៥. មញ្ចបីឋសិក្ខាបទវណ្ណនា

៥២១. បញ្ចមេ បាឡិយំ អាសយតោ, ភិក្ខវេ, មោឃបុរិសោ វេទិតព្ពោតិ ហីនជ្ឈាសយវសេន អយំ តុច្ឆបុរិសោតិ ញាតព្ពោ, ហីនាយ បច្ចយេ លោលតាយ បុគ្គលស្ស តុច្ឆតា ញាតព្ពាតិ អធិប្បាយោ. ឥមស្មិំ សិក្ខាបទេ, ឥតោ បរេសុ ច បញ្ចសុ អត្តនា ការាបិតស្ស បដិលាភេ ឯវ បាចិត្តិយំ. បរិភោគេ បនស្ស, អញ្ញេសញ្ច ទុក្កដមេវ. បមាណាតិក្កន្តមញ្ចបីឋតា, អត្តនោ ករណការាបនវសេន បដិលាភោតិ ទ្វេ អង្គានិ.

មញ្ចបីឋសិក្ខាបទវណ្ណនា និដ្ឋិតា.