៧. មហាបេសការសិក្ខាបទវណ្ណនា

៦៤២. សត្តមេ កិញ្ចិមត្តំ អនុបទជ្ជេយ្យាតិ ឥទំ តស្ស កត្តព្ពាការមត្តទស្សនំ, ទានំ បនេត្ថ អង្គំ ន ហោតិ សុត្តវឌ្ឍនវសេនេវ អាបជ្ជិតព្ពត្តា. តេនេវ បទភាជនេបិ ‘‘តស្ស វចនេន អាយតំ វា វិត្ថតំ វា អប្បិតំ វា ករោតិ, បយោគេ ទុក្កដំ, បដិលាភេន និស្សគ្គិយ’’ន្តិ សុត្តវឌ្ឍនាការមេវ ទស្សេត្វា អាបត្តិ វុត្តា. មាតិកាដ្ឋកថាយម្បិ (កង្ខា. អដ្ឋ. មហាបេសការសិក្ខាបទវណ្ណនា) វុត្តំ ‘‘ន ភិក្ខុនោ បិណ្ឌបាតទានមត្តេន តំ និស្សគ្គិយំ ហោតិ. សចេ បន តេ តស្ស វចនេន ចីវរសាមិកានំ ហត្ថតោ សុត្តំ គហេត្វា ឦសកម្បិ អាយតំ វា វិត្ថតំ វា អប្បិតំ វា ករោន្តិ, អថ តេសំ បយោគេ ភិក្ខុនោ ទុក្កដំ, បដិលាភេន និស្សគ្គិយំ ហោតី’’តិ. អាយតាទីសុ សត្តសុ អាការេសុ អាទិម្ហិ តយោ អាការេ សុត្តវឌ្ឍនេន វិនា ន សក្កា កាតុន្តិ អាហ ‘‘សុត្តវឌ្ឍនអាការមេវ ទស្សេតី’’តិ. សុវីតាទយោ ហិ អាការេ វិនាបិ សុត្តវឌ្ឍនេន សក្កា កាតុំ. សេសមេត្ថ ឧត្តានមេវ. អញ្ញាតកអប្បវារិតានំ តន្តវាយេ ឧបសង្កមិត្វា វិកប្បមាបជ្ជនតា, ចីវរស្ស អត្តុទ្ទេសិកតា, តស្ស វចនេន សុត្តវឌ្ឍនំ, ចីវរស្ស បដិលាភោតិ ឥមានេត្ថ ចត្តារិ អង្គានិ.

មហាបេសការសិក្ខាបទវណ្ណនា និដ្ឋិតា.