១០. នន្ទសិក្ខាបទំ

៥៤៧. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន អាយស្មា នន្ទោ ភគវតោ មាតុច្ឆាបុត្តោ អភិរូបោ ហោតិ ទស្សនីយោ បាសាទិកោ ចតុរង្គុលោមកោ ភគវតា [ភគវតោ (ក.)]. សោ សុគតចីវរប្បមាណំ ចីវរំ ធារេតិ. អទ្ទសំសុ ខោ ថេរា ភិក្ខូ អាយស្មន្តំ នន្ទំ ទូរតោវ អាគច្ឆន្តំ. ទិស្វាន – ‘‘ភគវា អាគច្ឆតី’’តិ អាសនា វុដ្ឋហន្តិ. តេ ឧបគតេ ជានិត្វា [ឧបគតំ សញ្ជានិត្វា (ស្យា.), ឧបគតេ សញ្ជានិត្វា (សី.)] ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អាយស្មា នន្ទោ សុគតចីវរប្បមាណំ ចីវរំ ធារេស្សតី’’តិ…បេ… សច្ចំ កិរ ត្វំ, នន្ទ, សុគតចីវរប្បមាណំ ចីវរំ ធារេសីតិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម ត្វំ, នន្ទ, សុគតចីវរប្បមាណំ ចីវរំ ធារេស្សសិ! នេតំ, នន្ទ, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

៥៤៨. ‘‘យោ បន ភិក្ខុ សុគតចីវរប្បមាណំ ចីវរំ ការាបេយ្យ អតិរេកំ វា, ឆេទនកំ បាចិត្តិយំ. តត្រិទំ សុគតស្ស សុគតចីវរប្បមាណំ – ទីឃសោ នវ វិទត្ថិយោ, សុគតវិទត្ថិយា; តិរិយំ ឆ វិទត្ថិយោ. ឥទំ សុគតស្ស សុគតចីវរប្បមាណ’’ន្តិ.

៥៤៩. យោ បនាតិ យោ យាទិសោ…បេ… ភិក្ខូតិ…បេ… អយំ ឥមស្មិំ អត្ថេ អធិប្បេតោ ភិក្ខូតិ.

សុគតចីវរប្បមាណំ [សុគតចីវរំ (ក.)] នាម ទីឃសោ នវ វិទត្ថិយោ, សុគតវិទត្ថិយា; តិរិយំ ឆ វិទត្ថិយោ.

ការាបេយ្យាតិ ករោតិ វា ការាបេតិ វា, បយោគេ ទុក្កដំ. បដិលាភេន ឆិន្ទិត្វា បាចិត្តិយំ ទេសេតព្ពំ.

៥៥០. អត្តនា វិប្បកតំ អត្តនា បរិយោសាបេតិ, អាបត្តិ បាចិត្តិយស្ស. អត្តនា វិប្បកតំ បរេហិ បរិយោសាបេតិ, អាបត្តិ បាចិត្តិយស្ស. បរេហិ វិប្បកតំ អត្តនា បរិយោសាបេតិ, អាបត្តិ បាចិត្តិយស្ស. បរេហិ វិប្បកតំ បរេហិ បរិយោសាបេតិ, អាបត្តិ បាចិត្តិយស្ស.

អញ្ញស្សត្ថាយ ករោតិ វា ការាបេតិ វា, អាបត្តិ ទុក្កដស្ស. អញ្ញេន កតំ បដិលភិត្វា បរិភុញ្ជតិ, អាបត្តិ ទុក្កដស្ស.

៥៥១. អនាបត្តិ ឩនកំ ករោតិ, អញ្ញេន កតំ បដិលភិត្វា ឆិន្ទិត្វា បរិភុញ្ជតិ, វិតានំ វា ភូមត្ថរណំ វា សាណិបាការំ វា ភិសិំ វា ពិព្ពោហនំ វា ករោតិ, ឧម្មត្តកស្ស, អាទិកម្មិកស្សាតិ.

នន្ទសិក្ខាបទំ និដ្ឋិតំ ទសមំ.

រតនវគ្គោ [រាជវគ្គោ (សី.)] នវមោ.

តស្សុទ្ទានំ –

រញ្ញោ ច រតនំ សន្តំ, សូចិ មញ្ចញ្ច តូលិកំ;

និសីទនញ្ច កណ្ឌុញ្ច, វស្សិកា សុគតេន ចាតិ.

ឧទ្ទិដ្ឋា ខោ, អាយស្មន្តោ, ទ្វេនវុតិ បាចិត្តិយា ធម្មា. តត្ថាយស្មន្តេ បុច្ឆាមិ – ‘‘កច្ចិត្ថ បរិសុទ្ធា’’? ទុតិយម្បិ បុច្ឆាមិ – ‘‘កច្ចិត្ថ បរិសុទ្ធា’’? តតិយម្បិ បុច្ឆាមិ – ‘‘កច្ចិត្ថ បរិសុទ្ធា’’? បរិសុទ្ធេត្ថាយស្មន្តោ, តស្មា តុណ្ហី, ឯវមេតំ ធារយាមីតិ.

ខុទ្ទកំ សមត្តំ.

បាចិត្តិយកណ្ឌំ និដ្ឋិតំ.