುಣ ಸಙ್ಕೋಚನೇ, ದೋ, ನತ್ತಂ, ಕುಣ ಸದ್ದೋಪಕರಣೇಸು ವಾ. ಮಾಘೇ ಭವಂ ಮಾಘ್ಯಂ, ಯೋ, ತಸ್ಮಿಂ ಕಾಲೇ ಹಿ ಪುಪ್ಫಾದಿಸಮಿದ್ಧಿ ಭವತೀತಿ ತಬ್ಭವತ್ತೇನ ಬ್ಯಪದೇಸೋ.

ದ್ವಯಂ ದೇವತಾಸೇ. ದೇವತಾ ಆಸನ್ತಿ ಯಂ ದೇವತಾಸೋ. ಜೀಮೂತಕಾಲೇ ಸಞ್ಜಾತತ್ತಾ ಜೀಮೂತೋ, ಮ್ಹನಲಾ. ದ್ವಯಂ ಸನಾಮಪಸಿದ್ಧೇ ಪುಪ್ಫವಿಟಪೇ. ಪುಪ್ಫಮಾಸುಂ ನ ಮಿಲಾತಮಸ್ಸ ಭವತೀತಿ ಅಮಿಲಾತೋ. ಮಹನ್ತಮ್ಪಿ ಕಾಲಂ ಸಹತೀತಿ ಮಹಾಸಹಾ.

೫೭೯. ಚತುಕ್ಕಂ ಝಿಣ್ಡಿಸಾಮಞ್ಞೇ. ಸಿರೀ ವತ್ತತಿ ಯೇನ ಸೇರೇಯ್ಯಕೋ, ಣೇಯ್ಯಕೋ. ದಾಸನಾಮಕತ್ತಾ ದಾಸೀ. ಕಿರ ವಿಕ್ಕಿರಣೇ, ಆತೋ, ದ್ವಿತ್ತಂ. ಕುರ ಸದ್ದೇ, ಡೋ, ಸಕತ್ಥೇ ಕೋ.

ದ್ವಯಂ ಕಣ್ಟೇನ, ಪತ್ರೇನ ಚ ಸಿತೇ ಪಣ್ಣಾಸೇ. ಅಜ ಗಮನೇ, ಉಕೋ. ಸಿತೋ ಸುಕ್ಕೋ ಪಣ್ಣಾಸೋ ಸಿತಪಣ್ಣಾಸೋ. ದ್ವಯಂ ಅಪ್ಪಪತ್ತೇ ಪಣ್ಣಾಸೇ. ಈರ ಕಮ್ಪನೇ, ಯು. ಫಣಿಂ ಜಯತಿ ಫಣಿಜ್ಜಕೋ, ಯಸ್ಸ ಕೋ.

೫೮೦. ದ್ವಯಂ ಜಪಾಕುಸುಮೇ. ಜಪತಿ ಯಾಯ ಜಪಾ, ಜು ಜವನೇ ವಾ, ಪೋ, ಉಸ್ಸತ್ತಂ. ಮರುದೇಸಜೇ ಕಣ್ಟಕಿನಿ ಕರಭಪ್ಪಿಯೇ ತರುವಿಸೇಸೇ ಕರೀರಾದಿದ್ವಯಂ. ಕರೋತಿಸ್ಮಾ ಈರೋ. ಕಚ ಬನ್ಧನೇ, ದ್ವಿತ್ತಂ, ಕಕಚೋ, ಗನ್ಥಿಲೋಪಿ.

ದ್ವಯಂ ರುಕ್ಖೋಪರಿಜಾತೇ ವಿಜಾತಿಯೇ ಪಲ್ಲವೇ. ರುಕ್ಖೇ ಜಾಯಮಾನಾ ತಂ ಅದ್ದತಿ ಹಿಂಸತೀತಿ ರುಕ್ಖಾದನೀ, ಅದ್ದ ಹಿಂಸಾಯಂ, ಯು, ನದಾದಿ, ದಲೋಪೋ. ವನ್ದ ಅಭಿವಾದನಥುತೀಸು, ಅ, ಇತ್ಥಿಯಂ, ಸಕತ್ಥೇ ಕೋ, ಅಸ್ಸ ದೀಘೋ. ರುಕ್ಖರುಹಾ, ಜೀವನ್ತಿಕಾಪಿ. ದ್ವಯಂ ಚಿತ್ತಕೇ. ಚಿತಿ ಹಿಂಸಾಯಂ, ಗನ್ಧೇ ಚ, ಣ್ವು. ಅಗ್ಗಿಸಞ್ಞಿತೋತಿ ಅಗ್ಗಿಪರಿಯಾಯನಾಮಕೋ. ಪಾಠೀಪಿ, ಪುಮೇ’ಯಂ.

