១. កោសិយសិក្ខាបទវណ្ណនា

៥៤២. ទុតិយស្ស បឋមេ បាឡិយំ កោសិយការកេតិ កោសការកបាណានំ កោសតោ និព្ពត្តត្តា កោសិយេន សុត្តេន វត្ថាទិំ ករោន្តេ. សង្ឃាតន្តិ វិនាសំ.

៥៤៤. ‘‘អវាយិម’’ន្តិ វុត្តត្តា វាយិត្វា ករណេ អនាបត្តិ. មិស្សេត្វាតិ ឯឡកលោមេហិ មិស្សេត្វា. បដិលាភេនាតិ បរិនិដ្ឋានេន ‘‘បរិយោសាបេតិ, និស្សគ្គិយ’’ន្តិ (បារា. ៥៤៥) វុត្តត្តា, កោសិយមិស្សកតា, អត្តនោ អត្ថាយ សន្ថតស្ស ករណការាបនំ, បដិលាភោ ចាតិ ឥមានេត្ថ តីណិ អង្គានិ.

កោសិយសិក្ខាបទវណ្ណនា និដ្ឋិតា.

៥៤៧-៥៥២. ទុតិយញ្ច តតិយញ្ច ឧត្តានមេវ. តត្ថ បន ឱទាតាទិមិស្សកសញ្ញាយ សុទ្ធកាឡកានញ្ញេវ សន្ថតស្ស ករណវសេន ចេត្ថ ទ្វេភាគតោ អធិកេសុ សុទ្ធកាឡកេសុ អនធិកសញ្ញាយ សន្ថតស្ស ករណវសេន ច អចិត្តកតា វេទិតព្ពា.