ខន្ធកបុច្ឆាវារោ

បុច្ឆាវិស្សជ្ជនាវណ្ណនា

៣២០. និទានេន ច និទ្ទេសេន ច សទ្ធិន្តិ ឯត្ថ និទានេនាតិ សិក្ខាបទបញ្ញត្តិទេសសង្ខាតេន និទានេន. និទ្ទេសេនាតិ បុគ្គលាទិនិទ្ទេសេន. ឧភយេនបិ តស្ស តស្ស សិក្ខាបទស្ស វត្ថុ ទស្សិតំ, តស្មា វត្ថុនា សទ្ធិំ ខន្ធកំ បុច្ឆិស្សាមីតិ អយមេត្ថ អត្ថោ. តត្ថាតិ តស្មិំ ឧបសម្បទក្ខន្ធកេ. ឧត្តមានិ បទានិ វុត្តានីតិ ‘‘ន, ភិក្ខវេ, ឩនវីសតិវស្សោ បុគ្គលោ ឧបសម្បាទេតព្ពោ’’តិអាទិនា (មហាវ. ៩៩, ១២៤) នយេន ឧត្តមបទានិ វុត្តានិ. ចម្មសំយុត្តេតិ ចម្មក្ខន្ធកេ.