೫೮೧. ದ್ವಯಂ ಗಣರೂಪೇ. ಅಕ್ಕೋ ಸೂರಿಯೋ, ತಪ್ಪರಿಯಾಯನಾಮಕತ್ತಾ ಅಕ್ಕೋ. ವಿಕರೋತೀತಿ ವಿಕಿರಣೋ, ಯು. ಅಸ್ಸಿ. ಅಕ್ಕವ್ಹೋ, ವಸುಕೋ, ಅಪ್ಫೋಟೋ, ಮನ್ದಾರೋ, ಅಕ್ಕಪಣ್ಣೋಪಿ. ‘‘ಪುಮೇ ಅಕ್ಕವ್ಹೋ ಅಪ್ಫೋಟೋ, ವನಮಾಲ್ಯಪರಾಜಿತೇ’’ತಿ [ಚಿನ್ತಾಮಣಿಟೀಕಾ ೧೪.೮೦] ರುದ್ದೋ. ಮನ್ದಾರೋ ದೇವದುಮಮ್ಹಿ ಪಾರಿಭದ್ದಕೇಪಿ. ತಸ್ಮಿಂ ಅಕ್ಕೇ ಯೋ ಸೇತಪುಪ್ಫಕೋ, ತಸ್ಮಿಂ ಅಳಕ್ಕೋ. ಸೇತಪುಪ್ಫತಾಯ ಅಲಂಭೂತೋ ಅಕ್ಕೋ ಅಳಕ್ಕೋ, ಅಲ ಭೂಸನೇ, ಳತ್ತಂ. ಪತಾಪಸೋಪಿ. ದ್ವಯಂ ಛಿನ್ನರುಹಾಯಂ. ತಿತ್ತರಸತ್ತಾ ಪೂತಿಭೂತಾ ಲತಾ ಪೂತಿಲತಾ, ಪೂ ಪವನೇ ವಾ,ತಿ. ರೋಗಮಲಂ ಪುನಾತೀತಿ ಪೂತಿ, ಸಾ ಏವ ಲತಾ ಪೂತಿಲತಾ. ಗುಳ ರಕ್ಖಣೇ, ಚೋ, ನದಾದಿ. ಗರ ಸೇಚನೇ ವಾ. ಅಮತಾ, ಮಧುಪಣ್ಣೀಪಿ. ಮಧು ಇವ ಪಣ್ಣಮಸ್ಸಾ ಮಧುಪಣ್ಣೀ. ದ್ವಯಂ ಧನುಸೇನಿಯಂ, ಯಾ ಪತ್ತೇಹಿ ವಚಾಸದಿಸೀ, ತತ್ತಚೋ ತನ್ತಧನುಗುಣೋಪಯುತ್ತೋ. ಮುಬ್ಬಾವಿಕಾರತಾಯೇವ ಧನುಜಿಯಾ ‘‘ಮುಬ್ಬೀ’’ತ್ಯುಚ್ಚತೇ, ಮುಬ್ಬ ಬನ್ಧನೇ, ಅ, ಮುಬ್ಬಾ. ಮಧುರಸತ್ತಾ ಮಧುರಸಾ. ದೇವೀ, ಮೋರಟಾಪಿ. ಮುರ ಪವೇಧನೇ, ಅಟೋ, ಮೋರಟಾ.

