៩. រូបិយសំវោហារសិក្ខាបទំ

៥៨៧. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ឆព្ពគ្គិយា ភិក្ខូ នានប្បការកំ រូបិយសំវោហារំ សមាបជ្ជន្តិ. មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម សមណា សក្យបុត្តិយា នានប្បការកំ រូបិយសំវោហារំ សមាបជ្ជិស្សន្តិ, សេយ្យថាបិ គិហី កាមភោគិនោ’’តិ! អស្សោសុំ ខោ ភិក្ខូ តេសំ មនុស្សានំ ឧជ្ឈាយន្តានំ ខិយ្យន្តានំ វិបាចេន្តានំ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ នានប្បការកំ រូបិយសំវោហារំ សមាបជ្ជិស្សន្តី’’តិ! អថ ខោ តេ ភិក្ខូ ឆព្ពគ្គិយេ ភិក្ខូ អនេកបរិយាយេន វិគរហិត្វា ភគវតោ ឯតមត្ថំ អារោចេសុំ…បេ… ‘‘សច្ចំ កិរ តុម្ហេ, ភិក្ខវេ, នានប្បការកំ រូបិយសំវោហារំ សមាបជ្ជថា’’តិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម តុម្ហេ, មោឃបុរិសា, នានប្បការកំ រូបិយសំវោហារំ សមាបជ្ជិស្សថ! នេតំ, មោឃបុរិសា, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

៥៨៨. ‘‘យោ បន ភិក្ខុ នានប្បការកំ រូបិយសំវោហារំ សមាបជ្ជេយ្យ, និស្សគ្គិយំ បាចិត្តិយ’’ន្តិ.

៥៨៩. យោ បនាតិ យោ យាទិសោ…បេ… ភិក្ខូតិ…បេ… អយំ ឥមស្មិំ អត្ថេ អធិប្បេតោ ភិក្ខូតិ.

នានប្បការកំ នាម កតម្បិ អកតម្បិ កតាកតម្បិ. កតំ នាម សីសូបគំ គីវូបគំ ហត្ថូបគំ បាទូបគំ កដូបគំ. អកតំ នាម ឃនកតំ វុច្ចតិ. កតាកតំ នាម តទុភយំ.

រូបិយំ នាម សត្ថុវណ្ណោ កហាបណោ, លោហមាសកោ, ទារុមាសកោ, ជតុមាសកោ យេ វោហារំ គច្ឆន្តិ.

សមាបជ្ជេយ្យាតិ កតេន កតំ ចេតាបេតិ, និស្សគ្គិយំ បាចិត្តិយំ [និស្សគ្គិយំ ហោតិ (ស្យា.)]. កតេន អកតំ ចេតាបេតិ, និស្សគ្គិយំ បាចិត្តិយំ. កតេន កតាកតំ ចេតាបេតិ, និស្សគ្គិយំ បាចិត្តិយំ. អកតេន កតំ ចេតាបេតិ, និស្សគ្គិយំ បាចិត្តិយំ. អកតេន អកតំ ចេតាបេតិ, និស្សគ្គិយំ បាចិត្តិយំ. អកតេន កតាកតំ ចេតាបេតិ, និស្សគ្គិយំ បាចិត្តិយំ. កតាកតេន កតំ ចេតាបេតិ, និស្សគ្គិយំ បាចិត្តិយំ. កតាកតេន អកតំ ចេតាបេតិ, និស្សគ្គិយំ បាចិត្តិយំ. កតាកតេន កតាកតំ ចេតាបេតិ, និស្សគ្គិយំ បាចិត្តិយំ. សង្ឃមជ្ឈេ និស្សជ្ជិតព្ពំ. ឯវញ្ច បន, ភិក្ខវេ, និស្សជ្ជិតព្ពំ. តេន ភិក្ខុនា សង្ឃំ ឧបសង្កមិត្វា ឯកំសំ ឧត្តរាសង្គំ ករិត្វា វុឌ្ឍានំ ភិក្ខូនំ បាទេ វន្ទិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘អហំ, ភន្តេ, នានប្បការកំ រូបិយសំវោហារំ សមាបជ្ជិំ. ឥទំ មេ និស្សគ្គិយំ. ឥមាហំ សង្ឃស្ស និស្សជ្ជាមី’’តិ. និស្សជ្ជិត្វា អាបត្តិ ទេសេតព្ពា. ព្យត្តេន ភិក្ខុនា បដិពលេន អាបត្តិ បដិគ្គហេតព្ពា. សចេ តត្ថ អាគច្ឆតិ អារាមិកោ វា ឧបាសកោ វា សោ វត្តព្ពោ – ‘‘អាវុសោ, ឥមំ ជានាហី’’តិ. សចេ សោ ភណតិ – ‘‘ឥមិនា កិំ អាហរិយ្យតូ’’តិ, ន វត្តព្ពោ – ‘‘ឥមំ វា ឥមំ វា អាហរា’’តិ. កប្បិយំ អាចិក្ខិតព្ពំ – សប្បិ វា តេលំ វា មធុ វា ផាណិតំ វា. សចេ សោ តេន បរិវត្តេត្វា កប្បិយំ អាហរតិ, រូបិយចេតាបកំ ឋបេត្វា, សព្ពេហេវ បរិភុញ្ជិតព្ពំ. ឯវញ្ចេតំ លភេថ, ឥច្ចេតំ កុសលំ; នោ ចេ លភេថ, សោ វត្តព្ពោ – ‘‘អាវុសោ, ឥមំ ឆឌ្ឌេហី’’តិ. សចេ សោ ឆឌ្ឌេតិ, ឥច្ចេតំ កុសលំ; នោ ចេ ឆឌ្ឌេតិ, បញ្ចហង្គេហិ សមន្នាគតោ ភិក្ខុ រូបិយឆឌ្ឌកោ សម្មន្និតព្ពោ – យោ ន ឆន្ទាគតិំ គច្ឆេយ្យ, ន ទោសាគតិំ គច្ឆេយ្យ, ន មោហាគតិំ គច្ឆេយ្យ, ន ភយាគតិំ គច្ឆេយ្យ, ឆឌ្ឌិតាឆឌ្ឌិតញ្ច ជានេយ្យ. ឯវញ្ច បន, ភិក្ខវេ, សម្មន្និតព្ពោ. បឋមំ ភិក្ខុ យាចិតព្ពោ. យាចិត្វា ព្យត្តេន ភិក្ខុនា បដិពលេន សង្ឃោ ញាបេតព្ពោ –

