សេទមោចនគាថា

អវិប្បវាសបញ្ហាវណ្ណនា

៤៧៩. សេទមោចនគាថាសុ អកប្បិយសម្ភោគោតិ អនុបសម្បន្នេហិ សទ្ធិំ កាតុំ បដិក្ខិត្តោ ឧបោសថាទិសំវាសោ ឯវ វុត្តោ. បញ្ហា មេសាតិ ឯត្ថ ម-ការោ បទសន្ធិករោ. ឯសាតិ ច លិង្គវិបល្លាសវសេន វុត្តំ, បញ្ហោ ឯសោតិ អត្ថោ. បញ្ហ-សទ្ទោ វា ទ្វិលិង្គោ ទដ្ឋព្ពោ. តេនាហ ‘‘ឯសា បញ្ហា’’តិអាទិ.

គរុភណ្ឌំ សន្ធាយាតិ គរុភណ្ឌេន គរុភណ្ឌបរិវត្តនំ សន្ធាយ. ទសាតិ ទស អវន្ទិយបុគ្គលេ. ឯកាទសេតិ អភព្ពបុគ្គលេ. សិក្ខាយ អសាធារណោតិ ខុរភណ្ឌំ ធារេតុំ អនុញ្ញាតសិក្ខាបទេន ភិក្ខូហិ អសាធារណសិក្ខាបទោតិ អត្ថោ.

ឧព្ភក្ខកេ ន វទាមីតិ អក្ខតោ ឧទ្ធំ សីសេ ឋិតមុខមគ្គេបិ បារាជិកំ សន្ធាយ ន វទាមិ. អធោនាភិន្តិ នាភិតោ ហេដ្ឋា ឋិតវច្ចបស្សាវមគ្គេបិ វិវជ្ជិយ អញ្ញស្មិំ សរីរប្បទេសេ មេថុនធម្មបច្ចយា កថំ បារាជិកោ សិយាតិ អត្ថោ.

ឆេជ្ជវត្ថុន្តិ បារាជិកំ.

អវិប្បវាសបញ្ហាវណ្ណនា និដ្ឋិតា.

បារាជិកាទិបញ្ហាវណ្ណនា

៤៨០. ទុស្សកុដិអាទីនីតិ អាទិ-សទ្ទេន អច្ឆតរតិបុបដ្ដាទីហិ, តិណបណ្ណាទីហិ ច បដិច្ឆន្នកុដិយោ សង្គណ្ហាតិ. តាទិសាយ ហិ កុដិយា ពហិ ឋត្វា អន្តោ ឋិតាយ ឥត្ថិយា មគ្គេ ទុស្សាទិនា សន្ថតំ កត្វា បវេសេន្តោបិ បារាជិកោ សិយា. លិង្គបរិវត្តំ សន្ធាយ វុត្តាតិ លិង្គេ បរិវត្តេ បដិគ្គហណស្ស វិជហនតោ បុន អប្បដិគ្គហេត្វា បរិភុញ្ជនាបត្តិំ សន្ធាយ វុត្តំ.

បាឡិយំ ភិក្ខូ សិយា វីសតិយា សមាគតាតិ វីសតិយា សង្ខាតាយ ភិក្ខូ សមាគតា, ឯតេន សព្ពកម្មារហតំ សង្ឃស្ស ទស្សេតិ.

និវត្ថោតិ គាថាយ អន្តរវាសកេន និវត្ថោ ឧត្តរាសង្គេន ទិគុណំ កត្វា បារុតសង្ឃាដិយោ. ឥតិ តានិ តីណិបិ ចីវរានិ កាយេ គតានេវ ភិក្ខុនិយា ពិន្ទុមត្តំ កាឡកំ ឧទកេន ធោវិតមត្តេ និស្សគ្គិយានិ ហោន្តីតិ អត្ថោ.

ឥត្ថិំ ហនេតិ គាថាយ ន មាតុភូតំ ឥត្ថិំ ហនេយ្យ, ន បិតុភូតំ បុរិសំ ហនេយ្យ. អនរិយន្តិ តញ្ច អនរហន្តមេវ ហនេយ្យ, ឯតេន អរហន្តឃាតកោបិ ន ហោតីតិ ទស្សេតិ. អនន្តរំ ផុសេតិ អានន្តរិយំ ផុសតីតិ អត្ថោ.

៤៨១. សុប្បតិដ្ឋិត-និគ្រោធសទិសន្តិ យោជនវិត្ថតំ រុក្ខំ សន្ធាយ វុត្តំ.

សត្តរសកេសូតិ ភិក្ខុនីនំ បញ្ញត្តសត្តរសសង្ឃាទិសេសេសុ.

បារាជិកាទិបញ្ហាវណ្ណនា និដ្ឋិតា.