೫೮೨. ದ್ವಯಂ ಮಕ್ಕಟಿಯಂ. ಕಪೀನಂ ವಾನರಾನಂ ಕಚ್ಛುಂ ಜನೇತೀತಿ ಕಪಿಕಚ್ಛು. ಕಪಿಕಚ್ಚುಪಿ. ದುಕ್ಖಸಮ್ಫಸ್ಸತಾಯ ದುಫಸ್ಸೋ. ಅತ್ತಗುತ್ತಾ, ಜಡಾ, ಅಬ್ಯಣ್ಡಾ, ಕಣ್ಡೂರಾ, ಪಾವುಸಾಯಿನೀ, ಸೂಕಸಿಮ್ಬಿಪಿ. ‘‘ಅಯಂ ಫಸ್ಸೇನ ಕಣ್ಡುಂ ಜನಯತೀ’’ತಿ ಯಾ ಲೋಕೇಹಿ ಪರಿಹರೀಯತೇ, ತತೋ ಅಯಂ ಅತ್ತನಾ ಗುತ್ತಾ ರಕ್ಖಿತಾ ಅತ್ತಗುತ್ತಾ. ಪಾವುಸಾಯಂ ಉತುಯಂ ಏತಿ ಜಾಯತೇ, ಣೋ, ಇನೀ. ಸೂಕಸಹಿತಾ ಸಿಮ್ಬಿ ಅಸ್ಸಾ ಸೂಕಸಿಮ್ಬಿ, ರಸ್ಸನ್ತೋ. ದ್ವಯಂ ಮಣ್ಡೂಕಪಣ್ಣಿಯಂ. ಮಜ ಸುದ್ಧಿಯಂ, ಠೋ. ಕಾಸ ದಿತ್ತಿಯಂ, ಕರಣೇ ಅ, ರಸ್ಸೋ. ಸಮಙ್ಗಾ, ಯೋಜನವಲ್ಲೀಪಿ. ಸಮಙ್ಗತೀತಿ ಸಮಙ್ಗಾ, ಅ. ಯೋಜನಂ ವಲ್ಲೀ ಯಸ್ಸಾ ಯೋಜನವಲ್ಲೀ.

ದ್ವಯಂ ವನತಿತ್ತಿಕಾಯಂ. ಅಮ್ಬ ಸದ್ದೇ, ಠೋ, ಅವ ರಕ್ಖಣೇ ವಾ, ನಿಗ್ಗಹೀತಾಗಮೋ. ಪಾ ರಕ್ಖಣೇ, ಠೋ. ಸೇತಾ, ಪಾಪಚೇಲೀಪಿ. ಸೇತರಸೇನ ಯುಜ್ಜತೇತಿ, ಅ. ದ್ವಯಂ ಕಟುಕರೋಹಿಣಿಯಂ. ಕಟ ವಸ್ಸಾವರಣಗತೀಸು. ಉ, ಕಟು, ನಾರೀ. ಕಟುಕರಸಾ ಹುತ್ವಾ ರುಹತೀತಿ ಕಟುಕರೋಹಿಣೀ, ರುಹ ಜನನೇ, ಯು, ನದಾದಿ. ‘‘ಕಟುಕರೋಹಿಣೀ’’ತಿ ಸಮುದಿತೇನ ನಾಮಮಿದಂ. ಕಟುರೋಹಿಣೀಪಿ.

೫೮೩. ದ್ವಯಂ ಖರಮಞ್ಜರಿಯಂ ‘‘ಚಚಸಿಮ’’ಇತಿ ಖ್ಯಾತಾಯಂ. ಅಪಮಜ್ಜನ್ತಿ ವತ್ಥಾದಿಕ’ಮನೇನೇತಿ ಅಪಾಮಗ್ಗೋ, ದೀಘೋ ಉಪಸಗ್ಗಸ್ಸ. ಸಿಖರಮಸ್ಸಾತಿ ಸೇಖರಿಕೋ. ಧಾಮಗ್ಗವೋ, ವಿಮುಖಪುಪ್ಫೀಪಿ. ‘‘ಘೋಸಕೇ ಖರಮಞ್ಜರಿಯಂ, ಧಾಮಗ್ಗವೋ ಪುಮೇ ಮತೋ’’. ವಿಮುಖಂ ಪುಪ್ಫಮಸ್ಸಾ. ದ್ವಯಂ ಕಣಾಯಂ. ಪಿತ್ತಂ ಫಲತಿ ಕುಪ್ಪತಿ ಯಾಯ ಪಿಪ್ಫಲೀ, ನದಾದಿ. ಮಗಧೇ ಭವಾ ಮಾಗಧೀ, ಮಗಧಾನಂ ಅಯಂ ವಾ ಮಾಗಧೀ, ತತ್ರ ಪಠಮುಪ್ಪನ್ನತ್ತಾ, ಬಾಹುಲ್ಯೇನ ವಾ ತತ್ರ ಜಾಯಮಾನತ್ತಾ ತಂಸಮಞ್ಞಾಯ ಬ್ಯಪದಿಸ್ಸತೇ. ವೇದೇಹೀ, ಕಣಾ, ಕೋಲಾಪಿ. ವೇದೇಹಾನಮಯಂ ವೇದೇಹೀ. ಕಣಾ ನಾನತ್ಥಾ, ವುತ್ತಞ್ಚ ‘‘ಕಣಾ ಪಿಪ್ಫಲಿ’ಜಾಜೀ ಚೇ’’ತಿ.

