បញ្ញត្តិហារវណ្ណនា

អាឃាតោ វត្ថុវសេន ទសវិធេន, ឯកូនវីសតិវិធេន វា បញ្ញត្តោ. អបច្ចយោ ឧបវិចារវសេន ឆធា បញ្ញត្តោ. អានន្ទោ បីតិអាទិវសេន វេវចនេន នវធា បញ្ញត្តោ. បីតិ សាមញ្ញតោ បន ខុទ្ទិកាទិវសេន បញ្ចធា បញ្ញត្តោ. សោមនស្សំ ឧបវិចារវសេន ឆធា, សីលំ វារិត្តចារិត្តាទិវសេន អនេកធា, គម្ភីរតាទិវិសេសយុត្តំ ញាណំ ចិត្តុប្បាទវសេន ចតុធា, ទ្វាទសធា វា, វិសយភេទតោ អនេកធា ច, ទិដ្ឋិសស្សតាទិវសេន ទ្វាសដ្ឋិយា ភេទេហិ, តទន្តោគធវិភាគេន អនេកធា ច, វេទនា ឆធា, អដ្ឋសតធា, អនេកធា ច, តស្សា សមុទយោ បញ្ចធា, តថា អត្ថង្គមោបិ, អស្សាទោ ទុវិធេន, អាទីនវោ តិវិធេន, និស្សរណំ ឯកធា, ចតុធា ច, អនុបាទាវិមុត្តិ ទុវិធេន, ‘‘អជានតំ អបស្សត’’ន្តិ វុត្តា អវិជ្ជា វិសយភេទេន ចតុធា, អដ្ឋធា ច, ‘‘តណ្ហាគតាន’’ន្តិអាទិនា វុត្តា តណ្ហា ឆធា, អដ្ឋសតធា, អនេកធា ច, ផស្សោ និស្សយវសេន ឆធា, ឧបាទានំ ចតុធា, ភវោ ទ្វិធា, អនេកធា ច, ជាតិ វេវចនវសេន ឆធា, តថា ជរា សត្តធា, មរណំ អដ្ឋធា, នវធា ច, សោកោ បញ្ចធា, បរិទេវោ ឆធា, ទុក្ខំ ចតុធា, តថា ទោមនស្សំ, ឧបាយាសោ ចតុធា បញ្ញត្តោតិ អយំ បភេទបញ្ញត្តិ, សមូហបញ្ញត្តិ ច.

‘‘សមុទយោ ហោតី’’តិ បភវបញ្ញត្តិ, ‘‘យថាភូតំ បជានាតី’’តិ ទុក្ខស្ស បរិញ្ញាបញ្ញត្តិ, សមុទយស្ស បហានបញ្ញត្តិ, និរោធស្ស សច្ឆិកិរិយាបញ្ញត្តិ, មគ្គស្ស ភាវនាបញ្ញត្តិ. ‘‘អន្តោជាលីកតា’’តិអាទិសព្ពទិដ្ឋីនំ សង្គហបញ្ញត្តិ. ‘‘ឧច្ឆិន្នភវនេត្តិកោ’’តិអាទិ ទុវិធេន បរិនិព្ពានបញ្ញត្តីតិ ឯវំ អាឃាតាទីនំ បភវបញ្ញត្តិបរិញ្ញាបញ្ញត្តិអាទិវសេន. តថា ‘‘អាឃាតោ’’តិ ព្យាបាទស្ស វេវចនបញ្ញត្តិ. ‘‘អប្បច្ចយោ’’តិ ទោមនស្សស្សវេវចនបញ្ញត្តីតិអាទិវសេន ច បញ្ញត្តិភេទោ វិភជ្ជិតព្ពោតិ អយំ ឯកេកស្ស ធម្មស្ស អនេកាហិ បញ្ញត្តីហិ បញ្ញបេតព្ពាការវិភាវនលក្ខណោ បញ្ញត្តិហារោ នាម, តេន វុត្តំ ‘‘ឯកំ ភគវា ធម្មំ, បណ្ណត្តីហិ វិវិធាហិ ទេសេតី’’តិអាទិ (នេត្តិ. ៤.១១).