೧೦. ಪೇಮಸುತ್ತಂ

೨೦೦. ‘‘ಚತ್ತಾರಿಮಾನಿ, ಭಿಕ್ಖವೇ, (ಪೇಮಾನಿ) [( ) ನತ್ಥಿ ಸೀ. ಸ್ಯಾ. ಕಂ. ಪೀ. ಪೋತ್ಥಕೇಸು] ಜಾಯನ್ತಿ. ಕತಮಾನಿ ಚತ್ತಾರಿ? ಪೇಮಾ ಪೇಮಂ ಜಾಯತಿ, ಪೇಮಾ ದೋಸೋ ಜಾಯತಿ, ದೋಸಾ ಪೇಮಂ ಜಾಯತಿ, ದೋಸಾ ದೋಸೋ ಜಾಯತಿ.

‘‘ಕಥಞ್ಚ, ಭಿಕ್ಖವೇ, ಪೇಮಾ ಪೇಮಂ ಜಾಯತಿ? ಇಧ, ಭಿಕ್ಖವೇ, ಪುಗ್ಗಲೋ ಪುಗ್ಗಲಸ್ಸ ಇಟ್ಠೋ ಹೋತಿ ಕನ್ತೋ ಮನಾಪೋ. ತಂ ಪರೇ ಇಟ್ಠೇನ ಕನ್ತೇನ ಮನಾಪೇನ ಸಮುದಾಚರನ್ತಿ. ತಸ್ಸ ಏವಂ ಹೋತಿ – ‘ಯೋ ಖೋ ಮ್ಯಾಯಂ ಪುಗ್ಗಲೋ ಇಟ್ಠೋ ಕನ್ತೋ ಮನಾಪೋ, ತಂ ಪರೇ ಇಟ್ಠೇನ ಕನ್ತೇನ ಮನಾಪೇನ ಸಮುದಾಚರನ್ತೀ’ತಿ. ಸೋ ತೇಸು ಪೇಮಂ ಜನೇತಿ. ಏವಂ ಖೋ, ಭಿಕ್ಖವೇ, ಪೇಮಾ ಪೇಮಂ ಜಾಯತಿ.

‘‘ಕಥಞ್ಚ, ಭಿಕ್ಖವೇ, ಪೇಮಾ ದೋಸೋ ಜಾಯತಿ? ಇಧ, ಭಿಕ್ಖವೇ, ಪುಗ್ಗಲೋ ಪುಗ್ಗಲಸ್ಸ ಇಟ್ಠೋ ಹೋತಿ ಕನ್ತೋ ಮನಾಪೋ. ತಂ ಪರೇ ಅನಿಟ್ಠೇನ ಅಕನ್ತೇನ ಅಮನಾಪೇನ ಸಮುದಾಚರನ್ತಿ. ತಸ್ಸ ಏವಂ ಹೋತಿ – ‘ಯೋ ಖೋ ಮ್ಯಾಯಂ ಪುಗ್ಗಲೋ ಇಟ್ಠೋ ಕನ್ತೋ ಮನಾಪೋ, ತಂ ಪರೇ ಅನಿಟ್ಠೇನ ಅಕನ್ತೇನ ಅಮನಾಪೇನ ಸಮುದಾಚರನ್ತೀ’ತಿ. ಸೋ ತೇಸು ದೋಸಂ ಜನೇತಿ. ಏವಂ ಖೋ, ಭಿಕ್ಖವೇ, ಪೇಮಾ ದೋಸೋ ಜಾಯತಿ.