ದ್ವಯಂ ತಿಕಣ್ಟಕೇ. ಗವಂ ಕಣ್ಟಕೋ ಗೋಕಣ್ಟಕೋ, ಪಥವಿಯಂ ವಾ ಲಗ್ಗೋ ಕಣ್ಟಕೋ ಗೋಕಣ್ಟಕೋ. ಸಿಙ್ಘ ಘಾಯನೇ, ಆಟೋ. ಪಲಙ್ಕಸಾ, ಸಾದುಕಣ್ಟೋಪಿ. ಯುತ್ತರಾಸ್ನಾಯಂ ಪಲಾಸೇ ಚ ಪಲಙ್ಕಸಾ ಥಿಯಂ. ಸಾದುಕಣ್ಟೋ ವಿಕಙ್ಕತೇಪಿ. ದ್ವಯಂ ಹತ್ಥಿಪಿಪ್ಫಲಿಯಂ. ಕೋಲಾಕಾರಾ, ತಂನಾಮಿಕಾ ವಾ ವಲ್ಲೀ ಕೋಲವಲ್ಲಿ, ರಸ್ಸೋ. ಇಭಾನಂ ಹತ್ಥೀನಂ ಪಿಪ್ಫಲೀ ಇಭಪಿಪ್ಫಲೀ. ಕಪಿವಲ್ಲೀ, ವಸಿರೋಪಿ. ವಸಿರೋ ನಾನತ್ಥೋ. ವಸಿರೋ ಅಪಾಮಗ್ಗೋ ಸಾಮುದ್ದಲವಣಂ ಹತ್ಥಿಪಿಪ್ಫಲಿ ಚೇತಿ. ಪುಮೇ’ಯಂ.

೫೮೪. ದ್ವಯಂ ಛಗನ್ಥಾಯಂ, ಯಾ ‘‘ಉಗ್ಗಗನ್ಧಾ’’ತಿಪ್ಯುಚ್ಚತೇ. ಗುನ್ನಂ ಲೋಮಸಮ್ಪಾತನಟ್ಠಾನೇ ಜಾತಾ ಗೋಲೋಮೀ, ವಚ ವಿಯತ್ತಿಯಂ ವಾಚಾಯಂ, ಕರಣೇ ಅ, ಸತಪಬ್ಬಿಕಾಪಿ. ವಚಾ ಸುಕ್ಕಲೋಹಿತಮೂಲಭೇದೇನ ದುವಿಧಾ, ತತ್ರಸುಕ್ಕಾ ‘‘ಹೇಮವತೀ’’ತ್ಯುಚ್ಚತೇ ಅಮರಕೋಸೇ [ಅಮರ ೧೪.೧೦೨-೩]. ದ್ವಯಂ ಅಪ್ಫೋಟಾಯಂ. ಕಣ್ಣಸಣ್ಠಾನಪುಪ್ಫತಾಯ ಕಣ್ಣೀ. ಗಿರಿಮ್ಹಿ ಜಾತಾ ಕಣ್ಣೀ ಗಿರಿಕಣ್ಣೀ. ರೋಗಾದಿಜಿತತ್ತಾ ಅಪರಾಜಿತಾ.

