೯. ತಣ್ಹಾಸುತ್ತಂ

೧೯೯. ಭಗವಾ ಏತದವೋಚ – ‘‘ತಣ್ಹಂ ವೋ, ಭಿಕ್ಖವೇ, ದೇಸೇಸ್ಸಾಮಿ ಜಾಲಿನಿಂ ಸರಿತಂ ವಿಸಟಂ ವಿಸತ್ತಿಕಂ, ಯಾಯ ಅಯಂ ಲೋಕೋ ಉದ್ಧಸ್ತೋ ಪರಿಯೋನದ್ಧೋ ತನ್ತಾಕುಲಕಜಾತೋ ಗುಲಾಗುಣ್ಠಿಕಜಾತೋ [ಕುಲಾಗುಣ್ಠಿಕಜಾತೋ (ಸೀ. ಸ್ಯಾ. ಕಂ. ಪೀ.) ಅ. ನಿ. ಅಟ್ಠ. ೨.೪.೧೯೯] ಮುಞ್ಜಪಬ್ಬಜಭೂತೋ ಅಪಾಯಂ ದುಗ್ಗತಿಂ ವಿನಿಪಾತಂ ಸಂಸಾರಂ ನಾತಿವತ್ತತಿ. ತಂ ಸುಣಾಥ, ಸಾಧುಕಂ ಮನಸಿ ಕರೋಥ; ಭಾಸಿಸ್ಸಾಮೀ’’ತಿ. ‘‘ಏವಂ, ಭನ್ತೇ’’ತಿ ಖೋ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ. ಭಗವಾ ಏತದವೋಚ –

‘‘ಕತಮಾ ಚ ಸಾ, ಭಿಕ್ಖವೇ, ತಣ್ಹಾ ಜಾಲಿನೀ ಸರಿತಾ ವಿಸಟಾ ವಿಸತ್ತಿಕಾ, ಯಾಯ ಅಯಂ ಲೋಕೋ ಉದ್ಧಸ್ತೋ ಪರಿಯೋನದ್ಧೋ ತನ್ತಾಕುಲಕಜಾತೋ ಗುಲಾಗುಣ್ಠಿಕಜಾತೋ ಮುಞ್ಜಪಬ್ಬಜಭೂತೋ ಅಪಾಯಂ ದುಗ್ಗತಿಂ ವಿನಿಪಾತಂ ಸಂಸಾರಂ ನಾತಿವತ್ತತಿ? ಅಟ್ಠಾರಸ ಖೋ ಪನಿಮಾನಿ, ಭಿಕ್ಖವೇ, ತಣ್ಹಾವಿಚರಿತಾನಿ ಅಜ್ಝತ್ತಿಕಸ್ಸ ಉಪಾದಾಯ, ಅಟ್ಠಾರಸ ತಣ್ಹಾವಿಚರಿತಾನಿ ಬಾಹಿರಸ್ಸ ಉಪಾದಾಯ.

‘‘ಕತಮಾನಿ ಅಟ್ಠಾರಸ ತಣ್ಹಾವಿಚರಿತಾನಿ ಅಜ್ಝತ್ತಿಕಸ್ಸ ಉಪಾದಾಯ? ಅಸ್ಮೀತಿ, ಭಿಕ್ಖವೇ, ಸತಿ ಇತ್ಥಸ್ಮೀತಿ ಹೋತಿ, ಏವಂಸ್ಮೀತಿ [ಏವಮಸ್ಮಿ (ಸೀ.), ಏವಸ್ಮಿ (ಸ್ಯಾ. ಕಂ. ಪೀ.) ವಿಭ. ೯೭೩ ಪಸ್ಸಿತಬ್ಬಂ] ಹೋತಿ, ಅಞ್ಞಥಾಸ್ಮೀತಿ ಹೋತಿ, ಅಸಸ್ಮೀತಿ ಹೋತಿ, ಸತಸ್ಮೀತಿ ಹೋತಿ, ಸನ್ತಿ ಹೋತಿ, ಇತ್ಥಂ ಸನ್ತಿ ಹೋತಿ, ಏವಂ ಸನ್ತಿ ಹೋತಿ, ಅಞ್ಞಥಾ ಸನ್ತಿ ಹೋತಿ, ಅಪಿಹಂ [ಅಪಿಹ (ಸೀ. ಪೀ.), ಅಪಿ (ಸ್ಯಾ. ಕಂ.)] ಸನ್ತಿ ಹೋತಿ, ಅಪಿಹಂ [ಅಪಿ (ಸೀ. ಸ್ಯಾ. ಕಂ. ಪೀ.)] ಇತ್ಥಂ ಸನ್ತಿ ಹೋತಿ, ಅಪಿಹಂ [ಅಪಿ (ಸೀ. ಸ್ಯಾ. ಕಂ. ಪೀ.)] ಏವಂ ಸನ್ತಿ ಹೋತಿ, ಅಪಿಹಂ [ಅಪಿ (ಸೀ. ಸ್ಯಾ. ಕಂ. ಪೀ.)] ಅಞ್ಞಥಾ ಸನ್ತಿ ಹೋತಿ, ಭವಿಸ್ಸನ್ತಿ ಹೋತಿ, ಇತ್ಥಂ ಭವಿಸ್ಸನ್ತಿ ಹೋತಿ, ಏವಂ ಭವಿಸ್ಸನ್ತಿ ಹೋತಿ, ಅಞ್ಞಥಾ ಭವಿಸ್ಸನ್ತಿ ಹೋತಿ. ಇಮಾನಿ ಅಟ್ಠಾರಸ ತಣ್ಹಾವಿಚರಿತಾನಿ ಅಜ್ಝತ್ತಿಕಸ್ಸ ಉಪಾದಾಯ.

