៥. ទុតិយសេនាសនសិក្ខាបទវណ្ណនា

១១៦-៧. ឯត្តកមេវ វុត្តមដ្ឋកថាសុ, តថាបិ បទដ្ឋាទយោបិ លព្ភន្តិ ឯវ. អនុគណ្ឋិបទេ ‘‘អញ្ញំ អត្ថរណាទិ អកប្បិយត្តា ន វុត្ត’’ន្តិ វុត្តំ. ‘‘មញ្ចំ វា បីឋំ វា វិហារេ វា វិហារូបចារេ វា’តិ ឥមិនាបិ សំសន្ទនត្ថំ ‘កិញ្ចាបិ វុត្តោ, អថ ខោ’តិអាទិ អារទ្ធ’’ន្តិ ច វុត្តំ. ឧបចារមត្តញ្ចេតំ ‘‘រុក្ខមូលេ’’តិ, តត្ថ វត្តព្ពំ នត្ថិ.

១១៨. អនាបុច្ឆិត្វាបិ គន្តុំ វដ្ដតីតិ អសតិយា គច្ឆតោបិ អនាបត្តិ, អាបុច្ឆនំ បន វត្តំ សញ្ចិច្ច អនាបុច្ឆតោ វត្តភេទទុក្កដត្តា. បុគ្គលិកសេនាសនេ សង្ឃិកសេយ្យំ, សង្ឃិកសេនាសនេ វា បុគ្គលិកសេយ្យំ អត្ថរិត្វា គច្ឆន្តស្ស ទុក្កដំ យុត្តំ វិយ. កស្មា? ‘‘សេយ្យាមត្តមេវ នស្សេយ្យា’’តិ វុត្តត្តា. ឥធ បន ‘‘បលិពុទ្ធំ បលិពុទ្ធោ’’តិ ទុវិធម្បិ អត្ថិ.

ទុតិយសេនាសនសិក្ខាបទវណ្ណនា និដ្ឋិតា.