ខន្ធកបុច្ឆាកថាវណ្ណនា

៣០០. សេសេសូតិ អភព្ពបុគ្គលបរិទីបកេសុ សព្ពបទេសុ.

៣០២. ‘‘នស្សន្តុ ឯតេ’’តិ បទច្ឆេទោ. បុរក្ខកាតិ ឯត្ថ សាមិអត្ថេ បច្ចត្តវចនំ, ភេទបុរេក្ខកស្ស, ភេទបុរេក្ខកាយាតិ អត្ថោ.

៣០៣. សេសេសូតិ អវសេសេសុ អសំវាសកាទិទីបកេសុ បដិក្ខេបបទេសុ.

៣០៤. ឯកាវ ទុក្កដាបត្តិ វុត្តាតិ វស្សំ អនុបគមនាទិបច្ចយា ជាតិតោ ឯកាវ ទុក្កដាបត្តិ វុត្តា.

៣០៥. ឧបោសថសមា មតាតិ ឧបោសថក្ខន្ធកេ វុត្តសទិសា ជាតា អាបត្តិយោ មតា អធិប្បេតា.

៣០៦. ចម្មេតិ ចម្មក្ខន្ធកេ. វច្ឆតរិំ គហេត្វា មារេន្តានំ ឆព្ពគ្គិយានំ បាចិត្តិ វុត្តាតិ សម្ពន្ធោ. វច្ឆតរិន្តិ ពលសម្បន្នំ តរុណគាវិំ. សា ហិ វច្ឆកភាវំ តរិត្វា អតិក្កមិត្វា ឋិតត្តា ‘‘វច្ឆតរី’’តិ វុច្ចតិ.

៣០៧. អង្គជាតំ ឆុបន្តស្សាតិ គាវីនំ អង្គជាតំ អត្តនោ អង្គជាតេន ពហិ ឆុបន្តស្ស. សេសេសូតិ គាវីនំ វិសាណាទីសុ គហណេ, បិដ្ឋិអភិរុហណេ ច. យថាហ ‘‘ឆព្ពគ្គិយា ភិក្ខូ អចិរវតិយា នទិយា គាវីនំ តរន្តីនំ វិសាណេសុបិ គណ្ហន្តី’’តិអាទិ (មហាវ. ២៥២).

៣០៩. តត្ថ ភេសជ្ជក្ខន្ធកេ. សាមន្តា ទ្វង្គុលេតិ វច្ចមគ្គបស្សាវមគ្គានំ សាមន្តា ទ្វង្គុលមត្តេ បទេសេ. សត្ថកម្មំ ករោន្តស្ស ថុល្លច្ចយមុទីរិតន្តិ យោជនា. យថាហ – ‘‘ន, ភិក្ខវេ, សម្ពាធស្ស សាមន្តា ទ្វង្គុលេ សត្ថកម្មំ វា វត្ថិកម្មំ វា ការេតព្ពំ, យោ ការេយ្យ, អាបត្តិ ថុល្លច្ចយស្សា’’តិ (មហាវ. ២៧៩). ឯត្ថ ច ‘‘សាមន្តា ទ្វង្គុលេ’’តិ ឥទំ សត្ថកម្មំយេវ សន្ធាយ វុត្តំ. វត្ថិកម្មំ បន សម្ពាធេយេវ បដិក្ខិត្តំ.

‘‘ន, ភិក្ខវេ, អញ្ញត្រ និមន្តិតេន អញ្ញស្ស ភោជ្ជយាគុ បរិភុញ្ជិតព្ពា, យោ បរិភុញ្ជេយ្យ, យថាធម្មោ ការេតព្ពោ’’តិ (មហាវ. ២៨៣) វុត្តត្តា អាហ ‘‘ភោជ្ជយាគូសុ បាចិត្តី’’តិ. ឯត្ថ ច ភោជ្ជយាគុ នាម ពហលយាគុ. ‘‘បិណ្ឌំ វដ្ដេត្វា បាតព្ពយាគូ’’តិ គណ្ឋិបទេ វុត្តំ. បាចិត្តីតិ បរម្បរភោជនបវារណសិក្ខាបទេហិ បាចិត្តិ. សេសេសូតិ អន្តោវុត្ថអន្តោបក្កសយំបក្កបរិភោគាទីសុ. យថាហ ‘‘ន, ភិក្ខវេ, អន្តោវុត្ថំ អន្តោបក្កំ សាមំបក្កំ បរិភុញ្ជិតព្ពំ, យោ បរិភុញ្ជេយ្យ, អាបត្តិ ទុក្កដស្សា’’តិអាទិ (មហាវ. ២៧៤).

៣១០. ចីវរសំយុត្តេតិ ចីវរក្ខន្ធកេ.

៣១៣. ចម្បេយ្យកេ ច កោសម្ពេតិ ចម្បេយ្យក្ខន្ធកេ ចេវ កោសម្ពកក្ខន្ធកេ ច. ‘‘កម្មស្មិ’’ន្តិអាទីសុបិ ឯសេវ នយោ.

៣១៧. រោមន្ថេតិ ភុត្តស្ស លហុំ បាកត្តាយ កុច្ឆិគតំ មុខំ អារោបេត្វា សណ្ហករណវសេន អនុចាលនេ.

៣១៨. សេនាសនស្មិន្តិ សេនាសនក្ខន្ធកេ. គរុនោតិ គរុភណ្ឌស្ស.

៣២០. សង្ឃភេទេតិ សង្ឃភេទកក្ខន្ធកេ.

៣២១. ភេទានុវត្តកានន្តិ សង្ឃភេទានុវត្តកានំ. គណភោគេតិ គណភោជនេ.

៣២២. សាតិ ឯត្ថ សព្ពវត្តេសុ អនាទរិយេន ហោតីតិ សេសោ. សេសំ ឧត្តានត្ថមេវ.

ឥតិ ឧត្តរេ លីនត្ថបកាសនិយា

ខន្ធកបុច្ឆាកថាវណ្ណនា និដ្ឋិតា.