‘‘ಕತಮಾನಿ ಅಟ್ಠಾರಸ ತಣ್ಹಾವಿಚರಿತಾನಿ ಬಾಹಿರಸ್ಸ ಉಪಾದಾಯ? ಇಮಿನಾಸ್ಮೀತಿ, ಭಿಕ್ಖವೇ, ಸತಿ ಇಮಿನಾ ಇತ್ಥಸ್ಮೀತಿ ಹೋತಿ, ಇಮಿನಾ ಏವಂಸ್ಮೀತಿ ಹೋತಿ, ಇಮಿನಾ ಅಞ್ಞಥಾಸ್ಮೀತಿ ಹೋತಿ, ಇಮಿನಾ ಅಸಸ್ಮೀತಿ ಹೋತಿ, ಇಮಿನಾ ಸತಸ್ಮೀತಿ ಹೋತಿ, ಇಮಿನಾ ಸನ್ತಿ ಹೋತಿ, ಇಮಿನಾ ಇತ್ಥಂ ಸನ್ತಿ ಹೋತಿ, ಇಮಿನಾ ಏವಂ ಸನ್ತಿ ಹೋತಿ, ಇಮಿನಾ ಅಞ್ಞಥಾ ಸನ್ತಿ ಹೋತಿ, ಇಮಿನಾ ಅಪಿಹಂ ಸನ್ತಿ ಹೋತಿ, ಇಮಿನಾ ಅಪಿಹಂ ಇತ್ಥಂ ಸನ್ತಿ ಹೋತಿ, ಇಮಿನಾ ಅಪಿಹಂ ಏವಂ ಸನ್ತಿ ಹೋತಿ, ಇಮಿನಾ ಅಪಿಹಂ ಅಞ್ಞಥಾ ಸನ್ತಿ ಹೋತಿ, ಇಮಿನಾ ಭವಿಸ್ಸನ್ತಿ ಹೋತಿ, ಇಮಿನಾ ಇತ್ಥಂ ಭವಿಸ್ಸನ್ತಿ ಹೋತಿ, ಇಮಿನಾ ಏವಂ ಭವಿಸ್ಸನ್ತಿ ಹೋತಿ, ಇಮಿನಾ ಅಞ್ಞಥಾ ಭವಿಸ್ಸನ್ತಿ ಹೋತಿ. ಇಮಾನಿ ಅಟ್ಠಾರಸ ತಣ್ಹಾವಿಚರಿತಾನಿ ಬಾಹಿರಸ್ಸ ಉಪಾದಾಯ.

‘‘ಇತಿ ಅಟ್ಠಾರಸ ತಣ್ಹಾವಿಚರಿತಾನಿ ಅಜ್ಝತ್ತಿಕಸ್ಸ ಉಪಾದಾಯ, ಅಟ್ಠಾರಸ ತಣ್ಹಾವಿಚರಿತಾನಿ ಬಾಹಿರಸ್ಸ ಉಪಾದಾಯ. ಇಮಾನಿ ವುಚ್ಚನ್ತಿ, ಭಿಕ್ಖವೇ, ಛತ್ತಿಂಸ ತಣ್ಹಾವಿಚರಿತಾನಿ. ಇತಿ ಏವರೂಪಾನಿ ಅತೀತಾನಿ ಛತ್ತಿಂಸ ತಣ್ಹಾವಿಚರಿತಾನಿ, ಅನಾಗತಾನಿ ಛತ್ತಿಂಸ ತಣ್ಹಾವಿಚರಿತಾನಿ, ಪಚ್ಚುಪ್ಪನ್ನಾನಿ ಛತ್ತಿಂಸ ತಣ್ಹಾವಿಚರಿತಾನಿ. ಏವಂ ಅಟ್ಠಸತಂ ತಣ್ಹಾವಿಚರಿತಂ ಹೋನ್ತಿ.

‘‘ಅಯಂ ಖೋ ಸಾ, ಭಿಕ್ಖವೇ, ತಣ್ಹಾ ಜಾಲಿನೀ ಸರಿತಾ ವಿಸಟಾ ವಿಸತ್ತಿಕಾ, ಯಾಯ ಅಯಂ ಲೋಕೋ ಉದ್ಧಸ್ತೋ ಪರಿಯೋನದ್ಧೋ ತನ್ತಾಕುಲಕಜಾತೋ ಗುಲಾಗುಣ್ಠಿಕಜಾತೋ ಮುಞ್ಜಪಬ್ಬಜಭೂತೋ ಅಪಾಯಂ ದುಗ್ಗತಿಂ ವಿನಿಪಾತಂ ಸಂಸಾರಂ ನಾತಿವತ್ತತೀ’’ತಿ. ನವಮಂ.