១. លោកចិន្តាសុត្តវណ្ណនា

១១១១. លោកចិន្តន្តិ លោកសន្និវេសបដិសំយុត្តវីមំសាវ. ‘‘លោកចិត្ត’’ន្តិបិ បាឋោ, តំតំលោកបរិយាបន្នំ ចិត្តន្តិ អត្ថោ. នាឡិកេរាទយោតិ អាទិ-សទ្ទេន អវុត្តានំ ឱសធិតិណវនប្បតិអាទីនំ សង្គហោ. ឯវរូបន្តិ ឯទិសំ អញ្ញម្បិ តំតំលោកចិត្តំ.

វិគតចិត្តោតិ អត្តត្ថបរត្ថតោ អបគតវិតក្កោ អទ្ទស ឯវំ អធិដ្ឋហិំសូតិ សម្ពន្ធោ. សម្ពរិមាយន្តិ សម្ពរេន អសុរិន្ទេន ឧប្បាទិតំ អសុរមាយំ, យំ ‘‘ឥន្ទជាល’’ន្តិបិ វុច្ចតិ ឥន្ទស្ស មោហនត្ថំ ឧប្បាទិតត្តា. សម្បរិវត្តេត្វាតិ បរិធាវេត្វា. យថា នេតិ នេ អសុរេ យថា សោ បុរិសោ បស្សតិ, ឯវំ អធិដ្ឋហិំសុ. កស្មា បនេតេ ឯវំ អធិដ្ឋហិំសូតិ? តំ បុរិសំ តត្ថ តថានិសិន្នំ ទិស្វា ‘‘អយញ្ច ទេវោ’’តិ អាសង្កន្តា តថា អធិដ្ឋហិត្វា ភិសមុឡាលឆិទ្ទេហិ បវិសិត្វា អត្តនោ អសុរភវនំ គតា. តេនាហ ភគវា – ‘‘ទេវានំយេវ មោហយមានា’’តិ.