៣. បេសុញ្ញសិក្ខាបទវណ្ណនា

៣៦. តតិយេ ភណ្ឌនំ ជាតំ ឯតេសន្តិ ភណ្ឌនជាតា. សម្មន្តនន្តិ រហោ សំសន្ទនំ. ហត្ថបរាមាសាទិវសេន មត្ថកំ បត្តោ កលហោ ជាតោ ឯតេសន្តិ កលហជាតា. អនាបត្តិគាមិកំ វិរុទ្ធវាទភូតំ វិវាទំ អាបន្នាតិ វិវាទាបន្នា. វិគ្គហសំវត្តនិកា កថា វិគ្គាហិកកថា. បិសតីតិ បិសុណា, វាចា, សមគ្គេ សត្តេ អវយវភូតេ វគ្គេ ភិន្នេ ករោតីតិ អត្ថោ. បិសុណា ឯវ បេសុញ្ញំ. តាយ វាចាយ វា សមន្នាគតោ បិសុណោ, តស្ស កម្មំ បេសុញ្ញំ. បិយភាវស្ស សុញ្ញករណវាចន្តិ ឥមិនា បន ‘‘បិយសុញ្ញករណតោ បិសុណា’’តិ និរុត្តិនយេន អត្ថំ វទតិ.

ឥធាបិ ‘‘ទសហាការេហិ បេសុញ្ញំ ឧបសំហរតី’’តិ វចនតោ ទសវិធអក្កោសវត្ថុវសេនេវ បេសុញ្ញំ ឧបសំហរន្តស្ស បាចិត្តិយំ. បាឡិមុត្តកានំ ចោរោតិអាទីនំ វសេន បន ទុក្កដមេវាតិ វេទិតព្ពំ. ‘‘អនក្កោសវត្ថុភូតំ បន បេសុញ្ញករំ តស្ស កិរិយំ វចនំ វា បិយកម្យតាយ ឧបសំហរន្តស្ស កិញ្ចាបិ ឥមិនា សិក្ខាបទេន អាបត្តិ ន ទិស្សតិ, តថាបិ ទុក្កដេនេត្ថ ភវិតព្ព’’ន្តិ វទន្តិ. ជាតិអាទីហិ អនញ្ញាបទេសេន អក្កោសន្តស្ស ភិក្ខុនោ សុត្វា ភិក្ខុស្ស ឧបសំហរណំ, បិយកម្យតាភេទាធិប្បាយេសុ អញ្ញតរតា, តស្ស វិជាននាតិ ឥមានេត្ថ តីណិ អង្គានិ.

បេសុញ្ញសិក្ខាបទវណ្ណនា និដ្ឋិតា.