‘‘ಕಥಞ್ಚ, ಭಿಕ್ಖವೇ, ದೋಸಾ ಪೇಮಂ ಜಾಯತಿ? ಇಧ, ಭಿಕ್ಖವೇ, ಪುಗ್ಗಲೋ ಪುಗ್ಗಲಸ್ಸ ಅನಿಟ್ಠೋ ಹೋತಿ ಅಕನ್ತೋ ಅಮನಾಪೋ. ತಂ ಪರೇ ಅನಿಟ್ಠೇನ ಅಕನ್ತೇನ ಅಮನಾಪೇನ ಸಮುದಾಚರನ್ತಿ. ತಸ್ಸ ಏವಂ ಹೋತಿ – ‘ಯೋ ಖೋ ಮ್ಯಾಯಂ ಪುಗ್ಗಲೋ ಅನಿಟ್ಠೋ ಅಕನ್ತೋ ಅಮನಾಪೋ, ತಂ ಪರೇ ಅನಿಟ್ಠೇನ ಅಕನ್ತೇನ ಅಮನಾಪೇನ ಸಮುದಾಚರನ್ತೀ’ತಿ. ಸೋ ತೇಸು ಪೇಮಂ ಜನೇತಿ. ಏವಂ ಖೋ, ಭಿಕ್ಖವೇ, ದೋಸಾ ಪೇಮಂ ಜಾಯತಿ.

‘‘ಕಥಞ್ಚ, ಭಿಕ್ಖವೇ, ದೋಸಾ ದೋಸೋ ಜಾಯತಿ? ಇಧ, ಭಿಕ್ಖವೇ, ಪುಗ್ಗಲೋ ಪುಗ್ಗಲಸ್ಸ ಅನಿಟ್ಠೋ ಹೋತಿ ಅಕನ್ತೋ ಅಮನಾಪೋ. ತಂ ಪರೇ ಇಟ್ಠೇನ ಕನ್ತೇನ ಮನಾಪೇನ ಸಮುದಾಚರನ್ತಿ. ತಸ್ಸ ಏವಂ ಹೋತಿ – ‘ಯೋ ಖೋ ಮ್ಯಾಯಂ ಪುಗ್ಗಲೋ ಅನಿಟ್ಠೋ ಅಕನ್ತೋ ಅಮನಾಪೋ, ತಂ ಪರೇ ಇಟ್ಠೇನ ಕನ್ತೇನ ಮನಾಪೇನ ಸಮುದಾಚರನ್ತೀ’ತಿ. ಸೋ ತೇಸು ದೋಸಂ ಜನೇತಿ. ಏವಂ ಖೋ, ಭಿಕ್ಖವೇ, ದೋಸಾ ದೋಸೋ ಜಾಯತಿ. ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ಪೇಮಾನಿ ಜಾಯನ್ತಿ.

‘‘ಯಸ್ಮಿಂ, ಭಿಕ್ಖವೇ, ಸಮಯೇ ಭಿಕ್ಖು ವಿವಿಚ್ಚೇವ ಕಾಮೇಹಿ…ಪೇ… ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ, ಯಮ್ಪಿಸ್ಸ ಪೇಮಾ ಪೇಮಂ ಜಾಯತಿ ತಮ್ಪಿಸ್ಸ ತಸ್ಮಿಂ ಸಮಯೇ ನ ಹೋತಿ, ಯೋಪಿಸ್ಸ ಪೇಮಾ ದೋಸೋ ಜಾಯತಿ ಸೋಪಿಸ್ಸ ತಸ್ಮಿಂ ಸಮಯೇ ನ ಹೋತಿ, ಯಮ್ಪಿಸ್ಸ ದೋಸಾ ಪೇಮಂ ಜಾಯತಿ ತಮ್ಪಿಸ್ಸ ತಸ್ಮಿಂ ಸಮಯೇ ನ ಹೋತಿ, ಯೋಪಿಸ್ಸ ದೋಸಾ ದೋಸೋ ಜಾಯತಿ ಸೋಪಿಸ್ಸ ತಸ್ಮಿಂ ಸಮಯೇ ನ ಹೋತಿ.

‘‘ಯಸ್ಮಿಂ, ಭಿಕ್ಖವೇ, ಸಮಯೇ ಭಿಕ್ಖು ವಿತಕ್ಕವಿಚಾರಾನಂ ವೂಪಸಮಾ…ಪೇ… ದುತಿಯಂ ಝಾನಂ…ಪೇ… ತತಿಯಂ ಝಾನಂ…ಪೇ… ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರತಿ, ಯಮ್ಪಿಸ್ಸ ಪೇಮಾ ಪೇಮಂ ಜಾಯತಿ ತಮ್ಪಿಸ್ಸ ತಸ್ಮಿಂ ಸಮಯೇ ನ ಹೋತಿ, ಯೋಪಿಸ್ಸ ಪೇಮಾ ದೋಸೋ ಜಾಯತಿ ಸೋಪಿಸ್ಸ ತಸ್ಮಿಂ ಸಮಯೇ ನ ಹೋತಿ, ಯಮ್ಪಿಸ್ಸ ದೋಸಾ ಪೇಮಂ ಜಾಯತಿ ತಮ್ಪಿಸ್ಸ ತಸ್ಮಿಂ ಸಮಯೇ ನ ಹೋತಿ, ಯೋಪಿಸ್ಸ ದೋಸಾ ದೋಸೋ ಜಾಯತಿ ಸೋಪಿಸ್ಸ ತಸ್ಮಿಂ ಸಮಯೇ ನ ಹೋತಿ.

