១០. ទន្តបោនសិក្ខាបទំ

២៦៣. តេន សមយេន ពុទ្ធោ ភគវា វេសាលិយំ វិហរតិ មហាវនេ កូដាគារសាលាយំ. តេន ខោ បន សមយេន អញ្ញតរោ ភិក្ខុ សព្ពបំសុកូលិកោ សុសានេ វិហរតិ. សោ មនុស្សេហិ ទិយ្យមានំ ន ឥច្ឆតិ បដិគ្គហេតុំ, សុសានេបិ រុក្ខមូលេបិ ឧម្មារេបិ អយ្យវោសាដិតកានិ សាមំ គហេត្វា បរិភុញ្ជតិ [ភុញ្ជតិ (ស្យា.)]. មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អយំ ភិក្ខុ អម្ហាកំ អយ្យវោសាដិតកានិ សាមំ គហេត្វា បរិភុញ្ជិស្សតិ! ថេរោយំ ភិក្ខុ វឋរោ មនុស្សមំសំ មញ្ញេ ខាទតី’’តិ! អស្សោសុំ ខោ ភិក្ខូ តេសំ មនុស្សានំ ឧជ្ឈាយន្តានំ ខិយ្យន្តានំ វិបាចេន្តានំ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ភិក្ខុ អទិន្នំ មុខទ្វារំ អាហារំ អាហរិស្សតី’’តិ…បេ… សច្ចំ កិរ ត្វំ, ភិក្ខុ, អទិន្នំ មុខទ្វារំ អាហារំ អាហរសីតិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម ត្វំ, មោឃបុរិស, អទិន្នំ មុខទ្វារំ អាហារំ អាហរិស្សសិ! នេតំ, មោឃបុរិស, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

‘‘យោ បន ភិក្ខុ អទិន្នំ មុខទ្វារំ អាហារំ អាហរេយ្យ, បាចិត្តិយ’’ន្តិ.

ឯវញ្ចិទំ ភគវតា ភិក្ខូនំ សិក្ខាបទំ បញ្ញត្តំ ហោតិ.

២៦៤. តេន ខោ បន សមយេន ភិក្ខូ ឧទកទន្តបោនេ [ឧទកទន្តបោណេ (ស្យា. ក.)] កុក្កុច្ចាយន្តិ. ភគវតោ ឯតមត្ថំ អារោចេសុំ…បេ… ‘‘អនុជានាមិ, ភិក្ខវេ, ឧទកទន្តបោនំ សាមំ គហេត្វា បរិភុញ្ជិតុំ. ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

២៦៥. ‘‘យោ បន ភិក្ខុ អទិន្នំ មុខទ្វារំ អាហារំ អាហរេយ្យ, អញ្ញត្រ ឧទកទន្តបោនា, បាចិត្តិយ’’ន្តិ.

២៦៦. យោ បនាតិ យោ យាទិសោ…បេ… ភិក្ខូតិ…បេ… អយំ ឥមស្មិំ អត្ថេ អធិប្បេតោ ភិក្ខូតិ.

អទិន្នំ នាម អប្បដិគ្គហិតកំ វុច្ចតិ.

ទិន្នំ នាម កាយេន វា កាយបដិពទ្ធេន វា និស្សគ្គិយេន វា ទេន្តេ ហត្ថបាសេ ឋិតោ កាយេន វា កាយបដិពទ្ធេន វា បដិគ្គណ្ហាតិ, ឯតំ ទិន្នំ នាម.

អាហារោ នាម ឧទកទន្តបោនំ ឋបេត្វា យំកិញ្ចិ អជ្ឈោហរណីយំ, ឯសោ អាហារោ នាម.

អញ្ញត្រ ឧទកទន្តបោនាតិ ឋបេត្វា ឧទកទន្តបោនំ.

‘‘ខាទិស្សាមិ ភុញ្ជិស្សាមី’’តិ គណ្ហាតិ, អាបត្តិ ទុក្កដស្ស. អជ្ឈោហារេ អជ្ឈោហារេ អាបត្តិ បាចិត្តិយស្ស.

២៦៧. អប្បដិគ្គហិតកេ អប្បដិគ្គហិតកសញ្ញី អទិន្នំ មុខទ្វារំ អាហារំ អាហារេតិ, អញ្ញត្រ ឧទកទន្តបោនា, អាបត្តិ បាចិត្តិយស្ស. អប្បដិគ្គហិតកេ វេមតិកោ អទិន្នំ មុខទ្វារំ អាហារំ អាហារេតិ, អញ្ញត្រ ឧទកទន្តបោនា, អាបត្តិ បាចិត្តិយស្ស. អប្បដិគ្គហិតកេ បដិគ្គហិតកសញ្ញី អទិន្នំ មុខទ្វារំ អាហារំ អាហារេតិ, អញ្ញត្រ ឧទកទន្តបោនា, អាបត្តិ បាចិត្តិយស្ស.

បដិគ្គហិតកេ អប្បដិគ្គហិតកសញ្ញី, អាបត្តិ ទុក្កដស្ស. បដិគ្គហិតកេ វេមតិកោ, អាបត្តិ ទុក្កដស្ស. បដិគ្គហិតកេ បដិគ្គហិតកសញ្ញី, អនាបត្តិ.

២៦៨. អនាបត្តិ ឧទកទន្តបោនេ, ចត្តារិ មហាវិកតានិ សតិ បច្ចយេ អសតិ កប្បិយការកេ សាមំ គហេត្វា បរិភុញ្ជតិ, ឧម្មត្តកស្ស, អាទិកម្មិកស្សាតិ.

ទន្តបោនសិក្ខាបទំ និដ្ឋិតំ ទសមំ.

ភោជនវគ្គោ ចតុត្ថោ.

តស្សុទ្ទានំ –

បិណ្ឌោ គណំ បរំ បូវំ, ទ្វេ ច វុត្តា បវារណា;

វិកាលេ សន្និធី ខីរំ, ទន្តបោនេន តេ ទសាតិ.