៦. ឃោសិតសុត្តវណ្ណនា

១២៩. រូបា ច មនាបាតិ នីលាទិភេទា រូបធម្មា ច មនសា មនុញ្ញា បិយរូបា សំវិជ្ជន្តិ, ឥទញ្ច សុខវេទនីយស្ស ផស្សស្ស សភាវទស្សនត្ថំ. ឯវំ ‘‘រូបា ច មនាបា ឧបេក្ខាវេទនិយា’’តិ ឯត្ថាបិ យថារហំ វត្តព្ពំ. ចក្ខុវិញ្ញាណ…បេ… ផស្សន្តិ វុត្តំ. ឧបនិស្សយកោដិយា ហិ ចក្ខុវិញ្ញាណសម្បយុត្តផស្សោ សុខវេទនីយោ, ន សហជាតកោដិយា. តេនាហ – ‘‘ឯកំ ផស្សំ បដិច្ច ជវនវសេន សុខវេទនា ឧប្បជ្ជតី’’តិ. សេសបទេសូតិ ‘‘សំវិជ្ជតិ ខោ, គហបតិ, សោតធាតូ’’តិ អាគតេសុ បញ្ចសុ កោដ្ឋាសេសុ.

តេវីសតិ ធាតុយោ កថិតា ឆន្នំ ទ្វារានំ វសេន វិភជ្ជគហណេន. វត្ថុនិស្សិតន្តិ ហទយវត្ថុនិស្សិតំ. បញ្ចទ្វារេ វីសតិ, មនោទ្វារេ តិស្សោ ឯវំ តេវីសតិ.

ឃោសិតសុត្តវណ្ណនា និដ្ឋិតា.