១០. គិលានទស្សនសុត្តវណ្ណនា

៣៥២. មត្តរាជា នាម ឯកោ ភុម្មទេវោ ភូតាធិបតិ សុរាបោតលរុក្ខនិវាសី. តេន វុត្តំ ‘‘មត្តរាជកាលេ’’តិ. ‘‘ឱសធិតិណវនប្បតីសូ’’តិ វត្វា តេ យថាក្កមំ ទស្សេន្តោ ‘‘ហរីតកា…បេ… រុក្ខេសុ ចា’’តិ អាហ. បត្ថនាវសេន ចិត្តំ ឋបេហិ. សមិជ្ឈិស្សតីតិ យថាធិប្បាយំ សមិជ្ឈិស្សតិ. តេន ហីតិ យស្មា តំ ទេវាបិ អាសន្នមរណំ មញ្ញន្តិ, តស្មា សា វរមេវ ភវិស្សតិ, តំ តុម្ហាកំ ទីឃរត្តំ ហិតាយ សុខាយ ភវិស្សតីតិ អធិប្បាយោ.

គិលានទស្សនសុត្តវណ្ណនា និដ្ឋិតា.

ចិត្តសំយុត្តវណ្ណនា និដ្ឋិតា.