‘‘ಯಸ್ಮಿಂ, ಭಿಕ್ಖವೇ, ಸಮಯೇ ಭಿಕ್ಖು ಆಸವಾನಂ ಖಯಾ ಅನಾಸವಂ ಚೇತೋವಿಮುತ್ತಿಂ ಪಞ್ಞಾವಿಮುತ್ತಿಂ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರತಿ, ಯಮ್ಪಿಸ್ಸ ಪೇಮಾ ಪೇಮಂ ಜಾಯತಿ ತಮ್ಪಿಸ್ಸ ಪಹೀನಂ ಹೋತಿ ಉಚ್ಛಿನ್ನಮೂಲಂ ತಾಲಾವತ್ಥುಕತಂ ಅನಭಾವಂಕತಂ ಆಯತಿಂ ಅನುಪ್ಪಾದಧಮ್ಮಂ, ಯೋಪಿಸ್ಸ ಪೇಮಾ ದೋಸೋ ಜಾಯತಿ ಸೋಪಿಸ್ಸ ಪಹೀನೋ ಹೋತಿ ಉಚ್ಛಿನ್ನಮೂಲೋ ತಾಲಾವತ್ಥುಕತೋ ಅನಭಾವಂಕತೋ ಆಯತಿಂ ಅನುಪ್ಪಾದಧಮ್ಮೋ, ಯಮ್ಪಿಸ್ಸ ದೋಸಾ ಪೇಮಂ ಜಾಯತಿ ತಮ್ಪಿಸ್ಸ ಪಹೀನಂ ಹೋತಿ ಉಚ್ಛಿನ್ನಮೂಲಂ ತಾಲಾವತ್ಥುಕತಂ ಅನಭಾವಂಕತಂ ಆಯತಿಂ ಅನುಪ್ಪಾದಧಮ್ಮಂ, ಯೋಪಿಸ್ಸ ದೋಸಾ ದೋಸೋ ಜಾಯತಿ ಸೋಪಿಸ್ಸ ಪಹೀನೋ ಹೋತಿ ಉಚ್ಛಿನ್ನಮೂಲೋ ತಾಲಾವತ್ಥುಕತೋ ಅನಭಾವಂಕತೋ ಆಯತಿಂ ಅನುಪ್ಪಾದಧಮ್ಮೋ. ಅಯಂ ವುಚ್ಚತಿ, ಭಿಕ್ಖವೇ, ಭಿಕ್ಖು ನೇವ ಉಸ್ಸೇನೇತಿ ನ ಪಟಿಸೇನೇತಿ [ನ ಪಟಿಸ್ಸೇನೇತಿ (ಸೀ. ಪೀ.)] ನ ಧೂಪಾಯತಿ ನ ಪಜ್ಜಲತಿ ನ ಸಮ್ಪಜ್ಝಾಯತಿ [ನ ಅಪಜ್ಝಾಯತಿ (ಸೀ.), ನ ಪಜ್ಝಾಯತಿ (ಸ್ಯಾ. ಕಂ. ಪೀ.)].

