៥-១០. អនុសយសុត្តាទិវណ្ណនា

១៧៦-១៨១. ថាមគតដ្ឋេនាតិ សត្តសន្តានេ ថិរភាវូបគមនភាវេន. ថាមគតន្តិ ច អញ្ញេហិ អសាធារណោ កាមរាគាទីនំយេវ អាវេណិកោ សភាវោ ទដ្ឋព្ពោ. កាមរាគោវាតិ កាមរាគោ ឯវ អប្បហីនោ. សោ សតិ បច្ចយលាភេ ឧប្បជ្ជនារហតាយ សន្តានេ អនុសេតីតិ អនុសយោ. សេសេសុបីតិ បដិឃានុសយាទីសុ. ឱរម្ភាគោ វុច្ចតិ កាមធាតុ រូបារូបភាវតោ ហេដ្ឋាភូតត្តា. តត្ថ បវត្តិយា បច្ចយភាវតោ ឱរម្ភាគិយានិ យថា ‘‘បច្ឆិយោ គោទុហកោ’’តិ. សំយោជេន្តីតិ សំយោជនានិ, ហេដ្ឋា វិយ អត្ថោ វត្តព្ពោ. ឧទ្ធម្ភាគោ មហគ្គតភាគោ, តស្ស ហិតានីតិ សព្ពំ ហេដ្ឋា វុត្តនយត្តា ន វុត្តន្តិ អធិប្បាយោ.

អនុសយសុត្តាទិវណ្ណនា និដ្ឋិតា.

ឱឃវគ្គវណ្ណនា និដ្ឋិតា.

មគ្គសំយុត្តវណ្ណនា និដ្ឋិតា.