អធិដ្ឋានហារវណ្ណនា

‘‘អវណ្ណ’’ន្តិ សាមញ្ញតោ អធិដ្ឋានំ. តមវិកប្បេត្វា វិសេសវចនំ ‘‘មមំ វា’’តិ. ធម្មស្ស វា សង្ឃស្ស វាតិ បក្ខេបិ ឯស នយោ. តថា ‘‘សីល’’ន្តិ សាមញ្ញតោ អធិដ្ឋានំ. តមវិកប្បេត្វា វិសេសវចនំ ‘‘បាណាតិបាតា បដិវិរតោ’’តិអាទិ. ‘‘អញ្ញេវ ធម្មា’’តិអាទិ សាមញ្ញតោ អធិដ្ឋានំ, តមវិកប្បេត្វា វិសេសវចនំ ‘‘តយិទំ ភិក្ខវេ, តថាគតោ បជានាតី’’តិអាទិ, តថា ‘‘បុព្ពន្តកប្បិកា’’តិអាទិ សាមញ្ញតោ អធិដ្ឋានំ. តមវិកប្បេត្វា វិសេសវចនំ ‘‘សស្សតវាទា’’តិអាទិ. ឥមិនា នយេន សព្ពត្ថ យថាទេសិតមេវ សាមញ្ញវិសេសា និទ្ធារេតព្ពា. អយំ សុត្តាគតានំ ធម្មានំ អវិកប្បនាវសេន យថាទេសិតមេវ សាមញ្ញវិសេសនិទ្ធារណលក្ខណោ អធិដ្ឋានហារោ នាម, យថាហ ‘‘ឯកត្តតាយ ធម្មា, យេបិ ច វេមត្តតាយ និទ្ទិដ្ឋា’’តិអាទិ (នេត្តិ. ៤.១៤).