‘‘ಕಥಞ್ಚ, ಭಿಕ್ಖವೇ, ಭಿಕ್ಖು ಉಸ್ಸೇನೇತಿ? ಇಧ, ಭಿಕ್ಖವೇ, ಭಿಕ್ಖು ರೂಪಂ ಅತ್ತತೋ ಸಮನುಪಸ್ಸತಿ, ರೂಪವನ್ತಂ ವಾ ಅತ್ತಾನಂ, ಅತ್ತನಿ ವಾ ರೂಪಂ, ರೂಪಸ್ಮಿಂ ವಾ ಅತ್ತಾನಂ; ವೇದನಂ ಅತ್ತತೋ ಸಮನುಪಸ್ಸತಿ, ವೇದನಾವನ್ತಂ ವಾ ಅತ್ತಾನಂ, ಅತ್ತನಿ ವಾ ವೇದನಂ, ವೇದನಾಯ ವಾ ಅತ್ತಾನಂ; ಸಞ್ಞಂ ಅತ್ತತೋ ಸಮನುಪಸ್ಸತಿ, ಸಞ್ಞಾವನ್ತಂ ವಾ ಅತ್ತಾನಂ, ಅತ್ತನಿ ವಾ ಸಞ್ಞಂ, ಸಞ್ಞಾಯ ವಾ ಅತ್ತಾನಂ; ಸಙ್ಖಾರೇ ಅತ್ತತೋ ಸಮನುಪಸ್ಸತಿ, ಸಙ್ಖಾರವನ್ತಂ ವಾ ಅತ್ತಾನಂ, ಅತ್ತನಿ ವಾ ಸಙ್ಖಾರೇ, ಸಙ್ಖಾರೇಸು ವಾ ಅತ್ತಾನಂ; ವಿಞ್ಞಾಣಂ ಅತ್ತತೋ ಸಮನುಪಸ್ಸತಿ, ವಿಞ್ಞಾಣವನ್ತಂ ವಾ ಅತ್ತಾನಂ, ಅತ್ತನಿ ವಾ ವಿಞ್ಞಾಣಂ, ವಿಞ್ಞಾಣಸ್ಮಿಂ ವಾ ಅತ್ತಾನಂ. ಏವಂ ಖೋ, ಭಿಕ್ಖವೇ, ಭಿಕ್ಖು ಉಸ್ಸೇನೇತಿ.

‘‘ಕಥಞ್ಚ, ಭಿಕ್ಖವೇ, ಭಿಕ್ಖು ನ ಉಸ್ಸೇನೇತಿ? ಇಧ, ಭಿಕ್ಖವೇ, ಭಿಕ್ಖು ನ ರೂಪಂ ಅತ್ತತೋ ಸಮನುಪಸ್ಸತಿ, ನ ರೂಪವನ್ತಂ ವಾ ಅತ್ತಾನಂ, ನ ಅತ್ತನಿ ವಾ ರೂಪಂ, ನ ರೂಪಸ್ಮಿಂ ವಾ ಅತ್ತಾನಂ; ನ ವೇದನಂ ಅತ್ತತೋ ಸಮನುಪಸ್ಸತಿ, ನ ವೇದನಾವನ್ತಂ ವಾ ಅತ್ತಾನಂ, ನ ಅತ್ತನಿ ವಾ ವೇದನಂ, ನ ವೇದನಾಯ ವಾ ಅತ್ತಾನಂ; ನ ಸಞ್ಞಂ ಅತ್ತತೋ ಸಮನುಪಸ್ಸತಿ, ನ ಸಞ್ಞಾವನ್ತಂ ವಾ ಅತ್ತಾನಂ, ನ ಅತ್ತನಿ ವಾ ಸಞ್ಞಂ, ನ ಸಞ್ಞಾಯ ವಾ ಅತ್ತಾನಂ; ನ ಸಙ್ಖಾರೇ ಅತ್ತತೋ ಸಮನುಪಸ್ಸತಿ, ನ ಸಙ್ಖಾರವನ್ತಂ ವಾ ಅತ್ತಾನಂ, ನ ಅತ್ತನಿ ವಾ ಸಙ್ಖಾರೇ, ನ ಸಙ್ಖಾರೇಸು ವಾ ಅತ್ತಾನಂ; ನ ವಿಞ್ಞಾಣಂ ಅತ್ತತೋ ಸಮನುಪಸ್ಸತಿ, ನ ವಿಞ್ಞಾಣವನ್ತಂ ವಾ ಅತ್ತಾನಂ, ನ ಅತ್ತನಿ ವಾ ವಿಞ್ಞಾಣಂ, ನ ವಿಞ್ಞಾಣಸ್ಮಿಂ ವಾ ಅತ್ತಾನಂ. ಏವಂ ಖೋ, ಭಿಕ್ಖವೇ, ಭಿಕ್ಖು ನ ಉಸ್ಸೇನೇತಿ.

