២. គិលានវគ្គោ

១-៣. បាណសុត្តាទិវណ្ណនា

១៩២-១៩៤. យេសន្តិ យេសំ សត្តានំ. ចត្តារោ ឥរិយាបថា អត្ថិ លព្ភន្តិ តទុបគសរីរាវយវលាភេន. ឯតន្តិ ‘‘ចត្តារោ ឥរិយាបថេ កប្បេន្តី’’តិ ឯតំ វចនំ. ‘‘វិវេកនិស្សិត’’ន្តិអាទិវចនតោ ‘‘សហវិបស្សនកេ មគ្គពោជ្ឈង្គេ’’ឥច្ចេវ វុត្តំ. ទុតិយតតិយានិ ឧត្តានត្ថានេវ ហេដ្ឋា វុត្តនយត្តា.

៤-១០. បឋមគិលានសុត្តាទិវណ្ណនា

១៩៥-២០១. វិសុទ្ធំ អហោសិ វិសភាគធាតុក្ខោភំ វូបសមេន្តំ. តេនាហ – ‘‘បោក្ខរបត្តេ …បេ… វិនិវត្តិត្វា គតោ’’តិ. ឯសេវ នយោ បាឡិតោ អត្ថតោ ច ចតុត្ថេន បញ្ចមឆដ្ឋានំ សមានត្តា. វិសរុក្ខវាតសម្ផស្សេនាតិ វិសរុក្ខសន្និស្សិតវាតសម្ផស្សេន. មន្ទសីតជរោតិ មុទុកោ សីតជរោ. សេសន្តិ វុត្តាវសេសំ. សព្ពត្ថាតិ សត្តមាទីសុ ចតូសុ.

គិលានវគ្គវណ្ណនា និដ្ឋិតា.