អាសន្ទាទិកថា

៥៥. អាសន្ទាទិកថាយំ ចតុរស្សបីឋន្តិ សមចតុរស្សំ. អដ្ឋង្គុលបាទំ វដ្ដតីតិ អដ្ឋង្គុលបាទកមេវ វដ្ដតិ. បមាណាតិក្កន្តោបិ វដ្ដតីតិ សមចតុរស្សមេវ សន្ធាយ វុត្តំ. អាយតចតុរស្សា បន សត្តង្គបញ្ចង្គាបិ ឧច្ចបាទា ន វដ្ដន្តិ. វេត្តេហេវ ចតុរស្សាទិអាការេន កតំ ភទ្ទបីឋន្តិ អាហ ‘‘វេត្តមយបីឋ’’ន្តិ. ទារុបដ្ដិកាយ ឧបរីតិ អដនិអាការេន ឋិតទារុបដលស្ស ហេដ្ឋា. ឧទ្ធំ បាទំ កត្វា បវេសនកាលញ្ហិ សន្ធាយ ‘‘ឧបរី’’តិ វុត្តំ. ឯឡកស្ស បច្ឆិមបាទទ្វយំ វិយ វង្កាការេន ឋិតត្តា បនេតំ ‘‘ឯឡកបាទបីឋ’’ន្តិ (វិ. វិ. ដី. ចូឡវគ្គ ២.២៩៧) វុត្តំ.