ದ್ವಯಂ ಕಲಸಿಯಂ. ಸೀಹಪುಚ್ಛಾಕಾರಕುಸುಮಮಞ್ಜರಿತಾಯ ಸೀಹಪುಚ್ಛಿ. ಪಞ್ಹಿ ಅಪ್ಪತನು ವುಚ್ಚತೇ. ಪಞ್ಹಿ ಪಣ್ಣಂ ಯಸ್ಸಾ ಪಞ್ಹಿಪಣ್ಣೀ. ಪುಥುಪಣ್ಣೀ, ಗುಹಾಪಿ, ಪುಥು ಅಸಿಲಿಟ್ಠಂ ಪಣ್ಣಮಸ್ಸಾ ಪುಥುಪಣ್ಣೀ. ಗಹ್ವರೇ ಸೀಹಪುಚ್ಛಞ್ಚ, ಥಿಯಂ ಛಮಾತುಕೇ ಗುಹೋ [ಚಿನ್ತಾಮಣಿಟೀಕಾ ೧೪.೯೩]. ದ್ವಯಂ ಸಾಲಪಣ್ಣಿಯಂ. ಸಾಲಪಣ್ಣಸದಿಸವಿಟತಾಯ ಸಾಲಪಣ್ಣೀ. ಸಾಲಂ ಸೋಭನಯುತ್ತಂ ಪಣ್ಣಮಸ್ಸಾ ವಾ ಸಾಲಪಣ್ಣೀ. ಥು ಗತಿಥೇರಿಯೇಸು, ಇರೋ, ಥಿರೋ.

೫೮೫. ದ್ವಯಂ ಕಣ್ಟಕಾರಿಕಾಯಂ. ನಿದ್ದಹತಿ ಕಣ್ಟಕಮುಟ್ಠೇತಿ ನಿದಿದ್ಧಿಕಾ, ಣ್ವು. ಭಯಕರಣವಸೇನ ಬ್ಯಗ್ಘಸದಿಸತಾಯ ಬ್ಯಗ್ಘೀ, ಬ್ರಹತೀ, ಖುದ್ದಾಪಿ. ದ್ವಯಂ ನೀಲಿರುಕ್ಖೇ. ನೀಲ ವಣ್ಣೇ. ನೀಲವಣ್ಣತಾಯ ನೀಲೀ, ನದಾದಿ, ಇನೀ, ನೀಲಿನೀ, ಕಾಳಾ, ತುತ್ಥಾಪಿ.

ಕಾಳಾ ಕಣ್ಹತಿವುತಾಯಂ, ನೀಲೀ ಯೋಜನವಲ್ಲಿಸು;

ಪಣ್ಡೇ ರಸಞ್ಜನೇ ತುತ್ಥಾ, ಸುಖುಮೇಲಾಯ ನೀಲಿಯಂ [ಚಿನ್ತಾಮಣಿಟೀಕಾ ೧೪.೯೪-೫].

ದ್ವಯಂ ಗುಞ್ಜಾಯಂ. ಜಞ್ಜ ಯುದ್ಧೇ, ಉಕೋ, ಅಸ್ಸಿ, ಗುಜ ಸದ್ದೇ, ಅ, ಬಿನ್ದಾಗಮೋ. ನಾಮನ್ತರಾನಿ ಚಸ್ಸ –

ದುಮೇ ಸಾ ರತ್ತಿಕಾ ರತ್ತ-ದಲಾ ಚೂಳಾಮಣೀ ಚ ಸಾ;

ಕಾಕಚಿಞ್ಚೀ ತುಲಾಬೀಜಂ, ಕಣ್ಹಲಾ ಚ ಸಿಖಣ್ಡಿನೀ.

