បរិវត្តនហារវណ្ណនា

អាឃាតាទីនមករណំ ខន្តិសោរច្ចានិ អនុព្រូហេត្វា បដិសង្ខានភាវនាពលសិទ្ធិយា ឧភយហិតបដិបត្តិមាវហតិ. អាឃាតាទយោ បន បវត្តិយមានា ទុព្ពណ្ណតំ, ទុក្ខសេយ្យំ, ភោគហានិំ, អកិត្តិំ, បរេហិ ទុរុបសង្កមនតញ្ច និប្ផាទេន្តា និរយាទីសុ មហាទុក្ខមាវហន្តិ. បាណាតិបាតាទិបដិវិរតិ អវិប្បដិសារាទិកល្យាណំ បរម្បរមាវហតិ. បាណាតិបាតាទិ បន វិប្បដិសារាទិអកល្យាណំ បរម្បរមាវហតិ. គម្ភីរតាទិវិសេសយុត្តំ ញាណំ វេនេយ្យានំ យថារហំ វិជ្ជាភិញ្ញាទិគុណវិសេសមាវហតិ សព្ពញ្ញេយ្យស្ស យថាសភាវាវពោធតោ. តថា គម្ភីរតាទិវិសេសរហិតំ បន ញាណំ ញេយ្យេសុ សាធារណភាវតោ យថាវុត្តគុណវិសេសំ នាវហតិ. សព្ពាបិ ចេតា ទិដ្ឋិយោ យថារហំ សស្សតុច្ឆេទភាវតោ អន្តទ្វយភូតា សក្កាយតីរំ នាតិវត្តន្តិ អនិយ្យានិកសភាវត្តា. សម្មាទិដ្ឋិ បន សបរិក្ខារា មជ្ឈិមបដិបទាភូតា សក្កាយតីរមតិក្កម្ម បារំ គច្ឆតិ និយ្យានិកសភាវត្តា. វេទនានំ យថាភូតំ សមុទយាទិបដិវេធនា អនុបាទាវិមុត្តិមាវហតិ មគ្គភាវតោ. វេទនានំ យថាភូតំ សមុទយាទិអសម្បដិវេធោ សំសារចារកាវរោធមាវហតិ សង្ខារានំ បច្ចយភាវតោ. វេទយិតសភាវបដិច្ឆាទកោ សម្មោហោ តទភិនន្ទនមាវហតិ, យថាភូតាវពោធោ បន តត្ថ និព្ពេធំ, វិរាគញ្ច អាវហតិ. មិច្ឆាភិនិវេសេ អយោនិសោមនសិការសហិតា តណ្ហា អនេកវិហិតំ ទិដ្ឋិជាលំ បសារេតិ. យថាវុត្តតណ្ហាសមុច្ឆេទោ បឋមមគ្គោ តំ ទិដ្ឋិជាលំ សង្កោចេតិ. សស្សតវាទាទិបញ្ញាបនស្ស ផស្សោ បច្ចយោ អសតិ ផស្សេ តទភាវតោ. ទិដ្ឋិពន្ធនពទ្ធានំ ផស្សាយតនាទីនមនិរោធនេន ផស្សាទិអនិរោធោ សំសារទុក្ខស្ស អនិវត្តិយេវ យាថាវតោ ផស្សាយតនាទិបរិញ្ញា សព្ពទិដ្ឋិទស្សនានិ អតិវត្តតិ, តេសំ បន តថា អបរិញ្ញា ទិដ្ឋិទស្សនំ នាតិវត្តតិ. ភវនេត្តិសមុច្ឆេទោ អាយតិំ អត្តភាវស្ស អនិព្ពត្តិយា សំវត្តតិ, អសមុច្ឆិន្នាយ ភវនេត្តិយា អនាគតេ ភវប្បពន្ធោ បរិវត្តតិយេវាតិ អយំ សុត្តេ និទ្ទិដ្ឋានំ ធម្មានំ បដិបក្ខតោ បរិវត្តនលក្ខណោ បរិវត្តនហារោ នាម. កិមាហ ‘‘កុសលាកុសលេ ធម្មេ, និទ្ទិដ្ឋេ ភាវិតេ បហីនេ ចា’’តិអាទិ.