មហាសង្គាមំ

វោហរន្តេន ជានិតព្ពាទិវណ្ណនា

៣៦៨-៣៧៤. មហាសង្គាមេ បាឡិយំ សង្គាមាវចរេនាតិ អនុវិជ្ជកំ សន្ធាយ វុត្តំ. វត្ថូតិ មេថុនាទិវីតិក្កមោ. និទានន្តិ វេសាលិអាទិបញ្ញត្តិដ្ឋានំ. បុគ្គលោ អការកោ ជានិតព្ពោតិ ឯត្ថ សង្ឃេ វា គណេ វា បរិណាយកភូតោ បុគ្គលោតិ ទដ្ឋព្ពំ.

៣៧៥. វិស្សដ្ឋិសិក្ខាបទន្តិ នីលាទិទសន្នំ សុក្កានំ មោចនវសេន វុត្តំ សុក្កវិស្សដ្ឋិសិក្ខាបទំ. តញ្ហិ តេលាទិមន្ទវណ្ណានំ នីលាទិបចុរវណ្ណានំ វសេន ‘‘វណ្ណាវណ្ណា’’តិ វុត្តំ. បចុរត្ថេ ហិ ឥធ អវណ្ណោតិ អ-ការោ.

៣៧៩. យាវ អកនិដ្ឋព្រហ្មានោ ទ្វិធា ហោន្តីតិ ឯត្ថ អវិហាទិសុទ្ធាវាសិកា អញ្ញភូមីសុ អរិយា ធម្មវាទីបក្ខំ ឯវ ភជន្តិ, ឥតរេ ទុវិធម្បីតិ ទដ្ឋព្ពំ.

វោហរន្តេន ជានិតព្ពាទិវណ្ណនា និដ្ឋិតា.