೯. ಅತಮ್ಮಯಸುತ್ತಂ

೧೦೪. ‘‘ಛ, ಭಿಕ್ಖವೇ, ಆನಿಸಂಸೇ ಸಮ್ಪಸ್ಸಮಾನೇನ ಅಲಮೇವ ಭಿಕ್ಖುನಾ ಸಬ್ಬಧಮ್ಮೇಸು ಅನೋಧಿಂ ಕರಿತ್ವಾ ಅನತ್ತಸಞ್ಞಂ ಉಪಟ್ಠಾಪೇತುಂ. ಕತಮೇ ಛ? ಸಬ್ಬಲೋಕೇ ಚ ಅತಮ್ಮಯೋ ಭವಿಸ್ಸಾಮಿ, ಅಹಙ್ಕಾರಾ ಚ ಮೇ ಉಪರುಜ್ಝಿಸ್ಸನ್ತಿ, ಮಮಙ್ಕಾರಾ ಚ ಮೇ ಉಪರುಜ್ಝಿಸ್ಸನ್ತಿ, ಅಸಾಧಾರಣೇನ ಚ ಞಾಣೇನ ಸಮನ್ನಾಗತೋ ಭವಿಸ್ಸಾಮಿ, ಹೇತು ಚ ಮೇ ಸುದಿಟ್ಠೋ ಭವಿಸ್ಸತಿ, ಹೇತುಸಮುಪ್ಪನ್ನಾ ಚ ಧಮ್ಮಾ. ಇಮೇ ಖೋ, ಭಿಕ್ಖವೇ, ಛ ಆನಿಸಂಸೇ ಸಮ್ಪಸ್ಸಮಾನೇನ ಅಲಮೇವ ಭಿಕ್ಖುನಾ ಸಬ್ಬಧಮ್ಮೇಸು ಅನೋಧಿಂ ಕರಿತ್ವಾ ಅನತ್ತಸಞ್ಞಂ ಉಪಟ್ಠಾಪೇತು’’ನ್ತಿ. ನವಮಂ.