សមារោបនហារវណ្ណនា

អាឃាតាទីនមករណីយតាវចនេន ខន្តិសម្បទា ទស្សិតា ហោតិ. ‘‘អប្បមត្តកំ ខោ បនេត’’ន្តិអាទិនា សោរច្ចសម្បទា. ‘‘អត្ថិ ភិក្ខវេ’’តិអាទិនា ញាណសម្បទា. ‘‘អបរាមសតោ ចស្ស បច្ចត្តញ្ញេវ និព្ពុតិ វិទិតា’’តិ, ‘‘វេទនានំ…បេ… យថាភូតំ វិទិត្វា អនុបាទាវិមុត្តោ’’តិ ច ឯតេហិ សមាធិសម្បទាយ សទ្ធិំ វិជ្ជាវិមុត្តិវសីភាវសម្បទា ទស្សិតា. តត្ថ ខន្តិសម្បទា បដិសង្ខានពលសិទ្ធិតោ សោរច្ចសម្បទាយ បទដ្ឋានំ, សោរច្ចសម្បទា បន អត្ថតោ សីលមេវ, សីលំ សមាធិសម្បទាយ បទដ្ឋានំ. សមាធិ ញាណសម្បទាយ បទដ្ឋានន្តិ អយំ បទដ្ឋានសមារោបនា.

បាណាតិបាតាទីហិ បដិវិរតិវចនំ សីលស្ស បរិយាយវិភាគទស្សនំ. សស្សតវាទាទិវិភាគទស្សនំ បន ទិដ្ឋិយា បរិយាយវចនន្តិ អយំ វេវចនសមារោបនា.

សីលេន វីតិក្កមប្បហានំ, តទង្គប្បហានំ, ទុច្ចរិតសំកិលេសប្បហានញ្ច សិជ្ឈតិ. សមាធិនា បរិយុដ្ឋានប្បហានំ, វិក្ខម្ភនប្បហានំ, តណ្ហាសំកិលេសប្បហានញ្ច សិជ្ឈតិ. បញ្ញាយ ទិដ្ឋិសំកិលេសប្បហានំ, សមុច្ឆេទប្បហានំ, អនុសយប្បហានញ្ច សិជ្ឈតីតិ អយំ បហានសមារោបនា.

សីលាទិធម្មក្ខន្ធេហិ សមថវិបស្សនាភាវនាបារិបូរិំ គច្ឆតិ បហានត្តយសិទ្ធិតោតិ អយំ ភាវនាសមារោបនា. អយំ សុត្តេ អាគតធម្មានំ បទដ្ឋានវេវចនបហានភាវនាសមារោបនវិចារណលក្ខណោ សមារោបនហារោ នាម. វុត្តញ្ហេតំ ‘‘យេ ធម្មា យំ មូលា, យេ ចេកត្ថា បកាសិតា មុនិនា’’តិអាទិ, (នេត្តិ. ៤.១៦) អយំ សោឡសហារយោជនា.

សោឡសហារវណ្ណនា និដ្ឋិតា.