ទេសនាហារវណ្ណនា

ឥទានិ នេត្តិយា, បេដកោបទេសេ ច វុត្តនយវសេន ហារាទីនំ និទ្ធារណំ. តត្ថ ‘‘អត្តា, លោកោ’’តិ ច ទិដ្ឋិយា អធិដ្ឋានភាវេន, វេទនាផស្សាយតនាទិមុខេន ច គហិតេសុ បញ្ចសុ ឧបាទានក្ខន្ធេសុ តណ្ហាវជ្ជិតា បញ្ចុបាទានក្ខន្ធា ទុក្ខសច្ចំ. តណ្ហា សមុទយសច្ចំ. តំ បន ‘‘បរិតស្សនាគហណេន តណ្ហាគតាន’’ន្តិ, ‘‘វេទនាបច្ចយា តណ្ហា’’តិ ច បទេហិ សមុទយគ្គហណេនញ្ច បាឡិយំ សរូបេន គហិតមេវ. អយំ តាវ សុត្តន្តនយោ.

អភិធម្មេ បន វិភង្គប្បករណេ អាគតនយេន អាឃាតានន្ទាទិវចនេហិ, ‘‘អាតប្បមន្វាយា’’តិអាទិបទេហិ, ចិត្តបទោសវចនេន, សព្ពទិដ្ឋិគតិកបទេហិ, កុសលាកុសលគ្គហណេន, ភវគ្គហណេន, សោកាទិគ្គហណេន, ទិដ្ឋិគ្គហណេន, តត្ថ តត្ថ សមុទយគ្គហណេន ចាតិ សង្ខេបតោ សព្ពលោកិយកុសលាកុសលធម្មវិភាវនបទេហិ គហិតា ធម្មកិលេសា សមុទយសច្ចំ. តទុភយេសមប្បវត្តិ និរោធសច្ចំ. តស្ស បន តត្ថ តត្ថ វេទនានំ អត្ថង្គមនិស្សរណបរិយាយេហិ បច្ចត្តំ និព្ពុតិវចនេន, អនុបាទាវិមុត្តិវចនេន ច បាឡិយំ គហណំ វេទិតព្ពំ. និរោធបជាននា បដិបទា មគ្គសច្ចំ. តស្សបិ តត្ថ តត្ថ វេទនានំ សមុទយាទីនិ យថាភូតបដិវេធនាបទេសេន ឆន្នំ ផស្សាយតនានំ សមុទយាទីនិ យថាភូតបជាននបរិយាយេន, ភវនេត្តិយា ឧច្ឆេទវចនេន ច គហណំ វេទិតព្ពំ.

តត្ថ សមុទយេន អស្សាទោ, ទុក្ខេន អាទីនវោ, មគ្គនិរោធេហិ និស្សរណន្តិ ឯវំ ចតុសច្ចវសេន, យានិ បាឡិយំ សរូបេនេវ អាគតានិ អស្សាទាទីនវនិស្សរណានិ, តេសញ្ច វសេន ឥធ អស្សាទាទយោ វេទិតព្ពា. វេនេយ្យានំ តាទិភាវាបត្តិអាទិ ផលំ. យញ្ហិ ទេសនាយ សាធេតព្ពំ ហេដ្ឋា វុត្តំ បយោជនំ. តទេវ ផលន្តិ វុត្តោវាយមត្ថោ. តទត្ថញ្ហិ ឥទំ សុត្តំ ភគវតា ទេសិតំ. អាឃាតាទីនមករណីយតា, អាឃាតាទិផលស្ស ច អនញ្ញសន្តានភាវិតា និន្ទាបសំសាសុ យថាសភាវំ បដិជានននិព្ពេឋនានីតិ ឯវំ តំតំបយោជនាធិគមហេតុ ឧបាយោ. អាឃាតាទីនំ ករណបដិសេធនាទិអបទេសេន អត្ថកាមេហិ តតោ ចិត្តំ សាធុកំ រក្ខិតព្ពន្តិ អយំ អាណារហស្ស ធម្មរាជស្ស អាណត្តីតិ. អយំ អស្សាទាទីនវនិស្សរណផលូបាយាណត្តិវសេន ឆព្ពិធធម្មសន្ទស្សនលក្ខណោ ទេសនាហារោ នាម. វុត្តញ្ច –

‘‘អស្សាទាទីនវតា, និស្សរណម្បិ ច ផលំ ឧបាយោ ច;

អាណត្តី ច ភគវតោ, យោគីនំ ទេសនាហារោ’’តិ.