៥៩០. ‘‘សុណាតុ មេ, ភន្តេ, សង្ឃោ. យទិ សង្ឃស្ស បត្តកល្លំ, សង្ឃោ ឥត្ថន្នាមំ ភិក្ខុំ រូបិយឆឌ្ឌកំ សម្មន្នេយ្យ. ឯសា ញត្តិ.

‘‘សុណាតុ មេ, ភន្តេ, សង្ឃោ. សង្ឃោ ឥត្ថន្នាមំ ភិក្ខុំ រូបិយឆឌ្ឌកំ សម្មន្នតិ. យស្សាយស្មតោ ខមតិ ឥត្ថន្នាមស្ស ភិក្ខុនោ រូបិយឆឌ្ឌកស្ស សម្មុតិ, សោ តុណ្ហស្ស; យស្ស នក្ខមតិ, សោ ភាសេយ្យ.

‘‘សម្មតោ សង្ឃេន ឥត្ថន្នាមោ ភិក្ខុ រូបិយឆឌ្ឌកោ. ខមតិ សង្ឃស្ស, តស្មា តុណ្ហី, ឯវមេតំ ធារយាមី’’តិ.

តេន សម្មតេន ភិក្ខុនា អនិមិត្តំ កត្វា បាតេតព្ពំ. សចេ និមិត្តំ កត្វា បាតេតិ, អាបត្តិ ទុក្កដស្ស.

៥៩១. រូបិយេ រូបិយសញ្ញី រូបិយំ ចេតាបេតិ, និស្សគ្គិយំ បាចិត្តិយំ. រូបិយេ វេមតិកោ រូបិយំ ចេតាបេតិ, និស្សគ្គិយំ បាចិត្តិយំ. រូបិយេ អរូបិយសញ្ញី រូបិយំ ចេតាបេតិ, និស្សគ្គិយំ បាចិត្តិយំ. អរូបិយេ រូបិយសញ្ញី រូបិយំ ចេតាបេតិ, និស្សគ្គិយំ បាចិត្តិយំ. អរូបិយេ វេមតិកោ រូបិយំ ចេតាបេតិ, និស្សគ្គិយំ បាចិត្តិយំ. អរូបិយេ អរូបិយសញ្ញី រូបិយំ ចេតាបេតិ, និស្សគ្គិយំ បាចិត្តិយំ.

អរូបិយេ រូបិយសញ្ញី, អាបត្តិ ទុក្កដស្ស. អរូបិយេ វេមតិកោ, អាបត្តិ ទុក្កដស្ស. អរូបិយេ អរូបិយសញ្ញី, អនាបត្តិ.

៥៩២. អនាបត្តិ ឧម្មត្តកស្ស, អាទិកម្មិកស្សាតិ.

រូបិយសំវោហារសិក្ខាបទំ និដ្ឋិតំ នវមំ.