៧. វិហារការសិក្ខាបទវណ្ណនា

៣៦៥. សត្តមេ បូជាវចនប្បយោគេ កត្តរិ សាមិវចនស្សបិ ឥច្ឆិតត្តា ‘‘គាមស្ស វា បូជិត’’ន្តិ វុត្តំ. រូបិន្ទ្រិយេសុ វិជ្ជមានំ សន្ធាយ ឯកិន្ទ្រិយតា វុច្ចតីតិ អាហ ‘‘កាយិន្ទ្រិយំ សន្ធាយា’’តិ. តេ ហិ មនិន្ទ្រិយម្បិ ភូតគាមានំ ឥច្ឆន្តិ.

៣៦៦. កិរិយតោ សមុដ្ឋានាភាវោតិ វត្ថុនោ អទេសនាសង្ខាតំ អកិរិយំ វិនា ន កេវលំ កិរិយាយ សមុដ្ឋានភាវោ. កិរិយាកិរិយតោ ហិ ឥទំ សមុដ្ឋាតិ. ឥមស្មិំ សិក្ខាបទេ ភិក្ខូ វា អនភិនេយ្យាតិ ឯត្ថ វា-សទ្ទោ សមុច្ចយត្ថោ, តេន ‘‘មហល្លកញ្ច វិហារំ ករេយ្យ, ភិក្ខូ ច អនភិនេយ្យា’’តិ កិរិយញ្ច អកិរិយញ្ច សមុច្ចិនោតិ.

វិហារការសិក្ខាបទវណ្ណនា និដ្ឋិតា.