៤. តតិយសំខិត្តសុត្តវណ្ណនា

៤៨៤. សីលក្ខន្ធាទីហិ សទ្ធិន្ទ្រិយាទីហិ ច បរិតោ បូរណេន បរិបូរំ អរហត្តមគ្គំ ករោន្តោ និប្ផត្តិតោ អរហត្តផលំ អារាធេតិ និប្ផាទេតិ. តយោ បទេសមគ្គេតិ សីលក្ខន្ធាទីនំ អបារិបូរិយា ឯកទេសភូតេ តយោ ហេដ្ឋិមមគ្គេ. បទេសំ ហេដ្ឋិមផលត្តយំ. ចតូសូតិ ឥមស្មិំ វគ្គេ បឋមាទីសុ ចតូសុ សុត្តេសុ. កាមញ្ចេត្ថ តតិយេ ‘‘តតោតិ ផលវសេន និស្សក្ក’’ន្តិ វុត្តំ, ចតុត្ថេ ‘‘បរិបូរំ បរិបូរការី អារាធេតិ, បទេសំ បទេសការី’’តិ, ‘‘ចតូសុបិ សុត្តេសុ មិស្សកានេវ ឥន្ទ្រិយានិ កថិតានី’’តិ បន វចនតោ វិបស្សនាវសេនបិ យោជនា លព្ភតេវាតិ ទដ្ឋព្ពំ.