ದ್ವಯ’ಮಹೇರುಯಂ. ಅಯಮಹೇರುಇಚ್ಚೇವ ಖ್ಯಾತಕಣ್ಟಕವತೀ ಭವತಿ. ಸತಂ ಮೂಲಾನಿ ಯಸ್ಸ ಸತಮೂಲೀ. ಸತಂ ರೋಗೇ ಆವರತೀತಿ ಸತಾವರೀ, ವರ ಆವರಣಿಚ್ಛಾಸು, ಅಥ ವಾ ‘‘ಸತಾ’’ತಿ ಚ ‘‘ಆವರೀ’’ತಿ ಚ ದ್ವೇ ನಾಮಾನಿ ತಸ್ಸಾ. ‘‘ಸತಮೂಲೀ ಬಹುಸುತಾ-ಭೀರು ಇನ್ದೀವರೀ ವರೀ’’ತಿ [ಅಮರ ೧೪.೧೦೦] ಹಿ ವುತ್ತಂ.

೫೮೬. ದ್ವಯಂ ಅತಿವಿಸಾಯಂ. ಮಹಾವೀರಿಯಂ ಓಸಧಂ ಮಹೋಸಧಂ. ‘‘ಲಸುಣೇ ತಿವಿಸಾಯಞ್ಚ, ಸುಣ್ಠಿಯಮ್ಪಿ ಮಹೋಸಧ’’ನ್ತಿ ರುದ್ದೋ. ಅತೀವ ವಿಸತಿ ಭೇಸಜ್ಜಪಯೋಗೇಸೂತಿ ಅತಿವಿಸಾ, ವಿಸಾ, ಅರುಣಾ, ಸಿಙ್ಗೀಪಿ.

‘‘ಅರುಣೋ ಕಿಞ್ಚಿರತ್ತಕ್ಕೇ, ಸಞ್ಝಾರಾಗೇ ಅನೂರುಕೇ;

ನಿಸದ್ದೇ ಕಪಿಲೇ ಕುಟ್ಠೇ, ದಬ್ಬೇವ ವಾಚ್ಚಲಿಙ್ಗಿಕೋ’’.

‘‘ಅರುಣಾತಿವಿಸಾಸಾಮಾ, ಮಞ್ಜಟ್ಠಾತಿವುತಾಸು ಚ;

ಉಸೀರೇತಿವಿಸಾಯಞ್ಚ, ಸಿಙ್ಗಿಮಗ್ಗುರವಲ್ಲಭಾ’’ತಿ.

ದ್ವಯಂ ಸೋಮರಾಜಿಯಂ. ವಕ ಆದಾನೇ, ಅಚೋ, ಸೋಮಸಮತಾಯ ಕಾರಿತಾ ವಲ್ಲಿಕಾ ಸೋಮವಲ್ಲಿಕಾ, ಸಕತ್ಥೇ ಕೋ, ಕಣ್ಹಫಲಾ, ಪೂತಿಫಲಾಪಿ.

ದ್ವಯಂ ದಾರುಹಲಿದ್ದಾರುಕ್ಖೇ. ದರ ವಿದಾರಣೇ, ಬೋ, ರಸ್ಸ ಬೋ, ದಾಬ್ಬೀ, ದೀಘಾದಿ, ನದಾದಿ. ಹಲಿದ್ದವಣ್ಣದಾರುತಾಯ ದಾರುಹಲಿದ್ದಾ, ಹಲಿದ್ದಾಪಿ. ದ್ವಯಂ ಬಿಳಙ್ಗೇ. ಅಙ್ಗ, ರಙ್ಗ, ಲಙ್ಗ, ಗತ್ಯತ್ಥಾ ದಣ್ಡಕಾ ಧಾತೂ, ಅ, ಳತ್ತಂ, ಬಿಳಙ್ಗಂ. ಚಿತ್ರಾನಿ ತಣ್ಡುಲಾನಿ ಯಸ್ಸಾ, ತಣ್ಡುಲೋ, ಕಿಮಿಸತ್ತುಪಿ.

