ជតុភេសជ្ជកថា

ជតុភេសជ្ជកថាយំ ‘‘អនុជានាមិ, ភិក្ខវេ, ជតូនិ ភេសជ្ជានិ ហិង្គុំ ហិង្គុជតុំ ហិង្គុសិបាដិកំ តកំ តកបត្តិំ តកបណ្ណិំ សជ្ជុលសំ, យានិ វា បនញ្ញានិបិ អត្ថិ ជតូនិ ភេសជ្ជានិ នេវ ខាទនីយេ ខាទនីយត្ថំ ផរន្តិ, ន ភោជនីយេ ភោជនីយត្ថំ ផរន្តិ, តានិ បដិគ្គហេត្វា យាវជីវំ បរិហរិតុំ, សតិ បច្ចយេ បរិភុញ្ជិតុំ, អសតិ បច្ចយេ បរិភុញ្ជន្តស្ស អាបត្តិ ទុក្កដស្សា’’តិ (មហាវ. ២៦៣) វចនតោ តានិ ជតូនិ ភេសជ្ជានិ បដិគ្គហេត្វា យាវជីវំ បរិហរិតុំ, សតិ បច្ចយេ បរិភុញ្ជិតុំ វដ្ដតិ. តត្ថ ហិង្គុហិង្គុជតុហិង្គុសិបាដិកា ហិង្គុជាតិយោយេវ. តកតកបត្តិតកបណ្ណយោ លាខាជាតិយោ.

វជិរពុទ្ធិដីកាយំ (វជិរ. ដី. មហាវគ្គ ២៦៣) បន ‘‘ហិង្គុជតុ នាម ហិង្គុរុក្ខស្ស ទណ្ឌបល្លវបវាឡបាកនិប្ផន្នា. ហិង្គុសិបាដិកា នាម តស្ស មូលសាខបាកនិប្ផន្នា. តកំ នាម តស្ស រុក្ខស្ស តចបាកោទកំ. តកបត្តីតិ តស្ស បត្តបាកោទកំ. តកបណ្ណីតិ តស្ស ផលបាកោទកំ. អថ វា ‘តកំ នាម លាខា. តកបត្តីតិ កិត្តិមលោហសាខា. តកបណ្ណីតិ បក្កលាខា’តិ លិខិតំ. សតិ បច្ចយេតិ ឯត្ថ សតិបច្ចយតា គិលានាគិលានវសេន ទ្វិធា វេទិតព្ពា. វិកាលភោជនសិក្ខាបទស្ស ហិ អនាបត្តិវារេ យាមកាលិកាទីនំ តិណ្ណម្បិ អវិសេសេន សតិបច្ចយតា វុត្តា. ឥមស្មិំ ខន្ធកេ ‘អនុជានាមិ, ភិក្ខវេ, គិលានស្ស គុឡំ អគិលានស្ស គុឡោទកំ. អនុជានាមិ, ភិក្ខវេ, គិលានស្ស លោណសោវីរកំ, អគិលានស្ស ឧទកសម្ភិន្ន’ន្តិ (មហាវ. ២៧៣) វុត្តំ, តស្មា សិទ្ធំ ‘សតិបច្ចយតា គិលានាគិលានវសេន ទុវិធា’តិ, អញ្ញថា អសតិ បច្ចយេ គុឡោទកាទិ អាបជ្ជតិ, តតោ ច បាឡិវិរោធោ. អាហារត្ថន្តិ អាហារបយោជនំ, អាហារកិច្ចយាបនន្តិ អត្ថោតិ ច. តេលបរិភោគេនាតិ សត្តាហកាលិកបរិភោគេន. បិដ្ឋេហីតិ បិសិតតេលេហិ. កោដ្ឋផលន្តិ កោដ្ឋរុក្ខស្ស ផលំ, មទនផលំ វាតិ ច លិខិត’’ន្តិ វុត្តំ.