យានកថា

យានកថាយំ ‘‘អនុជានាមិ, ភិក្ខវេ, បុរិសយុត្តំ ហត្ថវដ្ដក’’ន្តិ (មហាវ. ២៥៣) ឯត្ថ អនុជានាមិ, ភិក្ខវេ, បុរិសយុត្តំ, អនុជានាមិ, ភិក្ខវេ, ហត្ថវដ្ដកន្តិ ឯវំ បច្ចេកំ វាក្យបរិសមាបនំ អធិប្បេតន្តិ អាហ ‘‘បុរិសយុត្តំ ឥត្ថិសារថិ វា…បេ… បុរិសា វា, វដ្ដតិយេវា’’តិ. ‘‘បីឋកសិវិកន្តិ បីឋកយានំ. បាដង្កិន្តិ អន្ទោលិកាយេតំ អធិវចន’’ន្តិ សារត្ថទីបនិយំ (សារត្ថ. ដី. មហាវគ្គ ៣.២៥៣) វុត្តំ, ‘‘បីឋកសិវិកន្តិ ផលកាទិនា កតំ បីឋកយានំ. បដបោតលិកំ អន្ទោលិកា. សព្ពម្បិ យានំ ឧបាហនេនបិ គន្តុំ អសមត្ថស្ស គិលានស្ស អនុញ្ញាត’’ន្តិ វិមតិវិនោទនិយំ (វិ. វិ. ដី. មហាវគ្គ ២.២៥៣).