೫೮೭. ದ್ವಯಂ ಸಮನ್ತದುದ್ಧಾಯಂ, ನುಹ ಉಗ್ಗಿರಣೇ, ನದಾದಿ, ಮಹನ್ತಂ ನಾಮಮಸ್ಸ. ಸೀಹುಣ್ಡೋ, ವಜಿರದುಮೋ, ಗುಳಾಪಿ. ದ್ವಯಂ ದಕ್ಖಾಯಂ. ಮುದುಗುಣಯೋಗಾ ಮುದ್ದಿಕಾ, ಮಧುರಸೋ ಸಾದು, ತೇನ ವುತ್ತಂ ವೇಜ್ಜಗನ್ಥೇ ‘‘ಸಾದು ಲವಣತಿತ್ತಮ್ಬಿಲಕಟುಕಸಾಯಕಾ’’ಇತಿ, ತಂಯೋಗಾ ಮಧುರಸಾ. ಗೋತ್ಥನೀ, ದಕ್ಖಾಪಿ. ತಿಕಂ ಯಟ್ಠಿಮಧುಕಾಯಂ. ಮಧುರಸತಾಯ ಮಧುಕಂ, ಉಪಮಾನೇ ಕೋ. ದಣ್ಡಾಕಾರತ್ತಾ ಯಟ್ಠಿ ಚ ಸಾ ಮಧುರಸತ್ತಾ ಮಧುಕಾ ಚೇತಿ ಯಟ್ಠಿಮಧುಕಾ. ಮಧುರಸಭಾವೇ ತಿಟ್ಠತೀತಿ ಮಧುಲಟ್ಠಿಕಾ, ರಸ್ಸ ಲೋ, ಸಕತ್ಥೇ ಕೋ ಚ. ‘‘ಮಧುಯಟ್ಠಿಕಾ’’ತಿಪಿ ಪಾಠೋ, ವುತ್ತಞ್ಚ ‘‘ಮಧುಕಂ ಕ್ಲೀತಕಂ ಯಟ್ಠಿ-ಮಧುಕಂ ಮಧುಯಟ್ಠಿಕಾ’’ತಿ [ಅಮರ ೧೪.೧೦೯].

೫೮೮. ದ್ವಯಂ ವಾತಿಙ್ಗಣೇ. ವಾತಹರತ್ತೇನ ಗಣೀಯತೇತಿ ವಾತಿಙ್ಗಣೋ, ಭಣ್ಡ ಪರಿಭಾಸನೇ, ಣ್ವು, ನದಾದಿ. ಟಕಾರಕರಣೇ ಭಣ್ಟಾಕೀಪಿ, ಬ್ರಹತಿಯಮ್ಪಿ ಅಯಂ.

‘‘ವಾತಿಙ್ಗಣೋ ತು ವಾತ್ತಾಕು,

ವಾತ್ತಾಕೋ ಸಾಕವೇಳು ಚ;

ಭಣ್ಡಾಕೀ ರಾಜಕುಮ್ಭಣ್ಡೋ,

ವಾತ್ತಾಕೀ ದುಪ್ಪಹಾಸಿನೀ’’ತಿ [ಚಿನ್ತಾಮಣಿಟೀಕಾ ೧೪.೧೧೪].

ರಭಸೋ. ದ್ವಯಂ ಬ್ರಹತಿಯಂ. ವಾತ್ತಂ ನಿರಾಮಯಂ ಕರೋತೀತಿ ವಾತ್ತಾಕೀ, ವಾತಿಙ್ಗಣೇಪಿ. ಬ್ರಹ ವುತ್ತಿಯಂ, ತೋ, ನದಾದಿ.

ದ್ವಯಂ ಗೋರಕ್ಖತಣ್ಡುಲೇ, ವುತ್ತಞ್ಚ ತನ್ತನ್ತರೇ ‘‘ಗಙ್ಗೇರುಕೀ ನಾಗಬಲಾ, ತಥಾ ಗೋರಕ್ಖತಣ್ಡುಲಾ’’ತಿ. ನಾಗಸ್ಸ ಬಲಮಿವ ಬಲಮೇತಿಸ್ಸಾ ರೋಗಹರಣತ್ತಾ ನಾಗಬಲಾ, ಝಸ ಹಿಂಸತ್ಥೋ, ಅ. ದ್ವಯಂ ಅಗ್ಗಿಸಿಖಾಯಂ. ನಙ್ಗಲಸದಿಸಮೂಲತಾಯ ಲಾಙ್ಗಲೀ, ನಸ್ಸ ಲೋ, ದೀಘೋ ಚ. ‘‘ನಙ್ಗಲೀ’’ತಿಪಿ ಪಾಠೋ, ಸರದಕಾಲೇ ಸಞ್ಜಾತತ್ತಾ ಸಾರದೀ.

