೧೦. ಭವಸುತ್ತಂ

೧೦೫. ‘‘ತಯೋಮೇ, ಭಿಕ್ಖವೇ, ಭವಾ ಪಹಾತಬ್ಬಾ, ತೀಸು ಸಿಕ್ಖಾಸು ಸಿಕ್ಖಿತಬ್ಬಂ. ಕತಮೇ ತಯೋ ಭವಾ ಪಹಾತಬ್ಬಾ? ಕಾಮಭವೋ, ರೂಪಭವೋ, ಅರೂಪಭವೋ – ಇಮೇ ತಯೋ ಭವಾ ಪಹಾತಬ್ಬಾ. ಕತಮಾಸು ತೀಸು ಸಿಕ್ಖಾಸು ಸಿಕ್ಖಿತಬ್ಬಂ? ಅಧಿಸೀಲಸಿಕ್ಖಾಯ, ಅಧಿಚಿತ್ತಸಿಕ್ಖಾಯ, ಅಧಿಪಞ್ಞಾಸಿಕ್ಖಾಯ – ಇಮಾಸು ತೀಸು ಸಿಕ್ಖಾಸು ಸಿಕ್ಖಿತಬ್ಬಂ. ಯತೋ ಖೋ, ಭಿಕ್ಖವೇ, ಭಿಕ್ಖುನೋ ಇಮೇ ತಯೋ ಭವಾ ಪಹೀನಾ ಹೋನ್ತಿ, ಇಮಾಸು ಚ ತೀಸು ಸಿಕ್ಖಾಸು ಸಿಕ್ಖಿತಸಿಕ್ಖೋ ಹೋತಿ – ಅಯಂ ವುಚ್ಚತಿ, ಭಿಕ್ಖವೇ, ಭಿಕ್ಖು ಅಚ್ಛೇಚ್ಛಿ ತಣ್ಹಂ, ವಿವತ್ತಯಿ ಸಂಯೋಜನಂ, ಸಮ್ಮಾ ಮಾನಾಭಿಸಮಯಾ ಅನ್ತಮಕಾಸಿ ದುಕ್ಖಸ್ಸಾ’’ತಿ. ದಸಮಂ.