៧. ទុច្ចរិតសុត្តវណ្ណនា

៤១៣. ឯត្ថាបិ មនោសុចរិតំ សីលំ នាមាតិ ទស្សេតីតិ កត្វា វុត្តំ ‘‘បច្ឆិមាបិ តយោ’’តិ. អនភិជ្ឈាអព្យាបាទសម្មាទិដ្ឋិធម្មា សីលំ ហោតីតិ វេទិតព្ពា កាយវចីសុចរិតេហិ សទ្ធិំ មនោសុចរិតម្បិ វត្វា ‘‘តតោ ត្វំ ភិក្ខុ សីលំ និស្សាយ សីលេ បតិដ្ឋាយា’’តិ វុត្តត្តា. សេសំ វុត្តនយមេវ. ឆដ្ឋសត្តមេសូតិ ឆដ្ឋសត្តមវគ្គេសុ អបុព្ពំ នត្ថិ. តេន វុត្តំ ‘‘ហេដ្ឋា វុត្តនយេនេវ អត្ថោ វេទិតព្ពោ’’តិ. វគ្គបេយ្យាលតោ បន ឥមស្មិំ សតិបដ្ឋានសំយុត្តេ កតិបយវគ្គា សង្គហំ អារូឡ្ហា, តថាបិ តេសំ អត្ថវិសេសាភាវតោ ឯកច្ចេសុ បោត្ថកេសុ មុខមត្តំ ទស្សេត្វា សំខិត្តា, ឯកច្ចេសុ អតិសំខិត្តាវ, តេ សង្ខេបវសេន ទ្វេ កត្វា ‘‘ឆដ្ឋសត្តមេសូ’’តិ វុត្តំ.

អមតវគ្គវណ្ណនា និដ្ឋិតា.

សតិបដ្ឋានសំយុត្តវណ្ណនា និដ្ឋិតា.