កសាវភេសជ្ជកថា

កសាវភេសជ្ជកថាយំ ‘‘អនុជានាមិ, ភិក្ខវេ, កសាវានិ ភេសជ្ជានិ និម្ពកសាវំ កុដជកសាវំ បដោលកសាវំ ផគ្គវកសាវំ នត្តមាលកសាវំ, យានិ វា បនញ្ញានិបិ អត្ថិ កសាវានិ ភេសជ្ជានិ នេវ ខាទនីយេ ខាទនីយត្ថំ ផរន្តិ, ន ភោជនីយេ ភោជនីយត្ថំ ផរន្តិ, តានិ បដិគ្គហេត្វា យាវជីវំ បរិហរិតុំ, សតិ បច្ចយេ បរិភុញ្ជិតុំ, អសតិ បច្ចយេ បរិភុញ្ជន្តស្ស អាបត្តិ ទុក្កដស្សា’’តិ (មហាវ. ២៦៣) វចនតោ តានិបិ កសាវភេសជ្ជានិ បដិគ្គហេត្វា យាវជីវំ បរិហរិតុំ សតិ បច្ចយេ បរិភុញ្ជិតុំ វដ្ដតិ. តត្ថ ផគ្គវន្តិ លតាជាតិ. នត្តមាលន្តិ ករញ្ជំ. ‘‘កសាវេហីតិ តចាទីនិ ឧទកេ តាបេត្វា គហិតឩសរេហី’’តិ វិមតិវិនោទនិយំ (វិ. វិ. ដី. មហាវគ្គ ២.២៦៣) វុត្តំ.