បរិក្ខារហារវណ្ណនា

អាឃាតាទីនំ ‘‘អនត្ថំ មេ អចរី’’តិអាទីនិ (ធ. ស. ១២៣៧; វិភ. ៩០៩) ឯកូនវីសតិ អាឃាតវត្ថូនិ ហេតុ. អានន្ទាទីនំ អារម្មណាភិសិនេហោ ហេតុ. សីលស្ស ហិរិឱត្តប្បំ, អប្បិច្ឆតាទយោ ច ហេតុ. ‘‘គម្ភីរា’’តិអាទិនា វុត្តធម្មស្ស សព្ពាបិ បារមិយោ ហេតុ. វិសេសេន បញ្ញាបារមី. ទិដ្ឋីនំ អសប្បុរិសូបនិស្សយោ, អសទ្ធម្មស្សវនំ មិច្ឆាភិនិវេសេន អយោនិសោមនសិការោ ច អវិសេសេន ហេតុ. វិសេសេន បន សស្សតវាទាទីនំ អតីតជាតិអនុស្សរណាទិ ហេតុ. វេទនានំ អវិជ្ជា, តណ្ហា, កម្មាទិផស្សោ ច ហេតុ. អនុបាទាវិមុត្តិយា អរិយមគ្គោ ហេតុ. អញ្ញាណស្ស អយោនិសោមនសិការោ ហេតុ. តណ្ហាយ សំយោជនិយេសុ អស្សាទានុបស្សនា ហេតុ. ផស្សស្ស សឡាយតនានិ ហេតុ. សឡាយតនស្ស នាមរូបំ ហេតុ. ភវនេត្តិសមុច្ឆេទស្ស វិសុទ្ធិភាវនា ហេតូតិ អយំ បរិក្ខារសង្ខាតេ ហេតុបច្ចយេ និទ្ធារេត្វា សំវណ្ណនាលក្ខណោ បរិក្ខារហារោ នាម, តេន វុត្តំ ‘‘យេ ធម្មា យំ ធម្មំ, ជនយន្តិប្បច្ចយា បរម្បរតោ’’តិអាទិ.