និសីទនាទិកថា

និសីទនាទិកថាយំ ‘‘អនុជានាមិ, ភិក្ខវេ, កាយគុត្តិយា ចីវរគុត្តិយា សេនាសនគុត្តិយា និសីទន’’ន្តិ (មហាវ. ៣៥៣) វចនតោ កាយាទីនំ អសុចិមុច្ចនាទិតោ គោបនត្ថាយ និសីទនំ ធារេតុំ វដ្ដតិ. តស្ស វិធានំ ហេដ្ឋា វុត្តមេវ. ‘‘អនុជានាមិ, ភិក្ខវេ, យាវមហន្តំ បច្ចត្ថរណំ អាកង្ខតិ, តាវមហន្តំ បច្ចត្ថរណំ កាតុ’’ន្តិ វចនតោ អតិខុទ្ទកេន និសីទនេន សេនាសនស្ស អគោបនត្តា មហន្តម្បិ បច្ចត្ថរណំ កាតុំ វដ្ដតិ. ‘‘អនុជានាមិ, ភិក្ខវេ, យស្ស កណ្ឌុ វា បីឡកា វា អស្សាវោ វា ថុល្លកច្ឆុ វា អាពាធោ, កណ្ឌុបដិច្ឆាទិ’’ន្តិ វចនតោ ឦទិសេសុ អាពាធេសុ សន្តេសុ ចីវរាទិគុត្តត្ថាយ កណ្ឌុបដិច្ឆាទិ វដ្ដតិ. តត្ថ បមាណំ ហេដ្ឋា វុត្តមេវ. ‘‘អនុជានាមិ, ភិក្ខវេ, មុខបុញ្ឆនចោឡ’’ន្តិ (មហាវ. ៣៥៥) វចនតោ មុខសោធនត្ថាយ មុខបុញ្ឆនចោឡំ វដ្ដតិ. តម្បិ ហេដ្ឋា វុត្តមេវ. ‘‘អនុជានាមិ, ភិក្ខវេ, បរិក្ខារចោឡក’’ន្តិ វចនតោ តិចីវរេ បរិបុណ្ណេ បរិស្សាវនថវិកាទីហិ អត្ថេ សតិ បរិក្ខារចោឡំ វដ្ដតិ. ‘‘អនុជានាមិ, ភិក្ខវេ, តិចីវរំ អធិដ្ឋាតុំ ន វិកប្បេតុំ, វស្សិកសាដិកំ វស្សានំ ចាតុមាសំ អធិដ្ឋាតុំ តតោ បរំ វិកប្បេតុំ, និសីទនំ អធិដ្ឋាតុំ ន វិកប្បេតុំ, បច្ចត្ថរណំ អធិដ្ឋាតុំ ន វិកប្បេតុំ, កណ្ឌុបដិច្ឆាទិំ យាវ អាពាធា អធិដ្ឋាតុំ តតោ បរំ វិកប្បេតុំ, មុខបុញ្ឆនចោឡំ អធិដ្ឋាតុំ ន វិកប្បេតុំ, បរិក្ខារចោឡំ អធិដ្ឋាតុំ ន វិកប្បេតុ’’ន្តិ (មហាវ. ៣៥៨) វចនតោ វុត្តនយេន អធិដ្ឋានញ្ច វិកប្បនា ច កាតព្ពា. អយមេត្ថ សង្ខេបោ, វិត្ថារោ បន ហេដ្ឋា វុត្តោវ.