៦. សុត្តវិញ្ញត្តិសិក្ខាបទំ

៦៣៦. តេន សមយេន ពុទ្ធោ ភគវា រាជគហេ វិហរតិ វេឡុវនេ កលន្ទកនិវាបេ. តេន ខោ បន សមយេន ឆព្ពគ្គិយា ភិក្ខូ ចីវរការសមយេ ពហុំ សុត្តំ វិញ្ញាបេសុំ. កតេបិ ចីវរេ ពហុំ សុត្តំ អវសិដ្ឋំ ហោតិ. អថ ខោ ឆព្ពគ្គិយានំ ភិក្ខូនំ ឯតទហោសិ – ‘‘ហន្ទ មយំ, អាវុសោ, អញ្ញម្បិ សុត្តំ វិញ្ញាបេត្វា តន្តវាយេហិ ចីវរំ វាយាបេមា’’តិ. អថ ខោ ឆព្ពគ្គិយា ភិក្ខូ អញ្ញម្បិ សុត្តំ វិញ្ញាបេត្វា តន្តវាយេហិ ចីវរំ វាយាបេសុំ. វីតេបិ ចីវរេ ពហុំ សុត្តំ អវសិដ្ឋំ ហោតិ. ទុតិយម្បិ ខោ ឆព្ពគ្គិយា ភិក្ខូ អញ្ញម្បិ សុត្តំ វិញ្ញាបេត្វា តន្តវាយេហិ ចីវរំ វាយាបេសុំ. វីតេបិ ចីវរេ ពហុំ សុត្តំ អវសិដ្ឋំ ហោតិ. តតិយម្បិ ខោ ឆព្ពគ្គិយា ភិក្ខូ អញ្ញម្បិ សុត្តំ វិញ្ញាបេត្វា តន្តវាយេហិ ចីវរំ វាយាបេសុំ. មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម សមណា សក្យបុត្តិយា សាមំ សុត្តំ វិញ្ញាបេត្វា តន្តវាយេហិ ចីវរំ វាយាបេស្សន្តី’’តិ!

អស្សោសុំ ខោ ភិក្ខូ តេសំ មនុស្សានំ ឧជ្ឈាយន្តានំ ខិយ្យន្តានំ វិបាចេន្តានំ. យេ តេ ភិក្ខូ អប្បិច្ឆា… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ សាមំ សុត្តំ វិញ្ញាបេត្វា តន្តវាយេហិ ចីវរំ វាយាបេស្សន្តី’’តិ! អថ ខោ តេ ភិក្ខូ ឆព្ពគ្គិយេ ភិក្ខូ អនេកបរិយាយេន វិគរហិត្វា ភគវតោ ឯតមត្ថំ អារោចេសុំ…បេ… ‘‘សច្ចំ កិរ តុម្ហេ, ភិក្ខវេ, សាមំ សុត្តំ វិញ្ញាបេត្វា តន្តវាយេហិ ចីវរំ វាយាបេថា’’តិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម តុម្ហេ, មោឃបុរិសា, សាមំ សុត្តំ វិញ្ញាបេត្វា តន្តវាយេហិ ចីវរំ វាយាបេស្សថ! នេតំ, មោឃបុរិសា, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

៦៣៧. ‘‘យោ បន ភិក្ខុ សាមំ សុត្តំ វិញ្ញាបេត្វា តន្តវាយេហិ ចីវរំ វាយាបេយ្យ, និស្សគ្គិយំ បាចិត្តិយ’’ន្តិ.

៦៣៨. យោ បនាតិ យោ យាទិសោ…បេ… ភិក្ខូតិ…បេ… អយំ ឥមស្មិំ អត្ថេ អធិប្បេតោ ភិក្ខូតិ.

សាមន្តិ សយំ វិញ្ញាបេត្វា.

សុត្តំ នាម ឆ សុត្តានិ – ខោមំ កប្បាសិកំ កោសេយ្យំ កម្ពលំ សាណំ ភង្គំ.

តន្តវាយេហីតិ បេសការេហិ វាយាបេតិ, បយោគេ បយោគេ ទុក្កដំ [វាយាបេតិ, បយោគេ ទុក្កដំ (ស្យា.)]. បដិលាភេន និស្សគ្គិយំ ហោតិ. និស្សជ្ជិតព្ពំ សង្ឃស្ស វា គណស្ស វា បុគ្គលស្ស វា. ឯវញ្ច បន, ភិក្ខវេ, និស្សជ្ជិតព្ពំ…បេ… ឥទំ មេ, ភន្តេ, ចីវរំ សាមំ សុត្តំ វិញ្ញាបេត្វា តន្តវាយេហិ វាយាបិតំ និស្សគ្គិយំ. ឥមាហំ សង្ឃស្ស និស្សជ្ជាមីតិ…បេ… ទទេយ្យាតិ…បេ… ទទេយ្យុន្តិ…បេ… អាយស្មតោ ទម្មីតិ.

៦៣៩. វាយាបិតេ វាយាបិតសញ្ញី, និស្សគ្គិយំ បាចិត្តិយំ. វាយាបិតេ វេមតិកោ, និស្សគ្គិយំ បាចិត្តិយំ. វាយាបិតេ អវាយាបិតសញ្ញី, និស្សគ្គិយំ បាចិត្តិយំ.

អវាយាបិតេ វាយាបិតសញ្ញី, អាបត្តិ ទុក្កដស្ស. អវាយាបិតេ វេមតិកោ, អាបត្តិ ទុក្កដស្ស. អវាយាបិតេ អវាយាបិតសញ្ញី, អនាបត្តិ.

៦៤០. អនាបត្តិ – ចីវរំ សិព្ពេតុំ, អាយោគេ, កាយពន្ធនេ, អំសពន្ធកេ [អំសវដ្ដកេ (សី.)], បត្តត្ថវិកាយ, បរិស្សាវនេ, ញាតកានំ, បវារិតានំ, អញ្ញស្សត្ថាយ, អត្តនោ ធនេន, ឧម្មត្តកស្ស, អាទិកម្មិកស្សាតិ.

សុត្តវិញ្ញត្តិសិក្ខាបទំ និដ្ឋិតំ ឆដ្ឋំ.