១១. ឱឃវគ្គោ

១-២. ឱឃសុត្តាទិវណ្ណនា

១៧២-១៧៣. វដ្ដេ ឱហនន្តិ ឱសីទាបេន្តីតិ ឱឃា. រូបារូបភវេតិ រូបភវេ ច អរូបភវេ ច រូបារូបតណ្ហោបនិស្សយា រូបារូបាវចរកម្មនិព្ពត្តា ខន្ធា. យោជនដ្ឋេន យោគោ.

៣-៤. ឧបាទានសុត្តាទិវណ្ណនា

១៧៤-១៧៥. កាមនវសេន ឧបាទិយនតោ កាមុបាទានំ. តេនាហ ‘‘កាមគ្គហណ’’ន្តិ. នាមកាយស្សាតិ វេទនាទីនំ ចតុន្នំ អរូបក្ខន្ធានំ. ឃដនបពន្ធនកិលេសោតិ ហេតុនា ផលស្ស កម្មវដ្ដស្ស វិបាកវដ្ដេន ទុក្ខប្បពន្ធសញ្ញិតស្ស ឃដនស្ស សម្ពជ្ឈនស្ស និព្ពត្តកកិលេសោ. អន្តគ្គាហិកទិដ្ឋិ សស្សតុច្ឆេទគាហោ.

ឧបាទានសុត្តាទិវណ្ណនា និដ្ឋិតា.

៥-១០. អនុសយសុត្តាទិវណ្ណនា

១៧៦-១៨១. ថាមគតដ្ឋេនាតិ សត្តសន្តានេ ថិរភាវូបគមនភាវេន. ថាមគតន្តិ ច អញ្ញេហិ អសាធារណោ កាមរាគាទីនំយេវ អាវេណិកោ សភាវោ ទដ្ឋព្ពោ. កាមរាគោវាតិ កាមរាគោ ឯវ អប្បហីនោ. សោ សតិ បច្ចយលាភេ ឧប្បជ្ជនារហតាយ សន្តានេ អនុសេតីតិ អនុសយោ. សេសេសុបីតិ បដិឃានុសយាទីសុ. ឱរម្ភាគោ វុច្ចតិ កាមធាតុ រូបារូបភាវតោ ហេដ្ឋាភូតត្តា. តត្ថ បវត្តិយា បច្ចយភាវតោ ឱរម្ភាគិយានិ យថា ‘‘បច្ឆិយោ គោទុហកោ’’តិ. សំយោជេន្តីតិ សំយោជនានិ, ហេដ្ឋា វិយ អត្ថោ វត្តព្ពោ. ឧទ្ធម្ភាគោ មហគ្គតភាគោ, តស្ស ហិតានីតិ សព្ពំ ហេដ្ឋា វុត្តនយត្តា ន វុត្តន្តិ អធិប្បាយោ.

អនុសយសុត្តាទិវណ្ណនា និដ្ឋិតា.

ឱឃវគ្គវណ្ណនា និដ្ឋិតា.

មគ្គសំយុត្តវណ្ណនា និដ្ឋិតា.