១០. ចីវរអបនិធានសិក្ខាបទំ

៣៧៧. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន សត្តរសវគ្គិយា ភិក្ខូ អសន្និហិតបរិក្ខារា ហោន្តិ. ឆព្ពគ្គិយា ភិក្ខូ សត្តរសវគ្គិយានំ ភិក្ខូនំ បត្តម្បិ ចីវរម្បិ អបនិធេន្តិ. សត្តរសវគ្គិយា ភិក្ខូ ឆព្ពគ្គិយេ ភិក្ខូ ឯតទវោចុំ – ‘‘ទេថាវុសោ, អម្ហាកំ បត្តម្បិ ចីវរម្បី’’តិ. ឆព្ពគ្គិយា ភិក្ខូ ហសន្តិ, តេ រោទន្តិ. ភិក្ខូ ឯវមាហំសុ – ‘‘កិស្ស តុម្ហេ, អាវុសោ, រោទថា’’តិ? ‘‘ឥមេ, អាវុសោ, ឆព្ពគ្គិយា ភិក្ខូ អម្ហាកំ បត្តម្បិ ចីវរម្បិ អបនិធេន្តី’’តិ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ ភិក្ខូនំ បត្តម្បិ ចីវរម្បិ អបនិធេស្សន្តី’’តិ…បេ… សច្ចំ កិរ តុម្ហេ, ភិក្ខវេ, ភិក្ខូនំ បត្តម្បិ ចីវរម្បិ អបនិធេថាតិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម តុម្ហេ, មោឃបុរិសា, ភិក្ខូនំ បត្តម្បិ ចីវរម្បិ អបនិធេស្សថ! នេតំ, មោឃបុរិសា, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

៣៧៨. ‘‘យោ បន ភិក្ខុ ភិក្ខុស្ស បត្តំ វា ចីវរំ វា និសីទនំ វា សូចិឃរំ វា កាយពន្ធនំ វា អបនិធេយ្យ វា អបនិធាបេយ្យ វា, អន្តមសោ ហសាបេក្ខោបិ, បាចិត្តិយ’’ន្តិ.

៣៧៩. យោ បនាតិ យោ យាទិសោ…បេ… ភិក្ខូតិ…បេ… អយំ ឥមស្មិំ អត្ថេ អធិប្បេតោ ភិក្ខូតិ.

ភិក្ខុស្សាតិ អញ្ញស្ស ភិក្ខុស្ស.

បត្តោ នាម ទ្វេ បត្តា – អយោបត្តោ, មត្តិកាបត្តោ.

ចីវរំ នាម ឆន្នំ ចីវរានំ អញ្ញតរំ ចីវរំ, វិកប្បនុបគំ បច្ឆិមំ.

និសីទនំ នាម សទសំ វុច្ចតិ.

សូចិឃរំ នាម សសូចិកំ វា អសូចិកំ វា.

កាយពន្ធនំ នាម ទ្វេ កាយពន្ធនានិ – បដ្ដិកា, សូករន្តកំ.

អបនិធេយ្យ វាតិ សយំ អបនិធេតិ, អាបត្តិ បាចិត្តិយស្ស.

អបនិធាបេយ្យ វាតិ អញ្ញំ អាណាបេសិ, អាបត្តិ បាចិត្តិយស្ស. អបនិធាបេយ្យ វា តិ អយ្យំ អាណាបេតិ, អាបត្តិ បាចិត្តិយស្ស. សកិំ អាណត្តោ ពហុកម្បិ អបនិធេតិ, អាបត្តិ បាចិត្តិយស្ស.

អន្តមសោ ហសាបេក្ខោបីតិ កីឡាធិប្បាយោ.

៣៨០. ឧបសម្បន្នេ ឧបសម្បន្នសញ្ញី បត្តំ វា ចីវរំ វា និសីទនំ វា សូចិឃរំ វា កាយពន្ធនំ វា អបនិធេតិ វា អបនិធាបេតិ វា, អន្តមសោ ហសាបេក្ខោបិ, អាបត្តិ បាចិត្តិយស្ស. ឧបសម្បន្នេ វេមតិកោ…បេ… ឧបសម្បន្នេ អនុបសម្បន្នសញ្ញី បត្តំ វា ចីវរំ វា និសីទនំ វា សូចិឃរំ វា កាយពន្ធនំ វា អបនិធេតិ វា អបនិធាបេតិ វា, អន្តមសោ ហសាបេក្ខោបិ, អាបត្តិ បាចិត្តិយស្ស.

អញ្ញំ បរិក្ខារំ អបនិធេតិ វា អបនិធាបេតិ វា, អន្តមសោ ហសាបេក្ខោបិ, អាបត្តិ ទុក្កដស្ស. អនុបសម្បន្នស្ស បត្តំ វា ចីវរំ វា អញ្ញំ វា បរិក្ខារំ អបនិធេតិ វា អបនិធាបេតិ វា, អន្តមសោ ហសាបេក្ខោបិ, អាបត្តិ ទុក្កដស្ស. អនុបសម្បន្នេ ឧបសម្បន្នសញ្ញី, អាបត្តិ ទុក្កដស្ស. អនុបសម្បន្នេ វេមតិកោ, អាបត្តិ ទុក្កដស្ស. អនុបសម្បន្នេ អនុបសម្បន្នសញ្ញី, អាបត្តិ ទុក្កដស្ស.

៣៨១. អនាបត្តិ នហសាធិប្បាយោ, ទុន្និក្ខិត្តំ បដិសាមេតិ, ‘‘ធម្មិំ កថំ កត្វា ទស្សាមី’’តិ បដិសាមេតិ, ឧម្មត្តកស្ស, អាទិកម្មិកស្សាតិ.

ចីវរអបនិធានសិក្ខាបទំ និដ្ឋិតំ ទសមំ.

សុរាបានវគ្គោ ឆដ្ឋោ.

តស្សុទ្ទានំ –

សុរា អង្គុលិ ហាសោ ច [តោយញ្ច (ឥតិបិ)], អនាទរិយញ្ច ភិំសនំ;

ជោតិនហានទុព្ពណ្ណំ, សាមំ អបនិធេន ចាតិ.