‘‘ಕಥಞ್ಚ, ಭಿಕ್ಖವೇ, ಭಿಕ್ಖು ಪಟಿಸೇನೇತಿ? ಇಧ, ಭಿಕ್ಖವೇ, ಭಿಕ್ಖು ಅಕ್ಕೋಸನ್ತಂ ಪಚ್ಚಕ್ಕೋಸತಿ, ರೋಸನ್ತಂ ಪಟಿರೋಸತಿ, ಭಣ್ಡನ್ತಂ ಪಟಿಭಣ್ಡತಿ. ಏವಂ ಖೋ, ಭಿಕ್ಖವೇ, ಭಿಕ್ಖು ಪಟಿಸೇನೇತಿ.

‘‘ಕಥಞ್ಚ, ಭಿಕ್ಖವೇ, ಭಿಕ್ಖು ನ ಪಟಿಸೇನೇತಿ? ಇಧ, ಭಿಕ್ಖವೇ, ಭಿಕ್ಖು ಅಕ್ಕೋಸನ್ತಂ ನ ಪಚ್ಚಕ್ಕೋಸತಿ, ರೋಸನ್ತಂ ನ ಪಟಿರೋಸತಿ, ಭಣ್ಡನ್ತಂ ನ ಪಟಿಭಣ್ಡತಿ. ಏವಂ ಖೋ, ಭಿಕ್ಖವೇ, ಭಿಕ್ಖು ನ ಪಟಿಸೇನೇತಿ.

‘‘ಕಥಞ್ಚ, ಭಿಕ್ಖವೇ, ಭಿಕ್ಖು ಧೂಪಾಯತಿ? ಅಸ್ಮೀತಿ, ಭಿಕ್ಖವೇ, ಸತಿ ಇತ್ಥಸ್ಮೀತಿ ಹೋತಿ, ಏವಂಸ್ಮೀತಿ ಹೋತಿ, ಅಞ್ಞಥಾಸ್ಮೀತಿ ಹೋತಿ, ಅಸಸ್ಮೀತಿ ಹೋತಿ, ಸತಸ್ಮೀತಿ ಹೋತಿ, ಸನ್ತಿ ಹೋತಿ, ಇತ್ಥಂ ಸನ್ತಿ ಹೋತಿ, ಏವಂ ಸನ್ತಿ ಹೋತಿ, ಅಞ್ಞಥಾ ಸನ್ತಿ ಹೋತಿ, ಅಪಿಹಂ ಸನ್ತಿ ಹೋತಿ, ಅಪಿಹಂ ಇತ್ಥಂ ಸನ್ತಿ ಹೋತಿ, ಅಪಿಹಂ ಏವಂ ಸನ್ತಿ ಹೋತಿ, ಅಪಿಹಂ ಅಞ್ಞಥಾ ಸನ್ತಿ ಹೋತಿ, ಭವಿಸ್ಸನ್ತಿ ಹೋತಿ, ಇತ್ಥಂ ಭವಿಸ್ಸನ್ತಿ ಹೋತಿ, ಏವಂ ಭವಿಸ್ಸನ್ತಿ ಹೋತಿ, ಅಞ್ಞಥಾ ಭವಿಸ್ಸನ್ತಿ ಹೋತಿ. ಏವಂ ಖೋ, ಭಿಕ್ಖವೇ, ಭಿಕ್ಖು ಧೂಪಾಯತಿ.

