៨. ទុតិយឆិគ្គឡយុគសុត្តវណ្ណនា

១១១៨. អធិច្ចុប្បត្តិកន្តិ យទិច្ឆាវសេន ឧប្បជ្ជនកំ. ឆិគ្គឡេនាតិ ឆិគ្គឡបទេសេន. ឆិគ្គឡុបរីតិ ហេដ្ឋិមយុគស្ស ឆិគ្គឡបទេសស្ស ឧបរិ. អារុឡ្ហស្ស ឆិគ្គឡេនាតិ ឧភិន្នម្បិ ឆិទ្ទេន. គីវប្បវេសនំ វិយាតិ ចតុន្នំ យុគានំ ឆិទ្ទបទេសេនេវ ឧបរូបរិ ឋិតានំ ឆិទ្ទន្តរេន កាណកច្ឆបស្ស គីវប្បវេសនំ អធិច្ចតរសម្ភវំ. តតោបិ អធិច្ចតរសម្ភវោ មនុស្សត្តលាភោ, តតោ អធិច្ចតមសម្ភវោ អរិយមគ្គបដិលាភោតិ ទស្សេន្តោ អាហ ‘‘ចតុសច្ចបដិវេធោ អតិវិយ អធិច្ចតរសម្ភវោ’’តិ.

បបាតវគ្គវណ្ណនា និដ្ឋិតា.