ផលភេសជ្ជកថា

ផលភេសជ្ជកថាយំ ‘‘អនុជានាមិ, ភិក្ខវេ, ផលានិ ភេសជ្ជានិ ពិឡង្គំ បិប្បលិំ មរិចំ ហរីតកំ វិភីតកំ អាមលកំ គោដ្ឋផលំ, យានិ វា បនញ្ញានិបិ អត្ថិ ផលានិ ភេសជ្ជានិ នេវ ខាទនីយេ ខាទនីយត្ថំ ផរន្តិ, ន ភោជនីយេ ភោជនីយត្ថំ ផរន្តិ, តានិ បដិគ្គហេត្វា យាវជីវំ បរិហរិតុំ, សតិ បច្ចយេ បរិភុញ្ជិតុំ, អសតិ បច្ចយេ បរិភុញ្ជន្តស្ស អាបត្តិ ទុក្កដស្សា’’តិ (មហាវ. ២៦៣) វចនតោ ខាទនីយភោជនីយត្ថំ អផរន្តានិ តានិ ផលានិ បដិគ្គហេត្វា យាវជីវំ បរិហរិតុំ, សតិ បច្ចយេ បរិភុញ្ជិតុម្បិ វដ្ដតិ.