បិដ្ឋភេសជ្ជកថា

បិដ្ឋភេសជ្ជកថាយំ ‘‘អនុជានាមិ, ភិក្ខវេ, និសទំ និសទបោតក’’ន្តិ (មហាវ. ២៦៣) វចនតោ បិសិតេហិ ចុណ្ណកតេហិ មូលភេសជ្ជេហិ អត្ថេ សតិ និសទញ្ច និសទបោតកញ្ច បរិហរិតុំ វដ្ដតិ. តត្ថ និសទំ និសទបោតកន្តិ បិសនសិលា ច បិសនបោតោ ច. និសទន្តិ បិសន្តិ ចុណ្ណវិចុណ្ណំ ករោន្តិ មូលភេសជ្ជាទយោ ឯត្ថាតិ និសទំ, បិសនសិលា. និសទន្តិ បិសន្តិ ចុណ្ណវិចុណ្ណំ ករោន្តិ មូលភេសជ្ជាទយោ ឯតេនាតិ និសទំ, បោសេតព្ពោតិ បោតោ, ទារកោ. ខុទ្ទកប្បមាណតាយ បោតោ វិយាតិ បោតោ, និសទញ្ច តំ បោតោ ចាតិ និសទបោតោ, តំ និសទបោតកំ. និបុព្ពសទ ចុណ្ណករណេតិ ធាតុ.