អធិករណបច្ចយកថាវណ្ណនា

២៨៥. វិវាទាធិករណម្ហាតិ ‘‘អធម្មំ ‘ធម្មោ’តិ ទីបេតី’’តិអាទិនយប្បវត្តា អដ្ឋារសភេទករវត្ថុនិស្សិតា វិវាទាធិករណម្ហា.

២៨៦. ឧបសម្បន្នំ ឱមសតោ ភិក្ខុស្ស បាចិត្តិ ហោតីតិ យោជនា.

២៨៧. អនុវាទាធិករណបច្ចយាតិ ចោទនាបរនាមធេយ្យំ អនុវាទាធិករណមេវ បច្ចយោ, តស្មា, អនុវាទនាធិករណហេតូតិ អត្ថោ.

២៨៩. ‘‘តថា’’តិ ឥមិនា អមូលកត្តំ អតិទិសតិ.

២៩០. អាបត្តិបច្ចយាតិ អាបត្តាធិករណបច្ចយា.

២៩៣. កិច្ចាធិករណបច្ចយាតិ អបលោកនាទិចតុព្ពិធកម្មសង្ខាតកិច្ចាធិករណហេតុ.

២៩៤. អច្ចជន្តីវាតិ អត្តនោ លទ្ធិំ អបរិច្ចជន្តី ឯវ.

២៩៧. បាបិកាយ ទិដ្ឋិយា បរិច្ចជនត្ថាយ កតាយ យាវតតិយកំ សមនុភាសនាយ តំ ទិដ្ឋិំ អច្ចជន្តិយា តស្សា ភិក្ខុនិយា, តស្ស ភិក្ខុស្ស ច អច្ចជតោ បាចិត្តិ ហោតីតិ យោជនា.

ឥតិ ឧត្តរេ លីនត្ថបកាសនិយា

អធិករណបច្ចយកថាវណ្ណនា និដ្ឋិតា.