១១. ទុតិយសង្ឃភេទសិក្ខាបទវណ្ណនា

៤១៧-៤១៨. ឯកាទសមេ យំ វចនំ សមគ្គេបិ វគ្គេ អវយវភូតេ ករោតិ ភិន្ទតិ, តំ កលហការកវចនំ ឥធ វគ្គន្តិ វុច្ចតីតិ អាហ ‘‘វគ្គំ អសាមគ្គិបក្ខិយវចនំ វទន្តី’’តិ. អសាមគ្គិបក្ខេ ភវា អសាមគ្គិបក្ខិយា, កលហកា. តេសំ វចនំ អសាមគ្គិបក្ខិយវចនំ, អសាមគ្គិបក្ខេ វា ភវំ វចនំ អសាមគ្គិបក្ខិយវចនំ. យស្មា ឧព្ពាហិកាទិកម្មំ ពហូនម្បិ កាតុំ វដ្ដតិ, តស្មា ‘‘ន ហិ សង្ឃោ សង្ឃស្ស កម្មំ ករោតី’’តិ ឥទំ និគ្គហវសេន កត្តព្ពកម្មំ សន្ធាយ វុត្តន្តិ វេទិតព្ពំ. អង្គានិ បនេត្ថ ភេទាយ បរក្កមនំ បហាយ អនុវត្តនំ បក្ខិបិត្វា ហេដ្ឋា វុត្តសទិសានេវ.

ទុតិយសង្ឃភេទសិក្ខាបទវណ្ណនា និដ្ឋិតា.