‘‘ಕಥಞ್ಚ, ಭಿಕ್ಖವೇ, ಭಿಕ್ಖು ನ ಧೂಪಾಯತಿ? ಅಸ್ಮೀತಿ, ಭಿಕ್ಖವೇ, ಅಸತಿ ಇತ್ಥಸ್ಮೀತಿ ನ ಹೋತಿ, ಏವಂಸ್ಮೀತಿ ನ ಹೋತಿ, ಅಞ್ಞಥಾಸ್ಮೀತಿ ನ ಹೋತಿ, ಅಸಸ್ಮೀತಿ ನ ಹೋತಿ, ಸತಸ್ಮೀತಿ ನ ಹೋತಿ, ಸನ್ತಿ ನ ಹೋತಿ, ಇತ್ಥಂ ಸನ್ತಿ ನ ಹೋತಿ, ಏವಂ ಸನ್ತಿ ನ ಹೋತಿ, ಅಞ್ಞಥಾ ಸನ್ತಿ ನ ಹೋತಿ, ಅಪಿಹಂ ಸನ್ತಿ ನ ಹೋತಿ, ಅಪಿಹಂ ಇತ್ಥಂ ಸನ್ತಿ ನ ಹೋತಿ, ಅಪಿಹಂ ಏವಂ ಸನ್ತಿ ನ ಹೋತಿ, ಅಪಿಹಂ ಅಞ್ಞಥಾ ಸನ್ತಿ ನ ಹೋತಿ, ಭವಿಸ್ಸನ್ತಿ ನ ಹೋತಿ, ಇತ್ಥಂ ಭವಿಸ್ಸನ್ತಿ ನ ಹೋತಿ, ಏವಂ ಭವಿಸ್ಸನ್ತಿ ನ ಹೋತಿ, ಅಞ್ಞಥಾ ಭವಿಸ್ಸನ್ತಿ ನ ಹೋತಿ. ಏವಂ ಖೋ, ಭಿಕ್ಖವೇ, ಭಿಕ್ಖು ನ ಧೂಪಾಯತಿ.

‘‘ಕಥಞ್ಚ, ಭಿಕ್ಖವೇ, ಭಿಕ್ಖು ಪಜ್ಜಲತಿ? ಇಮಿನಾ ಅಸ್ಮೀತಿ, ಭಿಕ್ಖವೇ, ಸತಿ ಇಮಿನಾ ಇತ್ಥಸ್ಮೀತಿ ಹೋತಿ, ಇಮಿನಾ ಏವಂಸ್ಮೀತಿ ಹೋತಿ, ಇಮಿನಾ ಅಞ್ಞಥಾಸ್ಮೀತಿ ಹೋತಿ, ಇಮಿನಾ ಅಸಸ್ಮೀತಿ ಹೋತಿ, ಇಮಿನಾ ಸತಸ್ಮೀತಿ ಹೋತಿ, ಇಮಿನಾ ಸನ್ತಿ ಹೋತಿ, ಇಮಿನಾ ಇತ್ಥಂ ಸನ್ತಿ ಹೋತಿ, ಇಮಿನಾ ಏವಂ ಸನ್ತಿ ಹೋತಿ, ಇಮಿನಾ ಅಞ್ಞಥಾ ಸನ್ತಿ ಹೋತಿ, ಇಮಿನಾ ಅಪಿಹಂ ಸನ್ತಿ ಹೋತಿ, ಇಮಿನಾ ಅಪಿಹಂ ಇತ್ಥಂ ಸನ್ತಿ ಹೋತಿ, ಇಮಿನಾ ಅಪಿಹಂ ಏವಂ ಸನ್ತಿ ಹೋತಿ, ಇಮಿನಾ ಅಪಿಹಂ ಅಞ್ಞಥಾ ಸನ್ತಿ ಹೋತಿ, ಇಮಿನಾ ಭವಿಸ್ಸನ್ತಿ ಹೋತಿ, ಇಮಿನಾ ಇತ್ಥಂ ಭವಿಸ್ಸನ್ತಿ ಹೋತಿ, ಇಮಿನಾ ಏವಂ ಭವಿಸ್ಸನ್ತಿ ಹೋತಿ, ಇಮಿನಾ ಅಞ್ಞಥಾ ಭವಿಸ್ಸನ್ತಿ ಹೋತಿ. ಏವಂ ಖೋ, ಭಿಕ್ಖವೇ, ಭಿಕ್ಖು ಪಜ್ಜಲತಿ.