೫೮೯. ತಿಕಂ ಕದಲಿಯಂ. ರಮನ್ತಿ ಯಸ್ಸಂ ರಮ್ಭಾ, ಭೋ. ಕದ ಮಾರಣೇ, ಅಲೋ, ನದಾದಿ. ಮುಚ ಮೋಚನೇ, ಣೋ. ದ್ವಯಂ ಕಪ್ಪಾಸಿಯಂ, ಯಸ್ಸಾ ಫಲಂ ಕಪ್ಪಾಸಂ ಕರೋತಿ ಲೋಕಾನಮುಪಕಾರನ್ತಿ ಕಪ್ಪಾಸೀ, ಕರೋತಿಸ್ಮಾ ಪಾಸೋ, ನದಾದಿ. ವದ ಥೇರಿಯೇ, ಅರೋ, ಸಮುದ್ದನ್ತಾಪಿ.

ಸಮುದ್ದನ್ತಾ ತು ಕಪ್ಪಾಸೀ, ಸಿಕ್ಕಾದುರಾಲಭಾಸು ಚ;

ಕಪ್ಪಾಸೀ ವನಸಮ್ಭವಾ ಚೇ, ಭಾರದ್ವಾಜೀತಿ ವುಚ್ಚತಿ.

ದ್ವಯಂ ಪಣ್ಣಲತಾಯಂ. ನಾಗಲೋಕೇ ಜಾತಾ ಲತಾ ನಾಗಲತಾ. ತಮ್ಬವಣ್ಣಂ ಲಾತೀತಿ ತಮ್ಬೂಲೀ, ಅಸ್ಸೂ, ನದಾದಿ. ತಮ್ಬೂಲಸ್ಸ ಅಯಂ ವಾ ತಮ್ಬೂಲೀ. ತಮ್ಬೂಲವಲ್ಲೀ, ನಾಗವಲ್ಲೀಪಿ, ತಮ್ಬೂಲಂ ನಾಮ ಫಲಪತ್ತಚುಣ್ಣಾದಿಯೋಗಸಮೂಹಾನಂ ನಾಮಂ, ತದತ್ಥಾ ವಲ್ಲೀ ತಮ್ಬೂಲವಲ್ಲೀ, ನಾಗಲೋಕಸ್ಸ ವಲ್ಲೀ. ದ್ವಯಂ ಧಾತಕಿಯಂ, ಅಯಂ ತಮ್ಬಪುಪ್ಫೀ, ಮಜ್ಜೋಪಯುತ್ತಾ. ಪುಪ್ಫಾ ಸುಗನ್ಧಿಕಾ ಧಾತಕಿಚ್ಚೇವ ಖ್ಯಾತಾ. ಅಗ್ಗಿಜಾಲಸಮಾನಪುಪ್ಫತಾಯ ಅಗ್ಗಿಜಾಲಾ. ಅತಿಸಯಂ ಠಿತಿಂ ಕರೋತೀತಿ ಧಾತಕೀ, ನದಾದಿ.

೫೯೦. ದ್ವಯಂ ಸುಕ್ಕತಿವುತಾಯಂ. ತಿಸ್ಸೋ ವುತಾ ತಚರಾಜಿಯೋ ಯಸ್ಸಾ ತಿವುತಾ. ತಿಸ್ಸೋ ಪುಟಾ ತಚರಾಜಿಯೋ ಯಸ್ಸಾ ತಿಪುಟಾ. ಸರಲಾ, ತಿಭಣ್ಡೀ, ರೋಚನೀಪಿ [ದೇವನೀಪಿ (ಕ.)]. ದ್ವಯಂ ಕಣ್ಹತಿವುತಾಯಂ. ಸಾ ತನುಕರಣೇ, ವಿರೇಚನಕರಣೇನ ಕಾಯಂ, ರೋಗಞ್ಚ ಸಾಯತೀತಿ ಸಾಮಾ.

‘‘ಸಾಮಾ ತು ಮೇಚಕೇ ವುದ್ಧ-ದಾರಕೇ ಹರಿತೇ ನದಿ;