‘‘ಕಥಞ್ಚ, ಭಿಕ್ಖವೇ, ಭಿಕ್ಖು ನ ಪಜ್ಜಲತಿ? ಇಮಿನಾ ಅಸ್ಮೀತಿ, ಭಿಕ್ಖವೇ, ಅಸತಿ ಇಮಿನಾ ಇತ್ಥಸ್ಮೀತಿ ನ ಹೋತಿ, ಇಮಿನಾ ಏವಂಸ್ಮೀತಿ ನ ಹೋತಿ, ಇಮಿನಾ ಅಞ್ಞಥಾಸ್ಮೀತಿ ನ ಹೋತಿ, ಇಮಿನಾ ಅಸಸ್ಮೀತಿ ನ ಹೋತಿ, ಇಮಿನಾ ಸತಸ್ಮೀತಿ ನ ಹೋತಿ, ಇಮಿನಾ ಸನ್ತಿ ನ ಹೋತಿ, ಇಮಿನಾ ಇತ್ಥಂ ಸನ್ತಿ ನ ಹೋತಿ, ಇಮಿನಾ ಏವಂ ಸನ್ತಿ ನ ಹೋತಿ, ಇಮಿನಾ ಅಞ್ಞಥಾ ಸನ್ತಿ ನ ಹೋತಿ, ಇಮಿನಾ ಅಪಿಹಂ ಸನ್ತಿ ನ ಹೋತಿ, ಇಮಿನಾ ಅಪಿಹಂ ಇತ್ಥಂ ಸನ್ತಿ ನ ಹೋತಿ, ಇಮಿನಾ ಅಪಿಹಂ ಏವಂ ಸನ್ತಿ ನ ಹೋತಿ, ಇಮಿನಾ ಅಪಿಹಂ ಅಞ್ಞಥಾ ಸನ್ತಿ ನ ಹೋತಿ, ಇಮಿನಾ ಭವಿಸ್ಸನ್ತಿ ನ ಹೋತಿ, ಇಮಿನಾ ಇತ್ಥಂ ಭವಿಸ್ಸನ್ತಿ ನ ಹೋತಿ, ಇಮಿನಾ ಏವಂ ಭವಿಸ್ಸನ್ತಿ ನ ಹೋತಿ, ಇಮಿನಾ ಅಞ್ಞಥಾ ಭವಿಸ್ಸನ್ತಿ ನ ಹೋತಿ. ಏವಂ ಖೋ, ಭಿಕ್ಖವೇ, ಭಿಕ್ಖು ನ ಪಜ್ಜಲತಿ.

‘‘ಕಥಞ್ಚ, ಭಿಕ್ಖವೇ, ಭಿಕ್ಖು ಸಮ್ಪಜ್ಝಾಯತಿ? ಇಧ, ಭಿಕ್ಖವೇ, ಭಿಕ್ಖುನೋ ಅಸ್ಮಿಮಾನೋ ಪಹೀನೋ ನ ಹೋತಿ ಉಚ್ಛಿನ್ನಮೂಲೋ ತಾಲಾವತ್ಥುಕತೋ ಅನಭಾವಂಕತೋ ಆಯತಿಂ ಅನುಪ್ಪಾದಧಮ್ಮೋ. ಏವಂ ಖೋ, ಭಿಕ್ಖವೇ, ಭಿಕ್ಖು ಸಮ್ಪಜ್ಝಾಯತಿ.

‘‘ಕಥಞ್ಚ, ಭಿಕ್ಖವೇ, ಭಿಕ್ಖು ನ ಸಮ್ಪಜ್ಝಾಯತಿ? ಇಧ, ಭಿಕ್ಖವೇ, ಭಿಕ್ಖುನೋ ಅಸ್ಮಿಮಾನೋ ಪಹೀನೋ ಹೋತಿ ಉಚ್ಛಿನ್ನಮೂಲೋ ತಾಲಾವತ್ಥುಕತೋ ಅನಭಾವಂಕತೋ ಆಯತಿಂ ಅನುಪ್ಪಾದಧಮ್ಮೋ. ಏವಂ ಖೋ, ಭಿಕ್ಖವೇ, ಭಿಕ್ಖು ನ ಸಮ್ಪಜ್ಝಾಯತೀ’’ತಿ. ದಸಮಂ.

ಮಹಾವಗ್ಗೋ ಪಞ್ಚಮೋ.